རྒྱལ་སྤྱིའི་ཨོ་རྩེད་འགྲན་ཚོགས་ཀྱི་ཉིན་བཅུ་གསུམ་པ།

རེའོ་ཨོ་རྩེད་འགྲན་ཚོགས་ཀྱི་རེའུ་མིག་ལྟར་ན། དེ་རིང་རྒྱལ་སྤྱིའི་ཨོ་རྩེད་འགྲན་ཚོགས་སྐབས་ ༣༡ པའི་སྟེང་ཨ་རི་ཨང་པོ་དང་དབྱིན་ཇི་ཨང་གཉིས་པ། རྒྱ་ནག་ཨང་གསུམ་པ་ཆགས་འདུག

རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་དྲོར་རྒྱ་གར་གྱི་གྱད་འགྲན་བུ་མོ་སག་ཤཱ་མ་ལེག་ (Sakshi Malik) ལ་བུད་མེད་ཀྱི་གྱད་འགྲན་ཁྲོད་ཟངས་ཀྱི་རྟགས་མ་ཐོབ་སྟེ། ད་ལོའི་རྒྱལ་སྤྱིའི་ཨ་རྩེད་འགྲན་ཚོགས་སྟེང་རྒྱ་གར་རྒྱལ་ཡོངས་ཀྱི་རྩེད་འགྲན་པའི་གྲས་ནས་རྟགས་མ་ཐོབ་མཁན་ཐོག་མ་ཆགས་ཡོད་པ་མ་ཟད། ཕྱི་ལོ་ ༡༩༤༧ ལོར་རྒྱ་གར་ལ་རང་བཙན་ཐོབ་པའི་རྗེས་ཀྱི་རྒྱལ་སྤྱིའི་ཨོ་རྩེད་འགན་ཚོགས་སྟེང་གསེར་དངུལ་ཟངས་གསུམ་གྱི་རྟགས་མ་ཐོབ་མཁན་ཨང་ ༢༥ བ་དེའང་ཆགས་ཡོད་འདུག

གསར་འགོད་པའི་བཅར་འདྲིའི་སྐབས་སུ། བུ་མོ་སག་ཤཱ་མ་ལེག་གྱིས་ངའི་གྲོགས་མོ་མང་ཆེ་བ་ལོ་ན་ཆུང་དུས་སློབ་སྦྱོང་ཕྲན་བུ་བྱས་རྗེས། ཁྱིམ་ལས་ལ་གཞོལ་དགོས་པ་དང་། དེ་ནས་གཉེན་སྒྲིག་རྗེས་སོ་སོའི་ཕྲུ་གུར་བདག་སྐྱོང་བྱེད་དགོས་སྟབས། ངའི་གྲོགས་མོ་ཚོ་དང་བསྡུར་ན། ངའི་མི་ཚེ་འདི་ཧ་ཅང་བསོད་ནམས་ཆེན་པོ་ཡིན་པ་དང་། ད་རེབ་ཀྱི་རྒྱལ་ཁ་འདི་ནི་ཕ་མའི་རྒྱབ་སྐྱོར་འོག་ང་རང་ལོ་ ༡༢ སྟེང་ནས་ད་ལྟའི་བར་དཀའ་སྤྱད་སྡུག་རུས་བྱས་པའི་འབྲས་བུ་ཡིན། ཞེས་སོགས་བརྗོད་འདུག

རང་ལོ་ ༢༣ ཡིན་པའི་བུ་མོ་སག་ཤཱ་མ་ལེག་ལགས་ནི་རྒྱ་གར་བྱང་རྒྱུད་ཧར་ཡ་ན་ (Haryana) མངའ་སྡེ་ནས་ཡིན་ཞིང་། ས་ཁུལ་དེར་གདོད་མའི་སྤྱི་ཚོགས་ནས་བརྒྱུད་ཡོང་བའི་ཕོ་མཆོག་མོ་དམན་གྱི་ལྟ་བ་ཤུགས་ཆེན་པོ་ཡོད་པ་དང་། བུ་མོ་ཚོ་ལོ་ན་ཆུང་དུས་ནས་ཕ་མའི་བཙན་དབང་འོག་གཉེན་སྒྲིག་དང་ཁྱིམ་འཛིན་གྱི་ལས་སུ་ཞུགས་དགོས་ཤིང་། གལ་ཏེ་བུ་མོ་སུ་ཞིག་ཆོས་ལུགས་རིགས་རུས་མི་གཅིག་པའི་ཕྱི་མི་ཞིག་ལ་གཉེན་སྒྲིག་པའམ་མཛའ་འབྲེལ་བྱུང་བ་ཡིན་ན། མོ་བུ་དེ་དམར་གསོད་དང་ལྐོག་གསོད། ཡང་ན་ཁྱིམ་ཚང་དེའི་ནང་མཐོང་ཆུང་བརྙས་བཅོས་བྱེད་པ་དང་། ཕྱི་ལོ་ ༢༠༡༡ ལོའི་མི་འབོར་གྲངས་བཤེར་ལྟར་ན། ས་ཁུལ་དེའི་སྐྱེས་པ་ ༡༠༠༠ ཁྲོད་སྐྱེད་མ་ ༨༧༧ ལས་མེད་ཅིང་། སྐྱེས་པ་ཆིག་སྟོང་གི་ཁྲོད་དུ་ཕོ་མཆོག་མོ་དམན་གྱི་འདུ་ཤེས་འཛིན་མཁན་མི་ ༩༤༠ ཟིན་གྱི་ཡོད་འདུག

རེའོ་ཨོ་རྩེད་འགྲན་ཚོགས་ཀྱི་རེའུ་མིག་ལྟར་ན། ལྷོ་ཨ་རིའི་རྒྱལ་ཁབ་བྷི་ར་རྫིལ་གྱི་གྲོང་ཁྱེར་རེའོ་ནང་འཚོགས་བཞིན་པའི་རེའོ་ཨོ་རྩེད་འགྲན་ཚོགས་སྐབས་ ༣༡ པའི་སྟེང་། ཟླ་འདིའི་ཚེས་ ༥ ནས་དེ་རིང་བར་ཨ་རིའི་རྩེད་འགྲན་རུ་ཁག་ལ་གསེར་གྱི་རྟགས་མ་ ༣༠ དང་དངུལ་གྱི་རྟགས་མ་ ༣༢ ། ཟངས་ཀྱི་རྟགས་མ་ ༣༡ བཅས་ཁྱོན་བསྡོམས་རྟགས་མ་ ༩༣ ཐོབ་སྟེ་ཨང་དང་པོ་དང་། དབྱིན་ཇིའི་རྩེད་འགྲན་རུ་ཁག་ལ་གསེར་གྱི་རྟགས་མ་ ༡༩ དང་། དངུལ་གྱི་རྟགས་མ་ ༡༩ ། ཟངས་ཀྱི་རྟགས་མ་ ༡༢ བཅས་ཁྱོན་རྟགས་མ་ ༥༠ ཐོབ་སྟེ་ཨང་གཉིས་པ། རྒྱ་ནག་གི་རྩེད་འགྲན་རུ་ཁག་ལ་གསེར་གྱི་རྟགས་མ་ ༡༩ དང་དངུལ་གྱི་རྟགས་མ་ ༡༥ ཟངས་ཀྱི་རྟགས་མ་ ༢༠ བཅས་ཁྱོན་རྟགས་མ་ ༥༤ ཐོབ་སྟེ་ཨང་གསུམ་པ་བཅས་ཆགས་ཡོད་འདུག

གཞན། ཨུ་རུ་སུའི་རྩེད་འགྲན་རུ་ཁག་ལ་ཁྱོན་རྟགས་མ་ ༤༡ དང་། ཉི་ཧོང་གི་རྩེད་འགྲན་རུ་ཁག་ལ་རྟགས་མ་ ༣༣། ཧྥ་རན་སིའི་རྩེད་འགྲན་རུ་ཁག་ལ་རྟགས་མ་ ༣༡། འཇར་མན་གྱི་རྩེད་འགྲན་རུ་ཁག་ལ་རྟགས་མ་ ༢༩། ཨོ་སི་ཊིར་ལེ་ཡའི་རྩེད་འགྲན་རུ་ཁག་ལ་རྟགས་མ་ ༢༤། ཨེ་ཊ་ལེའི་རྩེད་འགྲན་རུ་ཁག་ལ་རྟགས་མ་ ༢༣། ཧོ་ལན་ཊིའི་རྩེད་འགྲན་རུ་ཁག་ལ་རྟགས་མ་ ༡༥ བཅས་ཐོབ་ཡོད་པ་དང་། རྒྱ་གར་ལ་དེ་རིང་ཟངས་ཀྱི་རྟགས་མ་ ༡ ཐོབ་སྟེ་ཨང་ ༧༠ པ་དེ་ཆགས་ཡོད་པ་རེད།

རེའོ་གྲོང་ཁྱེར་དུ་འཚོགས་བཞིན་པའི་རྒྱལ་སྤྱིའི་ཨོ་རྩེད་འགྲན་ཚོགས་སྐབས་ ༣༡ དེ་ཟླ་འདིའི་ཚེས་ ༥ ནས་ ༢༡ བར་ཚོགས་འཆར་ཡོད་པ་དང་། རེའི་གྲོང་ཁྱེར་གྱི་ས་གནས་ཁག་ ༣༣ ནང་འཚོགས་བཞིན་ཡོད་འདུག ཐེངས་འདིའི་འགྲན་ཚོགས་སྟེང་འཛམ་གླིང་རྒྱལ་ཁབ་ ༢༠༥ ཡི་རྩེད་འགྲན་པ་ ༡༡༡ ༧༨ མཉམ་ཞུགས་བྱས་ཡོད་པ་དང་། རྩེད་མོའི་རྣམ་གྲངས་ཆེ་གྲས་ ༢༨ དང་ཆུང་གྲས་ ༣༠༦ བཅས་ཁྱོན་བསྡོམས་རྩེད་མོའི་རྣམ་གྲངས་ ༣༣༤ ཙམ་ཡོད་འདུག

རྒྱལ་སྤྱིའི་ཨོ་རྩེད་འགྲན་ཚོགས་ཐེངས་དང་པོ་དེ་ཕྱི་ལོ་ ༡༨༩༦ ལོར་དེང་གི་ཨི་ཊ་ལིའི་རྒྱལ་ས་རོམ་ནས་ཚོགས་མགོ་བཙུགས་ཡོད་པ་དང་། སྐབས་དེ་ནས་ད་ལྟའི་བར་འཛམ་གླིང་རྒྱལ་ཁབ་ ༡༤༢ ནང་ལ་དབྱར་དུས་ཀྱི་ཨོ་རྩེད་འགྲན་ཚོགས་ཐེངས་ ༢༩ དང་དགུན་དུས་ཀྱི་ཨོ་རྩེད་འགྲན་ཚོགས་ཐེངས་ ༢༢ བཅས་ཚོགས་ཡོད་འདུག

གསར་འགོད་པ། པདྨ་རྒྱལ།