ཐེངས་རྗེས་མའི་ཨ་རིའི་སྲིད་འཛིན་དང་བོད།

བུ་ཆུང་ཚེ་རིང་གིས་བརྩམས།
གཞིས་ཆགས་བུས་བསྒྱུར།

ཕྱི་ལོ་ ༢༠༡༦ ཟླ་བ་ ༡༡ ཚེས་ ༨ སྟེ་ཐེངས་རྗེས་མའི་ཨ་རིའི་སྲིད་འཛིན་གྱི་འོས་བསྡུ་ཆེན་མོ་བསླེབ་ལ་ཉེ་བར་བརྟེན། སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཌོ་ནལ་ཊྲམ་དང་། མང་གཙོ་ཚོགས་པའི་སྲིད་འཛིན་འོས་མི་ལྕམ་ཧི་ལ་རི་ཁི་ལིན་ཊོན་བར་གྱི་འགྲན་རྩོད་དེ་རྣོ་ངར་ཅན་ཞིག་ཏུ་འགྱུར་རྒྱུ་ཡིན་པར་མི་མང་པོས་ཚོད་དཔག་བྱེད་བཞིན་ཡོད།

ཨ་རིའི་མི་སེར་ཆགས་ཡོད་པའི་བོད་པ་ཚོ་དང་། བོད་དོན་དང་བོད་མིར་རྒྱབ་སྐྱོར་བྱེད་མཁན་ཨ་རི་བ་རྣམས་ཀྱིས་ཀྱང་འདི་ལོའི་ཨ་རིའི་སྲིད་འཛིན་འོས་བསྡུའི་འཕེལ་རིམ་ལ་དོ་སྣང་ཆེན་པོ་བྱེད་བཞིན་ཡོད། འདས་པའི་ཨ་རིའི་སྲིད་འཛིན་འོས་བསྡུ་ཆེན་མོ་ཁག་གི་ནང་། བོད་མི་ཨ་རིའི་མི་སེར་ཆགས་ཡོད་པ་ཚོས་གནད་དོན་བྱེ་བྲག་པ་ཞིག་ལ་བརྟེན་པའི་འོས་འཕེན་པ་ཞིག་ཡིན་པའི་རྣམ་པ་བསྟན་ཡོད་ལ། ཁོང་ཚོས་སྲིད་འཛིན་འོས་མི་སུ་ཞིག་བོད་དང་བོད་དོན་ལ་རྒྱབ་སྐྱོར་ཇི་ཙམ་ཆེ་བ་ཡོད་མེད་ལས། རང་ཉིད་ཆབ་སྲིད་ཚོགས་པ་ཅི་ཞིག་གི་ཁོངས་མི་དང་། དེའི་རྒྱབ་སྐྱོར་བ་ཡིན་མིན་གྱི་གནད་དོན་དེ་གཙོ་བོར་འཛིན་གྱི་མེད། དེ་ཡང་ཕྱི་ལོ་ ༢༠༠༤ ལོར་ཨ་རིའི་སྲིད་འཛིན་ཇོར་ཇི་བྷུ་ཤུ་ཐེངས་གཉིས་པའི་སྲིད་འཛིན་ལ་བསྐྱར་འདེམས་བྱུང་སྐབས། བོད་མི་ཨ་རིའི་མི་སེར་བ་ཕལ་མོ་ཆེས་རང་ཉིད་མང་གཙོ་ཚོགས་པའི་རྒྱབ་སྐྱོར་བ་ཡིན་བཞིན་དུ། སྤྱི་མཐུན་ཚོགས་པའི་སྲིད་འཛིན་འོས་མི་སྐབས་དེའི་སྲིད་འཛིན་ཇོར་ཇི་བྷུ་ཤུ་ལ་འོས་ཤོག་འཕངས་ཡོད། འདི་ནི་སྲིད་འཛིན་བྷུ་ཤུས་༸གོང་ས་མཆོག་དང་། བོད་དོན་ལ་རྒྱབ་སྐྱོར་ཡོད་ཅེས་ཁ་གསལ་པོའི་ཐོག་ནས་གསུངས་པའི་རྒྱུ་མཚན་གྱིས་རེད།

ཨ་རིའི་ཆབ་སྲིད་པ་རྣམས་ཀྱིས་འདི་ནི་གནད་དོན་ཆུང་ཚགས་ཤིག་ཡིན་ནའང་། (འོས་ཐོབ་པ་ལ་) ཤུགས་རྐྱེན་ཅན་གྱི་འོས་བསྡུའི་ས་ཁུལ་ཞིག་ཡིན་པ་དོ་སྣང་བྱུང་ཡོད། དེ་ཡང་ཕྱི་ལོ་ ༢༠༠༨ ལོའི་ཨ་རིའི་སྲིད་འཛིན་འོས་བསྡུ་ཆེན་མོའི་སྐབས། སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཇཱོན་མེ་ཁེན་མཆོག་ནས་༸གོང་ས་མཆོག་ཨ་རིའི་མངའ་སྡེ་ཁོ་ལོ་ར་ཌོའི་གྲོང་ཁྱེར་ཨེསི་པན་དུ་ཆིབས་སྒྱུར་དང་བསྟུན་ཏེ་༸གོང་ས་མཆོག་མཇལ་བར་ཆེད་བཅར་ཞུས་ཡོད། དེའི་རྗེས་ཀྱི་ཉིན་ཁ་ཤས་རྗེས་སྐབས་དེའི་མང་གཙོ་ཚོགས་པའི་སྲིད་འཛིན་འོས་མི་བྷེ་རེག་ཨོ་བྷ་མས་ཀྱང་༸གོང་ས་མཆོག་ལ་འཚམས་འཕྲིན་ཞིག་ཕུལ་བའི་ནང་། “ངེད་གཉིས་ཀྱི་མཛད་འཆར་ལས་རིམ་གྱི་རྐྱེན་པས་གང་ཉིད་ཟླ་བ་འདིའི་ནང་དུ་ཨ་རིར་ཆིབས་སྒྱུར་གྱི་སྐབས་སུ་མཇལ་འཕྲད་ཡོང་ཐབས་མེད་པ་དེར་བློ་འགྱོད་ཆེ། འོན་ཀྱང་ད་རེས་གོ་སྐབས་འདི་བརྒྱུད་ནས་ངོས་ནས་ཁྱེད་ལ་རྟག་ཏུ་སྙིང་ཁོངས་ནས་གུས་བཀུར་དང་། ལྷག་པར་དུ་གཉན་འཕྲང་གི་དུས་སྐབས་འདིར་ཁྱེད་ཉིད་དང་། ཁྱེད་ཀྱི་ཆོས་སྲིད་ཀྱི་གལ་ཆེའི་ལས་དོན་ཁག ད་དུང་ཁྱེད་ཀྱི་མི་མང་བཅས་ལ་རྒྱབ་སྐྱོར་ཡོད་ཅེས་བསྐྱར་ནན་ཞུ་འདོད་བྱུང་” ཅེས་གསལ།

སྲིད་འཛིན་གྱི་འོས་བསྡུ་ཆེན་མོ་དང་བོད།

སྤྱིར་བཏང་མང་གཙོ་ཚོགས་པ་དང་། སྤྱི་མཐུན་ཚོགས་པ་གཉིས་ཀ་ནས་སོ་སོའི་མ་འོངས་ལས་འཆར་རམ་བསྒྲུབ་བྱའི་ལས་དོན་ནང་བོད་དང་འབྲེལ་བའི་ལས་དོན་བྱེད་ཕྱོགས་ཤིག་ཡོང་གི་ཡོད། མང་གཙོ་ཚོགས་པའི་བསྒྲུབ་བྱའི་རྩ་དོན་ནང་བོད་དང་བོད་ཀྱི་གནད་དོན་དེ་ཨེ་ཤ་ཡའི་ཞི་མཐུན་སྡེ་ཚན་འོག་ཏུ་བཞག་ཡོད་ལ། དེའི་ནང་དུ་“ང་ཚོས་བོད་མིའི་ཐོབ་ཐང་ཐེ་བའི་འགྲོ་བ་མིའི་ཐོབ་ཐང་སྤྱི་ལ་ལྷག་པར་བརྩི་མཐོང་དགོས་པའི་རྒྱབ་སྐྱོར་ཞུ་རྒྱུ་ཡིན་ ” ཅེས་གསལ་ཡོད།

ཕྱི་ལོ་ ༢༠༡༢ ལོའི་མང་གཙོ་ཚོགས་པའི་བསྒྲུབ་བྱའི་རྩ་དོན་ནམ་མ་འོངས་ལས་འཆར་ནང་ “བོད་མི་རྣམས་ནས་སོ་སོའི་ལེགས་བྱང་དང་ཆོས་ལུགས་ཀྱི་ངོ་བོ་སྲུང་སྐྱོབ་བྱེད་རྒྱུའི་ཐོབ་ཐང་ཐེ་བའི་རྒྱ་རིགས་སྤྱིའི་ཡོངས་ཁྱབ་འགྲོ་བ་མིའི་ཐོབ་ཐང་ལ་བརྩི་མཐོང་དང་དོ་སྣང་དགོས་རྒྱུའི་གལ་གནད་ཀྱི་ཐོག་ལ་ང་ཚོས་རྒྱུན་མཐུད་ནས་གླེང་སློང་བྱ་རྒྱུ་ཡིན།”

འོན་ཀྱང་། སྤྱི་མཐུན་ཚོགས་པའི་བོད་དང་འབྲེལ་བའི་གྲོས་འཆར་ནི་དོན་དངོས་ཀྱི་ཆ་ནས་མང་གཙོ་ཚོགས་པ་དང་ཏོག་ཙམ་མི་འདྲ་བ་ཞིག་ཡོད། དེའི་ནང་དུ་ “དེ་དང་དུས་མཚུངས་བོད་དང་ཤིན་ཅང་གཉིས་ཀྱི་ནང་དུ་ལེགས་བྱང་རྩ་གཏོར་ནི་རྒྱུན་ཆད་མེད་ལ། དེ་སྔོན་ཁས་བླངས་དམ་བཅས་པའི་ཧོང་ཀོང་གི་རང་སྐྱོང་ནི་ག་ལེར་ཡལ་ཕྱིན་པ། གཡོ་བྱུས་ཀྱི་སྒོ་ནས་དངུལ་གྱི་འགྲོ་རྒྱུག་ལ་འགྱུར་བཅོས། དེ་བཞིན། ང་ཚོའི་འཕྲུལ་རིག་གི་ལག་རྩལ་རྣམས་འཇབ་རྐུན་བྱས་པ། བློ་གྲོས་ཀྱི་བདག་དབང་དང་། དཔལ་འབྱོར་གྱི་ཁེ་ཕན་ཁོ་ནར་བསམས་ནས་དཔར་སྐྲུན་གྱི་བདག་དབང་རྣམས་གཞན་གྱི་ཐོབ་ཐང་ལ་བརྩི་མཐོང་མེད་པར་བྱས་པ་” ཞེས་དང་།

ཕྱི་ལོ་ ༢༠༡༢ ལོར་སྤྱི་མཐུན་ཚོགས་པའི་བསྒྲུབ་བྱའི་རྩ་དོན་ནང་དུ་ “རྒྱ་གཞུང་ནི་ང་ཚོས་སྐྱོན་འཛུགས་བྱས་པའི་བྱེད་སྒོ་མང་པོ་ཞིག་གི་ནང་དུ་བཞུགས། དེ་ཡང་དོན་དམ་གྱི་དགོས་མཁོ་གང་ཡང་མ་མཆིས་ནའང་རྒྱ་གཞུང་གིས་དྲག་པོའི་དམག་གི་དབང་ཤུགས་དེ་རྒྱ་སྐྱེད་དང་། བོད་དང་ཤིན་ཅང་། རྒྱ་ནག་གི་ས་ཁུལ་གཞན་ཁག་ཏུ་འགྲོ་བ་མིའི་ཐོབ་ཐང་རྣམས་འགོག་པ་དང་། དྲག་གནོན་བྱེད་བཞིན་པ་ལྟ་བུའོ།”

ཐེངས་རྗེས་མའི་སྲིད་འཛིན་འོས་བསྡུ་ཆེན་མོ་དེ་སུ་ཞིག་ལ་ཐོབ་ཀྱི་ཡོད་ཀྱང་། སྲིད་འཛིན་གསར་པས་ངེས་པར་དུ་རྒྱུན་འཛིན་དགོས་པའི་བོད་དང་འབྲེལ་བའི་གཞི་རྩའི་གནད་དོན་ཁག་ཅིག་ཡོད་པ་རེད། དེ་དག་ཡོངས་སུ་རྫོགས་པ་ ༢༠༠༢ བོད་དོན་སྲིད་བྱུས་ཀྱི་ཁྲིམས་འཆར་དང་སྦྲེལ་ནས་ཡོད། ཨ་རིའི་རྒྱལ་ཡོངས་གྲོས་ཚོགས་ཞིབ་འཇུག་སྡེ་ཚན་གྱི་སྙན་ཐོའི་ནང་དུ། “༢༠༠༢ བོད་དོན་སྲིད་བྱུས་ཀྱི་ཁྲིམས་འཆར་ནི། ཨ་རིའི་གཞུང་གིས་བོད་ཐོག་འཛིན་པའི་སྲིད་བྱུས་ལ་ལམ་སྟོན་བྱ་རྒྱུའི་གྲོས་ཚོགས་ཀྱི་འཆར་གཞི་གཙོ་བོ་ཞིག་རེད།

གྲོས་ཚོགས་ཀྱི་གྲོས་འཆར་འདི་ཡིས་བོད་མི་ཚོར་རྒྱབ་སྐྱོར་གྱི་རྣམ་འགྱུར་གསལ་པོ་ཞིག་ལྡན་པའི་ཁ་ཡོད་ལག་ཡོད་ཀྱི་ལས་འགུལ་ཡིན་པ་འགྲེལ་བརྗོད་བྱེད་ཀྱི་ཡོད། བཅས་ཁྲིམས་འདི་ལ་བརྟེན་ནས་ཨ་རིའི་ཕྱི་སྲིད་ལས་ཁུངས་ནང་བོད་དོན་དང་འབྲེལ་བའི་གནད་དོན་ཐོག་ལ་དམིགས་བསལ་འབྲེལ་མཐུད་པ་ཞིག་བསྐོ་གཞག་ཐུབ་རྒྱུར་ཕན་གྲོགས་བྱས་ཡོད་ལ། བཅས་ཁྲིམས་ནང་ “དམིགས་བསལ་འབྲེལ་མཐུད་པའི་དགོས་དོན་གཙོ་བོ་ནི། རྒྱ་ནག་མི་མང་སྤྱི་མཐུན་རྒྱལ་ཁབ་དང་། ༸གོང་ས་མཆོག་གམ་༸གོང་ས་མཆོག་གི་སྐུ་ཚབ་གཉིས་བར་ལ་དོན་སྙིང་ལྡན་པའི་གྲོས་མོལ་ཞིག་ཡོང་བ་ལ་མཐུན་འགྱུར་བྱེད་རྒྱུ་དེ་ཡིན། ” བཅས་འཁོད་ཡོད།

ཕྱི་ལོ་ ༢༠༡༦ ཟླ་བ་ ༦ ཚེས་ ༢༦ ཉིན་ཨ་རིའི་ཨིན་ཌི་ཡ་ན་མངའ་སྡེའི་རྒྱལ་ས་ཨིན་ཌི་ཡ་ན་པོ་ལིསི་རུ། ཨ་རིའི་གྲོང་སྡེའི་སྤྱི་ཁྱབ་པའི་ལྷན་ཚོགས་སྟེང་། མང་གཙོ་ཚོགས་པའི་སྲིད་འཛིན་འོས་མི་ལྕམ་སྐུ་ཧི་ལ་རི་ཁི་ལིན་ཊོན་གྱིས་གཏམ་བཤད་ཀྱི་ཞོར་འཕྲོས་སུ་༸གོང་ས་མཆོག་གི་མཚན་སྨོས་ཙམ་བྱེད་པ་ལས། ད་བར་སྲིད་འཛིན་འོས་མི་གཉིས་ཀས་བོད་དོན་དང་འབྲེལ་བའི་བསྒྲགས་གཏམ་གང་ཡང་སྤེལ་མེད། འོས་བསྡུ་ཆེན་མོའི་གོང་གི་ཟླ་ཤས་ནང་དུ་། སྲིད་འཛིན་འོས་མི་གཉིས་ཀས་བོད་དོན་དང་འབྲེལ་བའི་གལ་གནད་ཅན་གྱི་བསྒྲགས་གཏམ་ཞིག་སྤེལ་གྱི་ཡོད་མེད་ད་དུང་བརྗོད་ཧ་ཅང་དཀའ་བ་ཞིག་རེད།

བོད་མི་ཨ་རིའི་མི་སེར་བ་དང་། བོད་དོན་རྒྱབ་སྐྱོར་བའི་གྲོགས་པོ་གྲོགས་མོ་རྣམས་ཀྱིས་ད་རེའི་སྲིད་འཛིན་གྱི་འོས་བསྡུ་ཆེན་མོ་དེར་དོ་སྣང་ཆེན་པོ་བྱེད་ཀྱིན་ཡོད།

རྩོམ་པ་པོའི་ངོ་སྤྲོད།

བུ་ཆུང་ཚེ་རིང་ལགས་ནི་ཕྱི་ལོ་ ༡༩༩༥ ལོར་ཨ་རིའི་རྒྱལ་ས་ཝ་ཤིང་ཊོན་དུ་བརྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་དུ་ལས་བཞུགས་གནང་བ་དང་། ད་ལྟའི་ཆར་འགན་འཛིན་གཞོན་པའི་ལས་འཁུར་བཞེས་བཞིན་ཡོད། ཁོང་རྒྱལ་སྤྱིའི་བོད་དོན་ལས་འགུལ་ཁང་དུ་ལས་བཞུགས་མ་གནང་གོང་དུ། རྒྱ་གར་རྒྱལ་ས་ལྡི་ལིར་རྒྱ་གར་བང་ཆེན་ཞེས་པའི་གསར་འགྱུར་ལས་ཁང་དུ་གསར་འགོད་པ་དང་། བཙན་བྱོལ་བོད་གཞུང་གི་གཞུང་ཞབས་ཀྱི་ཕྱག་ལས་ཀྱང་གནང་ཡོད།

ཁོང་ནི་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་མི་ཡིན་ལ། ༢༠༠༢ ནས་ ༢༠༡༠ ལོའི་བར་ཁོང་རང་བོད་རྒྱ་ཞི་མོལ་སྐུ་ཚབ་དང་ལྷན་དུ་རྒྱ་ནག་ཏུ་ཕེབས་ཡོད། ཁོང་གིས་རྒྱ་གར་དང་བལ་པོ། བོད། སུད་སི། ཨ་རི་བཅས་ཀྱི་གསར་དེབ་ཁག་ཏུ་བོད་དང་འབྲེལ་བའི་གནད་དོན་ཐོག་རྩོམ་ཡིག་མང་པོ་སྤེལ་ཡོད། དེ་བཞིན། ཁོང་རང་རྒྱལ་སྤྱིའི་བོད་ཀྱི་ལས་འགུལ་ཁང་གི་ངོ་ཚབ་ཐོག་ནས་ཨ་རིའི་གྲོས་ཚོགས་དང་། དེ་བཞིན་གཙུག་ལག་སློབ་ཁང་དང་ཞིབ་འཇུག་ལས་ཁང་བཅས་སུ་བོད་དོན་དང་འབྲེལ་བའི་གཏམ་བཤད་གནང་བཞིན་ཡོད།

མ་རྩོམ་འབྲེལ་ཐག https://weblog.savetibet.org/2016/08/the-next-american-president-and-tibet/