བོད་ཀྱི་སྐད་ཡིག་དེ་རྒྱུན་གནས་ཡོང་བར་བརྩོན་མཁན་ཞིག་ལ་མཚོན་ན། རང་རིགས་བྱིས་པ་ཚོར་རང་གི་སྐད་ཡིག་ཤེས་སུ་འཇུག་རྒྱུ་དེ་རེད། བྱིས་པ་ཚོས་རང་གི་སྐད་ཡིག་ཤེས་པ་ལ་བྱིས་པ་དང་མཐུན་པའི་བྱིས་སྒྲུང་ནི་མེད་ཐབས་མེད་པ་ཞིག་རེད། དེར་བརྟེན་བྱིས་སྒྲུང་གསར་བ་༼ ནེ་ཙོ་དང་གྲྭ་བ་ཆུང་ཆུང་། ༽ཟེར་བ་ཞིག་སྐུ་བལྟམས་འདུག
ཨ་རིར་ང་དང་ས་གནས་གཅིག་པར་གནས་སྡོད་བྱེད་མཁན་དོན་གྲུབ་ལགས་ནས་བྱིས་སྒྲུང་གསར་བ་༼ ནེ་ཙོ་དང་གྲྭ་བ་ཆུང་ཆུང ༽ ཟེར་བ་ཞིག་བརྩམས་ཡོད་པ་དྲ་ལམ་ཁག་ནས་མཐོང་བས། དོན་གྲུབ་ལགས་ལ་དེའི་ཐད་ནས་ཁ་བརྡ་བྱས་པ་ཡིན། དོན་གྲུབ་ཀྱིས་བཤད་ན། ད་ཐེངས་པར་དུ་བསྐྲུན་པའི་བྱིས་སྒྲུང་༼ ནེ་ཙོ་དང་གྲྭ་བ་ཆུང་ཆུང ༽ ཞེས་པ་འདི། གོང་ས་མཆོག་གིས་ཕྱི་མི་དག་ལ་ཐེངས་མང་གསུང་མྱོང་བའི་སྒྲུང་ཞིག་རེད། གོང་ས་མཆོག་དེ་སྔོན་བོད་དུ་ནོར་གླིང་ཕོ་བྲང་དུ་བཞུགས་སྐབས་དངོས་སུ་བྱུང་གི་སྒྲུང་ཞིག་སྟེ། གོང་ས་མཆོག་དང་ཁོང་གི་ཞབས་ཞུ་བ། ནེ་ཙོ་བཅས་ཀྱི་བར་གྱི་སྒྲུང་རེད། སྒྲུང་དེས་བསྟན་དོན་ནི་བཙན་པོ་དབང་ཡོད་ལས་བྱམས་སྐྱོང་བྱས་ན། ཕན་ཚུན་གྲོགས་པོ་དང་འཆམ་པོ་ཆགས་ཀྱི་ཡོད་པ་དེ་བསྟན་ཡོད། འོན་ཏེ་སྒྲུང་རང་ལ་མཚོན་ན་མཇུག་ཏུ་འཆམ་པོ་ཆགས་པའི་རྣམ་པ་མེད་ཀྱང་། ངས་སྒྲུང་དེའི་མཇུག་ལ་འགྱུར་བ་ཕྲན་བུ་བཏང་སྟེ། བྱིས་པའི་སེམས་ཁམས་དང་མཐུན་པའི་ནེ་ཙོ་དང་གྲྭ་ཆུང་གྲོགས་པོ་གྱུར་བར་བཟོས་ཡོད། ཅེས་བྱིས་སྒྲུང་དེའི་ཡོང་ཁོངས་དང་བརྒྱུད་རིམ་ཞིག་ཁ་བརྡ་བྱས་སོང་།
རེད་རེད། བྱིས་སྒྲུང་དེའི་ཡོང་ཁོངས་དང་བསྟན་དོན་གསལ་བོ་ཆགས་སོང་། རེད་དེ་བྱིས་སྒྲུང་དེའི་རི་མོ་དང་ཚིག་བེད་སྤྱོད་གཏོང་སྟངས་སོགས་ཧ་ཅང་གལ་ཆེན་ཞིག་ཡིན་རྒྱུ་རེད། དེའི་ཐད་ནས་ག་འདྲ་ཡིན་མིན་ཁ་བརྡ་ཞིག་བྱས་ན། ཨོ་ཡིན་ད་ཡིན། དོན་གྲུབ་ཀྱིས་རི་མོ་དང་ཚིག་ག་འདྲ་བེད་སྤྱོད་བྱེད་མིན་གལ་ཆེན་དོན་ཆེན་རེད། བྱིས་སྒྲུང་འདི་བྱིས་པ་ལོ་གསུམ་བཞི་ལོན་པ་དེའི་རིགས་ལ་དམིགས་ཡོད། ཁོང་ཚོའི་སེམས་ཁམས་དང་དགའ་ཕྱོགས། འཚར་ལོང་བཅས་ལ་འབྲེལ་བ་ཡོད་པ་རེད། ངའི་བྱིས་སྒྲུང་འདིའི་རི་མོ་དང་མིང་ཚིག་དག་ལ་དོ་ནན་གྱིས་ཁོང་ཚོ་དང་འཚམས་པ་ཞིག་ཡོང་ཐབས་ལ་འབད་ཡོད། གཙོ་བོ་ནི་བྱིས་པ་ཚོས་བོད་ཀྱི་སྐད་ཡིག་ལ་ལོ་ཚོད་ལ་དཔག་པའི་གང་འཚམས་ཤེས་སུ་འཇུག་རྒྱུ་དེ་རེད། དེ་ཤེས་པའི་ཐབས་ལ་བྱིས་པ་ཚོར་སྒྲུང་བཤད་ཀློག་བྱ་རྒྱུ་དེ་མེད་དུ་མི་རུང་བ་ཞིག་རེད་ལ། ཐེངས་འདིའི་ངའི་བྱིས་སྒྲུང་དེ་ཡང་དེའི་ཆེད་དུ་རེད། ངས་བྱིས་པ་ལོ་ལྔ་མན་ཆད་ལ་བོད་ཡིག་བསླབ་དེབ་བརྩམས་པ་འདི་ཐེངས་གསུམ་པ་དེ་ཡིན་ཞིང་། བྱིས་སྒྲུང་གི་དེབ་དང་པོ་དེ་ཡིན་ལ་མུ་མཐུད་དུ་དེའི་ཐད་ནས་ལས་འཆར་འགའ་བསྒྲིགས་ནས་ཡོད། ཅེས་བྱིས་པའི་སྒྲུང་དེབ་དེའི་ཁྱད་ཆོས་ཐད་ནས་ག་འདྲ་ཡིན་མིན་བཤད་སོང་།
ཁྱོད་ཀྱི་ཁ་བརྡ་ལ་ཉན་གྱིན་ཉན་གྱིན་ང་ལ་འདྲི་བ་ཞིག་རང་བཞིན་གྱིས་བསླེབས་སོང་། འདྲི་བ་ནི་བྱིས་པ་ཚོ་གཉིད་ཉར་ཁར་བོད་ཀྱི་ཕ་མ་ཚོར་བྱིས་སྒྲུང་བཀླགས་ཏེ་གཉིད་ཉར་བའི་གོམས་གཤིས་ཡོད་མེད་དང་དེའི་གནས་སྟངས་ག་འདྲ་ཞིག་རེད། དེའི་ཐད་ནས་ཁ་བརྡ་ཞིག་བྱེད་རོགས། ཨོ་དེའི་ཐད་ང་ལ་བསམ་ཚུལ་ཡོད། དོན་གྲུབ་ཀྱིས་བོད་ཀྱི་ཕ་མ་ཚོས་བྱིས་པར་སྒྲུང་ཀློག་བཞིན་གཉིད་ཉར་བའི་གོམས་གཤིས་དེ་སྐྱོ་བོ་རེད་བསམ། སྤྱིར་བོད་ཡུལ་དུ་བྱིས་པ་ཚོར་གནའ་གཏམ་བཤད་པའི་སྲོལ་སྔོན་མ་ནས་ཡོད་ལ། བྱིས་པ་གཉིད་ཁུག་པའི་གླུ་ཟེར་བ་སོགས་ཡོད་ཀྱང་། དེ་དག་དེང་སང་གི་བྱིས་པར་སློབ་གསོ་སྤྲོད་པའི་མཐུན་རྐྱེན་དུ་འཁྱེར་མ་ཐུབ་པའམ། དེ་དག་ཉམས་མུས་སུ་འགྲོ་བཞིན་པའི་རྣམ་པ་ཞིག་མཐོང་གིན་འདུག ནུབ་ཕྱོགས་ཀྱི་མི་མང་ལ་མཚོན་ན་དེ་དག་གལ་ཆེན་དུ་བརྩིས་ཏེ་ལོ་མང་པོ་འགྲོ་ཚར་བ་རེད་ལ། དེའི་ཐད་ནས་བྱིས་པའི་ལོ་ཚོད་འདྲ་མིན་དང་མཐུན་པའི་སྒྲུང་སོགས་མཐུན་རྐྱེན་འཛོམས་པོ་རེད། བོད་པ་ཚོས་ཀྱང་ངེས་པར་དུ་དེ་དག་ལ་མིག་དཔེ་བལྟས་ཏེ་ལེགས་ཆ་ལེན་པ་དང་བོད་པ་རང་གི་སྲོལ་རྒྱུན་ན་ཡོད་པའི་བྱིས་པ་ཚོར་གནའ་གཏམ་བཤད་སྲོལ་དག་རྒྱུན་འཛིན་བྱས་ཏེ། བོད་ཕྲུག་ཚོས་རང་གི་སྐད་ཡིག་ཤེས་པ་དང་། བོད་པའི་གཤིས་ཀ་ཡོད་པ་ཞིག་གསོ་སྐྱོང་བྱེད་དགོས་པ་ནི་ད་ལྟའི་དུས་འདིར་གནད་འགག་ཆེན་པོ་ཆགས་འདུག ཅེས་འགན་ཡོད་པ་དང་བསམ་བློ་བཏང་བའི་སྐད་ཆ་ལྗིད་པོ་ཞིག་བཤད་སོང་།
མི་སྒེར་དང་ཚོགས་སྡེ། སློབ་གྲྭ་གང་ལ་དགོས་མཁོ་ཡོད་ན་དྲ་ལམ་འདི་ནས་tibetanbabybooks.com འབྲེལ་བ་བྱེད་ཆོག་ལ། ཉོ་མཁན་ལ་སྡེབ་ཚོང་དང་སིལ་ཚོང་གཉིས་ཀ་བྱེད་བཞིན་ཡོད་འདུག
བཅར་འདྲི་བ་བློ་བརྟན་གྱིས།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
རྩོམ་ཡིག་གི་ཚུལ་དུ་བྲིས་པའི་གླ་མེད་གསལ་བསྒྲགས་ཤིག་ཡིན་པ་བརྗོད་དུམ་མཐའ་མ་དེས་གསལ་པོར་བསྟན་འདུག སྤྱང་པོ་རེད། གཅིག་གིས་བྲིས། གཅིག་གིས་རྩོམ་ཡིག་གི་ཚུལ་དུ་སྤེལ། དོན་དངོས་བོད་ཀྱི་དུས་བབ་དང་། ཁ་བརྡ་གཉིས་ལ་སྟ་རེ་ཞུས་འདུག ཧ་ཧ་་་ སྐུ་རེ་ཡིན།
རྩོམ་པ་པོའི་ཀུན་སློང་དང་འབད་བརྩོན་ལ་བསྔགས་བརྗོད་ཡོད། འོན་ཀྱང་ཁྱེད་ཀྱིས་དམིགས་ཚད་བཟུང་ཡུལ་ནི་ལོ་ན་ལྔ་མན་ཆད་ཀྱི་བྱིས་པ་ཚོ་རེད་འདུག དེ་ནི་སྔོན་འགྲོའི་འཛིན་གྲྭ་གཉིས་པ་མན་ཆད་ལ་གོ ཟུར་བལྟས་ཀྱིས་ཚོད་དུ་དཔགས་པ་ན་བྱིས་སྒྲུང་དེ་འཛིན་རིམ་གཉིས་པ་དང་གསུམ་པ་འགྲིམ་བཞིན་པའི་བྱིས་པ་ཚོས་ཀྱང་རང་འགུལ་གྱིས་རྟོགས་དཀའ་པོ་ཞིག་རེད་སྙམ། ཞིབ་ཕྲ་དེབ་དེ་ལག་ཏུ་སོན་ན་ཤེས་ངེས།
ལར་ནས་གྲྭ་བ་(གྲྭ་པ་)ཆུང་ཆུང་ཟེར་བ་དོན་ལ་སྦྱར་ན་གྲྭ་པ་ལོ་ཆུང་ཆུང་ཞིག་ལ་གོ་དགོས་པ་རེད་དམ་ཡང་ན་གཟུགས་པོ་ཆུང་ཆུང་ཞིག་ལ་གོ་དགོས་རེད། དེ་ལ་ཐ་སྙད་ཅིག་ཡོད་ངེས་པས་ཚོལ་ཅིག་གུ ། །།