དེ་རིང་ཕྱི་ཟླ་ ༡༠ ཚེས་ ༢༤ ཉིན་གྱི་སྔ་དྲོའི་ཆུ་ཚོད་ ༡༠།༣༥ སྟེང་། ༧གོང་ས་མཆོག་ཡུ་རོབ་ནང་གི་བདུན་ཕྲག་གཉིས་ལྷག་རིང་གི་མཛད་རིམ་ཁག་གྲུབ་སྟེ། ཕྱིར་བཞུགས་སྒར་དྷ་རམ་ས་ལའི་ཕོ་བྲང་དུ་ཆིབས་བསྒྱུར་བསྐྱངས་ཡོད་པ་རེད།
ཉེ་ལམ་ཕྱི་ཟླ་ ༡༠ ཚེས་ ༨ ཉིན་ཉིན་༧གོང་ས་མཆོག་བཞུགས་སྒར་ནས་ཆིབས་འཐོན་གནང་ཡོད་པ་དང་། ཚེས་ ༩ ཉིན་རྒྱ་གར་མ་ཧཱ་ར་ཤ་ཏྲ་མངའ་སྡེའི་གྲོང་ཁྱེར་ནག་པུར་ནང་མཛད་འཕྲིན་ཁག་ཅིག་དང་། ཚེས་ ༡༠ ཉིན་ཏི་ཝི་ཡའི་ Latvia རྒྱལ་ས་རི་གའི་ Riga གནམ་ཐང་དུ་ཞབས་སོར་བཀོད་དེ་ཡུ་རོབ་ནང་གི་མཛད་འཕྲིན་དབུ་འཛུགས་གནང་ཡོད།
ཐེངས་འདིར་ཡུ་རོབ་རྒྱལ་ཁབ་ལཱ་ཏི་ཝི་ཡ་(Latvia)དང་། སུད་སི་(Switzerland)། སུ་ལོ་ཝ་ཀི་ཡ་(Slovakia) ཅེག་སྤྱི་མཐུན་རྒྱལ་ཁབ་(Czech Republic) དེ་བཞིན། ཨི་ཊ་ལི་(Italy)བཅས་རྒྱལ་ཁབ་ཁག་ལྔའི་ནང་མཛད་འཕྲིན་བསྐྱངས་ཡོད་པ་རེད།
ཕྱི་ཟླ་ ༡༠ ཚེས་ ༡༤ ཉིན་གྱི་སྔ་དྲོར་སུད་སི་དང་ལིཀ་ཏེན་སཊིན་བོད་རིགས་མི་མང་ལ་དབུ་མ་རིན་ཆེན་ཕྲེང་བ་དང་སྒོམ་རིམ་བར་པ། རྒྱལ་སྲས་ལག་ལེན་སོ་བདུན་མ་བཅས་ཀྱི་བཀའ་ཆོས་གནང་བ་དང་འབྲེལ་ཏེ། ས་གནས་བོད་རིགས་ཚོས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་འདུག
ཕྱི་ཚེས་ ༡༦ ཉིན་ཡུ་རོབ་དབུས་ཁུལ་གྱི་རྒྱལ་ཁབ་སི་ལོ་བ་ཀེ་ཡའི་ (Slovakia)ནང་ཆིབས་བསྒྱུར་བསྐྱངས་ཏེ་སྲིད་འཛིན་ཨན་ཌ་རི་རྗ་ཀེ་སི་ཀ་ (Andrej Kiska) མཆོག་དང་མཇལ་འཕྲད་གནང་བར། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧྭ་ཁྲུན་ཡཱེན་ཟེར་བས། “སི་ལོ་བ་ཀེ་ཡའི་ཕྱོགས་ནས་ཏཱ་ལའི་ཁ་བྲལ་རུ་ཚོགས་ཀྱི་རང་བཞིན་ལ་ངེས་ཤེས་གསལ་བོ་འཐོབ་པའི་ཐོག་ནས་རྒྱ་ནག་གཞུང་གི་སེམས་ཁྲལ་དང་ཁེ་ཕན་ལ་བརྩི་བཀུར་བྱེད་པའི་རེ་བ་ཡོད།” ཅེས་སོགས་བཤད་འདུག
ཚེས་ ༢༠ ཉིན་ཨི་ཊ་ལིའི་གྲོང་ཁྱེར་མའེ་ལན་གཙུག་ལག་སློབ་གྲྭ་ University of Milan-Bicocca ཞེས་པའི་ནང་ཆིབས་བསྒྱུར་དང་། མའེ་ལན་གྲོང་སྡེ་ལས་ཁུངས་ཀྱི་ཚོགས་གཙོ་སྐུ་ཞབས་ལམ་བྷེར་ཏོ་བྷར་ཏོལ་ལེ་ Lamberto Bertolè མཆོག་གིས་༸གོང་ས་མཆོག་ལ་མའེ་ལན་གྲོང་ཁྱེར་གྱི་མི་སེར་ཕྱག་འཁྱེར་ Citizenship of the City of Milan འབུལ་ལམ་ཞུས་པར་སླར་ཡང་རྒྱ་ནག་གཞུང་གིས། ཏཱ་ལའི་བླ་མར་མི་སེར་ཕྱག་འཁྱེར་འབུལ་རྒྱུ་དེས་ཨི་ཊ་ལི་དང་རྒྱ་ནག་གཉིས་བར་གྱི་འབྲེལ་ལམ་ལ་དོ་ཕོག་འགྲོ་རྒྱུ་ཡིན་ལུགས་བཤད་ཡོད།
