དེ་རིང་སྔ་དྲོའི་ཆུ་ཚོད་ ༡༠།༢༠ ཐོག་སྤྱི་ཟུར་བསྟན་འཛིན་མགོན་པོ་ལགས་སྙུང་གཞིའི་རྐྱེན་གྱིས་བདེ་ལེགས་སྨན་ཁང་དུ་སྐུ་གྲོངས་ཡོད་འདུག
སྤྱི་ཟུར་བསྟན་འཛིན་མགོན་པོ་ལགས་ལ་ཡུན་རིང་ནས་སྙུང་གཞི་ཕོག་སྟེ་སྨན་བཅོས་བྱས་ཡོད་ཀྱང་ཕན་ཐོགས་མ་བྱུང་བར་དེ་རིང་སྔ་དྲོའི་ཆུ་ཚོད་ ༡༠།༢༠ ཐོག་བཞུགས་སྒར་དྷ་རམ་ས་ལར་ཡོད་པའི་བདེ་ལེགས་སྨན་ཁང་དུ་སྐུ་གྲོངས་ཡོད་འདུག
ཁོང་ཕྱི་ལོ་ ༡༩༦༠ ལོར་མཚོ་སྔོན་ཞིང་ཆེན་མཚོ་ལྷོ་ཁུལ་མང་ར་རྫོང་བྱ་གཞུང་དུ་ཕ་ཆོས་དཔལ་དང་མ་ཚེ་གཟུངས་སྐྱིད་གཉིས་ལ་བུ་སྤུན་གསུམ་ཡོད་པ་ལས་འབྲིང་བར་ཡིན་པ་དང་། རང་ལོ་ ༡༡ ཙམ་ནས་འབྲི་ཀློག་སྦྱངས་ཏེ་རིམ་གྱིས་མཚོ་ལྷོ་ཁུལ་མི་རིགས་དགེ་ཐོན་སློབ་གྲྭར་ཞུགས་པ་དང་། ༡༩༨༦ ཟླ་ ༡ པོའི་ནང་རྒྱ་གར་ནང་སྐྱབས་བཅོལ་དུ་འབྱོར་ཏེ། བོད་མིའི་༼དམངས་གཙོ༽་ཚགས་ཤོག་དང་། མ་འོངས་པ་བོད་ཀྱི་གསར་འཕྲིན་ལས་ཁང་ནང་གསར་འགྱུར་དང་འབྲེལ་བའི་ཕྱག་ལས་གནང་ཡོད་པ་དང་། དེ་བཞིན་དྷ་ས་བདེ་དོན་ཚོགས་ཆུང་གི་དྲུང་ཆེ་དང་དྷ་སར་ཡོད་པའི་༼རྒྱལ་ཞེན་ལྷན་ཚོགས༽ནང་ཕྱག་ལས་གནང་། གཞན་ཡང་། མདོ་སྨད་དབུས་རྒྱུན་གྱི་དྲུང་གཞོན་དང་དགེ་རྒན་གྱི་ཕྱག་ལས་སོགས་གནང་མྱོང་ཡོད་པ་མ་ཟད། མདོ་སྨད་སྤྱི་འཐུས་ཀྱི་བར་བརྒལ་འོས་བསྡུ་བརྒྱུད་བོད་མི་མང་སྤྱི་འཐུས་སྐབས་བཅུ་གཉིས་པ་དང་བཅུ་གསུམ་པའི་སྤྱི་འཐུས་དང་། ཕྱི་ལོ་ ༢༠༠༦ ནས་ ༢༠༡༡ བར་གྱི་སྐབས་བཅུ་བཞི་པའི་སྤྱི་འཐུས་བཅས་གནང་ཡོད་འདུག
དེ་རིང་སྔ་དྲོར་བོད་མི་མང་སྤྱི་འཐུས་ལྷན་ཚོགས་ཀྱི་རྒྱུན་ལས་རྣམ་པ་དང་མདོ་སྨད་དབུས་ས་གཉིས་ཀྱི་རྒྱུན་ལས་བཅས་ཕེབས་ཏེ་དམ་པ་ཁོང་ལ་མྱ་ངན་གུས་འདུད་དང་ཤུལ་ལུས་འབྲེལ་ཡོད་ཚོར་གདུང་སེམས་མཉམ་སྐྱེད་གནང་ཡོད་འདུག
གསར་འགོད་པ། པདྨ་མཚོ།
སྨྲ་བ་ཉུང་ཡང་ཀུ་རེའི་འཛུམ་མདངས་ཅན། །ཆེ་ལ་རྒོལ་ཡང་ཆུང་བའི་བརྟུལ་ཞུགས་ཅན། །རྒྱང་ཕུད་བཏང་ཡང་དམངས་གཙོའི་ཁྲིར་བཞུགས་པ། །དམ་གཙང་བློ་དཀར་གྲོགས་ཤིག་གཏན་དུ་གྱེས། །
གསོན་པའི་དུས་སུ་མི་ཁ་འཁོར་ན་ཡང་། །འཆི་བའི་དུས་སུ་བློ་སེམས་བདེ་བ་ཁྱོད། །གཤེགས་པའི་རྗེས་སུ་བཟང་ངན་ཅི་གླེང་ཡང་། །དོན་ལ་མི་རིགས་འདི་ཡི་དཔའ་རྒོད་ཅིག །
བསྟན་འཛིན་རྒྱ་མཚོའི་བཀའ་དགོངས་སྙིང་ལ་བཅངས། །ཆོས་སྲིད་ཟུང་གི་དོན་ཆེན་ཉམས་སུ་བླངས། །དབང་གྲགས་མི་གཉེར་བདེན་པ་སྐྱོང་བ་ཁྱོད། །མགོན་པོ་སྤྱན་རས་གཟིགས་ཀྱིས་རྗེས་འཛིན་སྨོན། །
༅༅། སྤྱི་ཟུར་བསྟན་འཛིན་མགོན་པོ་ལགས་འདས་པར་སེམས་གསོ་དང་མ་འོངས་པར་བོད་བསྟན་པ་
ཆབ་སྲིད་མི་རིགས་ཀྱི་དོན་དུ་སྐྱེ་བ་ལེན་པ་ཤོག་ཅེས་མཆོག་གསུམ་ལ་མ་བཅོས་སྙིང་ནས་གསོལ་འདེབས་ཞུ།
འདུས་བྱས་ཐམས་ཅན་མི་རྟག་པ། ཆོས་ཐམས་ཅན་སྟོང་ཆིང་བདག་མེད་ཡིན་པར་བརྟེན་སྔ་ཕྱི་མ་གཏོགས་
འཇིག་རྟེན་འདི་ང་ཚོ་ཚང་མ་བྲལ་ནས་འགྲོ་མི་དགོས་པ་སུ་གཅིག་ཀྱང་མེད་པ་རེད།
སྐྱེས་པའི་མཐའ་མ་འཆི་བ་དང་།་འདུས་པའི་མཐའ་མ་བྲལ་དགོས་པ་ཆོས་ཉིད་རེད།