རྒྱ་ནག་དབུས་སྒྲིག་ཁྲིམས་ཞིབ་གཤེར་ལྷན་ཁང་གིས་ཐེན་ཅིན་གྲོང་ཁྱེར་སྤྱི་ཁྱབ་པ་ཧུང་ཞིན་ཀོ་ཡིས་ཏང་གི་སྒྲིག་ཁྲིམས་ལ་གཏོར་བརླག་དང་ལྐོག་རྔན་སྤྲོད་ལེན་བྱས་པའི་ནག་ཉེས་ལ་ཞིབ་བཤེར་བྱེད་བཞིན་ཡོད་ཟེར།
ཁ་སང་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༠ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་ (CCDI) གིས། ཐེན་ཅིན་གྲོང་ཁྱེར་གྱི་ཞོགས་པའི་ཚགས་པར་སྟེང་། རྒྱ་ནག་ཤོར་ཕྱོགས་ཐེན་ཅིན་གྲོང་ཁྱེར་སྤྱི་ཁྱབ་པ་ཧུང་ཞིན་ཀོ་ (Huang Xingguo) ཡིས་ཏང་ནང་གི་ལྐོག་ཟ་རུལ་སུངས་གཙང་བཤེར་བྱ་འགུལ་དང་སྒྲིག་ཁྲིམས་ལ་གཏོར་བརླག་ཚབ་ཆེན་བཟོས་པ་མ་ཟད། ལྐོག་རྔན་སྤྲོད་ལེན་བྱས་པའི་ནག་ཉེས་ཐོག་ཞིབ་བཤེར་བྱེད་བཞིན་ཡོད་སྐོར་བཤད་འདུག
ཐེན་ཅིན་གྲོང་ཁྱེར་གྱི་ཞོགས་པའི་ཚགས་པར་སྟེང་། ཏང་གི་སྒྲིག་ཁྲིམས་དང་རྒྱལ་ཁབ་ཀྱི་རྩ་ཁྲིམས་ལ་གཏོར་བརླག་གཏོང་མཁན་ཚོར་ཞིབ་བཤེར་ནན་མོ་བྱེད་དགོས་སྐོར་བཤད་ཡོད་ནའང་། ཧུང་ཞིན་ཀོ་ཡིས་ལྐོག་རྔན་ག་ཚོད་སྤྲོད་ལེན་བྱས་ཡོད་མེད་དང་། ཁོར་ག་དུས་ཁྲིམས་ཐག་གཅོད་རྒྱུ་ཡིན་མིན་སྐོར་གསལ་བཤད་བྱས་མེད་པ་རེད།
ཧོང་ཀོང་རང་དབང་གསར་ཁང་གིས་སྤེལ་བའི་གནས་ཚུལ་ནང་། ཧུང་ཞིན་ཀོ་ལ་ཞིབ་བཤེར་བྱེད་དོན་གཙོ་བོ་ན་ནིང་ཕྱི་ཟླ་ ༨ ནང་ཐེན་ཅིན་གྲུ་ཁར་བྱུང་བའི་འབར་གས་དོན་རྐྱེན་དང་འབྲེལ་བ་ཡོད་པ་དང་། སྐབས་དེའི་རྫས་འགྱུར་འབར་གས་བྱུང་བའི་ཁྲོད་དུ་མི་ ༡༦༢ ཀྱི་ཚེ་སྲོག་ཤོར་ཡོད་སྐོར་བཀོད་འདུག
ཧུང་ཞིན་ཀོ་ནི་རྒྱ་ནག་ཀྲེ་ཅང་ཞིང་ཆེན་གྱི་ཞང་ཧྲན་གྲོང་ཚོ་ནས་ཡིན་ཞིང་། ད་ལྟ་རང་ལོ་ ༦༡ ཡིན་པ་དང་། ཕྱི་ལོ་ ༡༩༧༣ ནས་ ༡༩༨༧ ཞང་ཧྲན་གྲོང་ཚོའི་དམར་ཤོག་དྲུང་ཆེ་དང་། ཕྱི་ལོ་ ༢༠༠༣ ལོ་ནས་སྔ་རྗེས་སུ་ཐེན་ཅིན་གྲོང་ཁྱེར་སྤྱི་ཁྱབ་གཞོན་པར་བསྐོ་བཞག་བྱས་ཡོད་འདུག
ཟླ་སྔོན་མར་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས་དེ་སྔའི་ཐེན་ཅིན་གྲོང་ཁྱེར་སྤྱི་ཁྱབ་པ་ཟུར་བ་ཡན་ཧེ་ལིན་ (Yin Hailin) གྱིས་ལྐོག་རྔན་སྤྲོད་ལེན་བྱས་པའི་ནག་ཉེས་ཐོག་འཛིན་བཟུང་ཞིབ་བཤེར་བྱས་ཡོད་འདུག
ཕྱི་ལོ་ ༢༠༡༢ ལོའི་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་ ༡༨ པའི་སྟེང་རྒྱལ་ནང་དང་ཏང་ནང་གི་ལྐོག་ཟ་རུལ་སུངས་གཙང་བཤེར་བྱ་འགུལ་ལག་བསྟར་བྱ་རྒྱུ་གཏན་འབེབས་བྱས་པ་ནས་ད་ལྟའི་བར་རྒྱ་ནག་དབུས་སྒྲིག་ཁྲིགས་ཞིབ་བཤེར་ཁང་གིས། དམར་ཤོག་ཚོགས་པ་ནང་ཁུལ་གྱི་གནད་ཡོད་དཔོན་རིགས་ཟུར་བ་དང་ལས་ཐོག་དཔོན་རིགས་ཁྱོན་ ༡༢༠ དང་། དཔོན་རིགས་དེ་ཚོ་དང་འབྲེལ་ཡོད་མི་མང་ ༡༠༠༠༠༠ ལྷག་འཛིན་བཟུང་དང་ཞིབ་བཤེར། བཙོན་འཇུག་བཅས་བྱས་ཡོད་འདུག
ཐེན་ཅིན་ནི་རྒྱ་ནག་གི་གྲོང་ཁྱེར་ཆེན་པོ་བཞིའི་གྲས་ཀྱི་གཅིག་ཡིན་ཞིང་། ཐེན་ཅིན་གྲུ་ཁ་ནི་རྒྱ་ནག་ནུབ་རྒྱུད་ཀྱི་དཔལ་འབྱོར་ཐོན་སྐྱེད་དང་འཁོར་རྒྱུག་གི་ལྟེ་བ་གཙོ་བོ་ཞིག་ཡིན་འདུག
གསར་འགོད་པ། པདྨ་རྒྱལ།
