སང་ཉིན་སྟོབས་རྒྱལ་ལགས་རྒྱང་རྒྱུག་གནང་རྒྱུ་རེད།

སང་ཉིན་ཕྱི་དྲོར་ལྷོ་ཨ་མི་རི་ཁའི་བྷར་རྫིལ་(Brazil)རྒྱལ་ཁབ་ཏུ་འཚོགས་བཞིན་པའི་རྒྱལ་སྤྱིའི་ཨོ་རྩེད་འགྲན་ཚོགས་སྟེང་། རྨིད་ ༥༠༠༠ ཅན་གྱི་སྐྱེས་པའི་རྒྱང་རྒྱུག་འགྲན་བསྡུར་སྟེང་། བོད་པའི་ཕོ་གསར་སྟོབས་རྒྱལ་ལགས་ཞུགས་རྒྱུ་རེད།

ཆུ་ཚོད། རྒྱ་གར་གྱི་ཚེས་ ༢༡ ཉིན་གྱི་ཕྱི་དྲོའི་ཆུ་ཚོད་ ༦།༠༠ །

བོད་ནང་གི་ཕྱི་ཚེས་ ༢༡ ཉིན་གྱི་དགོང་མོའི་ཆུ་ཚོད་ ༨།༣༠ །

ཨ་རིའི་ཚེས་ ༢༡ ཉིན་གྱི་ཞོགས་པའི་ཆུ་ཚོད་ ༨།༣༠ །

ཡུ་རོབ་ཧྥ་རན་སིའི་ཕྱི་ཚེས་ ༢༡ ཉིན་གྱི་ཉིན་རྒྱབ་ཆུ་ཚོད་ ༢།༣༠ །

རྒྱང་རྒྱུག་འགྲན་བསྡུར་དེ་རྒྱ་གར་གྱི་བརྙན་འཕྲིན་(Star Sport)དང་། རྒྱ་ནག་གི་བརྙན་འཕྲིན་(CCTV5)། ཨ་རིའི་བརྙན་འཕྲིན་(NBC) སོགས་སུ་ཐད་གཏོང་བྱ་འཆར་ཡོད་འདུག

སྟོབས་རྒྱལ་ལགས་ནི། ༡༩༩༤ ལོའི་ཟླ་ ༢ པའི་ཚེས་ ༡༦ ཉིན་ལྷ་ས་སྟག་རྩེ་རྫོང་དར་རྒྱས་ཤིང་དུ་སྐྱེས་ཤིང་། ༢༠༠༩ ལོ་ནས་བོད་རང་སྐྱོང་ལྗོངས་ལུས་རྩལ་སློབ་གྲྭའི་རྒྱུག་ཤར་སྦྱོང་བརྡར་ནང་ཞུགས་ཏེ་ ༢༠༡༡ ལོར་རྒྱལ་ཡོངས་གཞོན་ནུ་ལོ་ཆུང་གི་རྒྱུག་ཤར་འགྲན་བསྡུར་ཁྲོད་གྲུབ་འབྲས་ཆེན་པོ་བླངས་པ་དང་། ༢༠༡༤ ལོར་ལྷོ་ཀོ་རི་ཡར་ཚོགས་པའི་ཨེ་ཤ་ཡའི་རྩེད་འགྲན་སྟེང་རྨིད་ ༥༠༠༠ ཅན་གྱི་སྐྱེས་པའི་རྒྱང་རྒྱུག་འགྲན་བསྡུར་ཁྲོད་ཨང་ ༡༢ པ་དང་། ༢༠༡༥ ལོར་རྒྱ་ནག་ཨིའུ་ཧྭན་དུ་ཚོགས་པའི་ཨེ་ཤ་ཡའི་རྒྱང་རྒྱུག་འགྲན་བསྡུར་ཁྲོད་ཨང་ ༥ པ་བཅས་ཐོབ་སྟེ། ད་སྔ་ཁྱོན་རྒྱ་ནག་ནང་ཁུལ་དང་ཕྱི་ལོགས་བཅས་ནས་གསེར་གྱི་རྟགས་མ་ ༨ དང་། དངུལ་གྱི་རྟགས་མ་ ༢ ། ཟངས་ཀྱི་རྟགས་མ་ ༥ ཐོབ་ཡོད་འདུག

རྒྱ་ནག་གི་གནས་ཚུལ་ནང་འཁོད་པ་ལྟར་ན། སྟོབས་རྒྱལ་ལགས་ནི་བོད་རང་སྐྱོང་ལྗོངས་ཁོངས་ནས་ ༡༩༨༨ ལོར་མདའ་འཕེན་ལུས་རྩལ་པ་རྡོ་རྗེ་ཆོས་དབྱངས་ལགས་ལྷོ་ཀོ་རི་ཡར་ཨོ་ལིམ་ཕིག་རྩེད་འགྲན་སྟེང་ཞུགས་པའི་རྗེས་ཀྱི་ཨོ་རྩེད་སྟེང་ཞུགས་མཁན་གཉིས་པ་དེ་ཆགས་ཡོད་འདུག

ཐེངས་འདིའི་ཨོ་རྩེད་སྟེང་རྒྱ་ནག་གི་རྩེད་འགྲན་རུ་ཁག་གི་མིང་ཐོག་ནས་བོད་མི་ལུས་རྩལ་པ་གཉིས་མཉམ་ཞུགས་གནང་ཡོད་པ་དང་། མདང་ནུབ་རྒྱ་གར་གྱི་ཆུ་ཚོད་ ༡༡།༠༠ སྟེང་། སྤྱི་ལེ་ ༢༠ ཅན་གྱི་བུད་མེད་འདུར་རྒྱུག་འགྲན་བསྡུར་ཁྲོད། བོད་པའི་བུ་མོ་ཆོས་དབྱངས་སྐྱིད་ལགས་ཞུགས་ཏེ་ཨང་ལྔ་པ་ཆགས་ཡོད།

ཐེངས་འདིར་ཁྱོན་འགྲན་ཞུགས་པ་ ༦༣ ཡོད་པའི་ཁྲོད་ནས་ཨང་དང་པོ་རྒྱ་ནག་གི་བུ་མོ་ལེའུ་ཧོང་(Liu Hong)ཞུ་བ་དུས་ཡུན་(1:28:35)དང་། ཨང་གཉིས་པ་མེག་སི་ཁོའོ་བུ་མོ་ (Maria Guadalupe Gonzalez)ཞུ་བ་དུས་ཡུན་(1:28:37)། ཨང་གསུམ་པ་རྒྱ་ནག་གི་བུ་མོ་(Lu Xiuzhi)་ཞུ་བ་དུས་ཡུན་(1:28:42)། ཨང་བཞི་པ་ཨི་ཊ་ལིའི་བུ་མོ་(Antonella Palmisano)ཞུ་བ་དུས་ཡུན་(1:29:03)། ཨང་ལྔ་པ་བོད་པའི་བུ་མོ་ཆོས་དབྱངས་སྐྱིད་ལགས་དུས་ཡུན་(1:29:04)བཅས་ཆགས་ཏེ། ཨང་དང་པོ་ལེའུ་དང་ཨང་ལྔ་པ་ཆོས་དབྱངས་སྐྱིད་ཀྱི་བར་སྐར་ཆ་ ༢༩ ཙམ་གྱི་ཁྱད་པར་ཤོར་ཡོད་པ་རེད།

༢༠༡༢ ལོའི་དབྱིན་ཇུ་ལོན་ཌོན་ཨོ་རྩེད་འདུར་རྒྱུག་འགྲན་བསྡུར་ཁྲོད། ཐོག་མ་ཆོས་དབྱངས་སྐྱིད་ལགས་སུ་ཨང་གསུམ་པ་ཐོབ་པར་ངོས་འཛིན་གྱིས་ཟངས་ཀྱི་རྟགས་མ་སྤྲད་ཡོད་ཀྱང་། ཨང་གཉིས་པ་འཐོབ་མཁན་ར་ཤི་ཡའི་བུ་མོ་(Kaniskina)ཞུ་བ་དེས་སྨན་རྫས་བེད་སྤྱོད་བཏང་ཡོད་པ་རྗེས་ལ་ཤེས་རྟོགས་བྱུང་སྟེ། ཆོས་དབྱངས་སྐྱིད་བསྐྱར་དུ་ཨང་གཉིས་པ་དངུལ་གྱི་རྟགས་མ་ཐོབ་པར་ངོས་འཛིན་བྱུང་ཡོད་པ་རེད།

གསར་འགོད་པ། དོན་འགྲུབ་བཀྲ་ཤིས།