བོད་མི་མང་སྤྱི་འཐུས་ཚོགས་གཞོན་ཨ་ཅརྱ་ཡེ་ཤེས་ཕུན་ཚོགས་ལགས་ནས་རྒྱ་གར་ས་གནས་མི་མང་ནས་བོད་ཀྱི་གནས་ཚུལ་ཡང་དག་པ་ཤེས་པའི་ཐོག་ནས་བོད་དོན་ཐོག་རྒྱབ་སྐྱོར་བྱེད་དགོས་པའི་འབོད་སྐུལ་ཞུས་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་། ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག དྷ་ས་མེག་གྷན་རླངས་འཁོར་འབབ་ཚིགས་སུ། ཁོར་ཡུག་གཙང་བཟོ་དང་འབྲེལ་ཏེ་ས་གནས་རྒྱ་གར་མི་མང་ལ་བོད་དོན་ཐོག་གོ་རྟོགས་སྤེལ་ཐབས་ཀྱི་ལས་འགུལ་ཞིག་སྤེལ་ཡོད་པ་རེད། ལས་འགུལ་དེའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་ཨ་ཅརྱ་ཡེ་ཤེས་ཕུན་ཚོགས་མཆོག་དང་། ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་རྗེ་སན་ལགས་གཉིས་གཙོས་པའི་དྷ་ས་ཁུལ་གྱི་ཧིན་བོད་མི་མང་དང་། དགོན་སྡེ་ཁག་གི་གྲྭ་བཙུན་སོགས་མི་མང་ ༢༠༠ ལྷག་འཛོམས་འདུག
སྤྱི་འཐུས་ཚོགས་གཞོན་ཨ་ཅརྱ་ཡེ་ཤེས་ཕུན་ཚོགས་མཆོག་གིས་དྷ་རམ་ས་ལ་ཁུལ་གྱི་རྒྱ་གར་ཡུལ་མི་ཚོས་ཁོར་ཡུག་གཙང་བཟོའི་ཐོག་དོ་སྣང་སྤྲོད་དགོས་སྐོར་དང་འབྲེལ་ཏེ་བོད་དོན་ལ་རྒྱབ་སྐྱོར་གནང་གལ་ཆེ་སྐོར་ཡང་གསུངས་ཡོད་པ་རེད།
ཚོགས་གཞོན་མཆོག་གིས་གསུངས་དོན། དེ་རིང་འདིར་ཁོར་ཡུག་གཙང་མ་བཟོ་བའི་ལས་འཆར་དེ་རྩ་བའི་རྒྱ་གར་ས་གནས་མི་མང་ནང་བོད་དོན་ཐོག་གོ་རྟོགས་ཆེད་ཡིན་པ་དང་། ཁ་ཉིན་ཁོར་ཡུག་གཙང་བཟོའི་ལས་འགུལ་དེ་སྤེལ་ཐུབ་མེད་སྟབས། དེ་རིང་འདིར་བོད་དོན་ཐོག་གོ་རྟོགས་ཐབས་དང་མཉམ་དུ་ལས་རིམ་བང་སྒྲིག་པ་ཡིན་ཞིང་། སྤྱིར་བོད་དོན་གོ་རྟོགས་ཐབས་དེ་ཚོགས་ཁང་ནང་མཁས་དབང་ཚོ་དང་སློབ་གྲྭ་ཁག་གི་སློབ་ཕྲུག་ཚོ་ཙམ་མ་ཡིན་པར་མི་མང་དཀྱུས་མའི་ནང་ལ་བོད་དོན་གོ་རྟོགས་སྤེལ་ན་མ་གཏོགས། ས་གནས་མི་མང་རྣམས་བོད་དོན་ལས་འགུལ་ཐོག་མཉམ་ཞུགས་བྱེད་ཐུབ་ཀྱི་མེད་སྟབས། དེ་རིང་གི་ལས་འགུལ་དེ་གཙོ་བོ་བོད་དོན་གོ་རྟོགས་སྤེལ་ཐབས་ཀྱི་ལས་འགུལ་ཞིག་ཆགས་ཡོད་པ་དང་། འཛམ་གླིང་མི་མང་གིས་བོད་དོན་ཐོག་རྒྱབ་སྐྱོར་ཤུགས་ཆེན་བྱེད་ཀྱིན་ཡོད་པ་དང་། ཕྱི་རྒྱལ་ནས་ཡོང་མཁན་ཚོས་བོད་དོན་སྐོར་གྱི་གནས་ཚུལ་ཐད་རྟོགས་ཞིབ་དང་ཉམས་ཞིབ་བྱེད་ཀྱིན་ཡོད་ནའང་། འདི་གའི་རྒྱ་གར་མི་མང་གིས་བོད་ཀྱི་རྩ་དོན་སྐོར་ལ་དོ་སྣང་གང་ཡང་མེད་པ་དང་། གནས་ཚུལ་ཆུང་ཆུང་དེ་ཚོ་རྙོག་དྲ་ཆེན་པོར་མཐོང་ནས་ཧ་ལས་ཧང་སང་བསྡད་ཡོད། ང་ཚོ་འདིར་མི་ཚེ་བསྐྱེལ་དུ་ཡོང་ཡོད་པ་མ་རེད། འཛམ་གླིང་མི་མང་གིས་རྒྱལ་བ་རིན་པོ་ཆེ་མཆོག་ལ་ཐུག་འཕྲད་དང་ཁོང་གི་དགོངས་གཞིའི་ཐོག་རྒྱབ་སྐྱོར་གནང་གི་ཡོད་པ་ལྟར། ཁྱེད་རང་ཚོ་རྒྱ་གར་མི་མང་གི་ངོས་ནས་ཀྱང་བོད་ཀྱི་གནས་ཚུལ་ཡང་དག་པ་ཤེས་པའི་ཐོག་ནས་བོད་དོན་ཐོག་རྒྱབ་སྐྱོར་བྱེད་དགོས་ཀྱི་ཡོད་པ་དང་། རྒྱ་གར་མི་མང་གིས་བོད་དོན་ཐོག་རྒྱབ་སྐྱོར་གནང་རོགས་གནང་ཞེས་ཞུ་བཞིན་ཡོད། ཅེས་བརྗོད་སོང་།
ཡང་ཁོང་གིས་བོད་དོན་ཐོག་རྒྱབ་སྐྱོར་གནང་མཁན་དེ་མཁས་པ་དང་ལས་ཁུངས་ནང་ལས་ཀ་བྱེད་མཁན་གཅིག་པུ་ཙམ་མིན་པར། སྔོ་ཚལ་འཚོང་མཁན་ནས་ཟ་ཁང་ཚོང་ཁང་མགྲོན་ཁང་འཛིན་མཁན་ཡོངས་སུ་རྫོགས་པའི་རྒྱབ་སྐྱོར་དགོས་ཀྱི་ཡོད་མ་གཏོགས། ང་ཚོར་རྐུབ་སྟེགས་སྟེང་སྡོད་མཁན་གཅིག་པུའི་རྒྱབ་སྐྱོར་གྱིས་འགྲིག་གི་ཡོད་པ་མ་རེད། རྒྱ་གར་གྱི་དབུ་ཁྲིད་མང་པོ་ཞིག་གིས་རྒྱ་གར་མི་མང་གིས་བོད་དོན་ཐོག་རྒྱབ་སྐྱོར་བྱེད་དགོས་པ་གནད་འགག་ཡིན་སྐོར་གསུང་གི་ཡོད་པ་ལྟར། རྒྱལ་བ་རིན་པོ་ཆེ་མཆོག་ལ་དངོས་གནས་དྲང་བདེན་གུས་ཞབས་ཡོད་པ་ཡིན་ན། རྒྱལ་བ་རིན་ཆེ་མཆོག་གི་ཐུགས་ཀྱི་དགོངས་གཞིའི་ཐོག་ནས་ཁྱེད་རང་ཚོས་བོད་ཀྱི་རྩ་དོན་ཐོག་ལ་རྒྱབ་སྐྱོར་གནང་རོགས། བཙན་བྱོལ་བོད་མི་ཚོ་ཕྱིར་བོད་ལ་ལོག་ཐུབ་རྒྱུ་དེ་དམིགས་ཡུལ་གཙོ་བོ་ཡིན་པ་ལས། ང་ཚོ་འདིར་གཏན་འཇགས་སུ་སྡོད་འཆར་ཡོད་པ་མ་རེད། ང་ཚོ་བཙོན་བྱོལ་ནང་འབྱོར་ནས་རྒྱ་གར་གཞུང་མང་གཉིས་ནས་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུ་ཡི་ཡོད་ཅེས་སོགས་ཧིན་སྐད་ནང་སྒྲོག་སྦྱངས་བྱས་ཡོད་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༡།༣༠ ནས་དྷ་ས་ཁུལ་གྱི་ཧིན་བོད་སེར་སྐྱ་མི་མང་གིས་བཞུགས་སྒར་ས་ཁུལ་གྱི་གཞུང་ལམ་གཡས་གཡོན་དང་ཟ་ཁང་ཚོང་ཁང་ཁག་གི་གཡས་གཡོན་གང་སའི་གད་སྙིགས་གཙང་བཟོ་བྱེད་བཞིན་ཡོད་པ་རེད།
གསར་འགོད་པ། པདྨ་རྒྱལ།
