དེ་རིང་གྲོས་ཚོགས་ཚོགས་དུས་གཉིས་པའི་ལས་ཉིན་ ༨ པར་སྲིད་སྐྱོང་བློ་བཟང་སེང་གེ་མཆོག་ནས་ཕྱི་དྲིལ་ལས་ཁུངས་ཀྱི་ཁྱབ་ཁོངས་དང་བཅས་པའི་ཕྱི་ལོ་ ༢༠༡༥ དང་ ༢༠༡༦ ལོའི་ལོ་འཁོར་ལས་བསྡོམས་སྙན་སྒྲོན་ཞུས་བ་དང་། སྤྱི་འཐུས་བློ་བཟང་ཆོས་འབྱོར་ལགས་ཀྱིས་སྤྱི་འཐུས་རྒྱུན་ལས་ནས་ཕྱི་དྲིལ་གྱི་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་ཤོག་ངོས་ ༥ ཅན་ཞིག་སྙན་སྒྲོན་ཞུས་སོང་ལ། ཕྱི་དྲིལ་གྱི་ལོ་འཁོར་ལས་བསྡོམས་དང་སྤྱི་འཐུས་རྒྱུན་ལས་ཀྱི་ཞིབ་འཇུག་སྙན་ཐོར་སྤྱི་ཡོངས་ནས་བགྲོ་གླེང་གནང་དགོས་པའི་གཞུང་འབྲེལ་གྲོས་འཆར་ལ་སྤྱི་མོས་བྱུང་བ་ལྟར། སྤྱི་འཐུས་བཅུ་གྲངས་ཤིག་གིས་སོ་སོའི་དགོངས་ཚུལ་གསུངས་པ་དང་འབྲེལ་སྲིད་སྐྱོང་བློ་བཟང་སེང་གེ་མཆོག་ལ་དོགས་འདྲི་མང་པོ་ཞུས་སོང་བ་དང་། སྐབས་དེར་སྲིད་སྐྱོང་མཆོག་ནས་ལས་བྱེད་འདེམས་བསྐོ་ལྷན་ཁང་གིས་སྒྲིག་གཞི་ལག་བསྟར་བྱས་པ་དང་། རྒྱ་ཡིག་ཤེས་མཁན་མང་པོས་གླ་ཕོགས་མཐོ་བའི་ལས་ཀ་བྱས་ཏེ། བོད་མིའི་སྒྲིག་འཛུགས་ནང་ཡོང་འདོད་བྱེད་ཀྱི་མེད་པའི་རྐྱེན་གྱིས་ཕྱི་འབྲེལ་རྒྱ་ཡིག་སྡེ་ཚན་དུ་ལས་བྱེད་ལྔ་ཡི་ས་མིག་ཡོད་པའི་ནང་ནས་ས་མིག་གསུམ་སྟོང་པར་ལྷག་སྟེ་ལས་བྱེད་མ་རག་པའི་དཀའ་ངལ་འཕྲད་བཞིན་ཡོད་སྐོར་གསུངས་སོང་།
སྤྱི་འཐུས་རྣམ་པས་ཕྱི་འབྲེལ་རྒྱ་ཡིག་སྡེ་ཚན་ནང་ལས་བྱེད་མ་རག་པའི་དཀའ་ངལ་འཕྲད་ཀྱི་ཡོད་པའི་སྐོར་ལ་དགོངས་ཚུལ་གསུངས་སྐབས་སྤྱི་འཐུས་ཤིག་གིས། ད་ལྟའི་ཆར་ཕྱི་འབྲེལ་རྒྱ་ཡིག་སྡེ་ཚན་ནང་ལས་བྱེད་ཀྱི་ས་མིག་ལྔ་ཡོད་ཀྱང་། གསུམ་སྟོང་པར་ལྷག་བསྡད་ཡོད་པ་དང་། ས་མིག་གསུམ་དེ་སྐོང་ཆེད་ཡིག་ཚད་ཐེངས་ཁ་ཤས་བཏང་ཡོད་ཀྱང་། ལས་བྱེད་འདེམས་བསྐོ་ལྷན་ཁང་གི་ཡིག་ཚད་ཀྱི་བརྒྱ་ཆའི་ནང་བོད་ཡིག་ལ་བརྒྱ་ཆ་ ༥༠ དང་། རྒྱ་ཡིག་ལ་བརྒྱ་ཆ་ ༧༠ ཡིན་པ་དང་། དེ་སྔོན་ཡིག་ཚད་སྐབས་བོད་ཡིག་གི་བརྒྱ་ཆ་ཏོག་ཙམ་མ་ལོན་པའི་རྐྱེན་གྱིས་ལས་བྱེད་ནང་ཚུད་ཐུབ་མེད་སྟབས། མ་འོངས་པར་བོད་ཡིག་གི་བརྒྱ་ཆ་ ༤༠ ལྟ་བུར་དམའ་རུ་བཏང་བ་ཡིན་ན་ལས་བྱེད་རག་པར་ཕན་ཐོགས་ཡོད་སྐོར་དང་། གཞུང་ཞབས་ནང་རྒྱ་ཡིག་ཡག་པོ་ཡོད་མཁན་གཉིས་ཡོད་པ་དེར་ཡིག་ཚད་བཏང་སྟེ་གྲུབ་འབྲས་འབྲེལ་ཡོད་ལ་ཕུལ་ཡོད་ཀྱང་། ད་ལྟའི་བར་དུ་བཀའ་ལན་གང་ཡང་གནང་མེད་པ་དང་། ཕྱི་ནས་ལས་བྱེད་རག་རྒྱུ་ཁག་པོ་ཡོད་ཀྱང་ནང་ལོགས་ན་ཡོད་པའི་རྒྱ་ཡིག་ཤེས་མཁན་རྣམས་རྒྱ་ཡིག་སྡེ་ཚན་དང་སྲིད་བྱུས་ཉམས་ཞིབ་ཁང་གི་ནང་ཕྱག་ལས་གནང་དུ་འཇུག་དགོས་པ་གལ་ཆེན་ཡིན་སྐོར། དེ་བཞིན། སློབ་སྦྱངོ་ཆེད་ཐའེ་ཝན་ནང་ལས་བྱེད་གཏོང་བའི་ལས་གཞིའི་འོག སྒྲིག་གཞི་གཞིར་བཟུང་རྒྱ་སྐད་ཚིག་གཅིག་མི་ཤེས་པའི་ལས་བྱེད་གཉིས་ཐའེ་ཝན་དུ་བཏང་ཡོད་པ་དང་། རྒྱ་ཡིག་གི་རྨང་གཞི་གང་ཡང་མེད་པ་ཞིག་གིས་ལོ་གཉིས་ཀྱི་རྗེས་སུ་ཟ་སྐད་འཐུང་སྐད་ཙམ་མ་གཏོགས་རྒྱ་ཡིག་གི་ཐོག་ནས་ཕྱག་ལས་གནང་ཐུབ་རྒྱུ་ཁག་པོ་ཡིན་སྟབས། ཁྲིམས་དང་སྒྲིག་གཞི་གལ་ཆེན་པོ་ཡིན་ཡང་གཙོ་བོ་ང་རང་ཚོར་ཕན་ཐོགས་ཡོད་པ་ཞིག་གནང་རྒྱུ་གལ་ཆེན་པོ་ཡིན་པའི་དགོངས་ཚུལ་ཞུས་སོང་།
སྲིད་སྐྱོང་བློ་བཟང་སེང་གེ་མཆོག་ནས་རྒྱ་ཡིག་སྡེ་ཚན་གྱི་དཀའ་ངལ་སྐོར་ལ་གསལ་བཤད་བཀའ་ལན་གནང་དོན། སྔོན་མ་གྲོས་ཚོགས་ནས་སྒྲིག་གཞིར་འགྱུར་བ་བཏང་སྟེ་རྒྱ་སྐད་ཤེས་མཁན་ཡིན་ན། རྒྱ་སྐད་རང་གི་ཆེད་དུ་ལས་བྱེད་འདེམས་པའི་སྒྲིག་གཞི་བཟོས་ཡོད་ཀྱང་། འདེམས་བསྐོ་ལྷན་ཁང་གི་ཆ་རྐྱེན་ནང་རྒྱ་སྐད་ཁུངས་འཁྱོལ་བ་ཞིག་དགོས་པའི་ཐོག བོད་ཡིག་ངེས་པར་དུ་ཤེས་དགོས་པ་རེད་ཅེས་བོད་ཡིག་ལ་བརྒྱ་ཆ་ ༥༠ བཞག་ཡོད་སྟབས། རྒྱ་ཡིག་ཤེས་པའི་ཐོག་བོད་ཡིག་ཡག་པོ་ཤེས་མཁན་ཞིག་དགོས་ཀྱི་ཡོད་པ་དང་། དེ་སྔོན་ཡིག་ཚད་བཏང་ཡོད་ཀྱང་རྒྱ་ཡིག་ཚད་དང་ལྡན་པ་ཡོད་ནའང་བོད་ཡིག་གིས་ཁུངས་མ་འཁྱོལ་བར་བདམས་མ་ཐུབ་པ་བྱུང་ཡོད་པར་བརྟེན། འདེམས་བསྐོ་ལྷན་ཁང་དང་བཀའ་བསྡུར་གྱིས་འགྱུར་བ་བཏང་སྟེ་ད་ལྟ་རྒྱ་ཡིག་ལ་བརྒྱ་ཆ་ ༧༠ དང་། བོད་ཡིག་ལ་བརྒྱ་ཆ་ ༣༣ བྱས་ན་ཞེས་འབད་བརྩོན་གནང་བཞིན་ཡོད་ནའང་། རྒྱ་ཡིག་གཅིག་པུ་ཤེས་མཁན་ཡོད་ནའང་རྒྱ་ཡིག་རྐྱང་བའི་ཐོག་ནས་ཡིག་ཚད་བཏང་སྟེ་བདམས་འདུག་ཟེར་བ་ཞིག་ཆགས་ཀྱི་ཡོད་སྟབས། འགྲོ་སྟངས་འགྲོ་ལུགས་ཀྱི་ཐོག་ནས་བོད་ཡིག་གི་ཆ་རྐྱེན་དེ་ཡོད་སྐོར་འདེམས་བསྐོ་ལྷན་ཁང་གིས་འགྲེལ་བཤད་བསྐྱོན་ཏེ་བོད་ཡིག་གི་ཡིག་ཚད་དེ་གཏོང་གི་ཡོད་སྐོར་དང་། རྒྱ་ཡིག་སྡེ་ཚན་ལ་རྒྱ་ཡིག་ཤེས་མཁན་དགོས་ཀྱི་འདུག་ཅེས་ཐའེ་ཝན་དོན་གཅོད་ལ་མངགས་ནས་འབད་བརྩོན་གནང་སྟེ། ས་མིག་གཉིས་རག་སྟེ་ལོ་གཉིས་ལ་རྒྱ་ཡིག་སྦྱོང་དུ་འགྲོ་ཡི་ཡོད་པ་དང་། རྒྱ་ཡིག་སྦྱོང་དུ་འགྲོ་སྐབས་གསལ་བསྒྲགས་བཏང་སྟེ་ལས་བྱེད་ཡོངས་རྫོགས་ཀྱིས་དེའི་ནང་ཆ་ཤས་ལེན་ཆོག་གི་ཡོད་པ་དང་། ཆ་ཤས་བླངས་ཏེ་སུ་ཚུད་པ་ཡིན་ནའང་གཏོང་དགོས་ཀྱི་ཡོད་སྟབས། སྐབས་དེར་རྒྱ་ཡིག་གི་རྨང་གཞི་མེད་མཁན་གཉིས་ཚུད་པ་རེད། རྗེས་སུ་དྲིལ་བསྒྲགས་ལས་ཁུངས་རང་ལ་རྒྱ་ཡིག་ཤེས་མཁན་འདུག་དེ་ཚོ་བཏང་ན་ཞེས་བཀའ་ཤག་ལ་ལན་རྗེས་སུ་འབྱོར་ཡོད་པ་དང་། ད་ལྟ་འགྲོ་མཁན་ཕྱིན་ཚར་བ་རེད། མ་འོངས་པར་ལས་བྱེད་ལ་དབྱེ་འབྱེད་བྱེད་ཆོག་གི་མེད་ཀྱང་། ཐའེ་ཝན་དང་ཉི་ཧོང་སོགས་གང་ལ་འགྲོ་ཡི་ཡིན་ལབ་པ་ཡིན་ནའང་ཚང་མས་ཡིག་ཚད་གཏོང་ཆོག་གི་རེད་དེ། རྒྱ་ཡིག་གི་རྨང་གཞི་ཡོད་པ་དང་། ཡང་ན་ཉི་ཧོང་སྐད་ཀྱི་རྨང་གཞི་ཡོད་པ། དེ་བཞིན་སི་པིན་སྐད་སོགས་ཀྱི་རྨང་གཞི་ཡོད་པ་ཡིན་ན་བརྒྱ་ཆ་ ༡༠ ཡོད་ཅེས་ལབ་པ་ཡིན་ན། ང་ཚོས་དམིགས་བསལ་གྱི་ཐོབ་ཐང་ངམ་དམིགས་བསལ་གྱི་ཆ་རྐྱེན་ཞིག་སྦྱོར་ཐུབ་ཀྱི་རེད་བསམ་གྱི་འདུག ཅེས་གསུངས་སོང་།
ཡང་ཁོང་གིས། སྤྱི་ཡོངས་ནས་ཞུས་པ་ཡིན་ན། ཏཱ་ལའི་བླ་མ་མཐོ་སློབ་ནས་ལོ་གསུམ་རིང་རྒྱ་ཡིག་བསླབས་ཏེ་ད་ལོར་སློབ་མ་རྣམས་ཐོན་ཡོད་པ་དང་། སློབ་ཕྲུག་དེ་ཚོའི་ནང་རྒྱ་ཡིག་རྨང་གཞི་ཡག་པོ་ཡོད་མཁན་མང་པོ་འདུག ཁོང་ཚོར་ང་ཐུག་མྱོང་། རྒྱ་ཡིག་ཡག་པོ་ཡོད་མཁན་བོད་མིའི་སྒྲིག་འཛུགས་ནང་མེད་དོན་གཙོ་བོ་དེ་ང་ཚོས་འབད་བརྩོན་གནང་རྒྱུ་གཅིག་པུ་རེད་མི་འདུག གང་ཡིན་ཟེར་ན། ཉེ་བའི་ཆར་རྒྱ་གར་ནང་རྒྱ་རིགས་ཚོང་པ་མང་པོ་བསླེབས་ཏེ་ཚོང་རྒྱག་གི་ཡོད་སྟབས། རྒྱ་སྐད་དང་དབྱིན་སྐད་ཏོག་ཙམ་ཤེས་ཀྱི་ཡོད་ན། རྒྱ་རིགས་ཚོང་པ་དེ་ཚོའི་སྐད་སྒྱུར་བྱས་ཏེ་བོད་མིའི་སྒྲིག་འཛུགས་ནང་ཡིག་ཚད་གཏོང་བར་ཡོང་གི་མེད་པ་རེད། ཁོ་རང་ཚོར་ཟླ་ཕོགས་ཁྲི་བདུན་བརྒྱད་དང་འབུམ་གཅིག་དེ་འདྲ་རག་གི་ཡོད་ལ། ཁོང་ཚོ་མང་ཆེ་བ་བོད་ནས་ཕེབས་མཁན་ཡིན་པ་དང་། གཞི་རྩའི་གསར་དུ་འབྱོར་མཁན་ཚོར་ང་ཚོས་གཟིགས་རྟོག་བྱེད་དགོས་པ་གལ་ཆེན་པོ་ཞེ་དྲགས་རེད་དེ། རྒྱ་ཡིག་ཤེས་མཁན་འགའ་ཤས་ཀྱི་གནང་སྟངས་ལ་བལྟས་པ་ཡིན་ན། བོད་མིའི་སྒྲིག་འཛུགས་གཙོ་བོ་གཞིར་བཞག་པའི་ཐོག་ནས་ཞབས་ཞུ་ཞུ་དགོས་ཀྱི་ཡོད་ཀྱང་། ཕོགས་མཐོ་སར་བལྟས་ནས་འགྲོ་མཁན་ཡོང་གི་འདུག དེའི་རྐྱེན་གྱིས་ང་ཚོའི་རྒྱ་ཡིག་སྡེ་ཚན་ནང་ས་མིག་ཡོད་པ་ཡིན་ནའང་། ལས་བྱེད་མི་རག་དགོས་དོན་དེ་འདེམས་བསྐོ་ལྷན་ཁང་གིས་སྒྲིག་གཞི་ལག་བསྟར་བྱས་པ་དང་། རྒྱ་ཡིག་ཤེས་མཁན་མང་ཆེ་བ་གཞན་ལ་ལས་བྱེད་དུ་ཕེབས་པར་བརྟེན་དཀའ་ངལ་འཕྲད་པ་ཞིག་རེད་འདུག ཅེས་གསུངས་སོང་།
གསར་འགོད་པ། པདྨ་མཚོ།
བོད་གཞུང་ལ་རྒྱ་ཡིག་ལས་བྱེད་པ་རག་གི་མི་གདའ་ཟེར་བ་དེ་བདེན་པ་མ་རེད། ངའི་གྲོགས་པོ་གྲོགས་མོ་ཁ་ཤས་ལས་བྱེད་ནང་དུ་ཡོད་ལེ་རེད། ཁོང་རྣམས་པས་རྒྱ་ཡིག་ཤེས་ལེ་རེད། འོན་ཀྱང་ལས་གནས་འདྲ་མིན་ལ་བཞག་པ་ལས་རྒྱ་ཡིག་གི་ལས་ཀ་བྱེད་བཅུག་ཡོད་ས་མེད་གདའ། དཔེར་ན་འཕྲོད་བསྟེན་དང་། ཤེས་རིག ཕྱི་དྲིལ་སོགས་ནང་རྒྱ་ཡིག་ཤེས་མཁན་འགའ་ཤས་ཡོད་ཀྱང་ཁོང་ཚོར་ལས་ཀ་གཞན་དག་བསྐུལ་འདུག དཀའ་ངལ་ནང་ཁུལ་ནས་གསལ་ཐབས་བྱེད་མི་ཐུབ་པ་འདྲ།