ཕྱི་ཟླ་ ༡༠ ཚེས་ ༢༡ ཉིན། ཐེ་ཝན་གྱི་རྒྱལ་ས་ཐེ་པེའི་གྲོང་ཁྱེར་གྱི་སྲིད་བློན་ལས་ཁུངས་མདུན་དུ། ཐེ་ཝན་ནང་གི་བོད་པ་གནས་སྡོད་ཆོག་པའི་ཡིག་ཆ་སོགས་གང་ཡང་མེད་པའི་སྐྱབས་བཅོལ་བ་ ༡༧ གྱིས་སྐྱབས་བཅོལ་ཡིག་ཅ་རེག་ཐབས་ལ་ཞི་བའི་ངོ་རྒོལ་ལས་འགུལ་ཞིག་སྤེལ་ཡོད་འདུག
ལས་འགུལ་དེའི་སྐོར་ཐེ་ཝན་བོད་རིགས་ཚོགས་པའི་ཚོགས་གཙོ་བཀྲ་ཤིས་ཚེ་རིང་ལགས་སུ་བཅར་འདྲི་ཞུས་པར་ཁོང་གིས་བརྗོད་དོན། སྤྱིར་ཐེ་ཝན་གཞུང་ལ་སྐྱབས་བཅོལ་དུ་ལེན་པའི་ཁྲིམས་དེ་ཡོད་པ་མ་རེད། ཡིན་ནའང་ད་བར་བོད་པ་ཚོའི་ཐོག་ལ་ཡག་པོ་ཞེ་དྲགས་གནང་གི་ཡོད་པ་རེད། ལྷག་པར་དུ་ཉེ་ལམ་ཕྱི་ཟླ་ ༥ པའི་ནང་ལ་ཐེ་ཝན་དམངས་གཙོ་ཡར་འཐོན་ཚོགས་པས་གཞུང་བཟུང་བ་ནས་བཟུང་བོད་པ་སྐྱབས་བཅོལ་བ་ཚོར་ཡིག་ཆ་རེག་རྒྱུར་རེ་བ་ཆེན་པོ་ཞིག་བསླེབས་ཡོད་པ་རེད། གང་ཡིན་ཟེར་ན། དམངས་གཙོ་ཡར་ཐོན་ཚོགས་པའི་དེ་སྔོན་ནས་སྐྱབས་བཅོལ་གྱི་ཁྲིམས་བཟོ་རྒྱུར་འབད་བརྩོན་བྱས་བསྡད་ཡོད་པ་རེད།
སྤྱིར་བཏང་སྔོན་ཆད་རིམ་པ་གསུམ་ལ་བོད་པ་ཚོར་སྐྱབས་བཅོལ་ཡིག་ཆ་སྤྲད་ཡོད་པ་རེད། ཐེངས་དང་པོར་ ༢༠༠༡ ལོར་བོད་པ་ ༡༣ ལ་སྐྱབས་བཅོལ་ཡིག་ཆ་སྤྲད་པ་རེད། དེའི་རྗེས་ལ་སྲིད་འཛིན་ཁྲི་ཧྲུ་ཕིན་གྱི་སྐབས་སུ་༧གོང་ས་མཆོག་གདན་འདྲེན་ཞུས་པ་དང་མཉམ་དུ་བོད་པ་ཚོར་རྔན་པ་ལྟ་བུར་མི་ ༡༢༥ ལ་ཐད་ཀར་སྐྱབས་བཅོལ་ཡིག་ཆ་སྤྲད་པ་རེད། དེའི་རྗེས་ ༢༠༡༡ ལོར་སླར་ཡང་བོད་མི་ ༥༧ ཙམ་ལ་ཡིག་ཆ་སྤྲད་པ་རེད། ད་ལྟ་བོད་པ་མང་པོ་ཞིག་ལ་ཡིག་ཆ་སོགས་གང་ཡང་ཡོད་པ་མ་རེད། ཁོ་རང་ཚོ་ཕྱིར་ཕ་ཡུལ་དང་རྒྱལ་ཁབ་གཞན་ལའང་འགྲོ་ཐུབ་ཀྱི་མེད་པ་མ་ཟད། ཐེ་ཝན་ནང་དུའང་ཐོབ་ཐང་མང་པོ་ཞིག་རེག་གི་མེད་པའི་དཀའ་ངལ་ཆེན་པོ་འཕྲད་ཡོད་པ་རེད། ཡིན་ནའང་ཁོ་རང་ཚོ་ཁྲིམས་འགལ་ཐོག་བསྡད་ཡོད་པ་དེ་འདྲ་མ་རེད། བལ་ཡུལ་ནས་ཡོང་སྟེ་རྗེས་ལ་བལ་ཡུལ་གཞུང་གིས་ཡིག་ཆ་འཕར་འགྱངས་ངོས་ལེན་མ་བྱས་པ་དང་། ཚུར་འབྱོར་ཏེ་དུས་ཚོད་མང་པོ་ཕྱིན་མེད་པ་དེ་འདྲ་རྐྱང་རེད། ཅེས་ངོ་སྤྲོད་གནང་བྱུང་།
ཁོང་ལ་མ་འོངས་པར་བོད་པ་ཚོར་སྐྱབས་བཅོལ་ཡིག་ཆ་རེག་རྒྱུར་རེ་བ་མཐོང་གི་ཡོད་མེད་དྲིས་པར་ཁོང་གིས། ཉེ་ལམ་ཕྱི་ཟླ་ ༩ པའི་ནང་གི་བོད་དོན་ལ་རྒྱབ་སྐྱོར་གནང་མཁན་ཤུགས་ཆེ་ཤོས་དང་ཐེ་ཝན་གྲོས་ཚོགས་འཐུས་མི། བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ལྕམ་ཀོ་ལ་སི་ཡོ་ཊ་ཁཱ་(Kolas Yotaka)མཆོག་དྷ་རམ་ས་ལར་ཕྱིན་པའི་རྗེས་ལ་མོས་ཐེ་ཝན་གྲོས་ཚོགས་ནང་བོད་དོན་གླེང་ཡོད་པ་མ་ཟད། བོད་དོན་མ་སེལ་བར་ཐེ་ཝན་གཞུང་གིས་བོད་དོན་ལ་རོགས་རམ་གནང་དགོས་སྐོར་ཞུས་པའི་ལན་དུ། ཐེ་ཝན་གཞུང་ངོས་ནས་བོད་དོན་འགྲིག་འཇགས་མ་ཡོང་བར་བོད་དོན་ལ་རྒྱབ་སྐྱོར་གནང་རྒྱུ་དཀའ་ཡང་། ༢༠༡༦ ཟླ་ ༦ ཚེས་ ༢༩ སྔོན་ལ་ཐེ་ཝན་ནང་འབྱོར་བ་ཚོར་རོགས་རམ་གནང་རྒྱུ་ཡིན་སྐོར་གསུངས་ཡོད་པ་རེད། དེར་བརྟེན། ཟླ་འདིའི་ཚེས་ ༢༡ ཉིན། ཐེ་ཝན་ནང་གི་ཡིག་ཆ་མེད་མཁན་བོད་པ་ ༡༧ གྱིས་སྲིད་བློན་ལས་ཁུངས་ནང་བཅར་ཏེ་དཀའ་ངལ་ཞུས་སྐབས། ཁོ་རང་ཚོས་ང་ཚོས་གང་མགྱོགས་གོ་བསྡུར་བྱས་ཏེ། མ་འོངས་པའི་ཟླ་ ༢ ནང་ཚུན་ལ་ཁྱེད་རང་ཚོར་ལན་ཞིག་སྤྲོད་ངེས་ཡིན་གསུངས་སོང་། མ་འོངས་པར་ཐེ་ཝན་གྲོས་ཚོགས་ཡང་བསྐྱར་ཚོགས་སྐབས་སྐྱབས་བཅོལ་གྱི་ཁྲིམས་གཏན་འབེབས་ཡོང་གི་རེད་བསམ་གྱི་འདུག ཅེས་བརྗོད་བྱུང་།
ཁོང་གིས་མུ་མཐུད་དུ། མཐའ་མར་གསལ་བོ་བྱས་ཏེ་ཞུ་རྒྱུ་ཞིག་ལ། ཐེ་ཝན་ནང་གི་བོད་པ་སྐྱབས་བཅོལ་བ་ཚོའི་དཀའ་ངལ་ཐད་ཐེ་ཝན་བོད་སོག་ལས་ཁུངས་ཀྱིས་ད་སྔ་རོགས་རམ་གང་ཡང་གནང་ཡོད་པ་མ་རེད་ལ། མ་འོངས་པར་རོགས་རམ་གནང་དགོས་དོན་ཡང་མེད། ང་ཚོར་དཀའ་ངལ་ག་རེ་འཕྲད་ཀྱང་ཐེ་ཝན་བོད་སོག་ལས་ཁུངས་དང་འབྲེལ་བ་རྩ་བ་ནས་མེད་ཅེས་གསལ་བོར་ཞུ་འདོད་བྱུང་སོང་། ཞེས་སོགས་བརྗོད་སོང་།
གཞན། ཟླ་སྔོན་མའི་ནང་ཐེ་ཝན་ཐེ་ཝན་ནང་གསར་འཛུགས་བྱས་པའི་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་བཀྲ་ཤིས་ཚེ་རིང་ལགས་དང་། ཐེ་ཝན་དུས་རབས་ཀྱི་སྟོབས་ཤུགས་ཚོགས་པའི་ New Power Party གྲོས་ཚོགས་འཐུས་མི་སྐུ་ཞབས་ཧྥི་ཌེ་ལེམ་ Freddy Lim མཆོག ཐེ་ཝན་མང་གཙོ་ཡར་ཐོན་ཚོགས་པའི་གྲོས་ཚོགས་འཐུས་མི་ལྕམ་སྐུ་ཀོ་ལ་སི་ཡོ་ཊ་ཀ་ Kolas Yotaka མཆོག་སོགས་བཞུགས་སྒར་དྷ་རམ་ས་ལར་ཕེབས་པ་དང་བསྟུན་ཏེ་ཕྱི་ཟླ་ ༩ ཚེས་ ༥ ཉིན། གངས་སྐྱིད་ལྷག་པ་ཚེ་རིང་ཚོགས་ཁང་དུ་གསར་འགོད་གསལ་བསྒྲགས་སྤེལ་ཏེ། ང་ཚོས་༧གོང་ས་ཏཱ་ལའི་བླ་མ་མཆོག་ཐེ་ཝན་ནང་གདན་འདྲེན་ཞུས་ཏེ་ཐེ་ཝན་གྲོས་ཚོགས་ནང་༸གོང་ས་མཆོག་གིས་བཀའ་སློབ་བསྩལ་རྒྱུའི་ལོ་རྒྱུས་ཀྱི་དུས་སྐབས་ལ་ངང་སྒུག་ཞུ་བཞིན་ཡོད། ཅེས་བརྗོད་ཡོད་པ་རེད།
ཕྱི་ཟླ་ ༡༠ ཚེས་ ༧ ཉིན་གྱི་སྔ་དྲོར་ཐེ་ཝན་གྲོས་ཚོགས་ཀྱི་སྐུ་མགྲོན་ཚོམས་ཆེན་ནང་། ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བ་གསལ་བསྒྲགས་གནང་ཡོད་པ་དང་། སྐབས་དེར་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ཧྥི་ཌེ་ལེམ་ལགས་ཀྱིས། ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་ནི་ཐེ་ཝན་གྱི་སྲིད་དོན་ཚོགས་པ་འདྲ་མིན་གྱི་གྲོས་ཚོགས་འཐུས་མི་ལས་གྲུབ་པའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་ཞིག་ཡིན་པ་དང་། གྲོས་ཚོགས་འཐུས་མིའི་ནུས་ཤུགས་གཅིག་ཏུ་བསྒྲིལ་ནས་བོད་དོན་ཁྱབ་སྤེལ་གྱིས་ཐེ་ཝན་ནང་བོད་སོག་ལས་ཁུངས་སྒོ་བརྒྱབ་རྒྱུའི་ལས་གཞི་མཇུག་སྐྱོང་རྒྱུ་དང་། རྒྱལ་སྤྱིའི་ཐོག་གི་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་མཉམ་ཞུགས་ཀྱིས་ལས་འགུལ་སྤེལ་ཐུབ་པ་བྱ་རྒྱུ་ཡིན། ཞེས་སོགས་བརྗོད་ཡོད་པ་རེད།
