འདས་པའི་མི་ལོ་ ༢༡ རིང་གི་ཨ་རྒྱ་གཉིས་ཀྱི་འབྲེལ་འདྲིས་ཁྲོད་ཨ་རིའི་སྲིད་འཛིན་འོས་མི་ལྕམ་ཧེ་ལ་རེ་མཆོག་ནི་རྒྱ་ནག་གཞུང་མང་གཉིས་ཀྱི་གླེང་གཞི་གཙོ་བོ་ཞིག་དང་སྐྱོན་བརྗོད་ཤུགས་ཆེན་བྱེད་པའི་མི་སྣ་ཞིག་ཆགས་ཡོད་འདུག
ཁ་སང་རྒྱ་ནག་ལྷོ་རྒྱུད་ཞོགས་པའི་ཚགས་པར་ཁང་གིས་གནས་ཚུལ་སྤལ་བ་ལྟར་ན། ཨ་རིའི་སྲིད་འཛིན་འོས་མི་ལྕམ་ཧེ་ལ་རེ་མཆོག་ནས་འགྲོ་བ་མིའི་ཐོབ་ཐང་སྐོར་གླེང་སློང་ཤུགས་ཆེན་བྱེད་བཞིན་པ་དེས་པེ་ཅིན་གཞུང་གི་དཔོན་རིགས་ཚོར་དོ་ཕོག་བཟོ་བཞིན་ཡོད་འདུག གནས་ཚུལ་འདིའི་ནང་། “ ཕྱི་ལོ་ ༡༩༩༥ ལོའི་ཟླ་ ༩ བར་མཉམ་འབྲེལ་རྒྱལ་ཚོགས་ཀྱི་བུད་མེད་ཐོབ་ཐང་སྐོར་གྱི་ཚོགས་ཆེན་ཐེངས་ ༤ བ་པེ་ཅིན་དུ་ཚོགས་སྐབས། ལྕམ་ཧེ་ལ་རེ་མཆོག་གིས་ཚོགས་ཆེན་སྟེང་མཉམ་ཞུགས་བྱས་པའི་འཛམ་གླིང་རྒྱལ་ཁབ་ ༡༨༠ སྐུ་ཚབ་དང་རྒྱ་ནག་གི་མཐོ་རིམ་དཔོན་རིགས་ཚོར་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཐད་ལ་སྐར་མ་ ༢༡ རིང་གི་གཏམ་བཤད་སྤེལ་ཏེ། ‘འགྲོ་བ་མིའི་ཐོབ་ཐང་ནི་བུད་མེད་ཀྱི་ཐོབ་ཐང་རེད་ལ། བུད་མེད་ཀྱི་ཐོབ་ཐང་ནི་འགྲོ་བ་མིའི་ཐོབ་ཐང་རེད’ ཅེས་པའི་ལྟ་ཚུལ་བཏོན་ཡོད་པ་དང་། ཕྱི་ལོ་ ༡༩༩༨ ལོའི་ཟླ་ ༦ པར་ལྕམ་ཧེ་ལ་རེ་མཆོག་སྐུ་ཟླ་བྷེལ་ཁི་ལེན་ཊོན་དང་ལྷན་དུ་ཉིན་ ༩ རིང་རྒྱ་ནག་ནང་རྒྱལ་དོན་གཟིགས་སྐོར་དུ་ཕེབས་པ་དེ་ནི་ཕྱི་ལོ་ ༡༩༨༩ ལོར་གནམ་བདེ་སྒོ་མོ་ཆེའི་ཐང་ཆེན་དུ་དམངས་གཙོའི་ལས་འགུལ་ཐོག་ཁྲག་དྲི་བྲོ་བའི་དྲག་གནོན་བྱས་པའི་རྗེས་སུ། ཨ་རིའི་སྲིད་འཛིན་རྒྱ་ནག་ནང་ཕེབས་པ་ཐེངས་དང་པོ་དེ་ཆགས་ཡོད་པ་དང་། ཕྱི་ལོ་ ༢༠༠༩ ལོའི་ཟླ་ ༧ པར་ཨ་རྒྱ་གཉིས་བར་དམག་དོན་དང་དཔལ་འབྱོར་སྐོར་གྱི་བཞུགས་མོལ་ཚོགས་འདུ་ཐོག་དང་པོ་དེ་རྒྱལ་ས་ཝ་ཤིན་ཊོན་དུ་ཚོགས་ཡོད་པ་དང་། སྐབས་དེར་ཨ་རིའི་རྒྱལ་དོན་དྲུང་ཆེ་ལྕམ་ཧེ་ལ་རེ་མཆོག་ནས་ཕྱོགས་གཉིས་བར་ལོ་རེའི་གྲོས་མོལ་ཚོགས་འདུ་བསྐོང་དགོས་པའི་ཐད་ལ་སྐུལ་འདེད་བྱས་པ། ཕྱི་ལོ་ ༢༠༡༠ ལོའི་ཟླ་ ༧ པར་ཝེ་ཋི་ནམ་རྒྱལ་ནང་དུ་ཚོགས་པའི་ཨེ་ཤ་ཡའི་བདེ་འཇགས་སྐོར་གྱི་ཚོགས་ཆེན་སྟེང་ལྕམ་ཧེ་ལ་རེ་མཆོག་ནས་ཐོག་དང་པོར་རྒྱ་ནག་གིས་རང་གི་མངའ་ཁོངས་སུ་གླེང་བཞིན་པའི་ལྷོ་རྒྱུད་མཚོ་ཁུལ་གྱི་བདག་དབང་རྩོད་གླེང་ཐད་ནས་ཨ་རིའི་རྒྱལ་ཁབ་ཀྱང་མཚོ་ཁུལ་དེའི་རང་དབང་མཚོ་འགྲུལ་ལ་མོས་པ་ཆེན་པོ་ཡོད་སྐོར་གསལ་བསྒྲགས་བྱས་ཡོད་པ་རེད།” ཅེས་འཁོད་འདུག
གསར་གནས་དེའི་ནང་མུ་མཐུད་དུ་ལྕམ་ཧེ་ལ་རེ་ཡིས་རྒྱ་ནག་ནང་གི་རང་དབང་དམངས་གཙོའི་ཐོག་འཛིན་པའི་རྣམ་འགྱུར་སྐོར་འཁོད་དོན། “ཕྱི་ལོ་ ༢༠༡༡ ལོའི་ཟླ་ ༥ བར་ནུབ་རྒྱ་མཚོ་ཆེན་མོ་ (The Atlantic) ཞེས་པའི་ཨ་རིའི་བདུན་དེབ་ཁང་གིས་བཅར་འདྲིའི་སྐབས་སུ། ལྕམ་ཧེ་ལ་རེ་མཆོག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེ་ཧ་ཅང་ཡི་མུག་སྐྱེ་དགོས་པ་ཞིག་ཡིན་པ་དང་། པེ་ཅིན་གཞུང་གིས་ཨ་རབ་དཔྱིད་ཀྱི་གསར་བརྗེ་ལ་འཛིན་པའི་རྣམ་འགྱུར་དེར་སེམས་ཁྲལ་སྐྱེ་གཞི་ཞིག་ཆགས་ཡོད་ཅིང་། རྣམ་འགྱུར་དེས་རང་དབང་དམངས་གཙོའི་ལོ་རྒྱུས་ལ་བཀག་རྒྱ་བཟོ་བའི་ལྟ་གོན་བྱེད་ཀྱི་ཡོད་སྟབས། རྣམ་འགྱུར་དེ་ནི་ལྐུག་པའི་བྱ་སྤྱོད་ཅིག་ཡིན་སྐོར་བརྗོད་ཡོད་པ་དང་། ཕྱི་ལོ་ ༢༠༡༢ ལོའི་ཟླ་ ༢ བར་རྒྱ་ནག་ཁྲང་ཅན་གྲོང་ཁྱེར་གྱི་ཉེན་རྟོག་དཔོན་ཝང་ལི་ཅིན་གྱིས་སུའུ་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་དུ་ཡོད་པའི་ཨ་རིའི་ཚོང་འབྲེལ་དོན་གཅོད་ཁང་ལ་སྐྱབས་བཅོལ་བའི་རེ་བ་འབྲས་མེད་དུ་མཐོང་རྗེས། ཨ་རྒྱ་གཉིས་བར་གྱི་འབྲེལ་ལམ་དེ་ཡང་དོགས་གཞིར་གྱུར་བ་དང་། སྐབས་དེར་ཨ་རིའི་རྒྱལ་དོན་དྲུང་ཆེ་ལྕམ་ཧེ་ལ་རེ་མཆོག་གིས་ཨ་རིའི་ཕྱོགས་ནས་རྒྱ་ནག་གཞུང་དང་མཉམ་དུ་གྲོས་མོལ་བརྒྱུད་སྐུ་ཞབས་ཝང་ལགས་ཕྱིར་རྒྱ་ནག་མི་མང་བདེ་འཇགས་ལས་ཁུངས་སུ་རྩིས་སྤྲོད་འདོད་ཡོད་སྟབས། པེ་ཅན་གཞུང་ཕྱོགས་ནས་འབྲེལ་ཡོད་མི་སྣ་སུ་ལའང་ངོ་གནོང་དགོས་དོན་མེད་སྐོར་བརྗོད་ཡོད་པ་དང་། སྐུ་ཞབས་ཝང་གི་གནད་དོན་དེས་རྒྱ་ནག་དམར་ཤོག་ཚོགས་པའི་ཚོང་དོན་བློ་ཆེན་པོ་ཞི་ལེ་ཡི་དབང་ཤུགས་ལ་ཉམས་རྒུད་ཆེན་པོ་བསླངས་ཡོད་པ་རེད།
ཕྱི་ལོ་ ༢༠༡༢ ལོའི་ཟླ་ ༤ བར་ལྕམ་ཧེ་ལ་རེ་རྒྱ་ནག་ནང་དམག་དོན་དང་ཚོང་དོན་སྐོར་གྱི་ལོ་འཁོར་གྲོས་མོལ་ཚོགས་འདུ་ལ་མ་ཕེབས་སྔོན་དུ། རྒྱ་རིགས་འགྲོ་བ་མིའི་ཐོབ་ཐང་དོན་གཉེར་བ་ཁྲིན་གུང་ཁྲན་ལགས་རྒྱ་ནག་གཞུང་གི་བཟང་བཙོན་འོག་ནས་པེ་ཅིན་གྲོང་ཁྱེར་གྱི་ཨ་རིའི་གཞུང་ཚབ་ཁང་དུ་བྲོས་བྱོལ་བྱས་པའི་གནས་ཚུལ་དང་འབྲེལ་ཏེ། ཕྱི་ལོ་ ༢༠༡༤ ལོར་པར་སྐྲུན་བྱས་པའི་ལྕམ་ཧེ་ལ་རེ་མཆོག་གི་མི་ཚེ་ལོ་རྒྱུས་ནང་གི་ཐག་གཅོད་དཀའ་བའི་འདམ་ག་ཞེས་པའི་ལེའུ་དེའི་ནང་ཁོང་མོས་ཅིང་ཙེ་མིན་སྲིད་གཞུང་གིས་བོད་མིའི་ཐོག་འཛིན་པའི་སྲིད་ཇུས་དང་རྒྱ་རིགས་འགྲོ་བ་མིའི་ཐོབ་ཐང་དོན་གཉེར་སྐུ་ཞབས་ཁྲིན་གུང་ཁྲན་རྒྱ་ནག་གི་བཙོན་ཁང་ནས་ཨ་རིའི་གཞུང་ཚབ་ཁང་དུ་བྲོས་བྱོལ་དུ་ཡོང་བའི་གནད་དོན་སོགས་ནི་དམར་ཤོག་ཚོགས་པའི་དཔོན་རིགས་ཚོ་རྒྱལ་སྤྱིའི་སྲིད་དོན་གར་སྟེགས་སྟེང་ཁོང་ཚོར་ངོ་གནོང་དགོས་པའི་གནས་སྟངས་ཤིག་ཡིན་པ་དང་། དེ་བཞིན་ཁོང་མོར་ཨ་རིའི་རྒྱབ་སྐྱོར་དང་དོ་སྣང་། སྲུང་སྐྱོབ་བཅས་ལ་འོས་བབ་ཡོད་སྐོར་བརྗོད་འདུག
ཕྱི་ལོ་ ༢༠༡༥ ལོར་སྤྱི་ཚོགས་བརྒྱུད་ལམ་ཊི་ཝེ་ཊིར་ནང་ལྕམ་ཧེ་ལ་རེ་མཆོག་ནས་རྒྱལ་སྤྱིའི་བུད་མེད་ཀྱི་ཐོབ་ཐང་ཉིན་མོའི་སྔོན་ལ་རྒྱ་ནག་གཞུང་གིས་རྒྱ་རིགས་བུད་མེད་ཐོབ་ཐང་དོན་གཉེར་བ་བུ་མོ་ལྔ་བཀག་བསྐྱིལ་བྱས་ཡོད་པའི་སྐབས་འདིར། སྲིད་འཛིན་ཞི་ཅིན་ཕིན་ནེའུ་ཡོག་གྲོང་ཁྱེར་གྱི་མཉམ་འབྲེལ་རྒྱལ་ཚོགས་ཀྱི་བུད་མེད་ཐོབ་ཐང་སྐོར་གྱི་ཚོགས་ཆེན་བསྡུས་པ་དེ་ནི་ངོ་ཚ་དགོས་པའི་བྱ་སྤྱོད་ཅིག་ཡིན་སྐོར་བརྗོད་ཡོད་པ་རེད།” ཅེས་སོགས་འཁོད་འདུག
ད་དུང་གནས་ཚུལ་དེའི་ནང་འདས་པའི་མི་ལོ་ ༢༡ རིང་ལྕམ་ཧེ་ལ་རེ་ཁི་ལེན་ཊོན་མཆོག་ནི་ཨ་རིའི་སྲིད་འཛིན་སྐབས་ ༤༢ བའི་སྐུ་ལྕམ་དང་ཨ་རིའི་གྲོས་ཚོགས་གོང་མའི་འཐུས་མི། ཨ་རིའི་རྒྱལ་དོན་དྲུང་ཆེ། དེ་བཞིན་ཨ་རིའི་སྲིད་འཛིན་འོས་བསྡུ་སྐབས་ ༥༧ དང་ ༥༨ བཅས་ཀྱི་འོས་མིར་བཞེངས་པའི་བརྒྱུད་རིམ་ཁྲོད་དུ་ཨ་རིའི་སྲིད་འཛིན་རིམ་བྱོན་གྱི་གྲས་ནས་ལྕམ་ཧེ་ལ་རེ་མཆོག་ལ་འབྲེལ་འདྲིས་དང་རྒྱུས་ལོན་ཡོད་མཁན་རྒྱ་རིགས་མི་མང་ཐེར་འབུམ་ ༡.༣ ལྷག་ཟིན་གྱི་ཡོད་པ་དང་། དེ་ལ་བརྟེན་ནས་ལྕམ་ཧེ་ལ་རེ་མཆོག་ནི་རྒྱ་ནག་གཞུང་མང་གཉིས་ཀྱི་གླེང་གཞི་གཙོ་བོ་ཞིག་དང་སྐྱོན་བརྗོད་ཤུགས་ཆེན་བྱེད་པའི་མི་སྣ་ཞིག་ཆགས་ཡོད་འདུག
ན་ནིང་ཕྱི་ཟླ་ ༤ བའི་ནང་ལྕམ་ཧེ་ལ་རེ་མཆོག་ནས་ཁོང་མོ་སྐབས་ ༥༨ པའི་ཨ་རིའི་སྲིད་འཛིན་འོས་མིར་བཞེངས་པ་གསལ་བསྒྲགས་བྱེད་སྐབས། རྒྱ་ནག་དབུས་བརྙན་འཕྲིན་ཁང་གི་དྲ་ཚིགས་བརྒྱུད་ལམ་ནས་རྒྱ་ནག་མི་མང་གིས་ལྕམ་ཧེ་ལ་རེ་ནི་རྒན་མོ་འདྲེས་མོ་ཞིག་ཡིན་པའི་སྐུར་འདེབས་བྱས་པ་དང་། རྒྱ་རིགས་མི་མང་ཁ་ཅིག་གིས་གལ་ཏེ་ཁོང་མོར་སྲིད་འཛིན་རྒྱལ་ཁ་འཐོབ་པ་ཡིན་ན། མོས་འཛམ་གླིང་འཁྲུག་ཆེན་གསུམ་པ་བསླང་སྲིད་པའི་བསམ་ཚུལ་ཡང་བཏོན་ཡོད་ཚུལ་སོགས་བཀོད་འདུག
གསར་འགོད་པ། པདྨ་རྒྱལ།
