འདི་ལོར་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་གཞིས་ཆགས་སུ་ཆར་ཆུ་དུས་སུ་མ་བབ་པའི་རྐྱེན་གྱིས་སྟོན་ཐོག་བརྒྱ་ཆ་དགུ་བཅུ་ཙམ་ཕན་མེད་དུ་འགྱུར་བཞིན་ཡོད་པ་རེད།
རྒྱ་གར་ལྷོ་ཕྱོགས་ཀར་ཎ་ཊ་ཀ་མངའ་སྡེ། མེ་སོར་རྫོང་ཁོངས་ཀོ་ལི་གྷལ་དོན་ལྡན་གླིང་གཞིས་ཆགས་ཀྱི་མི་སེར་སྤྱི་དང་ལྷག་པར་ཕྱི་རྒྱལ་དུ་ནང་མི་མེད་པ་དང་། ཚོང་ལས་དཔལ་འབྱོར་གྱི་དཀའ་ངལ་ཡོད་པ་རྣམས་ཀྱིས་གཙོ་བོ་སོ་ནམ་ཞིང་ལས་ལ་བརྟེན་ནས་འཚོ་བ་སྐྱེལ་བཞིན་ཡོད་པ་དང་། ས་གནས་སུ་ལོ་ལྟར་ཕྱི་ཟླ་ ༧ པའི་ཟླ་སྟོད་ནས་སོ་ནམ་འདེབས་ལས་བྱེད་འགོ་རྩོམ་གྱི་ཡོད་པ་དང་། ཕྱི་ཟླ་ ༨ པ་ནས་ཆར་དུས་འགོ་འཛུགས་ཀྱི་ཡོད་པར་བརྟེན། ཐན་སྐྱོན་འབྱུང་བའི་དཀའ་ངལ་ཧ་ཅང་ཉུང་ཉུང་ཡིན་པ་རེད། འོན་ཀྱང་ད་ལོར་ཆར་ཆུ་དུས་སུ་མ་བབས་པར་བརྟེན། ས་གནས་གཞིས་ལས་ཁང་དང་། མཉམ་འབྲེལ། གྲོང་སྡེ་སྤྱི་མི་སོགས་ཀྱིས་འགན་ཁུར་འོག་ཆར་འབེབ་རིམ་འགྲོ་གང་མང་བསྒྲུབས་ཡོད་ཀྱང་། སྟོན་ཐོག་ལ་ཕན་པའི་ཆར་ཆུ་འབབ་ཐུབ་ཀྱི་མེད་པར་བརྟེན་སྟོན་ཐོག་ཧ་ཅང་མང་པོ་འཕྲོ་བརླག་ཏུ་འགྲོ་བཞིན་ཡོད་པ་དང་། ས་གནས་ཀྱི་སྟོན་ཐོག་མང་ཆེ་བ་ཨ་ཤོམ་རེད་འདུག
གནས་ཚུལ་འདིའི་སྐོར་ལ་དོན་ལྡན་གླིང་གཞིས་གྲོང་Sཔའི་སོ་ནམ་པ་ཚེ་རིང་མཚམས་སྐྱིད་ལགས་ཀྱིས་བརྗོད་དོན། ང་རང་གིས་སོ་ནམ་ཞིང་ལས་བྱས་ཏེ་ལོ་ ༤༥ ཙམ་འགྲོ་ཡི་ཡོད་པ་དང་། ལོ་ལྟར་ཞིང་ཁ་ཨེ་ཀར་བཅོ་བརྒྱད་ཙམ་འདེབས་ཀྱི་ཡོད་ཀྱང་། འདི་ལོར་ཆར་ཆུ་དུས་སུ་མ་བབས་པའི་རྐྱེན་གྱིས་ང་ཚོར་དཀའ་ངལ་འཕྲད་ཀྱི་ཡོད་པ་རེད། སྤྱི་ཡོངས་ནས་བཤད་ན་ས་གནས་ཀྱི་ཞིང་ས་ཡག་སྡུག་གི་ཁྱད་པར་ཡོད་པ་རེད། ཞིང་ས་ཡག་པོ་ཡོད་ས་ནས་ཕར་ཆེར་སྟོན་ཐོག་བརྒྱ་ཆ་ལྔ་བཅུ་ཙམ་ལས་ཕན་ཐོགས་མེད་པ་ཆགས་ཚར་བ་རེད། ཞིང་ས་སྡུག་ས་དག་ནས་ཕར་ཆེར་བརྒྱ་ཆ་ལྔའམ་བཅུ་ཙམ་ལས་ཕན་ཐོགས་ཡོད་པ་མཐོང་གི་མི་འདུག ཅེས་བརྗོད་བྱུང་།
ཡང་ཁོང་མོས་ས་གནས་སུ་སྟོན་ཉེས་བྱུང་ན་མཇུག་འབྲས་མི་མང་དང་མཉམ་འབྲེལ་ལ་དཀའ་ངལ་འཕྲད་རྒྱུ་ཡིན་སྐོར་བརྗོད་དོན། སྟོན་ཐོག་བརྒྱ་ཆ་ལྔ་བཅུ་མ་ལོན་ན། ཞིང་པའི་འགྲོ་སོང་དང་སྟོན་འབྲས་ཀྱི་ཡོང་འབབ་ཁ་འདུམ་མི་ཐུབ་པའི་དཀའ་ངལ་འཕྲད་ཀྱི་རེད། སྟོན་འབྲས་བརྒྱ་ཆ་ལྔ་བཅུ་ཙམ་ལས་མ་ལོན་པའི་ཞིང་སའི་ཐོན་འབྲས་ཀྱི་ཡོང་འབབ་ཀྱིས་ཐོག་མའི་འགྲོ་སོང་ཡང་གསོ་ཐུབ་ཀྱི་མ་རེད། ད་ལོའི་སྟོན་ཐོག་དེ་བརྒྱ་ཆ་དགུ་བཅུ་ཙམ་རག་ས་མ་རེད་། ནམ་རྒྱུན་མཉམ་འབྲེལ་ནས་གཞིས་ཆགས་མི་མང་ལ་ཧིན་སྒོར་འབུམ་དྲུག་ཅུ་བདུན་ཅུ་བུ་ལོན་གཏོང་གི་ཡོད་པ་རེད། དེར་བརྟེན་སྟོན་འབྲས་བརྒྱ་ཆ་ལྔ་བཅུ་ཙམ་ལས་མ་བྱུང་བ་ཡིན་ན། ཞིང་པ་མི་མང་གིས་མཉམ་འབྲེལ་ལ་བུ་ལོན་སོད་ཀྱི་མ་རེད། དེ་ནས་མཉམ་འབྲེལ་ལ་ཡང་དཀའ་ངལ་འཕྲད་ཀྱི་རེད་ལ་མི་མང་ལ་ཡང་དཀའ་ངལ་ཡོད་པ་རེད། ང་རང་ཉིད་ལ་ས་ཞིང་ཡག་སྡུག་གཉིས་ཡོད་པ་ལས་ཆ་སྙོམ་བྱས་ན་སྟོན་འབྲས་བརྒྱ་ཆ་བཞི་བཅུ་ཙམ་ལེན་རྒྱུ་ཡོད་པར་རེ་བ་བྱེད་ཀྱི་ཡོད། ཅེས་བརྗོད་སོང་། དེ་བཞིན་སོ་ནམ་པ་ཨ་ཅག་པ་སངས་ལགས་ཀྱིས་མོ་རང་ལ་ས་ཞིང་ཨེ་ཀར་གསུམ་དང་བོགས་མ་ཨེ་ཀར་ལྔ་ཙམ་ཡོད་ཡིན་ནའང་ད་ལོ་ཞིང་ཁའི་འགྲོ་སོང་རག་རྒྱུ་མ་དགོས་རྩྭ་ཡང་རག་ཁག་པོ་ཡོད་པ་བརྗོད་བྱུང་།
ཆར་ཆུ་དུས་སུ་མ་བབ་པ་ནི་ཀོ་ལི་གྷལ་ས་ཁུལ་གཅིག་པུ་ཙམ་མ་ཡིན་པར། རྒྱ་གར་ལྷོ་ཕྱོགས་ཁུལ་དང་། ལྷག་པར་ཀར་ཎ་ཊ་ཀའི་མངའ་སྡེའི་ཁུལ་དུ་དཀའ་ངལ་ཆེན་པོ་ཆགས་བཞིན་ཡོད་པ་དང་། འདི་ལོ་ཀོ་ལི་གྷལ་དོན་ལྡན་གླིང་དུ་སྟོན་ཉེས་བྱུང་བ་ནི་ས་གནས་སུ་སྟོན་ཉེས་བྱུང་བ་ཐེངས་གསུམ་པ་དེ་ཡིན་ལ། སྟོན་ཉེས་ཀྱི་དཀའ་ངལ་ཆེན་པོ་འཕྲད་པ་ཡིན་ན་བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་འབྲེལ་ཡོད་མི་མང་ལ་གཟིགས་རྟོག་གནང་རྒྱུའི་རེ་བའང་ཞུ་བཞིན་འདུག
རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས་ཀྱིས་ཀོ་ལི་གྷལ་ནས།
གཞིས་ཆགས་འདིར་དེ་སྔོན་སྲོལ་རྒྱུན་ལ་མིང་རྟགས་ནས་གཞིས་མིའི་འཚོ་
བ་རྒྱོང་གུན་ཆེན་པ་བཟོས་ཡོད་པ་ད་ལོ་ཆར་ཆུ་དཀོན་པས་སྟོན་ཉེས་ཤོར་བ་དེ་ཚོ་ལ་དབུས་བོད་མིའི་སྒྲིག་འཛུགས་ནས་རོགས་སྐྱོར་གནང་དགོས་པ་དེ་ཕྱི་ནས་རོགས་དངུལ་ཐོབ་པའི་གསལ་བསྒྲགས་སྔོན་སོང་ལ་འགན་འཁུར་ནས་ས་
གནས་གཞིས་མིའི་དཀའ་ངལ་ཡར་ཞུ་མ་དགོས་པར་མར་གནང་དགོས་པ་དེ་
སྒྲིག་འཛུགས་ཡོད་པའི་དོན་གོ་ཚང་བར་ངོས་འཛིན་ཞུ་གི་ཡོད་།