རྡེ་ར་ལྡུན་ཁུལ་དུ་གནས་སྡོད་བོད་ནས་གསར་དུ་འབྱོར་བ་ཚོས་ཚོགས་འདུ་བསྐོངས་ཏེ་ཁོང་ཚོར་ས་ཁང་མེད་པའི་དཀའ་ངལ་ཡོད་སྟབས་བོད་མིའི་སྒྲིག་འཛུགས་ཀྱིས་ས་ཁང་རོགས་མགོན་ཡོང་བའི་རེ་སྐུལ་ཞུས་འདུག
དེ་རིང་འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཁ་སང་སྔ་དྲོའི་ཆུ་ཚོད་ ༡༠།༣༠ སྟེང་། རྡེ་ར་ལྡུན་བདེ་སྐྱིད་གླིང་ཚོགས་ཁང་དུ་རྡེ་ར་ལྡུན་ཆོལ་གསུམ་གསར་འབྱོར་སྐྱིད་སྡུག་ཚོགས་པའི་རྒྱུན་ལས་སྐབས་གཉིས་པའི་ཚོགས་འདུ་ཟེར་བ་ཞིག་བསྡུས་ཡོད་པ་དང་། སྐུ་མགྲོན་དུ་ས་སྐྱ་གོང་མ་རིན་པོ་ཆེ་མཆོག་གི་སྐུ་ཚབ་དང་། འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གི་སྐུ་ཚབ། བདེ་སྐྱིད་གླིང་དགེ་ལུགས་དགོན་པའི་དབུ་འཛིན། དེ་བཞིན། དོན་འགྲུབ་གླིང་གི་དྲུང་ཆེ་ཨོ་རྒྱུན་འཇིགས་མེད་སོགས་ས་གནས་རང་བདེན་ཚོགས་ཆུང་དང་། ས་གནས་བུད་མེད་སོགས་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་ཕེབས་ཡོད་འདུག
ཚོགས་འདུའི་ཐོག་ཆོལ་གསུམ་གསར་འབྱོར་སྐྱིད་སྡུག་ཚོགས་པའི་ཚོགས་གཙོ་དཔལ་ལྡན་ལགས་ཀྱིས་རྡེ་ར་ལྡུན་ཆོལ་གསུམ་གསར་འབྱོར་སྐྱིད་སྡུག་ཚོགས་པ་ངོ་སྤྲོད་གནང་བའི་ནང་། བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་གནས་སྡོད་གསར་འབྱོར་བ་རྣམས་ལ་བཙན་བྱོལ་བོད་མི་སྤྱི་མཚངས་ལྟར་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་གཞི་རྩའི་ཐོབ་ཐང་དང་རང་དབང་ཆ་ཚང་ལྡན་ཡང་། དམིགས་གསལ་འཚོ་རྟེན་གྱི་རྒྱབ་ལྗོངས་མེད་པའི་དཀའ་ངལ་དང་། བོད་ལ་ཕྱིར་ལོག་ཐབས་མེད་པ། སྡོད་གནས་གཏན་འཁེལ་མེད་པ་དང་། འཕྲོད་བསྟེན་དང་ཤེས་ཡོན་བཅས་ཀྱི་ཐད་དཀའ་ངལ་འཕྲད་བཞིན་པ་དག་ལ་བོད་མིའི་སྒྲིག་འཛུགས་ངོས་ནས་སྡོད་གནས་ས་ཁང་གནང་རྒྱུར་རེ་སྐུལ་ཞུས་འདུག
ཁོང་གིས་བོད་ཕྱི་ནང་གི་འབྲེལ་ལམ་དང་དེའི་གནས་སྟངས་སྐོར་ལ། ལྡེ་ར་ལྡུན་དུ་གཞིས་ཁུངས་མེད་པའི་གསར་འབྱོར་བ་ཚོས་ཟླ་རེའི་ཁང་གླ་སྤྲད་བསྡད་ཡོད་པ་དང་། ལས་གླ་ཆུང་ཚག་རེ་དང་དགུན་ཚོང་ཙག་ཙིག་ཙམ་གྱིས་ཁང་གླ་དང་དོ་མི་མཉམ་པའི་གནས་སྟངས་འོག་དཀའ་ངལ་ཆེན་པོ་འཕྲད་བཞིན་པ་སོགས་ལ་གཞིགས་ཏེ། གསར་འབྱོར་སྐྱིད་སྡུག་ཚོགས་པས་ཕྱི་ལོ་ ༢༠༡༣ ཟླ་ ༡༠ ཚེས་ ༢༤ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་སུ་ཆེད་བཅར་གྱིས་སྙན་ཞུ་ཕུལ་བ་ནས་བཟུང་ནང་སྲིད་ལས་ཁུངས་ལ་སྔར་རྗེས་སུ་སྙན་ཞུ་ཐེངས་ ༦ དང་། ད་ལོའི་ཕྱི་ཟླ་ ༨ ཚེས་ ༦ བར་སྙན་ཞུ་དང་ཞིབ་འཇུག་སྙན་ཐོ་ཐེངས་ ༡༧ ཕུལ། སྙན་ཞུ་རེ་རེ་བཞིན་ཕུལ་སྐབས་ནང་སྲིད་ལས་ཁུངས་དང་། བོད་མི་མང་སྤྱི་འཐུས་ལྷན་ཚོགས། ས་གནས་ལྡེ་ར་ལྡུན་བདེ་དོན་ལས་ཁུངས་བཅས་ནས་ཐུགས་ཁུར་ཆེ་བཞེས་ཀྱི་སྒོ་ནས་གསན་ཏེ་སྐབས་བབ་ཀྱི་བཀའ་ལན་གནང་སོང་། ཞེས་སོགས་བརྗོད་ཡོད་འདུག
ཡང་ཁོང་གིས་བོད་ནས་རྗེས་སུ་འབྱོར་བའི་བཙན་བྱོལ་བ་འདི་དག་རྒྱ་གར་ནང་བཙན་བྱོལ་བོད་མིའི་སྒྲིག་འཛུགས་ནས་བདག་པོ་རྒྱག་མ་ཐུབ་པར་སྡོད་གནས་དང་ཟས་གོས་ཀྱི་དཀའ་སྡུག་འོག་ཕྱིར་བོད་ལ་ལོགས་དགོས་བྱུང་ཚེ། དེ་ནི་སྤྱིར་བཙན་བྱོལ་བོད་མིའི་སྒྲིག་འཛུགས་དང་ཡང་སྒོས་དོ་བདག་མི་རེ་ངོ་རེ་ནས་རྒྱ་ནག་གཞུང་ལ་ངོ་གནོང་དགོས་པ་ཞིག་དང་། གཞིས་ལུས་རྒྱ་ཆེའི་མི་མང་རེ་ཐག་འཆད་པའི་ཉེན་ཁ་ཡོད། བདུན་ཅུ་བརྒྱད་ཅུའི་ནང་གཞིས་ཁུངས་སུ་ལེན་མ་ཐུབ་པར་ཁ་འཐོར་དུ་སོང་བའི་ཁྱིམ་ཚང་ལ་ལའི་མི་རྒྱུད་གསར་བ་ཚོ་དེང་སྐབས་ངོ་བོ་གཞན་དུ་འགྱུར་ནས་སེམས་རྒྱུད་དུ་བོད་ཀྱི་རིག་གཞུང་ལེགས་བྱང་མེད་ཁར། རང་ཉིད་བོད་རིགས་ཡིན་པའང་བརྗོད་མི་བདེ་བའི་གནས་ཚུལ་ཡོད་པ་མཐོང་དུས། ང་ཚོ་རྗེས་འབྱོར་བ་ཚོའང་ཁ་འཐོར་དུ་གནས་ན་ནི། མི་རབས་རྗེས་མའང་གོང་སྨྲས་བཞིན་འགྱུར་རྒྱུ་ཐག་ཆོད་ཡིན། ཞེས་སོགས་འཁོད་འདུག
རྡེ་ར་ལྡུན་ཁུལ་གྱི་ས་ཁང་མེད་པའི་གནས་སྟངས་སྐོར་ཞིག་འཁོད་ཡོད་པའི་ནང་། ༡༽དགོན་སྡེ་ཁག་དང་ཁྱིམ་ཚང་མ་ཚབ་སོགས་ཕྱག་ལས་གནང་ཡུལ་སོགས་སུ་ཁང་གླ་མེད་པ་དང་། རྩ་བའི་གླ་ཆ་ནས་ཁང་གླ་འཐེན་པའམ། ལས་ཤག་གི་མིང་ཐོག་ལ་ཡོད་ཀྱང་། མ་འོངས་པར་གཞིས་ཆགས་སྲ་བརྟན་མེད་མཁན། ལས་གནས་དེ་ནས་ཐོན་ཚེ་ཁྱིམ་མི་གང་བོ་འགྲོ་ས་འདུག་ས་མེད་མཁན་ཁྱིམ་ཐོ་གྲངས་ ༣༢ དང་མི་གྲངས་ ༡༠༠ འདུག ༢༽ དགོན་སྡེ་ཁག་དང་ཁྱིམ་ཚང་གཞན་དག་ནང་ལས་ཀ་ཆུང་ཚག་རེ་གཉེར་བཞིན་སྡོད་མཁན། མ་འོངས་པར་གཏན་སྡོད་གཞིས་ཆགས་སྲ་བརྟན་མེད་མཁན་ཁྱིམ་ཚང་ ༡༩ དང་མི་གྲངས་ ༤༩ འདུག ༣༽ ད་ལྟ་ཁ་འཐོར་དུ་སྡོད་ཅིང་། ཟླ་རེའི་ཁང་གླ་སྤྲད་བསྡད་ཡོད་པ། ལས་གླ་ཆུང་ཚག་རེ་དང་དགུན་ཚོང་ཙག་ཙིག་ཙམ་གྱིས་ཁང་གླ་དང་དོ་མི་མཉམ་པའི་དཀའ་ངལ་ཅན་གྱི་ཁྱིམ་ཚང་ ༨༢ དང་མི་གྲངས་ ༢༤༨ འདུག་བཅས་ཡོད་སྐོར་འཁོད་འདུག
གསར་འགོད་པ། པདྨ་རྒྱལ།
གུས་པར་ས་ཁང་གཏན་འཇགས་ཤིག་སྤྲོད་རོགས།
སྤྱིར་བཏང་གིས་བཤད་སྲོལ་བཞིན། ཚང་མས་ཤེས་གསལ་རེད། གསར་འབྱོར་བ་ལ་བདག་པོ་བརྒྱབ་མེད་ཟེར་ན་རྩ་བ་ནས་མི་འགྲིག འོན་ཀྱང་བདག་པོ་དོན་ལེགས་པོ་ཞིག་གནང་ཡོད་དམ་ཟེར་ན་མེད། གང་ཡིན་ཟེར་ན། རྒྱ་གར་དང་བལ་ཡུལ་སོགས་ཀྱི་ས་ཁུལ་ན་གནས་སྡོད་བྱེད་བཞིན་པའི་གསར་འབྱོར་བ་རྣམས། གཞིས་ཆགས་ནང་བཞིན་ཁང་གླ་སྟེར་མི་དགོས་པར་རྐུབ་བཙུགས་ན་བཙུགས་ཆོག་ཆོག་གི་ཁང་པ་ཞིག་ད་བར་སུ་ལ་ཡོད། ཁང་གླ་སྟེར་དགོས་པ་ནི་འཚོ་བའི་ཁུར་བོ་ལྷག་མ་ཞིག་ཡིན། ད་དུང་ས་གནས་དེ་གར་འདུག་ཆོག་པའི་ཐོབ་ཐང་ལག་ཁྱེར་སོགས་ཀྱི་ཆ་རྐྱེན་བཤད་མ་དགོས་པ་རེད། དེ་དང་དེ་འདྲ་བའི་དཀའ་ངལ་གྱི་རིམ་པ་ཧ་ཅང་གི་མང་པོ་ཡོད་པ་མཁྱེན་བཞིན་དུ་མ་སེལ་བ་ཡིན་ནམ། ཡང་ན་བདག་པོ་མ་བརྒྱབ་པ་རེད། གསར་འབྱོར་བ་ཚང་མ་བོད་ལ་ཕར་ལོག་དགོས་ཟེར་ན། བཙན་བྱོལ་བས་གཞིས་བཞུགས་རྣམས་ལ་འབྲེལ་བཤད་ཅི་ཞིག་ཞུ།
གསར་འབྱོར་བ་མང་པོ་ཞིག་བོད་ནས་བཙན་བྱོལ་དུ་འོང་བ་ནི། འདུག་ས་མེད་པ་དང་། ཟ་རྒྱུ་འཐུང་རྒྱུ་མེད་པར་བཙན་བྱོལ་ལ་ཡོང་བ་ཞིག་གཏན་ནས་མ་རེད། གཙོ་བོ་རང་གི་རྩ་བའི་བླ་མ་མཇལ་བའི་ཆེད་དང་། གཉིས་ནས་སློབ་སྦྱོང་ཕྲན་བུ་རེ་བྱུང་ན་བསམ་པ། གལ་ཆེ་བའི་ནང་དོན་གསུམ་པ་དེ། བཙན་བྱོལ་ལ་ཡོང་པའི་དམིགས་བྱ་མཐར་ཐུག བསམ་བློར་རང་དབང་མེད་པ་དང་། སྨྲ་བརྗོད་རང་དབང་མེད་པ་སོགས་ཀྱི་རྐྱེན་བྱས་ཏེ་ཡུལ་བྱོལ་ལ་བྲོས་པ་རེད། བརྒྱ་ཆ་ལྔ་ཕར་ལོག་འགྲོ་རུང་། བརྒྱ་ཆ་དགུ་བཅུ་གོ་ལྔ་དམར་བོའི་བཙན་འོག་ནས་འདུག་འདོད་མེད་པ་ཤ་སྟག་ཡིན་དུས། བཙན་བྱོལ་གཞུང་གིས་དེ་དག་ལ་སྡོད་ཁང་གོ་སྒྲིག་དང་། མཐུན་རྐྱེན་གང་ཞིག་སྦྱར་དགོས་ན་གཞིས་ཆགས་ནང་བཞིན་སྦྱོར་དགོས་ཀྱིན་ཡོད། དེ་ལྟར་གནང་མ་ཐུབ་ཚེ། གཞིས་ཆགས་དང་གསར་འབྱོར་ཞེས་པའི་དབྱེ་འབྱེད་ཤུགས་དྲག་གནང་ཡོད་པ་ཁ་གསལ་གཏིང་གསལ་རེད། དེ་ལྟར་ཡོང་དང་མི་ཡོང་དེ་རྩ་བའི་གཞུང་གི་ལས་འཛིན་པ་རྣམས་ལ་འགན་ལྷག་པོ་ཡོད།
གསར་འབྱོར་བར་མཐོང་སྤྲོད་ཀྱིན་པས་ན་གུས་པས་ཀྱང་བསམ་ཚུལ་ཞིག་ཞུ་ན་འདོད་། གུས་པའི་རེ་བ་དང་བསམ་ཚུལ་ནི་ཁ་མིན་དོན་གྱིས་གསར་འབྱོར་བ་ཚོ་ལའང་གཞི་ཆགས་ཀྱི་ཐོབ་ཐང་ཆ་ཚང་སྤྲད་མ་ཐུབ་ཀྱང་སྡོད་ཁང་གི་དཀའ་ངལ་སེལ་རན་རེད་འདོད་བྱུང་། སྔོན་སྐུ་ངོ་སྒེར་གཅོད་པ་འགའ་རེས་བཤད་ན་གསར་འབྱོར་བ་བརྟན་པོ་མེད་པ་དང་དེ་མིན་གཞན་དབང་སྟབས་བསྟུན་གྱིས་རྒྱ་གར་གྱི་གཞི་ཆགས་གསར་བསྐྲུན་མི་ཆོག་པའི་ཁྲིམས་སྲུང་དགོས་ཚུལ་གྱིས་སྐད་འདྲ་ཆགས་པོ་རེ་བཤད་ཅིང། ཡར་༧ གོང་ས་མཆོག་ལ་སྐད་ཆ་འདྲ་ཆགས་རེ་དང་མར་མི་མང་ལའང་ཁ་ཡག་རེ་བཤད་ཅིང་སྒེར་གྱི་རྐུབ་སྟེགས་སྲུང་ཐབས་ཙམ་ལས་སྤྱི་བའི་རྩ་དོན་ལ་ཐུས་ཤོར་རི་རབ་ཙམ་སྤུངས་ཡོད་པ་འདས་ཟིན་པར་ཕྱིར་མིག་ཐེངས་གཅིག་བྱ་ན་གསལ་ཡོང་བ་རེད། ད་ལྟའི་འབྲེལ་ཡོད་མཐོ་རིམ་པ་ཚོར་ནུས་པ་ཡོད་ན་འགུལ་རན་དང་མེད་ན་དགོངས་པ་ཞུ་རན་རེད་མ་གཏོགས་རྒྱ་མིས་བཙན་བྱོལ་བ་རྩ་མེད་གཏོང་བའི་ཐབས་ཇུས་ཀྱི་བསམ་དོན་ངན་པ་འགྲུབ་པའི་ཉེན་ཁ་འདུག གང་ཡིན་ཟེར་ན་བཙན་བྱོལ་ནང་དུ་བོད་ཡིག་གི་གནས་ཚད་གང་འཚམས་ཡོད་པ་དང་བོད་ནང་ལ་གནས་ཚུལ་གང་བྱུང་དེ་རྒྱལ་སྤྱིའི་སྟེང་དུ་སྐྱེལ་ཐུབ་པ་དེ་བོད་ནས་གསར་འབྱོར་དུ་འབྱོར་བ་ཚོའི་ནུས་པ་ལས་བྱུང་བ་རེད་མོད། བཙན་བྱོལ་ནང་གི་འདས་པའི་ལོ་རྒྱུས་ནང་གྲྭ་ས་ཁག་མ་གཏོགས་གསར་འབྱོར་བ་བོད་མི་རིགས་ཀྱི་རིགས་གཞུང་ལ་གནས་ཚད་ཧ་ཅང་མཐོ་བ་མང་ཆེ་བ་ཕྱི་རྒྱལ་ལ་མི་འགྲོ་རང་འགྲོར་ཆགས་པ་དེ་དག་ཚང་མའི་ཕུགས་བསམ་ཕྱི་གླིང་བའི་སྒོར་མོ་ཁོ་ན་རེད་དམ། ཡང་ན་སྔོན་གྱི་སྐུ་ངོ་སྒེར་གཅོད་བ་ཚོའི་བདག་པོ་མ་རྒྱབ་པའི་ལན་རེད། ད་དུང་གོ་ཐོས་སུ་རྒྱ་ནག་གཞུང་ཚབ་ཁང་གི་མདུན་དུ་ཉི་མ་རེ་ལ་གསར་འབྱོར་བརྒྱ་ཉིས་བརྒྱ་འཕྲེང་བསྒྲིག་བཞིན་པ་དེའི་རྒྱུ་རྐྱེན་གང་ལ་ཐུགས་ཡོད། ད་ལྟའི་བཀའ་ཤག་གྱིས་ཞིབ་འཇུག་དང་ཐག་གཅོད་ཡག་པོ་བྱེད་པའི་རེ་བ་དང་འབོད་བསྐུལ་ཞུ་ན་འདོད་བྱུང་། ད་དུང་སྣེ་ལེན་ཁང་དུ་གསར་འབྱོར་ཡོང་མཁན་མེད་པའི་ཁག་རྒྱ་ནག་གཅིག་པོ་དཀྲི་ན་འགྲིག་གམ སྲིད་སྐྱོང་མཆོག་གི་གསུངས་བ་བཞིན་གཞི་ཆགས་བའི་ནང་ན་ཁང་པ་མེད་མཁན་ཡོད་པ་དངོས་ཡོད་ཡིན་སྲིད་མོད། མི་རབས་གསར་བ་སླེབས་ཀྱིན་སླེབས་ཀྱིན་མི་རབས་རྙིང་བ་རྫོགས་འགྲོ་བ་ཆོས་ཉིད་རེད་ལ་ཁོ་ཚོ་ལ་ཞིང་ས་ལ་སོགས་ཐོབ་ཐང་ཆ་ཚང་ཡོད་པས། ས་ལག་མཐིལ་ཙམ་གྱི་སྐལ་སྤྲད་མྱོང་མེད་པའི་གསར་འབྱོར་བ་ཚོ་དང་བསྡུར་ན་གནས་ལུགས་རེད་དམ། ཡང་གཅིག་བཤད་ན་གསར་འབྱོར་བ་ཚོ། ལ་ལ་ལྷོ་ཕྱོགས་དང་། ལ་ལ་རྒྱ་བྱང་ཕྱོགས་སུ་གནས་སྡོད་དགོས་པའི་རྒྱུ་མཚན་དེ་མི་སྒེར་རང་རང་ལ་དཔག་པའི་གནས་ལུགས་རེ་ཡོད་པས་དེ་ཞིབ་འཇུག་ནན་པོ་དང་འཚམ་པའི་ཐག་གཅོད་བྱེད་པའི་དུས་ལ་བབ་ཡོད་པར་འདོད། མདོར་བསྡུ་ན་ད་ལྟའི་བཀའ་ཤག་གསར་བ་ལ་འབོད་སྐུལ་ཞུ་ན་འདོད་པ་ནི། འཇོན་པོ་ཚང་མ་ཕལ་ཆེར་ཕྱི་རྒྱལ་ལ་འཕུར་ཚར་སོང་། དེ་མིན་ཕ་ཡུལ་ལ་ལོག་ཐུབ་མཁན་མང་ཆེ་བ་ཕ་ཡུལ་ལ་ལོག་སོང་། ད་ལྟ་ད་དུང་རྒྱ་གར་གྱི་ཡུལ་གྲུ་ཁག་ཏུ་ལྷག་ཡོད་པའི་གསར་འབྱོར་བ་ཚོ་ལ་མཚོན་ན། གཉོམ་དེ་ལས་ཆུང་ན་དུད་འགྲོ་དང་། སྐེ་དེ་ལས་ཕྲ་ན་ཡི་དྭགས་ཀྱི་དཔེ་བཞིན་ཡིན་པས། ཕྱི་རྒྱལ་ལ་འགྲོ་འདོད་མེད་པའམ་འགྲོ་མ་ཐུབ་པ་ཕྱིར་ཕ་ཡུལ་ལ་ལོག་འདོད་མེད་པའམ་ལོག་ཐབས་མེད་པ་ཤ་སྟག་ཡིན་པས། མཐེ་བོང་གནམ་ལ་ཕྱར་མཁན་གྱི་བདག་མེད་གསར་འབྱོར་ཚོའི་ཆེད་དུ་བཀའ་ཤག་གྱིས་བསྐྱར་དུ་ཞིབ་འཇུག་ཡང་དག་ཞིག་གནང་ཡོང་བའི་རེ་བ་དང་འབོད་སྐུལ་ཞུ་བཞིན་ཡོད།