རྒྱལ་སྤྱིའི་རང་དབང་ཚོགས་སྡེ་བརྒྱད་ཐུན་མོང་གིས་ད་ལྟ་རྒྱའི་བཙོན་འོག་ཏུ་ཡོད་པའི་ཡུ་གུར་བ་སྐུ་ཞབས་ཨེམ་ཧམ་ཊོ་ཧ་ཊེ་ལགས་སུ་འགྲོ་བ་མིའི་ཐོབ་ཐང་གི་གཟེངས་རྟགས་ཤིག་ཕུལ་ཡོད་འདུག
ཧྥ་རན་སིའི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱལ་སྤྱིའི་ཉེས་ཡངས་ཚོགས་པ་དང་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་བཅས་རྒྱལ་སྤྱིའི་རང་དབང་ཐོབ་ཐང་ཚོགས་སྡེ་ཁག་ ༨ ཐུན་མོང་གིས་རྒྱ་གཞུང་གིས་འཛིན་བཟུང་བཙོན་འཇུག་བྱས་ཡོད་པའི་ཡུ་གུར་གྲངས་ཉུང་མི་རིགས་ཀྱི་དཔལ་འབྱོར་རིག་པ་བ་དང་དགེ་རྒན་ཆེན་མོ་སྐུ་ཞབས་ཨེལ་ཧམ་ཊོ་ཧ་ཊེ་ (Ilham Tohti) མཆོག་ལ་ (Martin Ennals) ཞེས་པའི་འགྲོ་བ་མིའི་ཐོབ་ཐང་གི་གཟེངས་རྟགས་འབུལ་རྒྱུ་གཏན་འཁེལ་གནང་ཡོད་པ་ལྟར། ཁ་སང་རེས་གཟའ་མིག་དམར་ཉིན་སུད་སིའི་གྲོང་ཁྱེར་ཇི་ནེ་ཝར། སྐུ་ཞབས་ཨེ་ལམ་ཐོ་ཧ་ཊེ་ལགས་ཀྱི་བུ་མོ་རྗི་ཝོ་ཧིར་ཨེལ་ཧམ་ (Jewher Ilham) ལགས་ཀྱིས་ཁོང་གི་ཚབ་བྱས་ཏེ་གཟེངས་རྟགས་དེ་བཞེས་ཡོད་འདུག
བུ་མོ་རྗི་ཝོ་ཧིར་ཨེལ་ཧམ་ལགས་ཀྱིས་གསར་འགོད་པར་ད་ལོའི་ལོ་སྟོད་ཙམ་ལ་ཁོང་མོའི་ནང་མི་ཚོ་སྐུ་ཞབས་ཨེལ་ཧམ་ཊོ་ཧ་ཊེ་ལགས་ལ་ཐུག་འཕྲད་དུ་ཕྱིན་སྐབས། ཁོང་གི་འཕྲོད་བསྟེན་གནས་སྟངས་ཧ་ཅང་ཞན་པོ་ཡོད་པ་དང་། ཁོང་གི་སྐྲ་ཚང་མ་དཀར་པོར་འགྱུར་འདུག བཙོན་སྲུང་དཔོན་རིགས་ཚོས་ཁོང་ཚོར་ཁ་བརྡ་མང་པོ་བཤད་དུ་བཅུག་མེད་སྐོར་བརྗོད་འདུག
གསར་འགོད་པས་ད་ལན་སྐུ་ཞབས་ཨེལ་ཧམ་ཊོ་ཧ་ཊེ་ལགས་ལ་འགྲོ་བ་མིའི་ཐོབ་ཐང་གི་གཟེགས་རྟགས་ཕུལ་བ་དེས་ཁོང་ལ་ཕན་གནོད་གང་འབྱུང་སྲིད་མིན་སྐོར་དྲིས་པར་བུ་མོ་རྗི་ཝོ་ཧིར་ཨེལ་ཧམ་ལགས་ཀྱིས། རྒྱ་ནག་གཞུང་གིས་ཁོང་མོའི་ཨ་ཕར་ཚེ་བཙོན་གྱི་ཁྲིམས་ཐག་བཅད་པ་ནས་བཟུང་། ཁོང་ཚོ་ཡ་ང་བའི་གནས་སྟངས་ཤིག་གི་འོག་ཏུ་གནས་ཡོད་སྐོར་བརྗོད་འདུག
སྐུ་ཞབས་ཨེལ་ཧམ་ཊེ་ཧ་ཊེ་ལགས་ནི་ཀྲུང་དབྱང་མི་རིགས་སློབ་ཆེན་གྱི་དགེ་རྒན་ཆེན་མོ་ཡིན་ཞིང་། ཁོང་གིས་རྒྱ་ནག་གཞུང་གིས་ཡུ་གུར་གྲངས་ཉུང་མི་རིགས་ཐོག་འཛིན་པའི་དྲགས་གནོན་སྲིད་ཇུས་ལ་སྐྱོན་བརྗོད་བྱེད་ཀྱིན་ཡོད་ནའང་། ཡུ་གུར་བ་དང་རྒྱ་ནག་ཧན་མི་རིགས་གཉིས་ཕན་ཚུན་མཐུན་འགྲིག་དང་ཞི་བདེ་མཉམ་གནས་བྱེད་པའི་ལྟ་ཚུལ་འདོན་མཁན་ཞིག་ཡིན་པ་རེད། ཡིན་ནའང་རྒྱ་གཞུང་གིས་ཁོང་གིས་ཁྲིམས་འགལ་ཚོགས་པ་དང་དྲ་ཚིགས་སོགས་བཙུགས་ཏེ་ཡུ་གུར་གྲངས་ཉུང་མི་རིགས་མེས་རྒྱལ་ནས་ཁ་བྲལ་གཏོང་མཁན་ཁ་བྲལ་རིང་ལུགས་པ་ཞིག་ཡིན་པའི་སྐྱོན་འཛུགས་བྱས་ཏེ། ༢༠༡༤ ཟླ་ ༩ པའི་ནང་ཤིན་ཅང་ཡུ་རུམ་ཆེ་ (Urumqi) གྲོང་ཁྱེར་ཁྲིམས་ཁང་ནས་རྒྱལ་ཁབ་ཁ་བྲལ་གྱི་ཉེས་འཛུགས་འོག་ཁོང་ལ་ཚེ་བཙོན་གྱི་ཁྲིམས་ཐག་བཅད་ཡོད་པ་རེད།
གསར་འགོད་པ། པདྨ་རྒྱལ།
