ད་ལྟའི་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཁྲིན་ཆོན་གོ་ཞིན་ཅང་རང་སྐྱོང་ཁུལ་དམར་ཤོག་ཚོགས་པའི་མགོ་ཁྲིད་དུ་གནས་སྤོར་བཏང་སྟེ་ཚབ་ཏུ་ཝུ་ཡེན་ཅེ་ཟེར་བ་ཞིག་བསྐོས་ཡོད་འདུག
ཁ་སང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༢༨ ཉིན་ཝུ་ཡེན་ཅེ་ (Wu Yingjie) ཟེར་བ་ཞིག་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེར་བསྐོ་བཞག་བྱས་ཏེ། དེ་སྔའི་དམར་ཤོག་ཚོགས་པའི་དྲུང་ཆེ་ཁྲིན་ཆོན་གོ་ (Chen Quanguo)ཤར་ཏུར་ཀི་སི་ཐན་ནམ་ཞིན་ཅང་རང་སྐྱོང་ཁུལ་དམར་ཤོག་ཚོགས་པའི་མགོ་ཁྲིད་དུ་གནས་སྤོ་བྱས་ཡོད་པ་དང་། ད་ལྟའི་ཞིན་ཅང་རང་སྐྱོང་ཁུལ་གྱི་དམར་ཤོག་ཚོགས་པའི་མགོ་ཁྲིད་ཀྲང་ཁྲུན་ཞིན་ (Zhang Chunxian) པེ་ཅིན་དུ་གནས་སྤོར་བྱ་རྒྱུ་ཙམ་ལས་ཁོའི་གོ་གནས་ད་སྔ་གཏན་འཁེལ་བྱས་མེད་འདུག
རྒྱལ་སྤྱིའི་བོད་རིག་པའི་མཁས་པ་སྐུ་ཞབས་ཁི་ལོ་ཌི་ཨར་ཕེ་ (Claude Arpi) ལགས་ཀྱིས་ཁོང་གི་དྲ་ཚིགས་སྟེང་སྤེལ་བའི་གནས་ཚུལ་ཞིག་གི་ནང་། ཐེངས་འདིར་གསར་དུ་བསྐོས་པའི་བོད་རང་སྐྱོང་ལྗངས་དམར་ཤོག་ཚོགས་པའི་དྲུང་ཆེ་ཝུ་ཡེན་ཅེ་ཕྱི་ལོ་ ༡༩༥༦ ལོར་ཧྲན་ཏུང་ཞིང་ཆེན་གྱི་ཁྲང་ཡེ་ (Changyi) རྫོང་དུ་སྐྱེས་པ་དང་། ད་ལྟ་ལོ་ ༥༩ ཡིན་ཞིང་། རིག་གནས་གསར་བརྗེ་ཆེན་མོའི་རྗེས་ཀྱི་ཕྱི་ལོ་ ༡༩༧༤ ལོར་ནག་ཆུ་ས་ཁུལ་དུ་ཡོང་བ་དང་། ཕྱི་ལོ་ ༡༩༧༧ ལོར་བོད་རང་སྐྱོང་ལྗོངས་ནུབ་རྒྱུད་ཀྱི་གློག་ཁང་ཞིག་གི་ནང་ལས་ཀ་བྱས། ཕྱི་ལོ་ ༡༩༩༨ ལོར་བོད་རང་སྐྱོང་ལྗོངས་སློབ་གསོ་ལྷན་ཁང་གི་དྲུང་ཆེ་གཞོན་པ་དང་། ཕྱི་ལོ་ ༢༠༠༥ ལོར་དྲིལ་བསྒྲགས་ལྷན་ཁང་གི་འགན་འཛིན། ཕྱི་ལོ་ ༢༠༠༦ ལོར་བོད་རང་སྐྱོང་ལྗོངས་ཀྱི་གཙོ་འཛིན་གཞོན་པ་དང་། ཕྱི་ལོ་ ༢༠༡༣ ལོར་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་གཙོ་འཛིན་གཞོན་པ། ད་ལོའི་ཕྱི་ཟླ་ ༨ ཚེས་ ༢༨ ཉིན་དམར་ཤོག་ཚོགས་པའི་དྲུང་ཆེར་བསྐོ་བཞག་བྱས་ཡོད་སྐོར་འཁོད་འདུག
གནས་ཚུལ་འདིའི་མཇུག་ཏུ། ཧུ་ནན་ཞིང་ཆེན་གྱི་མགོ་ཁྲིད་ཞུ་ཧྲུ་ཧྲང་ (Xu Shousheng) གི་ཚབ་ཏུ་ཌུ་ཅ་ཧྭ་ (Du Jiahao) ཟེར་བ་ཞིག་དང་། ཡུན་ནན་ཞིང་ཆེན་གྱི་དམར་ཤོག་ཚོགས་པའི་མགོ་ཁྲིད་ལེ་ཅེ་ཧྭིང་ (Li Jiheng) གི་ཚབ་ཏུ་ཡུན་ནན་ཞིང་ཆེན་གྱི་མགོ་ཁྲིད་ཁྲིན་ཧྭ་ (Chen Hao) ཟེར་བ་ཞིག་བཅས་སུ་འཕོ་འགྱུར་བཏང་ཡོད་སྐོར་བརྗོད་འདུག
གནས་ཚུལ་ལྟར་ན། རྒྱ་ནག་གི་སྲིད་འཛིན་ཞིས་ཅིན་ཕིན་གྱིས་ཞིང་ལྗོངས་གསུམ་གྱི་མགོ་ཁྲིད་ལ་འཕོ་འགྱུར་གཏོང་དོན་གཙོ་བོ་རང་ཉིད་ཀྱི་ཕྱོགས་གཏོགས་དཔོན་རིགས་ཚོར་ལོ་ ༥ རེའི་ནང་ཐེངས་རེར་འཚོགས་བཞིན་པའི་སང་ལོའི་སྟོན་ཁའི་མི་དམངས་འཐུས་མི་ཚོགས་ཆེན་ཐེངས་ ༡༩ བའི་སྔོན་ལ་གོ་གནས་གང་མང་གོ་སྒྲིག་བྱས་ཏེ། སྟོན་ཁའི་འཐུས་ཚོགས་སྟེང་རྒྱུན་ལས་ ༧ དང་ཚོགས་མི་སྣ་ ༢༥ ཡིས་གྲུབ་པའི་དབུས་ཆབ་སྲིད་ལྷན་ཁང་གི་དཔོན་རིགས་ཚོའི་གོ་དབང་ལ་འཕོ་འགྱུར་གཏོང་རྒྱུར་སྟབས་བདེ་བཟོ་བཞིན་ཡོད་སྐོར་ཡང་བརྗོད་འདུག
གསར་འགོད་པ། པདྨ་རྒྱལ།
