ཊི་རུམ་ཕི་ལ་སྲིད་འཛིན་རྒྱལ་ཁ་ཐོབ།

ཨ་རིའི་གྲོས་ཚོགས་གོང་འོག་གཉིས་ནང་ཁྱོན་འཐུས་མི་ ༥༣༨ ཡོད་པ་ལས། མངའ་སྡེ་གསུམ་གྱི་འཐུས་མི་འཕུད་པའི་ཆབ་སྲིད་ཚོགས་པའི་སྲིད་འཛིན་འོས་མིར་རྒྱལ་ཁ་འཐོབ་པར་ཞབས་སྟེགས་ ༢༧༠ འཐོབ་དགོས་པ་ལས་ཐེངས་འདིར་སྤྱི་མཐུན་ཚོགས་པའི་སྐུ་ཞབས་ཊི་རུམ་ཕི་ལ་འོས་ ༢༧༩ དང་། དམངས་གཙོ་ཚོགས་པའི་ལྕམ་ཧེ་ལ་རེ་ལ་འོས་ ༢༡༨ བཅས་ཐོབ་སྟེ། ཨ་རིའི་སྲིད་འཛིན་ཐེངས་ ༤༥ པ་དེ་སྤྱི་མཐུན་ཚོགས་པའི་སྐུ་ཞབས་ཌོལ་ནལ་ཊི་རུམ་ཕི་མཆོག་ལ་འཐོབ་རྒྱུ་ཡིན་པ་གཏན་འཁེལ་ཡོད་པ་རེད།

དེ་རིང་འོས་བསྡུའི་ཁྲོད་གྲོས་ཚོགས་གོང་མའི་ནང་དམངས་གཙོ་ཚོགས་པར་ཞབས་སྟེགས་ ༤༧ དང་། སྤྱི་མཐུན་ཚོགས་པར་ཞབས་སྟེགས་ ༥༡ ། དེ་བཞིན། གྲོས་ཚོགས་འོག་མའི་ནང་དམངས་གཙོ་ཚོགས་པར་ཞབས་སྟེགས་ ༡༩༡ དང་སྤྱི་མཐུན་ཚོགས་པར་ཞབས་སྟེགས་ ༢༣༦ བཅས་ཐོབ་སྟེ། གྲོས་ཚོགས་གོང་འོག་གཉིས་ཀའི་ནང་སྤྱི་མཐུན་ཚོགས་པར་རྒྱལ་ཁ་ཆེན་པོ་ཐོབ་ཡོད་པ་དང་། འོས་བསྡུའི་གྲུབ་འབྲས་མི་མཐུན་འགྱུར་བ་འགྲོ་བཞིན་ཡོད་པ་རེད།

ཨ་རིའི་སྲིད་འཛིན་འོས་འདེམས་ཀྱི་འགྲོ་སྟངས་ལྟར་ན། ཨ་རིའི་མངའ་སྡེ་ ༥༠ ནས་འཐུས་མི་གཉིས་རེ་ཁྱོན་འཐུས་མི་ ༡༠༠ ཡིས་གྲུབ་པའི་གྲོས་ཚོགས་གོང་མ་ (Senate) དང་། མངའ་སྡེ་སོ་སོའི་མི་གྲངས་གཞིར་བཟུང་གིས་འཐུས་མི་ ༤༣༥ ཡིས་གྲུབ་པའི་གྲོས་ཚོགས་འོག་མ་ (House of Representatives) གཉིས་ཀྱི་སྒྲིག་འཛུགས་འོག མངའ་སྡེ་སོ་སོ་ནས་སྲིད་འཛིན་འོས་མི་འདོན་གྱི་ཡོད་ནའང་། གལ་ཏེ་གྲོས་ཚོགས་གོང་འོག་གཉིས་གཙོས་པའི་མང་མོས་འོས་གཞིར་རྒྱབ་སྐྱོར་གནང་མཁན་མངའ་སྡེ་གཞན་གསུམ་བཅས་ཀྱི་འཐུས་ཚབ་ ༥༣༨ ཀྱིས་གྲུབ་པའི་ཨ་རིའི་སྲིད་འཛིན་འོས་མི་འདེམས་སྒྲུག་ལྷན་ཚོགས་ (United States Electoral Colleg) ནས་བཏོན་པའི་འོས་མི་རྣམས་ཀྱི་འོས་གྲངས་ ༢༧༠ མ་ཟིན་པ་ཡིན་ན། གྲོས་ཚོགས་འོག་མས་སྲིད་འཛིན་འོས་མི་འདོན་སྲོལ་ཡོད་པ་དང་། ཨ་རིའི་རྒྱལ་ཡོངས་སྲིད་འཛིན་འོས་བསྡུ་དེ་ལོ་ ༤ རེའི་ནང་ཐེངས་རེར་འདེམས་སྐོ་བྱེད་ཀྱི་ཡོད་འདུག

སྤྱིར་ཨ་རིར་སྤྱི་མཐུན་ཚོགས་པ་དང་དམངས་གཙོ་ཚོགས་པ། ལྗང་ཁུ་ཚོགས་པ། ངལ་རྩོལ་ཚོགས་པ། རྩ་ཁྲིམས་ཚོགས་པ། རང་དབང་ཚོགས་པ་ཟེར་བ་སོགས་སྲིད་དོན་ཚོགས་པ་མང་པོ་ཞིག་ཡོད་ཀྱང་། ༡༨༥༢ ལོར་ཨ་རིའི་རྒྱལ་ཡོངས་སྲིད་འཛིན་འོས་བསྡུ་ཐོག་མར་མགོ་བཙུགས་པ་ནས་བཟུང་ཤུགས་ཆེ་ཤོས་དེ་དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཆགས་ཡོད་འདུག

ད་ལོའི་ཕྱི་ཟླ་ ༡༢ ཡི་ཟླ་དཀྱིལ་ཙམ་ནས་ཨ་རིའི་གྲོས་ཚོགས་གོང་འོག་ནང་འོས་འདེམས་བྱ་རྒྱུ་ཡིན་པ་དང་། སྐབས་དེའི་འོས་འདེམས་ཀྱི་གྲུབ་འབྲས་གཞིར་བཟུང་ལོ་རྗེས་མའི་ཕྱི་ཟླ་ ༡ ཚེས་ ༢༠ ཉིན་ཨ་རིའི་སྲིད་འཛིན་ ༤༥ པས་ལས་འཁུར་དམ་འབུལ་ཞུ་རྒྱུ་ཡིན་འདུག