ཞི་ཅིན་ཕིན་ལ་ངོ་རྒོལ་ལས་འགུལ་སྤེལ།

ཁ་སང་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ལྷོ་ཕྱོགས་གྷོ་ཝར་རྒྱལ་ཁབ་བདུན་གྱི་ཚོང་དོན་ཚོགས་འདུར་བཅར་སྐབས་བོད་ཀྱི་གཞོན་ནུའི་ཚོགས་མི་ཚོས་རྒྱ་ནག་གཞུང་ཚབ་ཁང་གི་སྒོ་མདུན་དུ་ངོ་རྒོལ་ལས་འགུལ་སྤེལ་འདུག

རྒྱ་གར་ཧིན་རྡུ་ (The Hindu) གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཕྱི་ཚེས་ ༡༥ ནས་ ༡༧ བར་ཉིན་གཉིས་རིང་རྒྱ་གར་ལྷོ་ཕྱོགས་གྷོ་ཝ་ (Goa) རུ་རྒྱ་དཀར་ནག་གཉིས་དང་ཨུ་རུ་སུ། བྷ་ར་རྫེལ། ལྷོ་ཨ་ཧྥེ་རི་ཁ་སོགས་རྒྱལ་ཁབ་བདུན་ཐུན་མོང་གི་བཟོ་ལས་དཔལ་འབྱོར་མཉམ་ལས་སྐོར་གྱི་ཆེས་མཐོའི་དཔོན་རིགས་ལྷན་ཚོགས་ (BIMSTEC Summit) ཟེར་བ་ཞིག་འཚོགས་བཞིན་ཡོད་པ་ལྟར། ཁ་སང་ས་གནས་བོད་ཀྱི་གཞོན་ལྷན་གྱི་ངོས་ནས་རྒྱ་ནག་གཞུང་ཚབ་ཁང་གི་སྒོ་མདུན་དུ་ངོ་རྒོལ་ལས་འགུལ་སྤེལ་ཡོད་པ་དང་། སྐབས་དེར་རྒྱ་གར་ཉེན་རྟོག་པས་བོད་མི་ལས་འགུལ་བ་ ༡༠༠ ལྷག་བཀག་བསྐྱིལ་བྱས་ཡོད་འདུག

གནས་ཚུལ་འདིའི་ནང་། ས་གནས་གཞོན་ལྷན་གྱི་འགན་འཛིན་བསྟན་འཛིན་འཇིགས་མེད་ལགས་ཀྱིས། ཁོ་ཚོས་དེ་རང་འདིར་ཞི་ཅིན་ཕིན་ལ་རྒྱ་ནག་གིས་བོད་ནང་དྲག་གནོད་བྱེད་བཞིན་པ་མཚམས་འཇོག་དགོས་པ་དང་། དངོས་ཡོད་གནས་ཚུལ་དེ་འཛམ་གླིང་ཡོངས་ལ་ཐོས་སུ་འཇུག་དགོས་པའི་འབོད་སྐུལ་ཞུ་ཡི་ཡོད་ཅེས་དང་། རྒྱ་གར་གཞུང་གིས་གྷོ་ཝ་རུ་བདེ་སྲུང་དམག་མི་ཅི་འདྲ་འགྲེམས་འཇོག་བྱས་ནའང་། ཁོ་ཚོས་མུ་མཐུད་དུ་ངོ་རྒོལ་ལས་འགུལ་སྤེལ་རྒྱུ་ཡིན་ཞེས་སོགས་བཤད་ཡོད་སྐོར་བརྗོད་འདུག

གཞན། ཟླ་འདིའི་ཚེས་ ༡༣ ཉིན་གྱི་དགོང་མོར་བོད་རང་བཙན་སློབ་ཕྲུག་ཚོགས་པས་རྒྱ་གར་ལྷོ་ཕྱོགས་གྷོ་ཝའི་ལམ་གཞུང་དཀྱིལ་གྱི་གློག་སྡོང་ཞིག་གི་ཐོག་ཞི་ཅིན་ཕིན་གྱི་འདྲ་པར་དཔྱངས་པ་དང་དེའི་ཐོག་སྣག་ཚ་གཏོར་བ་སོགས་ཀྱི་ངོ་རྒོལ་ལས་འགུལ་སྤེལ་ཡོད་འདུག

གསར་འགོད་པ། པདྨ་རྒྱལ།