འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་རྔ་བ་ཀིརྟི་དགོན་གྱི་གྲྭ་ཨ་གྲགས་ལགས་ལ་རྒྱ་གཞུང་གིས་གསང་བའི་ཐོག་ནས་ལོ་ངོ་གསུམ་གྱི་བཙོན་འཇུག་ཁྲིམས་ཐག་བཅད་དེ། ད་ལྟ་སི་ཁྲོན་མེ་ཡཱང་བཙོན་ཁང་དུ་བཅུག་ཡོད་པ་ཤེས་རྟོགས་བྱུང་འདུག ཁྲིམས་ར་ཚོགས་སྐབས་ཁོང་གི་ཁྱིམ་མི་ཚོར་བརྡ་ལན་གང་ཡང་བཏང་མེད་སྟབས། ཁོང་ལ་ཁྲིམས་ཁང་གང་ནས་ཁྲིམས་ཐག་བཅད་པ་ཡིན་སོགས་ཤེས་རྟོགས་ཐུབ་ཀྱི་མེད་ཀྱང་། ཁ་སང་ཕྱི་ཚེས་ ༣ ཙམ་ལ་ཁྲིམས་ཐག་བཅད་ཡོད་པའི་ཚོད་དཔག་བྱེད་བཞིན་ཡོད་འདུག
རང་ལོ་ ༢༠ ཙམ་ཡིན་པའི་གྲྭ་ཨ་གྲགས་ལགས་ཀྱིས་འདས་ལོའི་ཕྱི་ཟླ་ ༩ ཚེས་ ༡༠ ཉིན་གྱི་སྔ་དྲོར། རྔ་བ་རྫོང་མཁར་གྱི་ཁྲོམ་གཞུང་དུ་”བོད་ལ་རང་དབང་དགོས། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག་” ཅེས་ཞི་རྒོལ་གོམ་བགྲོད་གནང་ཡོད་པ་དང་། དེ་མ་ཐག་ཉེན་རྟོག་པས་ཁོང་ལ་ཉེས་རྡུང་གཏོང་བཞིན་བཙན་ཁྲིད་བྱས་ཡོད་པ་དང་། ཉེ་འཁོར་གྱི་བོད་མི་མང་པོས་སྐད་འབོད་སྣ་ཚོགས་བྱེད་སྐབས། ཉེན་རྟོག་པས་མི་མང་ལ་གང་བྱུང་གཅར་རྡུང་བཏང་ཡོད་པ་མ་ཟད། ཉེས་བ་གང་ཡང་མེད་པའི་མི་མང་པོ་ཞིག་འཛིན་བཟུང་བྱས་ཡོད་ཀྱང་། ད་ལྟའི་བར་མི་དེ་དག་གི་མིང་དང་ས་གནས་སོགས་ཞིབ་ཕྲའི་གནས་ཚུལ་ཤེས་རྟོགས་མ་ཐུབ་པར་ལྷག་ཡོད་པ་རེད།
