ལྷོ་སུ་ཌན་རྒྱལ་ཁབ་ཀྱི་གྲངས་ཉུང་མི་རིགས་ཕན་ཚུན་བར་གྱི་ནང་འཁྲུག་ཁྲོད་དུ་སྲིད་གཞུང་གི་དྲག་ཆས་དམག་མི་ཚོས་ཉེས་མེད་ཡུལ་མི་དམར་གསོད་དང་བུད་མེད་ལ་བཙན་གཡེམ་བྱས་འདུག
ཁ་སང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་ཛི་ཌི་ (Zeid) ལགས་ཀྱིས་བསྒྲགས་གཏམ་ཞིག་སྤེལ་ཏེ། ཟླ་སྔོན་མའི་ཕྱི་ཚེས་ ༨ ནས་ ༢༥ བར་ལྷོ་སུ་ཌན་རྒྱལ་ཁབ་ཀྱི་དྲག་ཆས་དམག་མི་ཚོས་ཁྱོན་བུད་མེད་ ༢༡༧ ལ་བཙན་གཡེམ་བཏང་ཡོད་པ་མ་ཟད། ཡུལ་མི་ཁག་ཅིག་དམར་གསོད་བྱས་ཡོད་པ་དང་། ཁོ་ཚོ་ཚང་མ་ལྷོ་སུ་ཌན་རྒྱལ་ཁབ་ཀྱི་ནུའར་གྲངས་ཉུང་མི་རིགས་ཀྱི་ཡུལ་མི་ཡིན་པ་དང་། ལྷོ་སུ་ཌན་རྒྱལ་ཁབ་ཀྱི་རྒྱལ་ས་རྗུ་བྷ་ (Juba) ནང་འབྱུང་བཞིན་པའི་ནང་འཁྲུག་ཧ་ཅང་ཛ་དྲག་ཆགས་ཡོད་པ་དང་། ཉེས་མེད་ཡུལ་མི་དམར་གསོད་དང་བུད་མེད་ལ་བཙན་གཡེམ་བྱས་པའི་གནད་དོན་དེ་ལྷོ་སུ་ཌན་རྒྱལ་ཁབ་གཅིག་པུ་མ་ཡིན་པར། ཤར་ཨ་ཧྥི་རེ་ཁ་ (East African) རྒྱལ་ནང་དུའང་འབྱུང་མུས་ཡིན་སྐོར་བརྗོད་འདུག
འབྲེལ་ཡོད་ཡུལ་མི་ཁག་ཅིག་གིས་ཨེ་ཕེ་གསར་ཁང་ལ་གནས་ཚུལ་བརྗོད་པའི་ནང་། སྲིད་གཞུང་གི་དམག་མི་ཚོས་རྒྱལ་ས་རྗུ་བྷ་ནང་ཡོད་པའི་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལས་ཁུངས་ཀྱི་ཕྱི་ལོགས་སུ་གཉེན་སྒྲིག་བྱས་ཡོད་མེད་ཀྱི་བུད་མེད་མང་པོར་བཙན་གཡེམ་བྱས་པ་དང་། ཁོ་ཚོ་ཚང་མ་ཟིང་འཁྲུག་ཁྲོད་ནས་སྐྱབས་བཅོལ་དུ་ཡོང་བའི་ནུའར་གྲངས་ཉུང་མི་རིགས་ཀྱི་ཡུལ་མི་ཤ་སྟག་ཡིན་སྐོར་བརྗོད་འདུག
ལྷོ་སུ་ཌན་རྒྱལ་ཁབ་ནང་འབྱུང་བཞིན་པའི་ཟིང་འཁྲུག་དེ་ནི་རྒྱལ་ཁབ་དེའི་ནུའར་ (Nuer) གྲངས་ཉུང་མི་རིགས་དང་ཌེན་ཀ་ (Dinka) གྲངས་ཉུང་མི་རིགས་གཉིས་ཀྱི་ཤོག་ཁག་ཕན་ཚུན་བར་བྱུང་བ་ཞིག་ཡིན་པ་དང་། ཟིང་འཁྲུག་དེ་ཕྱི་ལོ་ ༢༠༡༣ ཟླ་ ༡༢ ནས་བཟུང་བྱུང་ཡོད་པ་དང་། ད་ལྟའི་ཆར་ཟིང་འཁྲུག་གི་གནས་སྟངས་ཛ་དྲགས་ཆགས་ཡོད་འདུག
གསར་འགོད་པ། པདྨ་རྒྱལ།
