འདི་ལོའི་དཀར་མཛེས་རྫོང་ཁོངས་ཀྱི་རི་བསང་དུས་སྟོན་ཆེན་མོར་རྒྱ་གཞུང་གིས་བཀག་འགོག་བྱེད་བཞིན་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ལོ་ལྟར་བོད་ཟླ་དྲུག་པའི་ཚེས་ ༦ ཉིན་དཀར་མཛེས་རྫོང་ཁོངས་སུ་ཡོད་པའི་ཏྲེ་ཧོར་བཀྲ་ཤིས་དར་རྒྱས་དགོན་གྱི་དབུས་ས་གནས་སེར་སྐྱ་མི་མང་འཕོན་ཆེན་འདུ་འཛོམས་ཀྱིས། ཨ་མྱེ་རྡོ་འབུལ་ཞེས་པའི་གཞིས་བདག་ཆེན་མོ་མཆོད་པ་དང་བསྟུན་གླུ་ལེན་གར་རྩེད་དང་རྟ་རྒྱུག་འགྲན་སྡུར་སོགས་ཀྱི་དགའ་སྟོན་ལ་རོལ་བའི་ལུགས་སྲོལ་ཡོད་སྟབས། ཉེ་སྔོན་ནས་བཟུང་ས་གནས་སེར་སྐྱ་མི་མང་གིས་འདི་ལོའི་རི་བསང་དུས་སྟོན་ཆེན་མོར་གྲ་སྒྲིག་བྱེད་བཞིན་ཡོད་ཀྱང་། རྒྱ་གཞུང་གིས་རི་བསང་དུས་སྟོན་ཆེན་མོའི་ཐོག་སྐར་ལྔའི་དར་དམར་སྒྲེང་འཛུགས་དགོས་པའི་བཙན་བཀའ་བཏང་ཡོད་པ་དང་། ས་གནས་སེར་སྐྱ་མི་མང་གིས་རི་བསང་དུས་སྟོན་ཆེན་མོ་ནི་བོད་ཀྱི་ཐུན་མོང་མ་ཡིན་པའི་ཆོས་ཕྱོགས་ཀྱི་ཆོ་ག་ཅིག་དང་། བོད་མི་རིགས་ཀྱི་རིག་གནས་སྒྱུ་རྩལ་རྒྱུན་འཛིན་དར་སྤེལ་གཏོང་བའི་དུས་སྟོན་ཆེ་ཤོས་ཤིག་ཡིན་ལ། ད་ལྟའི་བར་རི་བསང་དུས་སྟོན་ཆེན་མོའི་ཐོག་རྒྱལ་དར་སྒྲེང་འཛུགས་བྱས་མྱོང་མེད་སྐོར་བརྗོད་དེ་དང་ལེན་མ་བྱས་པར་བརྟེན། རྒྱ་གཞུང་གིས་རྒྱལ་དར་སྒྲེང་འཛུགས་མ་བྱས་ན་རི་བསང་དུས་སྟོན་ཆེན་མོ་གཏོང་མི་ཆོག་སྐོར་བརྗོད་དེ་བཀག་འགོག་བྱེད་བཞིན་ཡོད་འདུག
གནས་ཚུལ་ཐོན་རིམ་གཉིས་པ། རྒྱ་གཞུང་གིས་རྒྱལ་དར་སྒྲེང་འཛུགས་མ་བྱས་ན་དཀར་མཛེས་རྫོང་ཁོངས་ཀྱི་འདི་ལོའི་རི་བསང་དུས་སྟོན་ཆེན་མོ་གཏོང་མི་ཆོག་པའི་བཀའ་རྒྱ་བཏང་བར་བརྟེན། ས་གནས་སེར་སྐྱ་མི་མང་འཕོན་ཆེན་འདུ་འཛོམས་ཀྱིས་རི་བསང་དུས་སྟོན་ཆེན་མོ་གཏོང་ཐུབ་མེད་ཀྱང་། བཀྲ་ཤིས་དར་རྒྱས་དགོན་དུ་ས་གནས་སེར་སྐྱ་མང་པོ་འདུ་འཛོམས་ཀྱིས་ཆོས་ཞུ་མཆོད་འབུལ་སོགས་བྱས་ཡོད་འདུག
གསར་འགོད་པ། པདྨ་མཚོ།
