རྒྱ་ནག་གི་གསར་འགྱུར་ལས་སྒྲུབ་ཁང་གིས་ལས་གཞི་གསར་བ་ཞིག་ཕྱི་བསྒྲགས་བྱས་ཏེ་རྒྱ་ནག་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་མཉམ་ལས་བྱ་རྒྱུ་ཡིན་ལུགས་བཤད་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱལ་སྲིད་སྤྱི་ཁྱབ་ཁང་གི་གསར་འགྱུར་ལས་སྒྲུབ་ཁང་ནས་ “རྒྱལ་ཡོངས་འགྲོ་བ་མིའི་ཐོབ་ཐང་གི་ལས་འཆར” ཞེས་པའི་ཡིག་ཆ་དོན་ཚན་ ༦ དང་ནང་གསེས་དོན་ཚན་ ༡༧ ཅན་ཞིག་ཕྱི་བསྒྲགས་བྱས་ཏེ། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་མཉམ་ལས་བྱ་རྒྱུ་ཡིན་ལུགས་བཤད་ཡོད་འདུག
རྒྱ་ནག་གི་ལས་འཆར་གསར་བ་དེའི་ནང་། རྒྱ་ནག་གཞུང་གིས་ “རྒྱལ་ཡོངས་འགྲོ་བ་མིའི་ཐོབ་ཐང་གི་ལས་འཆར” ཞེས་པའི་ལས་གཞི་དེ་ཕྱི་ལོ་ ༢༠༢༠ བར་དངོས་སུ་ལག་བསྟར་བྱ་རྒྱུན་ཡིན་ཚུལ་དང་། གནས་སྟངས་ལ་གཞིགས་ཏེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་སྐུ་ཚབ་རྒྱ་ནག་ནང་མགྲོན་འབོད་བྱ་རྒྱུ། རྒྱ་ནག་གི་ཆེད་མཁས་པ་ཚོ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་དམིགས་གསལ་ལས་རིམ་ནང་མཉམ་ཞུགས་བྱ་རྒྱུ། དེ་བཞིན། རྒྱ་ནག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་དོགས་འདྲི་ཁག་ལ་ལན་འདེབས་བྱ་རྒྱུ་དང་། རྒྱ་ནག་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེས་མཐོའི་ལས་ཁུངས་དང་ལྷན་དུ་གྲོས་མོལ་དང་མཉམ་ལས་བྱ་རྒྱུ་མ་ཟད། འབྲེལ་ཡོད་རྒྱལ་ཁབ་ཁག་དང་ལྷན་དུ་འགྲོ་བ་མིའི་ཐོབ་ཐང་དང་། གཞི་རྩའི་ཁེ་དབང་དང་འདྲ་མཉམ་བཅས་ཀྱི་ཐོག་གྲོས་མོལ་བྱ་རྒྱུ་ཡིན་ལུགས་སོགས་བཤད་འདུག
གཞན། གནས་ཚུལ་འདིའི་ནང་རྒྱ་ནག་གཞུང་གིས་ནམ་རྒྱུན་གྲངས་ཉུང་མི་རིགས་ས་ཁུལ་ཁག་གི་འཚོ་གནས་ཡར་རྒྱས་གཏོང་གི་ཡོད་ཚུལ་དང་གྲངས་ཉུང་མི་རིགས་ཁག་གི་ཐོབ་ཐང་དང་ཁེ་དབང་འགན་སྲུང་བྱེད་ཀྱིན་ཡོད་ལུགས། རྒྱ་ནག་གཞུང་གིས་ཁྲིམས་ཀྱི་དབང་སྒྱུར་ལ་བརྟེན་ནས་རྒྱལ་ནང་གི་འགྲོ་བ་མིའི་ཐོབ་ཐང་འགན་སྲུང་དང་ཡར་རྒྱས་གཏོང་ཐབས་སུ་འབད་བརྩོན་བྱེད་ཀྱི་ཡོད་ལུགས་སོགས་བཤད་ཀྱི་ཡོད་ནའང་། དོན་དངོས་སུ་རྒྱ་ནག་གཞུང་གིས་བོད་དང་ཡུ་གུར་མི་རིགས་གཙོས་པའི་གྲངས་ཉུང་མི་རིགས་ས་ཁུལ་ཁག་ཏུ་མི་རིགས་དབྱེ་གཅོད་དང་། གྲངས་ཉུང་མི་རིགས་ཀྱི་ཆོས་ལུགས་རིག་གནས་ཀྱི་བྱ་སྒོ་ཁག་བཀག་སྡོམ། འགྲོ་བ་མིའི་ཐོབ་ཐང་གི་མཚོན་པའི་གྲངས་ཉུང་མི་རིགས་ཀྱི་མངོན་འདོད་དངོས་ལ་དམ་དྲག་བྱེད་བཞིན་ཡོད་སྐོར་སོགས་བརྗོད་འདུག
གསར་འགོད་པ། པདྨ་རྒྱལ།
ཧ་ཧ་ཧ། འགྲོ་མིའི་ཐོབ་ཐང་ལ་རིན་ཐང་དང་བརྩི་མཐོང་ཆེན་པོ་བྱེད་པའི་ནུབ་ཕྱོགས་རྒྱལ་ཁབ་ཚོར་མགོ་སྐོར་གཏོང་ཐུབ་ནི་མ་རེད།
ཡར་རྒྱས་གཏོང་དགོས་ན། དང་པོ། བོད་དང་ཞིན་ཅང་གི་སྲིད་དོན་བཙོན་མ།རྒྱ་ནག་གི་དམངས་གཙོ་དོན་གཉེར་བ། ཧྥ་ལུང་སྒོམ་གྱི་བཙོན་མ་བཅས་གློད་བཀྲོལ་གཏོང་དགོས།
གཉིས་པ། རྒྱ་ནག་གི་རྩ་ཁྲིམས་ནང་སྲོག་གཅོད་ཉེས་ཁྲིམས་མེད་པ་བཟོ་དགོས། རྒྱ་ནག་གཞུང་གིས་ལོ་རེར་སྲོག་གཅོད་ཉེས་ཁྲིམས་འོག་དམར་གསོད་བཏང་བའི་གྲངས་འབོར་འཛམ་གླིང་སྤྱི་ཡོངས་ཀྱི་དམར་གསོད་གྲངས་འབོར་ལས་ལྡབ་གསུམ་གྱི་མཐོ་བ་ཆགས་ཡོད།
༅༅། རྒྱ་ནག་ནས་མ་འོངས་པར་འགྲོ་བ་མིའི་ཐོབ་ཐང་སྐོར་ལ་ཡར་རྒྱས་གཏོང་གི་ཡིན་བརྗོད་པ་རྗུན་མ་རེད།
ད་བར་སྐྱག་རྗུན་མང་དག་བཤད་པ་འཛམ་གླིང་རྒྱལ་ཁབ་མང་པོས་ཤེས་བཞིན་པ་རེད།
སྐྱག་རྗུན་རིང་ལུགས་ཀྱི་རྒྱལ་ཁབ་རྒྱ་ནག་མ་གཏོགས་ཡོད་པ་མ་རེད།
སྐྱག་རྗུན་ལ་སྦྱངས་ཆུབ་ཅིང་སྐྱག་རྗུན་བཤད་པར་ངོ་ནི་མི་ཚ།
ཡིན་པ་མིན་དང་མིན་པ་ཡིན་སྟག་བཤད་དེ་བསྡད་ཀྱི་ཡོད་པ་རེད།
ཡིད་ཆེས་སུས་བྱེད། བློ་སུས་བཀལ། སྙིང་གཏམ་སུས་བཤད། ཉིན་གཅིག་དཀའ་ངལ་འཕྲད་སྲིད་པ་རེད།