དྷ་རམ་ས་ལའི་རང་དབང་གི་གསར་འགོད་པ་བློ་བཟང་དབང་རྒྱལ་ལགས་ཀྱིས་ཁ་སང་ཕྱི་དྲོར་དྷ་ས་བོད་ཀྱི་གསོལ་མགྲོན་ཁང་དུ་བོད་ཀྱི་གློག་བརྙན་དུས་སྟོན་དབུ་འཛུགས་གནང་ཡོད་པ་དང་། ད་ལོའི་གློག་བརྙན་དུས་སྟོན་ཐོག་གློག་བརྙན་ ༢༡ གཟིགས་འབུལ་ཞུ་རྒྱུ་ཡིན་འདུག
བོད་ཀྱི་གློག་བརྙན་དུས་སྟོན་གོ་སྒྲིག་པ་བློ་བཟང་དབང་རྒྱལ་ལགས་ནས་བོད་ཀྱི་གློག་བརྙན་དུས་སྟོན་སྐོར་ངོ་སྤྲོད་གནང་དོན། ང་ཚོའི་གློག་བརྙན་དུས་སྟོན་གྱི་དམིགས་ཡུལ་གཙོ་བོ་བཙན་བྱོལ་སྤྱི་ཚོགས་ནང་གི་གཞོན་སྐྱེས་ཚོར་གློག་བརྒྱུད་ལམ་སྐོར་གྱི་ཤེས་བྱ་དང་། གློག་བརྙན་སྒྲོག་བཟོ་དང་ཕབ་སྐྲུན། དེ་བཞིན། གློག་བརྙན་བཟོས་ཚར་རྗེས། རྒྱལ་སྤྱིའི་ཁྲོམ་རར་འགྲེམ་སྟངས་སོགས་ཀྱི་སྐོར་ལ་གོ་རྟོགས་སྤེལ་ཆེད་ཡིན། ང་ཚོའི་གཞོན་སྐྱེས་ཁག་ཅིག་གིས་རྩ་ཚང་ལ་མ་ཚང་བའི་སྒྲུང་གཏམ་ཞིག་བྲིས་ཏེ་གློག་བརྙན་ཞིག་བཟོས་རྗེས་མང་ཚོགས་ལ་སྟོན་གྱི་ཡོད་ཀྱང་གློག་བརྙན་དེ་དག་ཡག་པོ་མ་ཆགས་པར་བརྟེན་ནས་ཁོ་ཚོར་རྒྱབ་སྐྱོར་བྱེད་ཀྱི་མི་འདུག་ཅེས་སྐད་རྒྱག་གི་ཡོད་པ་དེ་ནོར་བ་རེད། གང་ཡིན་ཟེར་ན། སྤྱིར་གློག་བརྙན་སློབ་གྲྭ་ཁག་ནས་གློག་བརྙན་སྒྲིག་བཟོ་དང་ཕབ་སྐྲན་བྱེད་སྟངས་ལོ་བཞི་ལྔ་ལ་ཆེད་སྦྱོང་བྱེད་དགོས་ཀྱི་ཡོད་དུས། ཁོ་ཚོར་གློག་བརྙན་སྐོར་གྱི་ཆེད་སྦྱོང་དང་ཉམས་མྱོང་མེད་སྟབས་ཁོ་ཚོའི་གློག་བརྙན་དེར་ལྟད་མོ་བ་ཚོས་དགའ་བསུ་མ་ཐོབ་པ་རེད། དེར་བརྟེན། བོད་ཀྱི་གློག་བརྙན་དུས་སྟོན་འདི་བརྒྱུད་ནས་གཞོན་སྐྱེས་ཚོར་གློག་བརྙན་སྒྲིག་བཟོ་དང་ཕབ་སྐྲུན་བྱེད་སྟངས་སྐོར་གྱི་ཤེས་བྱ་མང་པོ་རག་གི་ཡོད་པ་རེད། ཅེས་བརྗོད་བྱུང་།
ཁོང་གིས་སྔོན་ཆད་ཡིན་ན་ང་ཚོ་བཙོན་བྱོལ་ནང་གློག་བརྙན་དུས་སྟོན་གཅིག་ཀྱང་ཡོད་པ་མ་རེད། དེ་བས་ང་ཚོ་མི་ཁག་ཅིག་གིས་བོད་ཀྱི་གློག་བརྙན་དུས་སྟོན་ཞེས་པ་མགོ་བཙུགས་པ་ཡིན་ལ། དེ་དང་བསྟུན་ནས་དེང་སྐབས་བོད་ཀྱི་གློག་བརྙན་དུས་སྟོན་ཁག་གཉིས་གསུམ་ཞིག་འདུག དེ་ཡང་བཟང་ཕྱོགས་ཀྱི་འཕོ་འགྱུར་ཞིག་ཡིན་པས། དེ་ཧ་ཅང་ཡག་པོ་རེད་བསམ་གྱི་འདུག ཅེས་བརྗོད་བྱུང་།
བོད་ཀྱི་གཞོན་སྐྱེས་པར་བ་ཀུན་བཟང་བསྟན་འཛིན་ལགས་ཀྱིས། ཁོས་རྒྱ་གར་བྱང་རྒྱུད་ཀྱི་ཝར་ཎ་ས་ཁུལ་གྱི་ཡུལ་མི་ཚོའི་འཚོ་གནས་སྐོར་པར་དུ་བླངས་ནས་བཙན་བྱོལ་སྤྱི་ཚོགས་གཙོས་པའི་ཕྱིའི་རྒྱལ་ཁབ་ཁག་ནས་ཡོང་མཁན་ཡུལ་སྐོར་སྤྲོ་འཆམ་པ་ཚོར་འགྲེམ་སྟོན་བྱེད་ཀྱིན་ཡོད་ལ། དེའི་དམིགས་ཡུལ་གཙོ་བོ་ང་ཚོ་རྒྱ་གར་ནང་སྐྱབས་བཅོལ་དུ་བསྡད་ཡོད་སྟབས། རྒྱ་གར་ཡུལ་མི་ཚོར་དྲིན་གཟོ་ཞུ་ཆེད་ཡིན། ང་རང་པར་བ་ཞིག་ཡིན་པའི་ཆ་ནས། པར་ལེན་ལ་བརྟེན་ནས་སོ་སོའི་ནུས་འཇོན་ལ་དཔག་པའི་རོགས་རམ་བྱེད་ཀྱིན་ཡོད། ཅེས་སོགས་བརྗོད་བྱུང་།
ད་ལོའི་བོད་ཀྱི་གློག་བརྙན་དུས་སྟོན་ཐོག་བོད་ཀྱི་གློག་གཅིག་ཡོད་པ་དང་། རྒྱལ་ཁབ་དབྱིན་ཡུལ་ནས་ཡིན་པའི་གློག་བརྙན་བཟོ་མཁན་ལྕམ་ཝོལ་ཧྥི་ (Woolf) ལགས་ནས་སྒྲིག་བཟོ་ཕབ་སྐྲུན་བྱས་པའི་<<ཝ་ར་ཎ་སའི་མི>><<Humans of Varanasi>>ཞེས་པ་དེ་བོད་ཀྱི་གཞོན་སྐྱེས་པར་བ་ཀུན་བཟང་བསྟན་འཛིན་ལགས་ཀྱིས་ཝར་ཎ་ས་ཁུལ་གྱི་རྒྱ་གར་དབུལ་གྲོང་གི་ཕྲུ་གུ་ལཱ་སྒྲོན་འཚོང་མཁན་སྐོར་ཞིག་གི་ཉིན་རེའི་འཚོ་བ་དང་ནང་མའི་གནས་སྟངས་སྐོར་གྱི་འདྲ་པར་བླངས་བ་ཞིག་ཡིན་འདུག
གཞན། པར་བ་ཀུན་བཟང་བསྟན་འཛིན་ལགས་ཀྱིས་ལོ་ཤས་སྔོན་ལའང་བོད་དོན་དང་འབྲེལ་བའི་བརྙན་ཐུང་<<སྤྱི་ལེ་སུམ་སྟོང་བདུན་བརྒྱ་>><<Three Thousand Seven Hundred Kilometre>>ཞེས་པ་ཞིག་ཀོ་རི་ཡའི་སྐད་ནང་སྒྲིག་བཟོ་བྱས་ཏེ་བརྒྱུད་ལམ་ཁག་ནང་བཀྲམ་ཡོད་འདུག
གསར་འགོད་པ། པདྨ་རྒྱལ།
