དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་མིག་དམར་ཉིན་ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་ཡིས་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ཡིས་སི་རི་ཡའི་ཐོག་འཛིན་པའི་སྲིད་ཇུས་ལངས་ཕྱོགས་ལ་གཞིགས་ན། གལ་ཏེ་ཨ་རིའི་དམག་དཔུང་གིས་སི་རི་ཡའི་ནང་དམག་འཐབ་བྱས་པ་ཡིན་ན། ཡུལ་ལུང་དེའི་ནང་ཡོད་པའི་ཨུ་རུ་སུའི་དྲག་ཆས་དམག་དཔུང་དང་ཨ་རི་གཉིས་བར་འཛམ་གླིང་དམག་ཆེན་གསུམ་པ་ལང་སྲིད་སྐོར་བརྗོད་འདུག
གསར་འགོད་པའི་བཅར་འདྲི་ཞིག་གི་ཐོག་སྐུ་ཞབས་ཊི་རུམ་ཕི་ཡིས། སི་རི་ཡའི་ནང་གི་ཁ་ཆེ་དྲག་སྤྱོད་པ་ (IS) ཕམ་ཉེས་གཏོང་རྒྱུ་དེ་ཨ་རིའི་ཕྱི་འབྲེལ་སྲིད་ཇུས་ཀྱི་དམིགས་འབེན་གཙོ་བོ་ཡིན་པ་ལས། སི་རི་ཡའི་སྲིད་འཛིན་བྷ་ཤཱར་ཨལ་ཨ་སི་ཌ་ (Bashar al-Assad) སྲིད་སྟེགས་ནས་ཕབ་རྒྱུ་དེ་གཙོ་བོ་མིན་པ་དང་། ལྕམ་ཧེ་ལ་རེ་ཡིས་ཨུ་རུ་སུའི་སྲིད་འཛིན་ཕུ་ཊེན་ལ་སྐྱོན་འཛུགས་ཤུགས་ཆེན་པོ་བྱས་ཡོད་སྟབས། གལ་སྲིད་མོ་རང་ཨ་རིའི་སྲིད་འཛིན་ཆགས་ན། མ་འོངས་པར་ཨ་རི་དང་ཨུ་རུ་སུ་གཉིས་བར་ཞི་འགྲིག་བཟོ་ཐབས་མེད་སྐོར་དང་། ཨོ་བྷ་མའི་སྲིད་དབང་འོག་ཨ་རི་དང་ཧྥེ་ལེ་ཕེན་གཉིས་བར་གྱི་འབྲེལ་ལམ་ཇེ་སྡུག་ཏུ་ཕྱིན་ཡོད་པ། ད་ལོའི་ལོའི་སྲིད་འཛིན་འོས་བསྡུའི་སྐབས་སུ་སྤྱི་མཐུན་ཚོགས་པའི་དཔོན་རིགས་ཚོ་ཆིག་སྒྲིལ་མེད་སྐོར་སོགས་བརྗོད་འདུག
གནས་ཚུལ་འདིའི་མཇུག་ཏུ་སྐུ་ཞབས་ཊི་རུམ་ཕི་ཡིས། ད་ལོའི་སྲིད་འཛིན་འོས་བསྡུའི་ཁྲོད་དུ་ཨ་རིའི་མི་མང་སྤྱི་མཐུན་ཚོགས་པའི་མགོ་ཁྲིད་ཚོའི་ཐོག་ལ་ཁོང་ཁྲོ་ལང་གི་ཡོད་པ་དང་། དེའི་རྒྱུ་མཚན་གཙོ་བོ་གལ་ཏེ་སྤྱི་མཐུན་ཚོགས་པའི་ཆེས་མཐོའི་དཔོན་རིགས་ཚོས་ཁོང་ལ་རྒྱབ་སྐྱོར་གནང་བ་ཡིན་ན། སྤྱི་མཐུན་ཚོགས་པར་བརྒྱ་ཆ་བརྒྱ་སྲིད་འཛིན་རྒྱལ་ཁ་འཐོབ་རྒྱུ་ཡིན་པ་མ་ཟད། གལ་ཏེ་ཁོང་ལ་རྒྱལ་ཁ་ཐོབ་པ་ཡིན་ན། ཁོང་གིས་མ་འོངས་པར་དམངས་གཙོ་ཚོགས་པའི་དཔོན་རིགས་ཚོ་གྲོས་ཚོགས་ནང་ལ་མ་གཏོགས་བཀའ་ཤག་བསྐོ་འཇོག་བྱ་རྒྱུ་མིན་སྐོར་སོགས་བརྗོད་འདུག
ལྕམ་ཧེ་ལ་རེ་ཡི་རྒྱབ་སྐྱོར་ཚོགས་པའི་མགྲིན་ཚབ་པ་རྗ་སི་ལ་རེ་ཁི་ (Jesse Lehrich) ཟེར་བ་ཞིག་གིས། སྐུ་ཞབས་ཊི་རུམ་ཕི་ཡིས་ཨུ་རུ་སུའི་སྲིད་འཛིན་ཕུ་ཊེན་གྱིས་ཨ་རི་ལ་ཞེད་སྣང་སྐུལ་བྱེད་ཀྱི་སྐད་ཆ་དེ་དག་བསྐྱར་ཟློས་བྱེད་ཀྱིན་ཡོད་པ་མ་གཏོགས། ཁོ་རང་ལ་ཁ་ཆེ་དྲག་སྤྱོད་པ་ཕམ་ཉེས་བཟོ་བའམ། ཡང་ན་སི་རི་ཡའི་དཀའ་སྡུག་སེལ་བའི་འཆར་གཞི་གང་ཡང་མེད་སྐོར་བརྗོད་འདུག
གནས་ཚུལ་ལྟར་ན། ཨ་རིའི་སྲིད་འཛིན་འོས་མི་གཉིས་བར་གྱི་ཆབ་སྲིད་འགྲོ་གླེང་ཐེངས་གསུམ་པའི་ཐོག་ལྕམ་ཧེ་ལ་རེ་ཡིས། སི་རི་ཡའི་ནང་མཁའ་ལམ་མེད་པའི་ས་ཁུལ་ཁག་ཏུ་ཨ་རིའི་དམག་དཔུང་བཏང་སྟེ་ཉེ་མེད་མི་སེར་སྲུང་སྐྱོབ་བྱེད་དགོས་སྐོར་བརྗོད་ཡོད་པ་དང་། ཁོང་མོའི་བསམ་ཚུལ་དེའི་ཐད་ལ་ཨ་རིའི་སྲིད་དོན་དབྱེ་ཞིབ་པ་ཚོས་གལ་ཏེ་མཁའ་ལམ་མེད་པའི་ས་ཁུལ་དེ་དག་སྲུང་སྐྱོབ་བྱས་པ་ཡིན་ན། ཨ་རི་དང་ཨུ་རུ་སུའི་དམག་དཔུང་གཉིས་བར་ཐད་ཀར་འཁྲུག་འཛིང་ཤོར་སྲིད་སྐོར་རྗོད་ཀྱི་ཡོད་འདུག
གཞན། ལྕམ་ཧེ་ལ་རེ་ཡི་རྒྱབ་སྐྱོར་ཚོགས་པའི་ངོས་ནས་སྐུ་ཞབས་ཊི་རུམ་ཕི་ཡིས་ལྕམ་ཧེ་ལ་རེ་ལ་སྐྱོན་འཛུགས་བྱེད་བཞིན་པར་ཁ་ཡ་མི་བྱེད་པར། སྤྱི་མཐུན་ཚོགས་པ་དང་དམངས་གཙོ་ཚོགས་པ་གཉིས་ཀྱི་ཨ་རིའི་རྒྱལ་ཡོངས་བདེ་འཇགས་ལས་དོན་ཐད་ཀྱི་ཆེད་མཁས་པ་ཚོས་སྐུ་ཞབས་ཊི་རུམ་ཕི་ལ་ཨ་རིའི་སྲིད་དབང་འཛིན་པའི་ཤེས་འཇོན་གང་མེད་སྐོར་བརྗོད་པ་དེ་ལ་དོ་སྣང་བྱེད་ཀྱིན་ཡོད་འདུག
སྐུ་ཞབས་ཊི་རུམ་ཕི་ཡི་ཕྱོགས་ནས། ཨ་རིའི་གསར་འགྱུར་བརྒྱུད་ལམ་ཁག་གིས་འོས་བསྡུའི་ཁྲིམས་སྒྲིག་འཕྲོ་བརླག་ལ་བཏང་སོང་བ་དང་། ཁོང་གི་རྒྱབ་སྐྱོར་བ་ཚོས་སྤྱི་མཐུན་ཚོགས་པའི་དཔོན་རིགས་ཚོར་ཆིག་སྒྲིལ་མེད་པར་སེམས་ཁྲལ་བྱེད་བཞིན་སྐོར་བརྗོད་ཡོད་པ་རེད།
ད་ལོའི་ཕྱི་ཟླ་ ༡༡ ཚེས་ ༨ ཉིན་སྐབས་ ༥༨ པའི་ཨ་རིའི་སྲིད་འཛིན་འོས་བསྡུ་ཆེན་མོ་གནང་རྒྱུ་ཡིན་པ་རེད།
གསར་འགོད་པ། པདྨ་རྒྱལ།
