རྒྱ་གར་སྲིད་བློན་མུ་ཌེ་མཆོག་གིས་ཛ་དྲག་གི་གསལ་བསྒྲགས་སྤེལ་ཏེ་དོ་ནུབ་ནས་བཟུང་ཧིན་སྒོར་ལྔ་བརྒྱ་ལོ་དང་སྟོང་ལོ་བེད་སྤྱོད་བཏང་མི་ཆོག་པ་དང་འབྱུང་འགྱུར་ཉིན་ལྔ་བཅུའི་ནང་ཚུན་ལ་དངུལ་དེ་དག་ཡོངས་རྫོགས་བརྗེ་བོ་བསློག་དགོས་སྐོར་བསྒྲགས་འདུག
ད་ལྟ་རང་རྒྱ་གར་གྱི་སྲིད་བློན་ནཱ་རེན་ཌིར་མུ་ཌེ་མཆོག་གིས་ཛ་དྲག་གི་གསལ་བསྒྲགས་སྤེལ་ཏེ། དོ་ནུབ་མཚན་གུང་ཆུ་ཚོད་ ༡༢ ནས་བཟུང་ཧིན་སྒོར་ ༥༠༠ ཅན་དང་ ༡༠༠༠ ཅན་གཉིས་ཕར་སྤྲོད་ཚུར་ལེན་གྱི་བེད་སྤྱོད་གཏོང་མི་ཆོག་པ་མ་ཟད། མི་སོ་སོའི་ལག་ཏུ་ཉར་ཡོད་པའི་ཧིན་སྒོར་ལྔ་བརྒྱ་ལོ་དང་སྟོང་ལོ་ཅན་ཡོངས་རྫོགས་ཕྱི་ཟླ་ ༡༡ པའི་ཚེས་ ༡༠ ནས། ཕྱི་ཟླ་ ༡༢ པའི་ཚེས་ ༣༠ ཉིན་བར་གྱི་ཉིན་གྲངས་ ༥༠ ནང་ཚུན་ལ་དངུལ་ཁང་དང་སྦྲགས་ཁང་ཁག་ནང་འཇུག་ཐུབ་བྱེད་རྒྱུ་དང་། ཡང་ན་བརྗེ་བོ་རྒྱག་དགོས་པ་ལས་དུས་ཚོད་དེ་ལས་བརྒལ་ཚེ་དངུལ་དེ་དག་ཡོངས་རྫོགས་རྩིས་མེད་གཏོང་རྒྱུ་ཡིན་སྐོར་བརྗོད་འདུག
ཕྱི་ཟླ་ ༡༡ ཚེས་ ༩ དང་ ༡༠ ཉིན་གཉིས་རིང་རྒྱ་གར་གྱི་དངུལ་ཁང་ཡོངས་རྫོགས་སྒོ་རྒྱག་རྒྱུ་ཡིན་པ་མ་ཟད། དངུལ་འདོན་བྱང་བུ་(ATM)བརྒྱུད་དེ་དངུལ་འདོན་ཐུབ་ཀྱི་མེད་པ་དང་། ཚེས་ ༡༡ ཉིན་ནས་དངུལ་ཁང་ཁག་སྒོ་འབྱེད་བྱ་རྒྱུ་ཡིན་འདུག
ཛ་དྲག་གི་ལས་འགུལ་དེ་ནི་ཁྲིམས་འགལ་གྱི་དངུལ་ཉར་བ་དང་དངུལ་རྫུན་མ་བཀྲམ་པ། དེ་བཞིན། ནག་ཚོང་དང་ལྐོག་ཟ་རུལ་སུངས་སོགས་བཀག་སྡོམ་བྱེད་ཆེད་རྒྱལ་ཁབ་ཀྱི་ཁྲིམས་ཐོག་ནས་གཏན་འབེབས་བྱས་པའི་ལས་དོན་གལ་ཆེན་ཡིན་སྐོར་སོགས་བརྗོད་འདུག་ལ། ཐེངས་འདིའི་ལས་འགུལ་དེ་དང་མཉམ་དུ་ཧིན་སྒོར་ ༥༠༠ ཅན་དང་ ༢༠༠༠ ཅན་གྱི་དངུལ་ལོ་གསར་པའང་འགྲེམ་སྤེལ་བྱས་ཡོད་འདུག
དེ་རིང་སང་ཉིན་གཉིས་ལ་དངུལ་འདོན་མ་ཐུབ་ཚེ་གྲོང་འཁྱེར་གྱི་མི་མང་པོ་ཞིག་ལྟོག་ཤི་ཐེབས་ངེས་ཡིན།
དུས་བབ་གསར་ཤོག་ནས་གནས་ཚུལ་ལམ་སེང་སྤེལ་བར་དགའ་སྤྲོ་ཡོད། ཡིན་ན་ཡང་བོད་པ་མང་ཆེ་བ་སུད་ཚོང་ཐོག་དངུལ་སྒོར་མང་པོ་གསོག་འཇོག་བྱས་ནས་ཉལ་གི་ཡོད། ཁ་ཐུག་དངུལ་ཁང་མེད་པ་དང་། ཡང་ན་ཚོང་རྒྱབ་སར་དངུལ་ཁང་ལག་དེབ་མེད་པ་རྣམས་ལ་ད་ལྟ་དངུལ་སྒོར་རྣམས་རང་སོ་སོའི་ནང་དུ་ཉལ་སྡད་པ་རྣམས། མང་པོ་ཞིག་གིས་ག་རེ་བྱེད་དགོས་མེད་འགྲོ་ལུགས་འགྲོ་ལྟངས་མ་ཤེས་མཁན་མང་པོ་ཡོད་པས་དེ་དག་རྣམས་ལ། གསར་ཤོག་ཐོག་ནས་ཁོང་རྣམས་དངུལ་རྣམས་དངུལ་ཁང་དུ་འཇུག་ལྟངས་དང་དུས་ཚོད་སོགས་ཀྱི་ལམ་སྟོན་ཡག་པོ་ཡིག་གནང་པ་ཡིན་ན་ཕན་ཐོགས་ཆེན་པོ་ཡོང་ངེས་རེད།།
གསར་འགོད་པས་དུས་ཐོག་ཏུ་གནས་ཚུལ་ཁྱབ་བསྒྲགས་བྱས་པ་ཤིན་ཏུ་ཐུགས་རྗེ་ཆེ། བོད་པའི་དགོན་སྡེ་ཁག་དང་གཞིས་ཆགས་ཁག་གི་རྒན་མགོ་ཚོའི་ནང་དུ་དངུལ་མང་པོ་ཉར་ཡོད་པ་རེད། དེ་དག་ཉིན་ལྔ་བཅུའི་ནང་གསར་བརྗེ་བྱེད་མ་ཐུབ་ན་འཕྲོ་བརླག་ཆགས་འགྲོ་བ་རེད། དཀའ་རྙོག་འཕར་མ་ཞིག་ག་རེ་འདུག་ཟེར་ན། མི་འགྲུལ་བཞུད་བྱེད་བཞིན་པ་དག་ཉིན་ལྔ་བཅུའི་ནང་ཚུན་ལ་སོ་སོ་གཏན་སྡོད་བྱེད་སའམ་དངུལ་ཁང་ཕྱེ་ས་དེར་མ་བསླེབས་པ་ཡིན་ན་དངུལ་འདོན་འཇུག་བྱེད་ཐུབ་ཀྱི་མེད་པས་ཁོ་རང་གི་དངུལ་ཡོངས་རྫོགས་འཕྲོ་རླགས་མ་རེད་དམ།
མུ་སྡེ་འདི་འཛམ་གླིང་གི་དབུ་ཁྲིད་རླབས་ཆེན་གྲས་སུ་ཚུད་ཀྱིན་འདུག ཁོ་རང་གི་བློ་ཁོག་དང་ཐག་ཆོད་འདི་དག་གིས་མ་འོངས་པའི་ལོ་ལྔའི་ནང་རྒྱ་གར་ལ་གནམ་ས་བླ་འོག་བརྗེ་བ་ལྟ་བུའི་འཕོ་འགྱུར་ཆེན་པོ་ཞིག་དང་། འཛམ་གླིང་ཐོག་མཚན་སྙན་གྲགས་ཆེན་པོ་ཅན་ཞིག་ཆགས་རྒྱུ་ཡིན་པ་གདོན་མི་ཟ་འོ།།
རླབས་ཆེན་རེད། འདི་ལྟར་བྱས་ན་དངུལ་ནག་ཉར་མཁན་ཚོའི་དངུལ་དེ་དངུལ་ཁང་མ་བརྒྱུད་པར་འགྲོ་ས་ཡོད་པ་མ་རེད། གལ་སྲིད་དངུལ་ཁང་བརྒྱུད་པ་ཡིན་ན་སྲིད་གཞུང་གིས་ཁོ་རང་གི་དངུལ་གྱི་གྲངས་འབོར་གསལ་བོ་ཧ་གོ་འགྲོ་བ་མ་ཟད། དངུལ་དེ་དག་ནག་པོ་ཡིན་ན་ནག་སར་འདེད་ཐུབ་པ་དང་དཀར་པོ་ཡིན་ན་མ་འོངས་པར་དཀར་རྐྱང་གི་ལམ་ཁར་འཇོག་ཐུབ་པ་རེད།
ཧ་ལས་པའི་ཡག་པོ་རེད། རྒྱ་གར་གྱི་ཧིན་སྒོར་ས་ཡ་མང་པོ་རྒྱལ་ཁབ་ཀྱི་དཔལ་འབྱོར་སྒྲོན་གཞི་ནང་ཡོང་ཐུབ་པའི་རེ་བ་ཡོད།
གསར་འགོད་པ་མིང་མེད་འདི་བཀྲ་ཤིས་ཡིན་རྒྱུ་རེད། ཤོག་དངུལ་གསར་བརྗེ་འདི་རྒྱ་གར་རྒྱལ་ཁབ་ཀྱི་ཁྲིམས་ཐོག་ནས་གཏན་འབེབས་བྱས་པའི་ལས་དོན་གལ་ཆེན་ཡིན་ཞེས་ཟེར་བ་འུར་བརྗོད་་མ་བྱས་ན་བཟང་གི་རེད།གལ་སྲིད་འདི་འདྲ་ཞིག་བྱ་འཆར་ཡོད་པ་ཤེས་ཀྱི་ཡོད་ན་སྲིད་བློན་མུ་ལྡེ་ལགས་ཀྱི་ལས་འགུལ་འདིའི་དམིགས་ཡུལ་གྱི་མངོན་འདོད་འགྲུབ་ཁག་པོ་རེད། རྒྱུ་མཚན་གང་ཡིན་ཟེར་ན། དངུལ་རྐྱང་ནག་པོ་གཉེར་མཁན་ཚོས་སྔོན་ནས་རང་ཉིད་ཀྱི་དངུལ་རྐྱང་ནག་པོ་གང་ཡོད་ཡར་མར་འདྲ་མིན་བྱས་ཏེ་དཀར་པོ་བཟོས་ཚར་ནས་ལྷོད་ལྷོད་ངང་སྲིད་བློན་ལགས་ཀྱིས་སྐར་མ་བཞི་བཅུ་རིང་གི་རྒྱལ་ཡོངས་གཏམ་བཤད་གནང་བ་ལྟ་གྱིན་ཡོད་ཀྱི་རེད། འདི་དང་འདི་ལྟ་བུའི་རྒྱུ་མཚན་མང་པོ་ཡོད་ཀྱང་སྤྱི་སྤྱོད་རླངས་འཁོར་ནང་དུ་འབྲི་བདེ་བོ་མི་འདུག
དངུལ་ཁང་དང་སྦྲགས་ཁང་ནང་དུ་གོང་གི་དངུལ་ཤོག་གཉིས་ཀྱི་གྲངས་ས་ཡ་ལྷག་བརྗེ་ལེན་བྱེད་སྐབས་དངུལ་དཀར་པོ་མིན་ཡིན་གྱི་བདེན་དཔང་བྱེད་དགོས་ཀྱི་ཡོད།བདེན་དཔང་སྤྲད་མ་ཐུབ་ན་ཁྲིམས་ཁང་དུ་འགྲོ་དགོས་ཆགས་ཡོད།
བཙན་བྱོལ་ནང་གི་དགོན་སྡེ་དང་བླ་བྲང་ཁག་ལ་དཀའ་ངལ་འཕར་མ་མི་ཡོང་བར་སྨོན
འདས་པའི་ཉིན་ལྔ་བཅུའི་ནང་ཚུན་ལ་དངུལ་དེ་དག་ཡོངས་རྫོགས་བརྗེ་བོ་བསློག་དགོས་ཟེར་ན་གང་ཡིན་ནམ། ཉིན་ལྔ་བཅུ་དེ་འབྱུང་འགྱུར་མ་ཡིན་ནམ་་ཧི་ཧི་ཧི་