རྒྱ་གཞུང་གིས་བཀོད་ཁྱབ་འོག་གསེར་རྟ་བླ་རུང་ཆོས་སྒར་གྱི་གྲྭ་བཙུན་སློབ་གཉེར་བ་ཚོའི་སྡོད་ཤག་བཙན་གཏོར་བྱེད་བཞིན་ཡོད་པའི་སུན་གཙེར་ལ་མ་བཟོད་པར་སྡེ་དགེ་ནས་ཡིན་པའི་བཙུན་མ་རིག་འཛིན་སྒྲོལ་མ་ཞུ་བ་ཞིག་གིས་རང་སྲོག་བཅད་ཡོད་འདུག
ཕྱི་ཟླ་ ༧ ཚེས་ ༢༠ ནས་བཟུང་གསེར་རྟ་བླ་རུང་ཆོས་སྒར་གྱི་གྲྭ་ཤག་མང་པོ་བཙན་གྱིས་གཏོར་ཏེ་ད་ལྟའི་བར་གྲྭ་བཙུན་གྱི་ཤག་ ༦༠༠ ལྷག་གཏོར་ཡོད་སྟབས། ཆོས་སྒར་དུ་སློབ་གཉེར་གནང་བཞིན་ཡོད་པའི་བཙུན་མ་རིག་འཛིན་སྒྲོལ་མ་ཞུ་བ་ཞིག་གིས་རྒྱ་གཞུང་གི་སུན་གཙེར་ལ་མ་བཟོད་པར་སྐེ་ལ་ཐག་པ་བརྒྱབ་ནས་རང་སྲོག་བཅད་ཡོད་པ་དང་། བཙུན་མ་རིག་འཛིན་སྒྲོལ་མས་ཁ་ཆེམས་ཡི་གེ་ཞིག་བཞག་ཡོད་པའི་ནང་དུ། བླ་རུང་སྒར་དུ་སློབ་གཉེར་བྱས་པའི་རིང་རྒྱ་གཞུང་གིས་སུན་གཙེར་སྣ་ཚོགས་བཟོས་ཏེ་སྡུག་བསྔལ་བཟོད་ཐབས་མེད་སྐོར་བརྗོད་ཡོད་པ་མ་ཟད། ཤུལ་དུ་སྒོར་མོ་འགའ་བཞག་ཡོད་པ་དེ་དགོན་པར་འབུལ་དགོས་པའི་ཁ་ཆེམས་བཞག་ཡོད་འདུག
ཁ་སང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་ཊ་རུ་ཌུ་ (Trudeau) ལགས་ཀྱིས་གསར་འགོད་ལྷན་ཚོགས་ཤིག་ཐོག་གསར་འགོད་པར། རྒྱ་ནག་གི་དབང་འཛིན་དཔོན་རིགས་ཚོས་བཙན་དབང་གིས་བླ་རུང་ཆོས་སྒར་གྱི་གྲྭ་བཙུན་ཚོའི་སྡོད་ཤག་གཏོར་བཞིན་པར་བློ་འཚབ་ཆེན་པོ་ཡོད་སྐོར་དང་། རྒྱ་ནག་གི་དབང་འཛིན་དཔོན་རིགས་ཚོས་གྲྭ་ཤག་བཙན་གཏོར་བྱེད་བཞིན་པ་དེས་མི་མང་ལ་དོ་ཕོག་བཟོ་སྲིད་པས། གྲྭ་བཙུན་ཚོའི་སྡོད་ཤག་བཙན་གྱིས་གཏོར་བཞིན་པ་མྱུར་དུ་མཚམས་འཇོག་དགོས་པ་དང་། རྒྱ་ནག་གཞུང་གིས་བོད་མིའི་ཆོས་དད་རང་དབང་ལ་རྡོག་རོལ་མི་གཏོང་བར་བླ་རུང་ཆོས་སྒར་གྱི་གནད་ཡོད་མི་སྣ་དང་ལྷན་དུ་གྲོས་མོལ་བརྒྱུད་དཀའ་རྙོག་སེལ་ཐབས་དགོས་སྐོར་བརྗོད་འདུག
གསར་འགོད་པ། པདྨ་རྒྱལ།
༅༅། གཏོར་དང་མ་གཏོར་གཏོར་སོང། བཙན་གནོན་ཆེན་པོས་གཏོར་སོང།།
ཆོས་བྱེད་བཞུགས་གནས་གཏོར་སོང།། རང་འདོད་བཞིན་དུ་གཏོར་སོང།།
མི་དགའ་སྙིང་ནས་མི་དགའ། རྒྱ་ནག་གཞུང་ལ་མི་དགའ།
མི་དགའ་སྙིང་ནས་མི་དགའ། སྐྱག་རྫུན་སྲིད་བྱུས་མི་དགའ།
དུས་གསུམ་འགྲོ་དོན་མཛད་མཁས་བླ་མ་མཁྱེན།
བདག་འཛིན་དབེན་པའི་གཞན་ཕན་གཅིག་འཛིན་པ།།
ཁྱེད་ཀྱི་ལྷོད་མེད་ཐུགས་རྗེའི་གཟི་བྱིན་གྱིས།།
འཇིག་རྟེན་སྐྱེ་འགྲོའི་སྡུག་བསྔལ་མ་ལུས་འཇོམས།།