བོད་མིའི་སྤྱི་མཐུན་མཉམ་འབྲེལ་ཁག་བཅོ་ལྔའི་འཛིན་སྐྱོང་ཚོགས་ཆེན་ཐེངས་ ༡༦ པ་དེ་ར་ལྦང་ལར་ཉིན་གསུམ་རིང་ཚོགས་ཡོད་འདུག
གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཚེས་ ༧ ནས་ ༩ བར་གྱི་ཉིན་གསུམ་རིང་། བོད་མིའི་མཉམ་འབྲེལ་བཅོ་ལྔའི་འཛིན་སྐྱོང་ཚོགས་ཆེན་ཐེངས་ ༡༦ པ་དེ་ར་ལྦང་ལ་ཀུན་ཕན་གླིང་གཞིས་ཆགས་སུ་ཚོགས་ཡོད་པ་དང་། ཚོགས་ཆེན་དབུ་འབྱེད་ཀྱི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་། དམིགས་བསལ་སྐུ་མགྲོན་བོད་མིའི་སྤྱི་མཐུན་མཉམ་འབྲེལ་གྱི་སློབ་སྟོན་པ་བཀའ་ཟུར་རྒྱ་རི་སྒྲོལ་མ་མཆོག བོད་མིའི་སྤྱི་མཐུན་མཉམ་འབྲེལ་ཚོགས་གཙོ་སྤྱི་འཐུས་པདྨ་བདེ་ལེགས་ལགས་དང་། འབྲས་ལྗོངས་ར་ལྦང་ལ་མཉམ་འབྲེལ་དེབ་བསྐྱེལ་ལས་ཁུངས་ཀྱི་ལས་བྱེད་པདྨ་རྡོ་རྗེ་ལགས་དང་། སི་ཀེ་རའི་ C K Rai ལགས། སྒང་ཏོག་དང་ར་སྦང་ལ་ས་གནས་མགོ་འཛིན། དེ་བཞིན། ས་གནས་ཀྱི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་མི་སྣ་བཅས་ཕེབས་ཡོད།
སྤྱི་མཐུན་མཉམ་འབྲེལ་གྱི་སྤྱི་ཁྱབ་འགན་འཛིན་བསྟན་འཛིན་ཡིད་དགའ་ལགས་ཀྱིས་སྐུ་མགྲོན་རྣམས་ཕེབས་བསུ་དང་སྦྲགས་ད་ལྟའི་བོད་མིའི་སྤྱི་མཐུན་མཉམ་འབྲེལ་གྱི་གནས་སྟངས་ངོ་སྤྲོད་གནང་རྗེས། སྤྱི་མཐུན་མཉམ་འབྲེལ་ཚོགས་གཙོ་སྤྱི་འཐུས་པདྨ་བདེ་ལེགས་ལགས་ཀྱིས་སྤྱི་མཐུན་མཉམ་འབྲེལ་གྱི་འཕེལ་རིམ་དང་མ་འོངས་ལས་འཆར། དེ་བཞིན། བོད་མིའི་གཞིས་ཆགས་ཁག་གི་མཉམ་འབྲེལ་ནང་མི་མང་མཉམ་ཞུགས་དང་གཞོན་སྐྱེས་ཚོས་ཆ་ཤས་བླངས་ཏེ། སོ་སོའི་གཞིས་ཆགས་ཡར་རྒྱས་གཏོང་ཐབས་ཐོག་ཧུར་ཐག་གནང་ཡོད་སྐོར་དང་། བཀའ་ཟུར་རྒྱ་རི་སྒྲོལ་མ་མཆོག་བོད་མིའི་སྤྱི་མཐུན་མཉམ་འབྲེལ་ཚོགས་པའི་སློབ་སྟོན་པ་གནང་རོགས་ཞེས་རེ་འདུན་ཞུས་པ་ལྟར་མོས་མཐུན་གནང་ཡོད་སྐོར་སོགས་བརྗོད་སོང་།
དེའི་རྗེས་བཀའ་ཟུར་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། བོད་མིའི་སྤྱི་མཐུན་མཉམ་འབྲེལ་གྱི་སློབ་སྟོན་པའི་ལས་གནས་འདིར་མོས་མཐུན་ཞུ་རྒྱུར་དགའ་ཚོར་ཆེན་པོ་བྱུང་བ་མ་ཟད། བོད་མིའི་སྤྱི་མཐུན་མཉམ་འབྲེལ་ནི་མི་མང་དང་ཐད་ཀར་འབྲེལ་བ་ཆགས་ཡོད་སྟབས། མང་ཚོགས་ཀྱི་བདེ་དོན་ཆེད་ཞབས་འདེགས་བསྒྲུབ་རྒྱུའི་གོ་སྐབས་ཆགས་ཡོད། ཅེས་དང་། བོད་མིའི་གཞིས་ཆགས་ཁག་ཐོག་མར་གསར་འཛུགས་སྐབས་དཀའ་ངལ་འཕྲད་དུས་མཉམ་འབྲེལ་གྱིས་བོད་མིའི་གཞིས་ཆགས་ཁག་གི་ནང་ཡར་རྒྱས་ཀྱི་བྱེད་སྒོ་སྤེལ་ཡོད་སྐོར་སོགས་བརྗོད་སོང་།
དེ་ནས་སྐུ་མགྲོན་གཙོ་བོ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་བོད་མིའི་སྤྱི་མཐུན་མཉམ་འབྲེལ་གྱིས་བོད་པའི་སྤྱི་ཚོགས་ནང་དགོས་མཁོ་བསྐྲུན་པར་བསྔགས་བརྗོད་དང་། སྤྱི་མཐུན་མཉམ་འབྲེལ་གྱི་འཛིན་སྐྱོང་གནད་སྨིན་ཡོང་སླད་མཉམ་འབྲེལ་གྱི་སྒྲིག་གཞི་དང་། གནས་ཡུལ་རྒྱལ་ཁབ་དང་བཙན་བྱོལ་བོད་མིའི་ཁྲིམས་ལུགས་ལྟར་བརྩི་སྲུང་བྱ་གལ་ཆེ་བ། འབྲེལ་ཡོད་མི་སྣ་རྣམས་ལ་ཚོགས་པའི་དམིགས་ཡུལ་དང་འགན་འཁྲི་སོགས་ཀྱི་སྐོར་ཟབ་སྦྱོང་དང་སྦྱོང་བརྡར་སོགས་ཕུལ་ཏེ་ཚོགས་པ་དེ་ལམ་ལྷོངས་ལྡན་པ་ཞིག་བཟོ་གལ་ཆེ་སྐོར་གསུངས་སོང་།
ད་དུང་བཀའ་བློན་མཆོག་གིས་ཚོང་ལས་ནང་མི་མང་གི་མཉམ་བཞུགས་དགོས་སྐོར་དང་བཀའ་ཤག་སྐབས་ ༡༥ ལས་འཆར་ལྔ་དང་ལྔ་བཅུ། དེ་བཞིན་ ༼བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་ཀྱི་སྲིས་བྱུས་ ༢༠༡༤༽ ལག་སྟར་གནང་ཕྱོགས་དང་། སྲིད་བྱུས་དེའི་འོག་མཉམ་འབྲེལ་བྱས་ཏེ་རྒྱ་གར་དབུས་གཞུང་དང་མངའ་སྡེའི་གཞུང་སོ་སོའི་ཁེ་ཕན་རིགས་ཐོབ་ཐབས་བྱ་དགོས་སྐོར་གསུངས།
སྤྱི་མཐུན་མཉམ་འབྲེལ་གྱི་ཚོགས་ཆེན་ཉིན་དང་པོར་ས་གནས་མཉམ་འབྲེལ་ཁག་གི་འདས་པའི་ལོ་གཅིག་གི་ལས་བསྡོམས་དང་རྩིས་ཁྲ། འབྱུང་འགྱུར་ལས་དོན་བྱེད་འཆར་དང་སྔོན་རྩིས་སྐོར་སྙན་སེང་དང་། ཕན་ཚུན་ལེགས་སྤེལ་ཉེས་འགོག་གི་དྲི་པ་དྲིས་ལན་དང་། ཉིན་གཉིས་པར་སྔ་ལོའི་འཛིན་སྐྱོང་ཚོགས་ཆེན་སྐབས་བཞག་པའི་གྲོས་ཆོད་ཀྱི་ལག་བསྟར་མཇུག་སྐྱོང་སྐོར་ལ་བསྐྱར་ཞིབ། ཉིན་གཉིས་པ་དང་གསུམ་པར་ཚོགས་ཆུང་ཁག་གསུམ་དུ་ཆ་བགོས་བྱས་ཏེ། མ་འོངས་པར་ལས་གཞི་རྒྱ་སྐྱེད་དང་འཛིན་སྐྱོང་ཚགས་ཚུད་གཏོང་ཕྱོགས་སོགས་ཀྱི་ཐོག་གོ་བསྡུར་དང་གྲོས་ཆོད་བཞག་ཡོད།
ཐེངས་འདིའི་དབུ་འབྱེད་ཀྱི་མཛད་སྒོའི་ཐོག་བོད་མིའི་སྤྱི་མཐུན་མཉམ་འབྲེལ་ལས་ཁང་གིས་ཨོ་རི་ས་ཕུན་ཚོགས་གླིང་མཉམ་འབྲེལ་དང་རྡོར་གླིང་བསུ་ན་མདའ་མཉམ་འབྲེལ་གཉིས་བཙུགས་ཏེ་སྤྱི་ཚོགས་ལ་མཐུན་འགྱུར་དང་ཞབས་འདེགས་རྒྱ་ཆེ་ཞུས་གནང་པར་ལོ་ངོ་ ༥༠ ཧྲིལ་པོ་འཁོར་བའི་འཚམས་འདྲི་དང་ལེགས་སོའི་གྱི་བྱ་དགའ་སྩལ་ཡོད།
