སྤྱི་འཐུས་གྲོས་ཚོགས་ནང་དཔལ་འབྱོར་ལས་ཁུངས་ཀྱི་ལས་བསྡོམས་ཐོག་བགྲོ་གླེང་གནང་སྐབས་གླེང་གཞི་ཆེ་ཤོས་གསུམ་ནི། བོད་མིའི་སྒྲིག་འཛུགས་ཀྱི་ཚོང་ལས་ཡར་རྒྱས་རམ་འདེགས་ལས་གཞི་དང་། ཁྱད་ལས་དང་བླངས་ཞབས་ཞུའི་ལས་གཞི། དེ་བཞིན། བོད་མིའི་དང་བླངས་དཔྱ་དངུལ་ལག་དེབ་ཀྱི་དཀའ་ངལ་སྐོར་སོགས་རེད།
ཁ་སང་ཕྱི་ཚེས་ ༢༤ ཉིན་གྱི་སྔ་དྲོར། སྐབས་བཅུ་དྲུག་པའི་སྤྱི་འཐུས་གྲོས་ཚོགས་ཚོགས་དུས་གཉིས་པའི་སྟེང་། དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་འདས་པའི་ལོ་གཅིག་རིང་གི་དཔལ་འབྱོར་ལས་ཁུངས་ཀྱི་ལས་བསྡོམས་སྙིང་བསྡུས་སྙན་སེང་ཞུས་རྗེས། སྤྱི་འཐུས་ཚོས་སོ་སོའི་དགོངས་ཚུལ་དང་དོགས་འདྲི་ཞུས་ཡོད། སྤྱིར་འགྲོ་སྟངས་ལྟར་ན། ལྷན་ཁང་ཁག་གི་ལས་བསྡོམས་ཟླ་ཤས་གོང་ནས་སྤྱི་འཐུས་རྒྱུན་ལས་སུ་ཕུལ་རྗེས། སྤྱི་འཐུས་རྒྱུན་ལས་ཀྱིས་ཚོགས་ཆུང་ཁག་བསྒོས་བྱས་ཏེ་ལྷན་ཁང་ཁག་གི་ལས་བསྡོམས་ལ་བསྐྱར་ཞིབ་བྱས་ཏེ། སྙན་ཐོ་ཐེངས་འདིའི་གྲོས་ཚོགས་སུ་འབུལ་དགོས་ཀྱང་། ཐེངས་འདིར་དཔལ་འབྱོར་ལས་བསྡོམས་ཐོག་སྤྱི་འཐུས་རྒྱུན་ལས་ཀྱི་དོགས་འདྲི་དང་ཞིབ་འཇུག་སོགས་ཀྱི་སྙན་ཐོ་གང་ཡང་མེད་སྐོར་བརྗོད་སོང་།
དཔལ་འབྱོར་ལས་ཁུངས་ཀྱི་ལས་བསྡོམས་ནང་བཀོད་པ་ལྟར་ན། ༢༠༡༥ ཟླ་ ༦ ཚེས་ ༢༦ ཉིན། ཁྱད་མཁས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་ལས་གཞིའི་ཁྲོད། ཚོང་པ་གསར་པ་ ༧ ནང་ཁུལ་ཚོང་ལས་འཆར་གཞི་འགྲན་བསྡུར་བྱས་ཏེ། སྐབས་དང་པོའི་ཚོང་པ་རེར་ཧིན་སྒོར་འབུམ་ ༡ རེ་རྔན་པ་དང་། ཧིན་སྒོར་འབུམ་ ༡ རེ་སྐྱེད་མེད་བུན་གཡར་བྱས་ཡོད་པ་དང་། ༢༠༡༥ ཟླ་ ༨ པའི་ཚེས་ ༣༠ ཉིན། སྐབས་གཉིས་པའི་ཚོང་པ་ ༤ ལ་མ་དངུལ་རོགས་སྐྱོར་གཟེངས་རྟགས་འབུལ་རྒྱུར་བདམས་འཐོན་བྱུང་ཡོད་འདུག དེ་བཞིན། ༢༠༡༥ ཟླ་ ༨ ཚེས་ ༣༠ ཉིན་དྷ་རམ་ས་ལར་སྐབས་དང་པོའི་ཡར་འཐོན་ཚོང་ལས་ཚོགས་འདུ་ཚོགས་པའི་སྟེང་ཚོང་པ་ ༨༠ ཙམ་མཉམ་ཞུགས་གནང་ཡོད་འདུག
ལས་གཞི་འདིའི་ཐད་སྤྱི་འཐུས་ཚོས། སྔོན་ཆད་དཔལ་འབྱོར་ལས་ཁུངས་ཀྱིས་ཆ་རྐྱེན་གང་ཡང་མེད་པར་ཚོང་པ་གསར་པ་ཚོར་ཧིན་སྒོར་འབུམ་གཅིག་རེ་སྤྲོད་རྒྱུ་བྱས་ཡོད་ཀྱང་། རྗེས་ལ་དངོས་སུ་ཐོབ་མཁན་ཚོར་ཆ་རྐྱེན་འདྲ་མིན་བཏོན་ཏེ་དངུལ་དེ་དུམ་བུ་མང་པོ་བྱས་ཏེ་སྤྲོད་བཞིན་ཡོད་པ་དེར་སྤྱི་ཚོགས་ནང་ལབ་གླེང་མང་པོ་ཡོད་སྐོར་དང་། ཉེ་ལམ་ཕྱི་ཟླ་ ༨ པའི་ཟླ་མཇུག་ལ་ཡར་འཐོན་ཚོང་ལས་ཚོགས་འདུ་ཐེངས་གཉིས་པའི་སྐབས། དཔལ་འབྱོར་ལས་ཁུངས་ཀྱིས་ས་གནས་ཁག་ལ་བརྡ་ཐོ་བཏང་བར། ས་གནས་གཞིས་མགོ་ཁག་གིས་ཚོང་པ་འགྲོ་མཁན་མ་རེག་སྟབས། མང་ཚོགས་ལ་ཁྲལ་ལྟ་བུ་བཞག་སྟབས། ཚོང་ལས་ཙག་ཙིག་གཉེར་མཁན་དང་སྒྱུ་མ་ཚོང་མཁན་སོགས་ཀྱང་ཕྱིན་ཡོད་པ་མ་ཟད། ས་གནས་རེ་ཟུང་ནང་མང་ཚོགས་ལ་རྒྱན་བརྒྱབ་སྟེ་ཚོང་ལས་ལ་འབྲེལ་བ་མེད་པའི་གྲྭ་བའང་ཕྱིན་ཡོད་ཚུལ་སོགས་བརྗོད་སོང་།
བོད་མིའི་ཚོང་ལས་རམ་འདེགས་ལས་གཞི་དེ་ནི། ༢༠༡༥ ཟླ་ ༥ ཚེས་ ༢༥ ཉིན། གངས་སྐྱིད་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། དཔལ་འབྱོར་ལས་ཁུངས་ཀྱི་དྲུང་ཆེ་འཕྲིན་ལས་རྒྱ་མཚོ་རྣམ་གཉིས་ཀྱིས་གསར་འགོད་གསལ་བསྒྲགས་སྤེལ་ཏེ། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འོག ༼ སྲིད་སྐྱོང་ཁྱད་མཁས་ཚོང་པའི་གཟེངས་རྟགས་ ༢༠༡༥ ༽ཟེར་བ་ཞིག་དང་། ༼ ཁྱད་མཁས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས། ༽ཟེར་བ་གཉིས་མགོ་འཛུགས་བྱ་རྒྱུ་ཡིན་པ་དང་། སྲིད་སྐྱོང་ཁྱད་མཁས་ཚོང་པའི་གཟེངས་རྟགས་ཧིན་སྒོར་འབུམ་ ༢༡ སྤྲོད་རྒྱུ་དང་། ཁྱད་མཁས་ཚོང་པ་གསར་པའི་མ་དངུལ་རོགས་སྐྱོར་ཧིན་སྒོར་འབུམ་ ༡༥ སྤྲོད་རྒྱུ་ཡིན་སྐོར་བསྒྲགས་ཡོད།
སྐབས་དེེའི་གསལ་བསྒྲགས་ལྟར་ན། སྲིད་སྐྱོང་ཁྱད་མཁས་ཚོང་པའི་གཟེངས་རྟགས་དེ་ད་ཡོད་བཙན་བྱོལ་སྤྱི་ཚོགས་ནང་གི་དོ་དག་ཚོང་པ་རང་གིས་བཙན་བྱོལ་སྤྱི་ཚོགས་ལ་ཕན་ནུས་ཁྱབ་ཆེ་ཆུང་ག་ཚོད་གནང་ཡོད་མེད་དང་། ཚོང་པ་རང་ཉིད་ཀྱི་ཚོང་ལས་དེའི་ཐོག་ནས་འབྱུང་འགྱུར་ཚོང་པ་གསར་པ་ག་ཚོད་ལ་སེམས་ཤུགས་སྐྱེ་གཞིའི་དམིགས་དཔེར་འགྱུར་མིན་སོགས་ལ་གཞིགས་ཏེ་ཚོང་པ་ ༡ ལ་ཆེ་བསྟོད་ཧིན་སྒོར་ ༢༡༠༠༠༠༠ གནང་གཏན་འཁེལ་བ་དང་། ༼ཁྱད་མཁས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས༽ཞེས་པ་ནི་ཚོང་ལས་ལ་གསར་དུ་ཞུགས་མཁན་གཞོན་སྐྱེས་ཚོང་ལས་འཆར་གཞི་དང་འདུན་པ་ཚད་ལྡན་ཡོད་ཀྱང་། དཔལ་འབྱོར་གྱི་བརྒྱབ་བརྟེན་མེད་མཁན་ཚོར་དམིགས་ཏེ། ཚོང་པ་གསར་པ་ ༧ ཙམ་ལ་མ་དངུལ་རོགས་སྐྱོར་ཧིན་སྒོར་ ༡༥༠༠༠༠༠ ཙམ་བགོ་འགྲེམ་གནང་གཏན་འཁེལ་ཡོད་པ་རེད།
བོད་མིའི་ཁྱད་ལས་དང་བླངས་ཞབས་ཞུའི་ལས་གཞི་དེ་ནི། ༢༠༡༢ ཟླ་ ༤ པའི་ནང་མགོ་འཛུགས་གནང་ཡོད་པ་དང་། ཐོག་མ་བཀའ་ཤག་འོག་ཏུ་སྡེ་ཚན་ཟུར་འཛུགས་བྱས་ཡོད་ཀྱང་། ད་ཆར་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འོག་ཟླ་བསྒྲིལ་བཏང་ཡོད་པ་དང་། ལས་གཞི་འདིའི་འོག་ ༢༠༡༢ ལོར་དང་བླངས་ཁྱད་ལས་པ་ ༩ དང་། ༢༠༡༤ ལོར་ཁྱད་ལས་པ་ ༡༣ ། ༢༠༡༥ ལོར་ཁྱད་ལས་པ་ ༢༡ ། ༢༠༡༦ ལོར་ཁྱད་ལས་པ་ ༡༥ བཅས་བྱུང་ཡོད་འདུག སྤྱི་འཐུས་ཚོས་ལས་གཞི་འདི་ད་ལྟ་ལམ་ལྷུང་ཡོང་གི་ཡོད་མེད་དང་། དང་བླངས་ཞབས་ཞུ་བ་དོ་བདག་སྒེར་སོ་སོ་དང་། དེ་བཞིན། བོད་མིའི་སྒྲིག་འཛུགས་སོགས་ལ་ཁ་ཡོད་ལག་ཡོད་ཀྱི་ཕན་ཐོགས་ཀྱི་ཡོད་མེད་དོགས་འདྲི་ཞུས་པའི་ལན་དུ་དཔལ་འབྱོར་བཀའ་བློན་མཆོག་གིས། ལས་གཞིའི་འདིའི་ཐོག་བཀའ་ཤག་གིས་གསལ་བསྒྲགས་བཏང་བ་བཞིན་ཕྱི་རྒྱལ་བོད་པ་ཁྱད་མེད་སྙན་ཞུ་འབུལ་རིགས་ཀྱི་ཆ་རྐྱེན་ལ་གཞིགས་ཏེ། གཞུང་གི་ལས་ཁུངས་ཁག་དང་སློབ་གྲྭའི་དགེ་རྒན་སོགས་གང་དུ་འོས་པ་དེ་བཞིན་ལས་གནས་གོ་སྒྲིག་ཞུ་བཞིན་ཡོད་སྐོར་གསུངས་སོང་། དེ་བཞིན། བོད་མིའི་སྒྲིག་འཛུགས་ཀྱི་དེ་སྔའི་འཆར་འགོད་ལྷན་ཁང་ཡང་དཔལ་འབྱོར་ལས་ཁུངས་ཀྱི་སྤྱི་ཚོགས་ཐེབས་རྩའི་འོག་ཏུ་ཟླ་བསྒྲིལ་བཏང་སྟེ་འཆར་འགོད་ལྷན་ཚོགས་སུ་མིང་བསྒྱུར་བྱས་ཡོད་འདུག
དང་བླངས་དཔྱ་དངུལ་ལག་དེབ་༼ རང་བཙན་ལག་དེབ། ༽ཐད། ཕྱི་ལོ་ ༢༠༡༥ ནས་ ༢༠༡༦ ལོའི་བར་རྒྱ་བལ་འབྲུག་གསུམ་གྱི་རང་བདེན་ཚོགས་ཆུང་ཁག་དང་། ཕྱི་རྒྱལ་སྐུ་ཚབ་དོན་གཅོད་ཁག་བཅས་ནས་དཔྱ་དངུལ་ལག་དེབ་དང་ངེས་ཅན་བསྡུ་དངུལ་སོགས་ལས་ཧིན་སྒོར་ས་ཡ་ ༡༩༠་༦༢ ཙམ་བསྡུ་རུབ་བྱས་ཡོད་འདུག ད་ལོར་དང་བླངས་དཔྱ་དངུལ་ལག་དེབ་གསར་པ་ ༣༠༤༣ ཙམ་བཟོས་ཏེ། ཁྱོན་ད་ལྟ་བླངས་དཔྱ་དངུལ་ལག་དེབ་ ༡༤༩༠༧༣ ཙམ་བཟོས་ཡོད་འདུག ད་ལོར་དང་བླངས་དཔྱ་དངུལ་ལག་དེབ་ ༡༦༦༠ ཙམ་ནོར་བཅས་བྱས་ཏེ། ཁྱོན་ད་བར་ལག་དེབ་ ༡༡༦༣༣ ཙམ་ནོར་བཅོས་བྱས་ཡོད་འདུག ད་ལོར་ལག་དེབ་བོར་བརླག་ཕྱིན་པ་ ༢༣༩ ཙམ་བསྐྱར་བཟོ་བྱས་ཏེ། ཁྱོན་ད་བར་བོར་བརླག་ཕྱིན་པ་ ༡༢༠༢ ཙམ་བསྐྱར་བཟོ་བྱས་ཡོད་འདུག གཞན། ཕྱི་རྒྱལ་ཁག་ཏུ་སྡོད་མཁན་ཚོའི་གཏན་སྡོད་ཡིག་ཆའི་ནང་གི་མིང་ལྟར་དཔྱ་དངུལ་ལག་དེབ་ ༡༣༦༣ ཙམ་མིང་བསྒྱུར་བྱས་ཡོད་འདུག ད་ལོར་དང་བླངས་དཔྱ་དངུལ་ལག་དེབ་ནང་སོ་སོའི་མིང་དང་སྐྱེས་ལོ་སྐྱེས་ཚེས། སྐྱེས་ཡུལ་སོགས་ལོ་རྒྱུས་སྙིང་བསྡུས་ཙམ་ལས་མེད་པའི་ལག་དེབ་གསར་པ་ ༣༩ ཙམ་བཟོས་ཏེ་ཁྱོན་ད་བར་ལག་དེབ་གསར་པ་ ༦༢ བཟོས་ཡོད་འདུག
ཕྱི་རྒྱལ་ཁག་ཏུ་དཔྱ་དངུལ་ལག་དེབ་ཀྱི་དཀའ་ངལ་སྣ་ཚོགས་ཐད། འདས་ལོར་དཔལ་འབྱོར་བཀའ་བློན་དང་འབྲེལ་ཡོད་ལས་བྱེད་སྐོར་སྐྱོད་གནང་སྟེ། སུད་སུ་ནས་མི་ ༡༣༠༠ དང་ཨ་རི་དང་ཁེ་ན་ཌ་ནས་མི་ ༡༥༠༠ ཙམ་ལ་དཔྱ་དངུལ་ལག་དེབ་བཟོས་ཡོད་པ་དང་། མི་ ༥༣༢ ཙམ་གྱིས་དངུལ་ཆད་ཆག་ཡང་ཞུས་ཏེ་ཁྱོན་ཧིན་སྒོར་ས་ཡ་ ༣་༠༥ ཙམ་བསྡུ་ཐུབ་ཡོད་འདུག
ལས་བསྡོམས་ནང་འཁོད་པ་ལྟར་ན། འདས་ལོར་བཙན་བྱོལ་བོད་མིའི་སུད་ཚོང་ཁག་ནས་ཚོང་ཕུད་ཞལ་འདེབས་ཧིན་སྒོར་ ༢༨༦༨༩༠ ཕུལ་ཡོད་འདུག སྤྱི་འཐུས་ཀརྨ་དགེ་ལེགས་ལགས་ཀྱིས་དོགས་འདྲི་ཞུས་པ་ལྟར་ན། བཙན་བྱོལ་བོད་མིའི་སུད་ཚོང་སྐྱིད་སྡུག་ཚོགས་པའི་ནང་ས་གནས་ཁག་ ༡༦༥ དང་། ཁྱིམ་ཚང་ ༣༤༠༥ ཙམ་ཡོད་འདུག་ལ། མ་འོངས་པར་དཔལ་འབྱོར་ལས་ཁུངས་ཀྱིས་ཤུགས་བརྒྱབ་པ་ཡིན་ན་སུད་ཚོང་ཞལ་འདེབས་འདི་ལས་མང་བ་འཐོབ་པའི་རེ་བ་ཡོད་སྐོར་གསུངས་སོང་།
གཞན། འདས་ལོར་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩ་བརྒྱུད་དེ། ཨ་རིའི་གཞུང་གིས་རོགས་དངུལ་ཧིན་སྒོར་ས་ཡ་ ༡༢༣་༩༨ དང་། ནོར་ཝེ་གཞུང་གིས་ཧིན་སྒོར་ས་ཡ་ ༢༢་༧༩ ། ཡུ་རོབ་སྤྱི་མཐུན་རྒྱལ་ཁབ་ནས་ཧིན་སྒོར་ས་ཡ་ ༢་༢༥ བཅས་གནང་ཡོད་འདུག གཞན། ཨ་རིའི་ཨེན་ཨི་ཌི་རོགས་ཚོགས་ནས་སྒོར་ས་ཡ་ ༡་༥༣ དང་། ཕེཊ་རིཀ་ནའོ་མན་རོགས་ཚོགས་ནས་སྒོར་ས་ཡ་ ༦་༥༣ ། ཨའེ་ཡེམ་རོགས་ཚོགས་ནས་སྒོར་ས་ཡ་ ༤་༢༥ ། ལེས་ཨེ་མིས་གྲུས་རོགས་ཚོགས་ནས་སྒོར་ས་ཡ་ ༡་༣༨ ། ཁེ་ན་ཌའི་ཏཱ་ལའི་བླ་མ་ཚོགས་པ་ནས་སྒོར་ ༧༢༠༠༠༠ ། ཨ་རི་བོད་ཀྱི་ཐེབས་རྩ་ནས་ཧིན་སྒོར་ས་ཡ་ ༡་༣༥ ། ཨ་རིའི་གཞུང་གིས་བོད་མིའི་སྒྲིག་འཛུགས་ཀྱི་གློག་ཀླད་དྲ་རྒྱ་སྲུང་སྐྱོབ་ཆེད་སྒོར་ས་ཡ་ ༢་༦༠ ། ཨིས་ཊེལ་རོགས་ཚོགས་ནས་སྒོར་ས་ཡ་ ༡་༢༡ བཅས་རེག་ཡོད་འདུག
ཐེངས་འདིར་བྱང་ཨ་རིའི་སྤྱི་འཐུས་པདྨ་ཕྱག་མཛོད་ཚང་གིས་ཕྱི་རྒྱལ་བོད་པར་གཉེན་སྒྲིག་བྱས་ཡོད་རིགས་དང་། དེ་དག་གི་བུ་ཕྲུག་སོགས་བོད་ཀྱི་ཡུལ་མིའི་ཁོངས་སུ་ཞུགས་ཆོག་པ་དང་། བོད་མིའི་དང་བླངས་དཔྱ་དངུལ་ལག་དེབ་ཀྱི་ཐོབ་ཐང་སྤྲོད་དགོས་སྐོར་བརྗོད་སོང་ལ། ཡུ་རོབ་སྤྱི་འཐུས་ཟམ་མདོ་བྱམས་པ་ལགས་ཀྱིས། དེང་སྐབས་རྒྱ་བལ་འབྲུག་གསུམ་ནང་བོད་པ་ཉུང་དུ་འགྲོ་བཞིན་ཡོད་པ་དང་ཕྱི་རྒྱལ་ཁག་ལ་མང་དུ་འགྲོ་བཞིན་ཡོད་སྟབས། ༢༠༢༡ ལོའི་འོས་བསྡུའི་སྐབས་ཆོལ་ཁའི་སྤྱི་འཐུས་ཉུང་དུ་བཏང་སྟེ་ཆོལ་ཁ་རེར་སྤྱི་འཐུས་ ༩ རེ་དང་། ཡུ་རོབ་ལ་མང་དུ་བཏང་སྟེ་སྤྱི་འཐུས་ ༣ དང་། ཨ་རི་ལ་ ༣ བཅས་བཟོ་དགོས་སྐོར་བརྗོད་སོང་།
ཚོགས་ར་འདིའི་ནང་ལ་བོད་སྐད་གཙང་མ་ཤོད་མཁན་རེ་ཟུང་ཡོད་པར་སྙིང་ཐག་པ་ནས་ཐུགས་རྗེ་ཆེ།
ཁྱད་ལས་པའི་ལས་གཞི་ཞེས་པ་དེ་ལས་བྱེད་བུ་མོ་རྣམ་པ་ཡོད་མཁན་སློབ་སྦྱོང་མེད་པ་དེ་འདྲ་གངས་ཅན་སྐྱིད་གཤོངས་ལ་ཉར་བྱེད་ཀྱི་ས་དམིགས་ཞིག་རེད། དེ་སྔ་བཀའ་ཤག་ནང་ཉར་ཡོད་རེད། དེ་ནས་སྲིད་སྐྱོང་མཆོག་ལ་མཚན་ཤས་མང་པོ་བྱུང་བས་རྗེས་སུ་དཔལ་འབྱོར་ལས་ཁུངས་ལ་གནས་སྤོས་བྱས་ཡོད། ད་ལྟའི་དཔལ་འབྱོར་བཀའ་བློན་གྱི་སྤུན་ཉེ་རེད་འདུག ཉེ་ཆར་ཁྱད་ལས་ལས་གཞིའི་མིང་ཐོག་ནས་ཨ་རིར་སྤྲོ་འཁྱམས་ལ་བཏང་ཡོད་པ་རེད། ཁ་སང་གྲོས་ཚོགས་ནང་བཀའ་བློན་བྱེ་བྲག་པའི་མི་ཡིན་ཟེར་མཁན་ཡོད་ཚུལ་སྐོར་དེ་གླིང་གཞི་འདི་ནས་རེད། ད་འདི་ཙམ་ཡིན། ཚོད་མེད་ན་རྗེས་སུ་རྩོམ་ཡིག་རྒྱས་པ་ཞིག་ཕུལ་གྱི་ཡིན།
ཡོངས་འདུས་རང་བཞིན་གྱི་གསར་འགྱུར་འདི་ཡག་པོ་ཞེ་དྲགས་འདུག
ང་ལ་དོགས་པ་ཆེན་པོ་ཞིག་སླེབས་སོང་། ལས་སྡོམ་ནང་ ” ཁྱོན་ད་ལྟ་བླངས་དཔྱ་དངུལ་ལག་དེབ་ ༡༤༩༠༧༣ ཙམ་བཟོས་ཡོད་འདུག ” ཞེས་འཁོད་འདུག རང་བཙན་ལག་དེབ་བཟོ་རྒྱུ་མགོ་བཙུགས་ཏེ་ད་བར་ལོ་ ༣༠ ་ལྷག་འགྲོ་བཞིན་ཡོད་པ་རེད། དེའི་ནང་གི་མི་མང་པོ་ཞིག་གྲོངས་ཚར་ཡོད་པ་རེད།
རང་གཞུང་དཔལ་འབྱོར་ལས་ཁུངས་ཀྱི་འདས་པའི་ལོ་གཅིག་རིང་གི་ལས་བསྡོམས་ལ་ཕྱོགས་སྡོམ་རང་བཞིན་གྱི་རྩོམ་ཡིག་ཧ་ཅང་ཡག་པོ་ཞིག་བྲིས་འདུག ད་དུང་སྤྱི་འཐུས་རྣམས་པ་ཚོས་དགོངས་ཚུལ་མི་མཐུན་པ་ག་རེ་གསུངས་ཡོད་མེད་རྒྱས་པ་བྲིས་ཡོད་ན་ཕུན་སུམ་ཚོགས་པའི་ཡན་ལག་ཅིག་ཆགས་ཡོད་པ་རེད།
ཡོ་རོབ་དང་ཨ་རི་ལ་སྤྱི་འཐུས་གསུམ་རེ་དགོས་ཟེར་བ་དེ་ཡུ་རོབ་སྤྱི་འཐུས་ཟམ་མདོ་བྱམས་པས་མགོ་མ་འཚོས་པ་རེད། བོད་མི་མང་སྤྱི་འཐུས་ཀྱི་གྲུབ་སྟངས་དེ་ས་ཁུལ་རང་བཞིན་གྱི་སྤྱི་འཐཱུས་མ་རེད། ཆོལ་ཁ་དང་ཆོས་བརྒྱུད་རང་བཞིན་གྱི་སྤྱི་འཐུས་རེད།
སྤྱི་འཐུས་རྒྱུན་ལས་ཀྱིས་དོགས་འདྲི་མ་རྙེད་དོན་ག་རེ་རེད། གྲོས་ཚོགས་ནང་དྲི་བ་མང་ཐག་ཆོད་ཅིག་སླེབས་སོང་། ད་དུང་སྤྱི་འཐུས་མང་པོ་ཞིག་གིས་དཔལ་འབྱོར་ལས་ཁུངས་ཀྱི་ཕྱག་གནས་གནང་སྟངས་ཐོག་འགོད་པ་མེད་པའི་གནས་ཚུལ་ཡང་གསུངས་ཡོད་པ་རེད།