འདས་པའི་ཉིན་གྲངས་བཅུ་གཉིས་རིང་རྒྱ་གར་ལྷོ་ཕྱོགས་སྦེལ་ཀོབ་ནས་དྷ་རམ་ས་ལ་བར། སྦག་སྦག་སྐོར་སྐྱོད་ཀྱི་བོད་དོན་དྲིལ་བསྒྲགས་ལས་འགུལ་ཞིག་སྤེལ་བའི་ནང་སྦག་སྦག་བདུན་དང་ལས་འགུལ་བ་ ༡༢ མཉམ་ཞུགས་གནང་ཡོད་པ་རེད།
དེ་རིང་ཕྱི་ཚེས་ ༡༢ ཉིན་གྱི་སྔ་དྲོའི་ཆུ་ཚོད་ ༩།༣༠ སྟེང་། དྷ་ས་ཐེག་ཆེན་ཆོས་གླིང་གཙུག་ལག་ཁང་གི་དཔའ་བོའི་དྲན་རྟེན་རྡོ་རིང་མདུན་ཐང་དུ། དྷ་རམ་ས་ལའི་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག ཉེ་ལམ་རྒྱ་གར་ལྷོ་ཕྱོགས་སྦེལ་ལ་ཀོ་པེ་དབུ་མའི་ལམ་ས་གནས་རྒྱུན་ལས་ཀྱིས་གོ་སྒྲིག་གནང་བའི་སྦག་སྦག་སྐོར་སྐྱོད་ཀྱི་བོད་དོན་ཁྱབ་བསྒྲགས་ལས་འགུལ་བ་རྣམས་ལ་ཕེབས་བསུའི་མཛད་སྒོ་ཞིག་ཚོགས་ཡོད་པ་རེད།
མཛད་སྒོ་དེའི་སྟེང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དྷ་ས་དབུ་མའི་ལམ་མི་མང་ལས་འགུལ་ཁང་གི་འགན་འཛིན་གཞོན་པ་སྤྱི་འཐུས་ཟླ་བ་ཚེ་རིང་ལགས། དེ་བཞིན། བོད་མི་མང་སྤྱི་འཐུས་ཁག་ཅིག་དང་། དབུ་མའི་ལམ་མི་མང་ལས་འགུལ་ཁང་གི་སློབ་སྟོན་པ་དང་རྒྱུན་ལས་ཟུར་བ། དྷ་སའི་གཞུང་འབྲེལ་མིན་པའི་ཚོགས་པ་ཁག་ཅིག་གི་ཚོགས་གཙོ་དང་སྐུ་ཚབ། བཞུགས་སྒར་ཁུལ་གྱི་སེར་སྐྱ་མི་མང་བཅས་ཕེབས་ཡོད་པ་རེད།
ད་ནང་ཞོགས་པའི་ཆུ་ཚོད་ ༧ པའི་སྟེང་། དྷ་རམ་ས་ལའི་གཞུང་འབྲེལ་མིན་པའི་ཚོགས་པ་བདུན་ཏེ། དྷ་རམ་ས་ལའི་མདོ་སྟོད་ཆུ་བཞི་སྒང་དྲུག་ཚོགས་པ་དང་ཆོལ་གསུམ་ཆིག་སྒྲིལ་ཚོགས་པ། མདོ་སྨད་དབུས་སྤྱི་ཁྱབ་རྒྱུན་ལས་ཁང་དང་། མངའ་རིས་སྤྱི་མཐུན་ཚོགས་པ་དང་། དབུས་གཙང་ཆོལ་ཁའི་རྒྱུན་ལས་ཁང་། དེ་བཞིན། དྷ་སའི་ཚོང་ཁང་སྐྱིད་སྡུག་བཅས་ཀྱི་སྐུ་ཚབ་ཚོས་ངྷ་ཤོད་ནས་ཕེབས་བསུ་གོ་སྒྲིག་ཞུས་ཡོད་པ་རེད།
ཚོགས་ཐོག་ཏུ་དབུ་མའི་ལམ་མི་མང་ལས་འགུལ་ཁང་གི་འགན་འཛིན་གཞོན་པ་སྤྱི་འཐུས་ཟླ་བ་ཚེ་རིང་ལགས་ཀྱིས་དབུ་མའི་ལམ་མི་མང་ལས་འགུལ་ཁང་ངོ་སྤྲོད་གནང་དོན། དབུ་མའི་ལམ་མི་མང་ལས་འགུལ་ཁང་འཛུགས་དོན་གཙོ་བོ་ང་ཚོ་རྒྱ་ཆེའི་མི་མང་གི་བསམ་ཚུལ་བསྡུ་རུབ་བྱས་ཏེ་མི་མང་བརྒྱ་ཆ་དགུ་བཅུས་དབུ་མའི་ལམ་གྱི་སྲིད་ཇུས་ཐོག་རྒྱབ་སྐྱོར་ཡོད་པའི་ཐོག་ནས་བཙུགས་པ་ཞིག་དང་། དེ་རྒྱལ་བ་རིན་པོ་མཆོག་གི་དགོངས་གཞི་དང་བོད་མིའི་སྒྲིག་འཛུགས་ཀྱི་སྲིད་ཇུས་རེད་ཟེར་ནས་འགན་མ་ཁུར་བའི་ཐོག་ནས་རང་དགར་བཞག་པ་ཡིན་ན་འགྲིག་གི་ཡོད་པ་མ་རེད། ལྷག་པར་དུ་ཉིས་སྟོང་བརྒྱད་ཀྱི་སྔོན་ལ་བོད་མི་མང་སྤྱི་འཐུས་གྲོས་ཚོགས་ནང་ཡིན་ན་རེད། མང་ཚོགས་ནང་ཡིན་ན་རེད། དབུ་མའི་ལམ་ཟེར་བ་དེ་རྒྱ་ནག་གཞུང་གིས་གང་སྤྲད་པ་དེ་མ་གཏོགས་ཞུ་གཏུག་དང་སྐད་འབོད་ལས་འགུལ་གང་ཡང་སྤེལ་རྒྱུ་མེད་པའི་སྐད་ཆ་བྱུང་བ་དང་། ལྷག་པར་དུ་ཤེས་ཡོན་མེད་པའི་མི་མང་དཀྱུས་མ་མང་པོ་ཞིག་གི་ནང་དུ་དབུ་མའི་ལམ་ཟེར་བ་དེར་ཞེ་དྲགས་གང་ཡང་བྱེད་རྒྱུ་མི་འདུག་བསམ་པ་དེ་འདྲ་བཤད་མཁན་ཡོང་གི་ཡོད་པ་རེད་ལ། སྤྱི་ཚོགས་ནང་དབུ་མའི་ལམ་གྱི་སྲིད་ཇུས་ལ་གོ་བ་ལོག་འགྲེལ་རྒྱག་པ་དང་། དངོས་འབྲེལ་གནས་ཚུལ་མ་ཤེས་པ། དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་ཡོད་ཟེར་མཁན་ཚོས་གནད་དོན་དེའི་ཐོག་ངེས་པ་མ་བརྙེད་པ་བཅས་ཀྱི་གནས་ཚུལ་ལ་གཞིགས་ཏེ། མང་ཚོགས་ལ་དབུ་མའི་ལམ་གྱི་སྲིད་ཇུས་ཐོག་གོ་རྟོགས་སྤེལ་རྒྱུ་དང་། རྒྱལ་སྤྱིའི་གླེང་སྟེགས་སྟེང་དབུ་མའི་ལམ་གྱི་སྲིད་ཇུས་སྐོར་གླེང་སློང་ཡོང་རྒྱུ་བཅས་ཀྱི་ཆེད་དུ་ཕྱི་ལོ་ ༢༠༠༨ ཟླ་ ༢ བར་དབུ་མའི་ལམ་མི་མང་ལས་འགུལ་ཁང་བཙུགས་པ་དང་། དེ་ཡང་ཐོག་མ་ཕྱི་ལོ་ ༢༠༠༦ ཟླ་ ༩ པའི་གྲོས་ཚོགས་སྐབས་སུ་བཀའ་མོལ་བྱུང་བ་རེད། འདས་པའི་ལོ་ངོ་ ༡ ལྷག་རིང་གྲོས་བསྡུར་གང་མང་བྱས་ཏེ་དབུ་མའི་ལམ་ལས་འགུལ་ཁང་འདི་བཙུགས་ཏེ་ད་བར་ལོ་བརྒྱད་དགུའི་རིང་ལས་འགུལ་གང་མང་ཞིག་སྤེལ་ཡོད།
བོད་པའི་སྤྱི་ཚོགས་ནང་ལྟ་གྲུབ་འདྲ་མིན་གྱི་ཚོགས་པ་འདྲ་མིན་ཡོད་ནའང་དབུ་མའི་ལམ་གྱི་སྲིད་ཇུས་དེ་རྒྱལ་བ་རིན་པོ་མཆོག་གི་དགོངས་གཞི་རེད། དབུ་མའི་ལམ་མི་མང་ལས་འགུལ་ཁང་བཙུགས་པའི་རྗེས་སུ་ཡིན་ནའང་། ས་གནས་ཁག་མང་པོ་ཞིག་གི་ནང་དབུ་མའི་ལམ་གྱི་སྲིད་ཇུས་སྐོར་ལ་གོ་རྟོགས་ལས་འགུལ་མང་པོ་སྤེལ་བར་བརྟེན་ནས། རྒྱ་ཆེའི་མི་མང་ནང་དབུ་མའི་ལམ་གྱི་སྐོར་ཤེས་རྟོགས་གང་འཚམ་བྱུང་ཡོད་སྟབས། དབུ་མའི་ལམ་མི་མང་ལས་འགུལ་ཁང་བཙུགས་པའི་དགོས་དམིགས་གཞིར་བཟུང་གིས་མང་ཚོགས་ནང་བོད་མིའི་སྒྲིག་འཛུགས་ཀྱི་སྲིད་ཇུས་ལངས་ཕྱོགས་དང་རྒྱལ་བ་རིན་པོ་མཆོག་གི་དགོངས་གཞི་དངོས་དེ་ཞུ་ཐུབ་པ་བྱུང་ཡོད་བསམ་པའི་སྤོབས་པ་དང་ཡིད་ཆེས་ཡོད། ཅེས་བརྗོད་སོང་།
དེའི་རྗེས་སྤྱི་འཐུས་ཚོགས་གཙོ་བསོད་ནམས་བསྟན་འཕེལ་མཆོག་གིས་གསུངས་དོན། འདས་པའི་ལོ་རྒྱུས་ཀྱི་ཐོག་ནས་བལྟས་པ་ཡིན་ན། འདས་པའི་ལོ་ངོ་ལྔ་བཅུ་དྲུག་བཅུ་ལྷག་ཟིན་ཙམ་འགྲོ་བཞིན་ཡོད་པ་རེད། བོད་ས་ཤོར་བ་དང་རྒྱལ་བ་རིན་པོ་ཆེ་མཆོག་བཙན་བྱོལ་ནང་ཆིབས་སྒྱུར་གནང་བའི་གནས་སྟངས་ཀྱི་ཐོག་ནས། ང་ཚོས་གཙོ་བོ་བོད་ནང་བོད་མི་ཚོའི་གནས་སྟངས་དང་རྒྱལ་ཞེན་གྱི་ཆབ་སྲིད་གནས་བབ། དེ་བཞིན། རྒྱལ་བ་རིན་པོ་མཆོག་ནས་དགོངས་གཞི་མང་པོ་བཞེས་པའི་ཐོག་ནས་བཙོན་བྱོལ་མིའི་སྒྲིག་འཛུགས་ལ་འགན་འཁུར་མཁན་རྣམ་པ་ཚོར་གོ་བསྡུར་རིམ་པར་བཞེས་པ་དང་། བཙོན་བྱོལ་མི་མང་ལ་གོ་བསྡུར་བཞེས་པའི་ཐོག་ནས་དབུ་མའི་ལམ་གྱི་སྲིད་ཇུས་གཏན་འབེབས་བྱུང་བ་ལྟར། ང་ཚོས་དངོས་སུ་ལག་བསྟར་བྱས་པའི་ཐོག་ནས་གྲུབ་འབྲས་ཀྱང་ཆེན་པོ་ཐོན་ཡོད་པ་དང་། དེ་ལ་བརྟེན་ནས་ང་ཚོ་བོད་མིའི་སྒྲིག་འཛུགས་ཡིན་ན་རེད། ༧སྐྱབས་མགོན་རིན་པོ་ཆེ་མཆོག་གི་དགོངས་གཞི་ཡིན་ན་རེད། ད་ལྟའི་བར་རྒྱ་ནག་གཞུང་དང་མཉམ་དུ་འབྲེལ་མོལ་བྱེད་པའི་ཐབས་ལམ་འདྲ་བོ་ཞིག་བརྒྱུད་ནས་འབྲེལ་མོལ་ཐེངས་དགུ་ལྷག་བྱུང་ཡོད་པ་དང་། དེར་བརྟེན་དབུ་མའི་ལམ་གྱི་སྲིད་ཇུས་དང་བོད་མིའི་སྒྲིག་འཛུགས། ཆོད་སེམས་བརྟན་པོས་ཐོག་ནས་འབྲེལ་མོལ་བྱེད་ཐུབ་པར་ང་ཚོས་ཡིད་ཆེས་ཞུ་བཞིན་ཡོད་ནའང་ཡིད་ཆེས་ཞུས་པ་ཙམ་གྱིས་མི་འགྲིག་པར། གཙོ་བོ་རྒྱ་ནག་གཞུང་གི་ཆབ་སྲིད་ཀྱི་གནས་བབ་ལ་འགྱུར་བ་འགྲོ་དགོས་ཀྱི་ཡོད་པ་དང་། རྒྱ་ནག་གི་ཆབ་སྲིད་གནས་བབ་ལ་འགྱུར་བ་འགྲོ་བའི་ཐབས་ལམ་འཚོལ་རྒྱུ་དེ་གལ་ཆེན་པོ་ཆགས་བསྡད་ཡོད་རེད། ཅེས་གསུངས་སོང་།
ཁོང་གིས་མུ་མཐུད་དུ་གསུངས་དོན། དབུ་མའི་ལམ་མི་མང་ལས་འགུལ་ཁང་གི་གོ་སྒྲོག་འོག་སྦག་སྦག་སྐོར་སྐྱོད་ཀྱི་ལས་འགུལ་སྤེལ་བ་དེའི་ཐོག་ནས་བོད་དོན་ཁྱབ་བསྒྲགས་གཏོང་རྒྱུ་དང་། བོད་མི་ཚོ་སེམས་ཤུགས་མ་ཆགས་པར་མུ་མཐུད་བོད་དོན་ལས་འགུལ་རྒྱུན་འཁྱོངས་བྱེད་རྒྱུ། ང་ཚོའི་འཐབ་རྩོད་དེ་བདེན་པའི་འཐབ་རྩོད་ཅིག་ཡིན་དུས། བདེན་པའི་འཐབ་རྩོད་དེ་བདེན་པའི་གནས་སྟངས་ལ་འཇོག་དགོས་ཀྱི་ཡོད་སྟབས། དེ་ལ་རྒྱབ་སྐྱོར་གནང་མཁན་གྱི་ངོས་ནས་ཡིན་ནའང་བོད་དོན་རྒྱབ་སྐྱོར་ཤུགས་ཆེན་པོ་ཡོང་བ་དེ་འདྲའི་ཐོག་ནས་རྣམ་པ་ཚོས་བོད་དོན་དང་བོད་མིའི་གནས་སྟངས་ཁྱབ་བསྒྲགས་གནང་བ་དང་། དེ་བཞིན། ཆོད་སེམས་བརྟན་པོའི་ཐོག་ནས་དེ་རིང་གི་དུས་ཚོད་འདི་ཟིན་པའི་ཐོག་ནས་མཇུག་སྡོམ་གནང་ཐུབ་པ་བྱུང་བར་ཧ་ཅང་བསྔགས་བརྗོད་ཞུ་རྒྱུ་ཡིན་ལ། བོད་མིའི་གནས་སྟངས་ལ་བལྟས་ཡོང་དུས། ང་རང་ཚོའི་ཆོས་དང་རིག་གཞུང་། ཆབ་སྲིད་དང་སྐད་ཡིག་གང་གི་ཐོག་ནས་བལྟས་བ་ཡིན་ནའང་ཧ་ཅང་གཉན་འཕྲང་ཅན་གྱི་དུས་སྐབས་ཤིག་ཆགས་ཡོད་པར་བརྟེན། ང་ཚོ་སེམས་ཤུགས་མ་ཆགས་པའི་ཐོག་ནས་མུ་མཐུད་བོད་དོན་ལས་འགུལ་རྒྱུན་འཁྱོངས་གནང་དགོས་པ་དང་། དེ་ལས་གལ་ཆེ་བ་ཞིག་ནི་༧སྐྱབས་མགོན་རིན་པོ་མཆོག་གི་དགུང་གྲངས་ཡིན་ནའང་གང་འཚམ་མཐོན་པོར་བསླེབས་བསྡད་ཡོད་དུས། ང་ཚོས་དེ་ལ་དགོངས་པ་ཟིན་པའི་ཐོག་ནས་རྒྱལ་སྤྱིའི་ཆབ་སྲིད་ཀྱི་གནས་སྟངས་ཐོག་བོད་དོན་ཟེར་དེ་ལ་ཐུགས་རྗེ་ཞིག་གནང་དགོས་ཀྱི་འདུག་ཟེར་བ་ཞིག་བྱེད་དགོས་ཀྱི་ཡོད་པ་དང་། ད་ལྟའི་གཉན་འཕྲང་གི་དུས་སྐབས་འདི་ལ་བོད་ཀྱི་བདེན་མཐའ་གསལ་མ་ཐུབ་པ་ཡིན་ན་མུ་མཐུད་དགོས་པ་དང་། བཙན་པོའི་དུས་སྐབས་སུ་བལྟས་པ་ཡིན་ན། བོད་པ་ཟེར་བ་དེ་སེམས་ཤུགས་ཆེན་པོ་དང་ལ་རྒྱ་ཆེན་པོ། སྙིང་སྟོབས་ཆེན་པོའི་མི་རིགས་ཤིག་ཆགས་བསྡད་ཡོད་དུས། གནས་ཚུལ་གང་ལ་འཕྲད་ཀྱང་དེ་ལ་བློས་གཏོང་མི་ཐུབ་པ་དེ་ནི་གནད་འགག་ཅིག་ཆགས་ཀྱི་ཡོད་པ་དང་། དེ་བས་ད་ལྟའི་གཉན་འཕྲང་གི་གོ་སྐབས་འདི་ཟིན་པའི་ཐོག་ནས་བོད་རྒྱ་འབྲོལ་མོལ་ཡོང་ཐབས་སུ་དགོངས་པ་བཞེས་དགོས་པའི་དུས་ལ་བབ་འདུག་ཟེར་བའི་བརྡ་གཏོང་དགོས་པ་དེ་གལ་ཆེན་ནང་གི་འགངས་ཆེན་ཆགས་ཀྱི་ཡོད། ཅེས་སོགས་གསུངས་སོང་།
ཐེངས་འདིའི་སྦག་སྦག་སྐོར་སྐྱོད་ལས་འགུལ་དེ་ཟླ་འདིའི་ཕྱི་ཚེས་ ༢ ཉིན། རྒྱ་གར་གྱི་བདག་ཉིད་ཆེན་པོ་གྷན་དྷེའི་འཁྲུངས་སྐར་དང་བསྟུན་ཏེ། རྒྱ་གར་ལྷོ་ཕྱོགས་སྦེལ་ཀོབ་ལུགས་ཟུང་བསམ་འགྲུབ་གླིང་ནས་དབུ་འཛུགས་གནང་ཡོད་པ་དང་། ལས་འགུལ་ནང་སྦག་སྦག་ ༧ དང་མི་གྲངས་ ༡༢ མཉམ་ཞུགས་གནང་ཡོད་པ་རེད།
གསར་འགོད་པ། པདྨ་རྒྱལ།
སྦག་སྦག་སྐོར་སྐྱོད་ལས་འགུལ་བ་རྣམས་ལ་རྡ་ཤོད་ནས་ཕེབས་བསུ་ཞུ་མཁན་གཞུང་འབྲེལ་མ་ཡིན་པའི་ཚོགས་པ་བདུན། རྡ་རམ་ས་ལའི་མདོ་སྟོད་ཆུ་བཞི་སྒང་དྲུག་ཚོགས་པ་དང་། ཆོལ་གསུམ་ཆིག་སྒྲིལ་ཚོགས་པ། མདོ་སྨད་དབུས་རྒྱུན་ལས། མངའ་རིས་སྤྱི་མཐུན་ཚོགས་པ། དབུས་གཙང་ཆོལ་ཁའི་རྒྱུན་ལས། རྡ་སའི་ཚོང་ཁང་སྐྱིད་སྡུག