བཀའ་ཤག་གིས་དངུལ་ཁང་འཛུགས་རྒྱུ་ཡིན།

དེ་རིང་གྲོས་ཚོགས་ནང་བགྲོ་གླེང་མང་པོ་གནང་མཐར་བཀའ་ཤག་གིས་དམིགས་བསལ་ལས་བྱེད་ ༡༨ ལས་མ་མང་བ་ཞིག་ཐད་བསྐོ་གནང་ཆོག་པའི་སྒྲིག་གཞི་གཏན་འབེབས་གནང་སོང་།

བདུན་ཕྲག་སྔོན་མའི་ནང་བཀའ་ཤག་གིས་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་ཞིག་འཁྱེར་ཡོང་སྟེ་གྲོས་ཚོགས་ལ་སྙན་སེང་ཞུས་པའི་ནང་། བཀའ་ཤག་གིས་དམིགས་བསལ་ལས་བྱེད་ ༡༨ ལས་མ་མང་བ་ཞིག་ཐད་བསྐོ་བྱེད་ཆོག་པའི་ལམ་ཁ་བཟོ་དགོས་ཚུལ་འཁོད་ཡོད་པའི་ཐོག སྤྱི་འཐུས་མང་པོ་ཞིག་གིས་དགོངས་ཚུལ་གསུངས་ཏེ། གལ་སྲིད་བཀའ་ཤག་གིས་བློ་བུར་ཐོག་རྒྱག་ལ་ལས་བྱེད་དེ་འདྲ་ཞིག་བསྐོ་བཞག་བྱས་ན། དེ་སྔའི་གཞུང་ཞབས་ཐག་པ་རིམ་འཛེགས་བྱས་ཏེ་ཡོང་མཁན་མང་པོ་ཞིག་གི་གནས་རིམ་དང་ས་མིག་སོགས་བཀག་འགོག་བྱེད་སྲིད་སྐོར་དང་། བཀའ་ཤག་སྐབས་སྔ་མར་གྲོས་འདྲི་བ་དང་གྲོས་འདོན་པ་སོགས་མང་པོ་ཞིག་བསྐོ་བཞག་བྱས་པར་བརྟེན་ཏེ། སྲིད་སྐྱོང་ལ་ལབ་གླེང་སྣ་ཚོགས་བྱུང་ཚུལ་སོགས་བརྗོད་ཡོད་སོང་།

ཡང་སྤྱི་འཐུས་ཁག་ཅིག་གིས་བཀའ་ཤག་ལ་ངེས་པར་དུ་དེ་ལྟ་བུའི་ལས་བྱེད་ཁ་ཤས་ཀྱི་དགོས་མཁོ་ཡོད་ཚེ་གཞུང་ཞབས་འདེམས་བསྐོ་ལྷན་ཁང་གི་སྒྲིག་གཞིའི་ནང་མི་འཇུག་པར། ཟུར་དུ་སྒྲིག་གཞི་གསར་པ་བཟོས་ཏེ་བསྐོ་བཞག་བྱ་རྒྱུ་དང་། ཡང་ན། གཞུང་ཞབས་འདེམས་བསྐོ་ལྷན་ཁང་གི་དེ་སྔའི་ཆོད་གན་ལས་བྱེད་ཀྱི་སྒྲིག་གཞི་བསྐྱར་བཅོས་བྱས་ཏེ། དུས་ཡུན་ཕར་འགྱང་གིས་དགོས་མཁོ་ཅན་གྱི་ལས་བྱེད་དེ་དག་ཆོད་གན་གྱི་ངོ་བོར་བསྐོས་ན་བཟང་ཚུལ་སོགས་བརྗོད་དེ་གཏན་འབེབས་བྱེད་ཐུབ་མེད།

དེ་རིང་ཕྱི་དྲོར་སླར་ཡང་སྤྱི་འཐུས་མང་པོ་ཞིག་གིས་དགོངས་འཆར་བཏོན་པ་ལྟར་ཁྲིམས་འཆར་དེའི་ནང་དོན་ལ་འགྱུར་བ་ཕྲན་བུ་བཏང་སྟེ། གྲོས་ཚོགས་ནང་སྙན་སྒྲོན་ཞུས་ཏེ་འོས་བསྡུ་གནང་སྐབས་སྤྱི་འཐུས་ ༣༡ གིས་རྒྱབ་སྐྱོར་གནང་སྟབས་མང་མོས་ཐོག་ཐག་གཅོད་གནང་ཡོད་པ་རེད།

སྒྲིག་གཞི་བསྐྱར་བཅོས་དེའི་ནང་། “དམིགས་བསལ་དགོས་གལ་བྱུང་ཚེ་འབྲེལ་ཡོད་བཀའ་བློན་ལས་ཁུངས་སོ་སོའི་འཆར་འབུལ་ལྟར་བཀའ་ཤག་ནས་ལས་བྱེད་ས་མིག་རྩ་འབོར་གྱི་བརྒྱ་ཆ་ ༣ མམ། ལས་བྱེད་མི་གྲངས་ ༡༨ ལས་མ་མང་བ་ལོ་དུས་རྒྱས་བཅས་ཐོག་བཀའ་ཤག་སྐབས་སོ་སོའི་ལས་ཡུན་རིང་ལས་བྱེད་འདེམས་ལྷན་དང་གོ་བསྡུར་གྱིས་ཐད་བསྐོ་ཆོག་རྒྱུ། ལས་བྱེད་དེ་རིགས་བཀའ་ཤག་སྐབས་སོ་སོའི་ལས་ཡུན་འཁྱུར་རྗེས་ཟླ་གསུམ་ནང་ཚུན་ལས་མཚམས་འཇོག་དགོས། དེ་དག་གི་ལས་འགན་དང་གནས་རིམ། ཕོགས་ཐོབ། ཁེ་ཕན་གཞན་བཅས་བཀའ་ཤག་གིས་གཏན་འབེབས་བྱ་རྒྱུ།” ཞེས་འཁོད་ཡོད་པ་རེད།

དེ་རིང་སྒྲིག་གཞི་བསྐྱར་བཅོས་དེའི་ཐོག་དྲི་བ་དྲིས་ལན་གནང་སྐབས། སྲིད་སྐྱོང་བློ་བཟང་སེང་གེ་མཆོག་གིས་སྒྲིག་གཞི་བསྐྱར་བཅོས་དེའི་དགོས་མཁོའི་སྐོར་གསལ་བཤད་གནང་དོན། བཀའ་ཤག་སྐབས་སྔ་མས་གྲོས་འདྲི་བ་དང་གྲོས་སྟོན་པ་མང་པོ་ཞིག་བསྐོས་པ་དེར། དེ་ལ་སྤྱི་འཐུས་ལྷན་ཚོགས་དང་། མང་ཚོགས་རྩིས་ཁྲ་ཚོགས་ཆུང་བཅས་ཀྱིས་དེ་གཞུང་ཞབས་འདེམས་བསྐོ་ལྷན་ཁང་གི་སྒྲིག་གཞི་དང་མཐུན་གྱི་མི་འདུག་སྟབས། དེ་དག་ཁྲིམས་མཐུན་བཟོ་དགོས་ཀྱི་འདུག་གསུངས་པ་ལྟར། བཀའ་ཤག་གིས་ཁྲིམས་འཆར་འདི་འཁྱེར་ཡོང་བ་རེད།

བོད་མིའི་སྒྲིག་འཛུགས་ཀྱིས་དངུལ་ཁང་ཞིག་འཛུགས་རྒྱུའི་འཆར་གཞི་སྒྲིག་གི་ཡོད་པ་རེད། ཨ་རིའི་ (USIAD)རོགས་དངུལ་འཐོན་གྲབས་ཡོད། རོགས་དངུལ་དེ་འཐོན་ན་ལོ་རྗེས་མར་ཨ་སྒོར་འབུམ་ ༥ དང་། དེ་ནས་ལོ་རེར་ཨ་སྒོར་ས་ཡ་ ༡ རེ་བུན་གཡར་བྱ་རྒྱའི་ལས་གཞི་སྤེལ་རྒྱུ་ཡིན། དང་པོ་ (NBFC)ཞེས་པའི་དངུལ་ཁང་འཛུགས་དགོས་ཀྱི་ཡོད་པ་རེད། ༢༠༡༨ ལོར་དངུལ་ཁང་འབྲིང་བ་ཞིག་འཛུགས་རྒྱུར་རྒྱ་གར་གཞུང་གིས་བཀའ་འཁྲོལ་གནང་གི་རེད། དེ་ལ་ལོ་གསུམ་རིང་ཞིབ་འཇུག་བྱས་ཚར་ཡོད་ལ། རོགས་དངུལ་ཡང་ཞུས་ཚར་བ་རེད། རོགས་དངུལ་འཐོན་གྲབས་ཡོད་པ་རེད། ད་ལྟ་ནས་གོམ་པ་སྤོ་དགོས་སྟབས། ང་ཚོར་དངུལ་ཁང་སྐོར་ཤེས་མཁན་སུ་ཡོད། ད་ལྟའི་བོད་མིའི་སྒྲིག་འཛུགས་ཀྱི་ལས་བྱེད་ནང་དུ་ཡོད་པ་མ་རེད། ཨ་རི་དང་ཡུ་རོབ་སོགས་ནས་ཁྱད་ལས་པ་ཞིག་གདན་འདྲེན་ཞུ་དགོས་པ་ཡིན་ན། ཁོ་ལ་ཆེ་མཐོང་ཞིག་ཕུལ་དགོས་པ་རེད། དངུལ་ཁང་དེ་མ་བཙུགས་ན་རོགས་དངུལ་ཕོན་ཆེན་པོ་དེ་རེག་ཐུབ་རྒྱུ་ཁག་པོ་ཞེ་དྲགས་རེད།

དེ་སྔའི་བཀའ་ཤག་ཤིག་གིས་ཨ་རིའི་གཞུང་ལ་ཨ་སྒོར་ས་ཡ་ ༨ ཐེངས་གཅིག་གནང་རོགས། དེ་གནང་བའི་རྗེས་ལ་ཨ་སྒོར་གཅིག་ཀྱང་ཞུ་རྒྱུ་མིན་ཞེས་ཡིག་ཐོག་ནས་འཆར་གཞི་ཕུལ་འདུག སྒོར་མོ་གཅིག་ཀྱང་རེག་མི་འདུག དེ་བཞིན། ཡུ་རོབ་ལའང་ཕུལ་འདུག ཡུ་རོབ་ནས་རོགས་དངུལ་གནང་མཁན་གྱི་མཁས་པ་སྐད་བཏང་སྟེ་ཟབ་སྦྱོང་སྤྲོད་རོགས་ཞུས་པ་ཡིན། ཁོ་རང་གིས་ཡུ་རོབ་ལ་འཆར་གཞི་ཕུལ་བ་དེ་ཐེངས་གཅིག་ལ་ཕུལ་བ་རེད་མ་གཏོགས། ཐེངས་གཉིས་ལ་ཕུལ་ཡོད་ན་བོད་མིའི་སྒྲིག་འཛུགས་(Blacklist)བྱེད་ངེས་རེད་ལབ་སོང་། ཞེས་སོགས་གསུངས་སོང་།