དེ་རིང་གསེར་རྟ་རྫོང་ནས་ཡིན་པའི་བོད་རིགས་དགེ་རྒན་གངས་སྐྱེས་སྒྲུབ་པ་སྐྱབས་ལགས་བཙོན་ཁང་ནས་ཀློད་གྲོལ་བཏང་ཡོད་འདུག
དེ་རིང་སྔ་དྲོར་གསེར་རྟ་རྫོང་རགས་བཀྲམ་ཡུལ་ཚོ་ནས་ཡིན་པའི་བོད་རིགས་དགེ་རྒན་གངས་སྐྱེས་སྒྲུབ་པ་སྐྱབས་ལགས་བཙོན་ཁང་ནས་ཀློད་གྲོལ་བཏང་ཡོད་པ་དང་། ཁོང་གི་བཙོན་འཇུག་དུས་ཡུན་ལོ་ ༥ དང་ལོ་ཕྱེད་རྫོགས་མེད་སྟབས། ཁོང་གི་གྲོགས་པོ་ཞིག་ལ་ཀློད་གྲོལ་བཏང་བའི་གནས་ཚུལ་དེ་བདེན་པ་ཡིན་མིན་དང་། ཁོང་གི་སྐུ་གཟུགས་གནས་སྟངས་ག་འདྲ་ཡོད་དྲིས་པར་ཁོང་གིས། དེ་རིང་སྔ་དྲོར་གངས་སྐྱེས་སྒྲུབ་པ་སྐྱབས་ལགས་ཀློད་གྲོལ་བཏང་འདུག་ཀྱང་། བདེ་ཐང་ཡིན་མིན་བཤད་ཚོད་ཐུག་མ་སོང་ཞེས་བརྗོད་བྱུང་།
ཁོང་ཀློད་གྲོལ་བཏང་སྟེ་ཕ་ཡུལ་དུ་འབྱོར་སྐབས། ཁོང་གི་ཁྱིམ་མི་གཉེན་ཉེ་དང་ཡུལ་མི་མང་པོ་འདུ་འཛོམས་བྱས་ཏེ། གངས་སྐྱེས་སྒྲུབ་པ་སྐྱབས་ལགས་གཟི་བརྗིད་ངང་ཕྱིར་ཕེབས་པར་དགའ་བསུ་ཞུ་ཞེས་པའི་འཕྲེད་དར་འཕྱར་ཏེ་བོད་ཟས་ཐུད་དང་ཞོ། གོ་རེ་སོགས་ཀྱི་སྡེར་ཁ་བསྒྲིགས་ཏེ་ཕེབས་བསུའི་དགའ་སྟོན་ཟབ་རྒྱས་ཞུས་ཡོད་འདུག
ས་བྱི་ཁྲག་བྲིས་དམར་པོ་དང་དེ་རིང་གི་མིག་ཆུ་ཞེས་པ་སོགས་ཀྱི་དཔེ་དེབ་རྩོམ་པ་པོ་གངས་སྐྱེས་སྒྲུབ་པ་སྐྱབས་སམ། སྨྱུག་མིང་གངས་མེ་སྟག་ལགས་ཕྱི་ལོ་ ༢༠༡༢ ལོའི་ཟླ་ ༢ ཚེས་ ༡༥ ཉིན་གྱི་མཚན་མོར་རྒྱ་གཞུང་ཉེན་རྟོག་པས་འཛིན་བཟུང་བྱས་ཏེ། ཕྱི་ལོ་ ༢༠༡༣ ཟླ་ ༨ ཚེས་ ༡ ཉིན་ཉག་ཆུ་རྫོང་མི་མང་ཁྲིམས་ཁང་གིས་ཁོང་དམར་ཆུང་ངོ་རྒོལ་ཚོགས་པའི་ཚོགས་མི་ཡིན་པ་དང་བོད་དོན་ལས་འགུལ་སྤེལ་ཡོད་པའི་ཉེས་མིང་འོག ཁོང་ལ་ལོ་ ༥ དང་ལོ་ཕྱེད་ཀྱི་བཙོན་འཇུག་ཁྲིམས་ཐག་བཅད་ཡོད་པ་དང་། སྐབས་དེར་ཉེས་མིང་དེའི་འོག་ཁོང་དང་མཉམ་དུ་བོད་རིགས་བསམ་འགྲུབ་ལགས་ལ་ལོ་ ༥ དང་། གཡུ་སྦྲང་ལགས་ལ་ལོ་ ༢། དྲན་གསལ་ལགས་ལ་ལོ་ ༣། ཤེལ་རྒྱལ་ལགས་ལ་ལོ་ ༢ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་པ་རེད།
གསར་འགོད་པ། པདྨ་མཚོ།
