བྱང་ཀོ་རི་ཡས་རྡུལ་ཕྲན་མཚོན་ཆའི་ཚོད་ལྟ་ཐེངས་ལྔ་པ་བྱས་པར་རྒྱལ་ཁབ་མང་པོས་སྐྱོན་བརྗོད་ཤུགས་ཆེན་བྱས་ཏེ་ཡུལ་དེའི་རྡུལ་ཕྲན་མཚོན་ཆ་བཟོ་བསྐྲུན་ལ་བཀག་སྡོམ་ཤུགས་ཆེ་རུ་གཏོང་དགོས་སྐོར་རྗོད་ཀྱི་འདུག
དེ་རིང་བྱང་ཀོ་རི་ཡའི་རྒྱལ་སྟོན་དུས་ཆེན་དང་སྟབས་བསྟུན་རྡུལ་ཕྲན་མཚོན་ཆའི་ཚོད་ལྟ་ཐེངས་ལྔ་པ་དེ་བྱས་ཡོད་པ་དང་། ཡུལ་དེའི་དབུས་བརྙན་འཕྲིན་ཁང་གིས་ཚོད་ལྟ་བྱེད་སྐབས་ཉེ་འགྲམ་ཁོར་ཡུག་ལ་གནོད་སྐྱོན་གང་ཡང་མ་ཐེབས་པར་ལེགས་འགྲུབ་བྱུང་བར་བརྟེན། བྱང་ཀོ་རི་ཡ་གཞུང་གིས་བྱང་ཕྱོགས་རྡུལ་ཕྲན་མཚོན་ཆ་ཞིབ་འཇུག་ལྟེ་གནས་ཀྱི་རྡུལ་ཕྲན་ཚན་རིག་པ་དང་ལག་རྩལ་མི་སྣར་བསྔགས་བརྗོད་རྟེན་འབྲེལ་ཞུས་ཡོད་སྐོར་བསྒྲགས་ཡོད་པ་དང་། ཨ་རི་དང་ཉི་ཧོང་། ཨུ་རུ་སུ་སོགས་འཛམ་གླིང་རྒྱལ་ཁབ་མང་པོས་བྱང་ཀོ་རི་ཡའི་བྱ་སྤྱོད་དེར་སྐྱོན་བརྗོད་དང་ངོ་རྒོལ་ཤུགས་ཆེན་བྱེད་བཞིན་འདུག
བྱང་ཀོ་རི་ཡ་དབུས་བརྙན་འཕྲིན་ཁང་གིས། ཨ་རི་སོགས་ཀྱིས་བྱང་ཀོ་རིའི་རྡུལ་ཕྲན་མཚོན་ཆའི་འཐབ་འཛིང་གི་ནུས་སྟོབས་ལ་དགྲ་འཛིན་གྱི་འདུ་ཤེས་བཟུང་སྟེ་ངོས་ལེན་བྱེད་ཀྱི་མེད་པ་མ་ཟད། གནག་སེམས་ཆེན་པོས་བྱང་ཀོ་རི་ཡའི་རང་སྲུང་ནུས་སྟོབས་ལ་སྐྱོན་བརྗོད་བྱེད་ཀྱི་ཡོད་སྟབས། ཐེངས་འདིའི་འགད་གཏོར་གྱི་ཚོད་ལྟ་དེ་ཁོ་ཚོའི་འཇིགས་སྐུལ་དང་བཀག་འགོག་གི་བྱ་སྤྱོད་ལ་དོན་དངོས་རང་བཞིན་གྱི་ཐོག་ནས་རྒོལ་ལན་སློག་པའི་ཆ་ཤས་ཤིག་ཡིན་པ་དང་། ཐེངས་འདིའི་ཚོད་ལྟ་ཡིས་བྱང་ཀོ་རི་ཡ་གཞུང་དང་མི་མང་ལ་འདི་ལྟ་བུའི་ནུས་སྟོབས་ཆེན་པོ་ཡོད་པ་བསྟན་པ་མ་ཟད། བྱང་ཀོ་རི་ཡའི་ཕྱོགས་ནས་འགོག་རྒོལ་བྱེད་མཁན་གྱི་རྒྱལ་ཁབ་ཁག་གིས་རྒོལ་ལན་སློག་པར་གྲ་སྒྲིག་ཡག་པོ་བྱས་ཡོད་སྐོར་དང་། མ་འོངས་བར་བྱང་ཀོ་རི་ཡའི་རྡུལ་ཕྲན་མཚོན་ཆའི་རང་སྲུང་ནུས་སྟོབས་ཨ་རི་ལས་བརྒལ་ཐུབ་པར་མུ་མཐུད་ཤུགས་གནོན་རྒྱག་རྒྱུ་ཡིན་སྐོར་བསྒྲགས་ཡོད་པ་རེད།
ཉི་ཧོང་གི་སྲིད་བློན་ཤིན་ཛོ་ཨ་བྷི་ཡིས་བྱང་ཀོ་རི་ཡས་རྡུལ་ཕྲན་མཚོན་ཆའི་ཚོད་ལྟ་ཐེངས་ ༥ པ་བྱས་པ་དེར་སྐྱོན་བརྗོད་ཤུགས་ཆེན་གནང་གི་ཡོད་སྐོར་བརྗོད་ཡོད་པ་དང་། ཉི་ཧོང་གི་ནང་སྲིད་བློན་ཆེན་ (Yoshihide Suga )ལགས་ཀྱིས་བྱང་ཀོ་རི་ཡའི་རྡུལ་ཕྲན་མཚོན་ཆ་བཟོ་སྐྲུན་ལ་སྔར་ལས་བཀག་སྡོམ་ནན་པོ་བྱེད་པར་མནོ་བསམ་གཏོང་དགོས་སྐོར་བརྗོད་འདུག
དེ་རིང་གསར་འགོད་ལྷན་ཚོགས་ཤིག་གི་ཐོག་རྒྱ་ནག་གི་ཕྱི་འབྲེལ་མགྲིན་ཚབ་པ་ཧྭ་ཁྲིན་ཡེན་གྱིས། བྱང་ཀོ་རི་ཡ་གཞུང་གིས་རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་ངོ་རྒོལ་ལ་ཅི་ཡང་མི་འཛེམས་བར་རྡུལ་ཕྲན་མཚོན་ཆའི་ཚོད་ལྟ་ཐེངས་ ༥ པ་བྱས་པ་དེར་རྒྱ་ནག་གཞུང་གིས་མཐའ་གཅིག་ཏུ་ངོ་རྒོལ་གྱི་ལངས་ཕྱོགས་བཟུང་ཡོད་པ་གསལ་བསྒྲགས་བྱས་ཡོད་ལ། བྱང་ཀོ་རི་ཡའི་ནང་རྡུལ་ཕྲན་མཚོན་ཆ་མེད་པ་བཟོ་བ་དང་རྡུལ་ཕྲན་མཚོན་ཆ་བཟོ་སྐྲུན་དར་ཁྱབ་ལ་བཀག་འགོག་བྱེད་པ་མངོན་འགྱུར་བྱུང་རྒྱུ་ནི་རྒྱ་ནག་ཕྱོགས་ཀྱི་ཐོག་མཐའ་བར་གསུམ་གྱི་ལངས་ཕྱོགས་ཡིན་སྟབས། བྱང་ཀོ་རི་ཡ་གཞུང་གིས་རྡུལ་ཕྲན་མཚོན་ཆ་མེད་པ་བཟོ་བའི་ཁས་ལེན་ལག་བསྟར་དང་། འཛམ་གླིང་མཉམ་འབྲེལ་རྒྱལ་ཚོགས་ལས་འཛིན་ལྷན་ཚོགས་ཀྱི་གྲོས་ཆོད་ལ་བརྩི་སྲུང་བྱས་ཏེ། སྡུག་ཕྱོགས་ཀྱི་བྱ་སྤྱོད་ག་རེ་ཡིན་ནའང་མཚམས་འཇོག་ཡོང་ཐབས་ལ་རྒྱབ་སྐྱོར་ཡོད་སྐོར་བརྗོད་འདུག
ཡང་གསར་འགོད་པས་མགྲིན་ཚབ་པར་རྒྱ་ནག་ཕྱོགས་ནས་མ་འོངས་པར་བྱང་ཀོ་རི་ཡའི་བྱ་སྤྱོད་དེ་འགོག་ཐབས་ག་འདྲ་བྱ་རྒྱུ་ཡིན་པ་དང་། བྱང་ཀོ་རི་ཡ་གཞུང་གིས་ཐེངས་འདིའི་ཚོད་ལྟ་མ་བྱས་གོང་དུ་རྒྱ་གཞུང་ལ་སྔོན་བརྡ་འབྱོར་ཡོད་མེད་འདྲི་སྐབས། རྒྱ་ནག་ཕྱོགས་ནས་མུ་མཐུད་འབྲེལ་མོལ་གྱི་ཐབས་ལམ་ལ་བརྟེན་ནས་བྱང་ཀོ་རི་ཡ་དང་འབྲེལ་བའི་གནད་དོན་ཐག་གཅོད་རྒྱུ་ཡིན་སྐོར་དང་། ཚོད་ལྟའི་སྔོན་བརྡ་འབྱོར་ཡོད་མེད་ཐད་མོ་རང་ལ་གནས་ཚུལ་གང་ཡང་མཁོ་སྤྲོད་བྱ་རྒྱུ་མེད་སྐོར་བརྗོད་ཡོད་པ་རེད།
ཨ་རིའི་ཕྱི་སྲིད་དྲུང་ཆེ་ཇོན་ཁེ་རི་ཡིས། བྱང་ཀོ་རི་ཡའི་རྡུལ་ཕྲན་མཚོན་ཆའི་ཚོད་ལྟ་ཡིས་ཉི་ཧོང་དང་ལྷོ་ཀོ་རི་ཡ་ཁྱིམ་མཚེས་རྒྱལ་ཁབ་གཉིས་ཡིན་པའི་ཅ་ནས་ཧ་ཅང་སེམས་འཚབ་ཡོད་ཀྱང་། རྒྱ་ནག་དང་ཨུ་རུ་སུ། ཨ་རི་ཡང་གནད་དོན་འདིར་སེམས་འཚབ་ཡོད་སྟབས། སྲིད་འཛིན་ཨོ་བྷ་མས་འདིའི་ཐད་གསུང་བཤད་གནང་ངེས་རེད་ལ། ཨ་རིས་མཉམ་འབྲེལ་རྒྱལ་ཚོགས་དང་ལྷན་དུ་དེའི་ཐད་གོ་བསྡུར་གནང་རྒྱུ་ཡིན་སྐོར་བརྗོད་འདུག
བྱང་ཀོ་རི་ཡ་གཞུང་གིས་རྡུལ་ཕྲན་མཚོན་ཆའི་ཚོད་ལྟ་དང་པོ་དེ་ཕྱི་ལོ་ ༢༠༠༦ ལོར་ཁེམ་ཅུང་ཨིལ་གྱི་དབང་འཛིན་འོག་མགོ་བཙུགས་ཏེ། ཕྱི་ལོ་ ༢༠༠༩ དང་ཕྱི་ལོ་ ༢༠༡༣ ལོ་བཅས་ལ་ཚོད་ལྟ་བྱས་ཡོད་པ་དང་། འདི་ལོའི་ཕྱི་ཟླ་ ༡ ཚེས་ ༦ ཉིན་སྲིད་འཛིན་ཁེམ་ཅུང་ཨན་གྱི་དབང་འཛིན་འོག་ཚོད་ལྟ་བྱས་ཡོད་པ་དང་། ད་ལན་གྱི་ཚོད་ལྟ་དེ་འདི་ལོའི་ཐེངས་གཉིས་པ་དེ་ཆགས་ཡོད་འདུག བྱང་ཀོ་རི་ཡ་གཞུང་གིས་རྡུལ་ཕྲན་མཚོན་ཆའི་ཚོད་ལྟ་ཡིས་ཁྱིམ་མཚེས་རྒྱལ་ཁབ་ཉི་ཧོང་དང་ལྷོ་ཀོ་རི་ཡ་སོགས་ལ་འཇིགས་སྣང་རིམ་པར་སློང་གི་ཡོད་པ་མ་ཟད། ཨ་རི་དང་མཉམ་འབྲེལ་རྒྱལ་ཚོགས་ཀྱིས་གཙོས་འཛམ་གླིང་རྒྱལ་ཁབ་མང་པོས་སྐྱོན་བརྗོད་དང་སྦྲགས། བྱང་ཀོ་རི་ཡར་དཔལ་འབྱོར་སོགས་ཀྱི་ཐོག་ནས་ཉེས་ཆད་གཅོད་པའི་བྱེད་ཐབས་ལག་བསྟར་བྱེད་ཀྱི་ཡོད་ཀྱང་། བྱང་ཀོ་རི་ཡ་གཞུང་གིས་རང་སྲུང་གི་སྟོབས་ཤུགས་ཤིག་ཡིན་སྐོར་བརྗོད་ནས་མུ་མཐུད་དུ་ཚོད་ལྟ་བྱས་ཏེ། བྱང་ཀོ་རི་ཡའི་རྡུལ་ཕྲན་མཚོན་ཆའི་རང་སྲུང་སྟོབས་ཤུགས་ལ་འཛམ་གླིང་རྒྱལ་ཁབ་ཡོངས་ཀྱིས་ཁ་གཏད་གཅོག་ཐབས་མེད་པ་ཞིག་བཟོ་རྒྱུ་ཡིན་སྐོར་རྗོད་ཀྱི་ཡོད་པ་རེད།
གསར་འགོད་པ། པདྨ་མཚོ།
