གསར་དུ་བདམས་ཐོན་བྱུང་བའི་ཨ་རིའི་མ་འོངས་སྲིད་འཛིན་སྐུ་ཞབས་ཊི་རུམ་ཕི་ཡིས་མི་འགྱང་བར་ཨ་རིའི་ནང་གི་ཉེས་དོན་དང་འབྲེལ་བའི་གནས་སྤོས་མི་མང་ས་ཡ་ ༢ ནས་ ༣ བར་ཕྱིར་འཕུད་གཏང་རྒྱུ་ཡིན་སྐོར་བརྗོད་འདུག
ཁ་སང་ཨ་རིའི་སེ་བྷེ་ཨེ་སི་ (CBS) བརྙན་འཕྲིན་ཁང་གིས་སྐར་མ་ ༦༠ རིང་ལ་གསར་དུ་བདམས་ཐོན་བྱུང་བའི་ཨ་རིའི་མ་འོངས་སྲིད་འཛིན་སྐུ་ཞབས་ཊི་རུམ་ཕི་མཆོག་ལ་བཅར་འདྲི་ཞུས་སྐབས། ཁོས་ཨ་རིའི་གནས་སྤོས་སྲིད་ཇུས་སྐོར་ལ། ང་ཚོའི་རྒྱལ་ཁབ་ནང་ཉེས་ཅན་པ་དང་འཇིགས་སྐུལ་དྲག་སྤྱོད་ཤོག་ཁག་གི་ཁོངས་མི། ནག་ཚོང་གཉེར་མཁན་སོགས་ཧ་ལམ་མི་གྲངས་ས་ཡ་ ༢ ནས་ ༣ བར་ཡོད་པ་ཚོ་མི་འགྱང་བར་ང་ཚོའི་རྒྱལ་ཁབ་ནང་ནས་ཕྱིར་འཕུད་གཏང་བའམ་འཛིན་བཟུང་བཙོན་འཇུག་བྱ་རྒྱུ་ཡིན། ཁོ་ཚོ་ཚང་མ་ཁྲིམས་འགལ་གྱིས་ཡོང་བ་ཡིན་སྟབས། ང་ཚོས་ཁོང་ཚོ་ཕྱིར་ཕུད་གཏང་གི་ཡིན། རྒྱལ་མཚམས་བརྟན་སྲུང་བྱས་རྗེས། རྒྱལ་མང་གཉིས་སླར་ཡང་བདེ་འཇགས་ཡོང་གི་རེད། ང་ཚོས་མཐའ་མཚམས་བརྒྱུད་ནས་གནས་སྤོར་ཡོང་མཁན་ཚོ་འཇིགས་སྐུལ་དྲག་སྤྱོད་པ་དང་འབྲེལ་བ་ཡོད་མེད་ཐག་གཅོད་གསལ་བོར་བྱེད་དགོས། ང་ཚོས་མཐའ་མཚམས་བརྟན་སྲུང་བྱ་རྒྱུ་གལ་ཆེན་པོ་རེད། ཅེས་བརྗོད་འདུག
ཕྱི་ཚེས་ ༡༠ ཉིན་སྲིད་འཛིན་ཨོ་བྷ་མ་དང་སྐུ་ཞབས་ཊི་རུམ་ཕི་རྣམ་གཉིས་ཕོ་བྲང་དཀར་པོའི་ནང་མཇལ་འཕྲད་བྱས་པའི་སྐོར་ནས་ཁོས། སྤྱིར་བཏང་ངེད་གཉིས་ཀྱིས་ནང་སྲིད་དང་ཕྱི་སྲིད་སྐོར་ནས་ཧ་ལམ་ཆུ་ཚོད་ ༤ རིང་གླེང་མོལ་བྱས་ཡིན། ཁོང་གིས་ང་ལ་ད་ཆར་ང་ཚོར་འཕྲད་བཞིན་པའི་རྒྱལ་དོན་ལེགས་ཉེས་མང་པོ་བཤད་སོང་། གསལ་བོར་བཤད་ན། ངེད་གཉིས་ཀྱིས་དཀྱིལ་ཤར་ཡུལ་གྲུའི་སྐོར་ནས་གླེང་མོལ་བྱས་ཡིན་ལ། དེ་ནི་ཧ་ཅང་གི་དཀའ་རྙོག་ཅིག་ཆགས་ཡོད་པ་རེད། ཁོང་གི་ཆབ་སྲིད་ལྟ་ཚུལ་ཐད་ང་ལ་ངེས་ཤེས་ཟབ་མོ་ཐོབ་སོང་། ངས་མ་འོངས་པར་དཀྱིལ་ཤར་ཡུལ་གྲུ་དང་བྱང་ཀོ་རི་ཡ། ད་ལྟའི་འཕྲོད་བསྟེན་ལྟ་སྐྱོང་བཅས་ཀྱི་ཐོག་དོ་སྣང་བྱ་རྒྱུ་ཡིན། ད་ལྟའི་འཕྲོད་བསྟེན་ལྟ་སྐྱོང་དཀའ་རྙོག་ཆགས་ཡོད་པ་རེད། ཅེས་བརྗོད་འདུག
ཁོང་ལ་སྲིད་འཛིན་རྒྱལ་ཁ་ཐོབ་པའི་སྐོར་ནས་ཁོས། འདས་པའི་ལོ་ངོ་ ༡༥ རིང་གི་དམག་འཁྲུག་ཁྲོད་མི་མང་གི་ཚེ་སྲོག་ཤོར་བ་དང་ཕམ་ཉེས་བྱུང་བ། མི་མང་ལས་མེད་ཆགས་པ་དང་། ང་ཚོའི་རྒྱལ་ཁབ་ཀྱི་འགྲིམ་འགྲུལ་གཞུང་ལམ་དང་ཟམ་པ། ཕུག་ལམ་དང་གནམ་ཐང་སོགས་རྙིང་རལ་དུ་གྱུར་ཡོད་ནའང་། ད་ལྟའི་བར་ང་ཚོས་དཀའ་ངལ་འདི་དག་ཚང་མ་སྣང་མེད་བསྐྱུར་ཏེ། ང་ཚོས་དཀྱིལ་ཤར་ཡུལ་གྲུ་ཁག་ནང་ཨ་སྒོར་ཁྲག་ཁྲིག་ཆེན་པོ་ ༦ ལྷག་གི་འགྲོ་གྲོན་བཏང་བ་རེད། ལྟོས་དང་། ཡུལ་ལུང་མང་པོ་ཞིག་གིས་ང་ཚོའི་རྒྱལ་ཁབ་ཀྱི་ཁེ་བཟང་འཁྱེར་བཞིན་ཡོད་པ་རེད། ང་ཚོའི་རྒྱལ་ཁབ་ཀྱི་སྟོབས་འབྱོར་ཉམས་རྒུད་འགྲོ་བཞིན་འདུག དེ་བས་ངས་མ་འོངས་པར་ཨ་རིའི་རྒྱལ་ཁབ་གཙོ་བོར་འཛིན་གྱི་ཡིན། ངས་གནད་དོན་དེ་དག་སྤོབས་པ་ཆེན་པོའི་སྒོ་ནས་བཤད་ཀྱི་ཡོད། དེར་བརྟེན། ང་ལ་ལས་སླ་བོར་སྲིད་འཛིན་རྒྱལ་ཁ་ཐོབ་པ་རེད། ཅེས་བརྗོད་འདུག
ཁོང་གིས། ང་ཚོས་མ་འོངས་པར་འཕྲོད་བསྟེན་ལྟ་སྐྱོང་སྲིད་ཇུས་དང་། གནས་སྤོས་སྲིད་ཇུས། དཔྱ་ཁྲལ་སྲིད་ཇུས་སོགས་འཕོ་འགྱུར་བཏང་སྟེ། ང་ཚོས་དཀའ་རྙོག་དེ་དག་སེལ་རྒྱུ་ཡིན། ང་ཚོས་མི་མང་གིས་ཨ་རིའི་གྲོས་ཚོགས་ལ་ཞུ་གཏུགས་བྱེད་པའི་སྲིད་ཇུས་གཙང་དག་བཟོ་དགོས། ང་ཚོས་ཕྱིའི་དངུལ་ལོར་ཉོ་འཚོང་ལ་ཚོད་འཛིན་དང་དམ་དྲགས་བྱ་དགོས། མི་མང་གིས་ཨ་རིའི་གཞུང་ལ་ལས་ཀ་བྱས་རྗེས། ཞུ་གཏུགས་(Lobbyist)བྱེད་མཁན་ཆགས་འདུག ཨ་རིའི་རྒྱལ་ཡོངས་སུ་ཞུ་གཏུགས་ཁང་ཁྱབ་ཆེན་པོ་འདུག དེ་ནི་ད་ལྟའི་སྒྲིག་འཛུགས་ཀྱི་གནད་དོན་ཡིན་སྟབས། ང་ཚོས་ཞུ་གཏུགས་སྒྲིག་འཛུགས་གཙང་དག་བཟོ་དགོས། ངས་ནང་སྲིད་བློན་ཆེན་ལྷན་ཚོགས་སྐོར་ཐག་གཅོད་བྱས་ཡོད་ཀྱང་། ད་ཆར་གནས་ཚུལ་དེ་ཞུ་རྒྱུ་མིན། ཞེས་སོགས་བརྗོད་འདུག
ཁོང་ལ་སྲིད་འཛིན་རྒྱལ་ཁ་ཐོབ་ནས་འདས་པའི་ཉིན་ ༥ རིང་ཨ་རིའི་མངའ་སྡེ་ཁག་ཅིག་ནང་སློབ་ཆེན་སློབ་མ་དང་ལྕམ་ཧེ་ལ་རེའི་རྒྱབ་སྐྱོར་བ། དེ་བཞིན། ཨ་རིའི་ནང་གི་གནས་སྤོས་མི་སེར་སྟོང་ཕྲག་མང་པོས་ཁོང་ལ་ངོ་རྒོལ་ཤུགས་ཆེན་བྱེད་པའི་ཐད་ཁོས། གནད་དོན་དེ་ནི་མི་མང་གིས་ང་ཡག་པོ་ཞིག་མ་ཤེས་པའི་རྐྱེན་གྱིས་ཡིན་པར་ངས་ཡིད་ཆེས་བྱེད་ཀྱིན་ཡོད། ང་ཚོས་ཨ་རིའི་རྒྱལ་ཁབ་ཀྱི་སྟོབས་འབྱོར་བསྐྱར་གསོ་བྱེད་ཀྱི་ཡོད་སྟབས། མི་མང་གིས་ངའི་རྒྱལ་ཁར་ཞེད་སྣང་བྱེད་དགོས་པ་མ་རེད། འོས་འདེམས་ཀྱི་དུས་ཡུན་ཐུང་ཐུང་འདིའི་ནང་མི་མང་གིས་ངོ་རྒོལ་སྐད་འབོད་བྱེད་ཀྱིན་ཡོད་པ་རེད། གལ་ཏེ་ཧེ་ལ་རེ་ལ་རྒྱལ་ཁ་འཐོབ་ཡོད་ནའང་། མི་མང་ཕྱི་ལོགས་ལ་ཡོང་ནས“རྒྱལ་ཁ་དེ་ནི་འཇིགས་སུ་རུང་བ་ཞིག་རེད”ཅེས་ངོ་རྒོལ་སྐད་འབོད་བྱ་སྲིད་པ་རེད། མི་མང་གིས་རྣམ་འགྱུར་སྟོན་སྟངས་འདྲ་ཡི་མ་རེད། ཅེས་སོགས་བརྗོད་འདུག
ཚོད་དཔག་ལྟར་ན། ད་ཆར་ཨ་རིའི་ནང་གནས་སྤོས་མི་མང་ས་ཡ་ ༡༡ ཙམ་ཡོད་པ་དང་། དེའི་ནང་གི་མི་མང་སྟོང་ཕྲག་མང་པོ་རྒྱ་གར་བ་ཨ་རིའི་མི་སེར་ཡིན་ཞིང་། ཕྱི་ལོ་ ༢༠༡༤ ལོར་ཉེས་དོན་དང་འབྲེལ་བའི་གནས་སྤོས་ཡིག་ཆ་མེད་མཁན་མི་མང་ ༢༠༠༠༠༠ ལྷག་ཕྱིར་སོ་སོའི་རྒྱལ་ཁབ་ནང་ཕྱིར་ཕུད་བཏང་ཡོད་འདུག
གསར་འགོད་པ། པདྨ་རྒྱལ།
བཞི་པ།
དེས་ན། སྲིད་འཛིན་འོས་མི་ཁྲི་རོམ་ཕུ་ལ་ཇི་ལྟར་རྒྱལ་ཁ་ཐོབ་པ་རེད་དམ་ཟེར་ན། རྒྱལ་ཁ་འཐོབ་པ་ལ་རྒྱབ་སྐྱོར་རག་དགོས་པ་རེད། དེར་བརྟེན། ཁོང་ལ་རྒྱབ་སྐྱོར་ཇི་ལྟར་རག་པའི་སྐོར་ལ་དབྱེ་ཞིབ་ཅིག་བྱེད། ཁོང་ལ་རྒྱབ་སྐྱོར་རག་སྟངས་ཀྱི་ཐད་ལ་ཆབ་སྲིད་དབྱེ་ཞིབ་ཀྱི་དྲི་ལན་བརྒྱ་ཕྲག་མང་པོ་ཡོད་པའི་གྲས་ཀྱི་གལ་ཆེ་བ་འགའ་ནི། གཅིག་ནས་ཁོང་ལ་ལྦ་ཞིན་ཀྲོན་(Washington)གྱི་ཆབ་སྲིད་པ་ཚོའི་གཤིས་སྤྱོད་ལས་ལྡོག་པའི་ཁ་རུ་ཁ་ཐུག་གི་གཤིས་ཀ་ཞིག་ཡོད་པ་དེ་དང་། ཁོང་གིས་ཇི་བསམ་པ་དེ་ཐད་ཀར་བཤད་པ་མ་གཏོགས་ཆབ་སྲིད་པ་ཚོ་ལྟར་རང་གི་བསམ་ཚུལ་ལ་རྐྱོང་སྐུམ་དང་བཅོས་བསྒྱུར་སོགས་མི་བྱེད་པ་དེ་རེད། ལྷག་པར་དུ། ཁོང་གི་བསམ་ཚུལ་ཁག་ལ་ “ཚོར་སྣང་གཟུངས་བཞུགས་ཅན་གྱི་ཐ་སྙད” (emotionally-charged language)་ཀྱི་ནུས་པ་ཤུགས་ཆེ། གཉིས་ནས་ཁོང་ནི་ལྦ་ཞིན་གྲོན་གྱི་ཆབ་སྲིད་ཀྱི་དཀྱིལ་འཁོར་ལ་འཛུལ་མ་མྱོང་བའི་ཕྱི་མི་ཞིག་ཡིན་པ་མ་ཟད་། ཨ་རིའི་སྲིད་གཞུང་དང་ཆབ་སྲིད་མི་སྣ། ཆབ་སྲིད་ཀྱི་སྒྲིག་འཛུགས་སོགས་ལ་འཛེམས་ཟོན་མེད་པར་དགག་པ་རྒྱག་མཁན་ཞིག་ཡིན་པ་དེ་རེད། དཔེར་ན། ཁོང་གིས་ད་ལྟའི་སྲིད་གཞུང་དང་མང་གཙོ། འོས་བསྡུའི་ལམ་ལུགས་སོགས་ཚང་མ་རུལ་སུངས་རེད་ཅེས་དམའ་འབེབས་ཀྱང་བྱས་ཡོད། གསུམ་ནས་ཁོང་གིས་འོས་བསྡུའི་འགྲོ་སོང་ཚང་མ་སོ་སོའི་དངུལ་ཁུག་ནས་གཏོང་བ་མ་གཏོགས་གཞན་གྱི་ཞལ་འདེབས་ལེན་གྱི་མིན་ཟེར་བ་དེ་རེད། དེ་ཡང་ཁོང་གི་འོས་འགྲན་ལ་བཟོ་ཚོང་ཁང་ཁག་དང་། ཕྱུག་བདག་ཚོ་དང་ཆབ་སྲིད་པ་ཚོའི་དངུལ་སྒོར་དང་ཤུགས་རྐྱེན་གཉིས་ཡོང་གཞི་མེད་པ་བཟོས་པ་དེ་རེད། བཞི་ནས་ཁོང་གིས་སྐྱབས་བཅོལ་བ་ཚོར་དགག་རྒྱག་བྱས་ཡོད་པ་མ་ཟད། ལྷག་དོན་ཨ་རིའི་དཔལ་འབྱོར་གྱི་གོ་སྐབས་མང་པོ་འཕྲོག་མཁན་ནི་སྐྱབས་བཅོལ་བ་ཚོ་ཡིན་པའི་བསྙོན་འཛུགས་ཀྱང་བྱས་ཡོད། གང་ལྟར། རྒྱུ་རྐྱེན་ཆེ་གྲས་འདི་དག་ལ་བརྟེན་ནས་ཁོང་གིས་ཨ་རིའི་མི་མང་གི་ཁོངས་སུ་ཁོང་ལ་རྒྱབ་སྐྱོར་བྱེད་མཁན་གྱི་མི་འབོར་སྟོབས་ཤུགས་(Biopower)ཤིག་རྙེད་ཅིང་མི་འབོར་བྱེ་བྲག་པ་དེའི་ཁོངས་སུ་་ཁོང་གི་གྲགས་པ་འབར་བ་རེད།
གསུམ་པ།
གོང་གི་དྲི་བ་འདི་དག་གི་ལན་མ་བཙལ་སྔོན་ལ་ང་ཚོས་ད་ལོའི་འོས་བསྡུའི་གྲུབ་འབྲས་ཀྱི་གྲངས་བཤེར་ལ་ཅིག་བལྟ། ཨ་རིར་མི་གྲངས་ས་ཡ་སུམ་བརྒྱ་ལྷག་ཡོད་པའི་ཁོངས་ནས་འོས་བསྡུའི་ཐོབ་ཐང་ཡོད་པ་མི་འབོར་ས་ཡ་ཉིས་བརྒྱ་སུམ་ཅུ་ལྷག་ཡོད། འོན་ཀྱང་། ད་ལོར་དངོས་སུ་འོས་བསྡུའི་ཆ་ཤས་ལེན་མཁན་མི་འབོར་དེའི་བརྒྱ་ཆ་ལྔ་བཅུ་ང་གསུམ་ཙམ་མ་གཏོགས་བྱུང་མེད། རྒྱུ་མཚན། མི་འབོར་གྱི་བརྒྱ་ཆ་བཞི་བཅུ་ཞེ་དྲུག་ཙམ་གྱིས་འོས་བསྡུའི་ཆ་ཤས་བླངས་མེད། མདོར་ན། ད་ལོར་འོས་བསྡུའི་ཆ་ཤས་ལེན་མཁན་མི་གྲངས་ས་ཡ་བརྒྱ་དང་ཉི་ཤུ་ལྷག་མ་གཏོགས་བྱུང་མེད་ཅིང་། འདི་ནི་འདས་པའི་ལོ་ངོ་ཉི་ཤུ་ལྷག་གི་ཁོངས་སུ་འོས་བསྡུའི་ཆ་ཤས་ལེན་མཁན་གྱི་གྲངས་ཀ་དམའ་ཤོས་དེ་ཆགས་ཡོད། འདི་ལ་རྒྱུ་རྐྱེན་མང་པོ་ཡོད་པའི་ཁྲོད་ཀྱི་རྒྱུ་རྐྱེན་ཆེ་ཤོས་དེ་ནི། ད་ལོའི་སྲིད་འཛིན་འོས་མི་གཉིས་ནི་ཨ་རིའི་ཆབ་སྲིད་ལོ་རྒྱུས་སྟེང་གི་ཆེས་མི་དགའ་བའི་སྲིད་འཛིན་འོས་མི་གཉིས་ (The Two Most Disliked Candidates in U.S. History) ཆགས་ཡོད། གང་ལྟར། སྲིད་འཛིན་འོས་མི་གཉིས་ལ་དགའ་བསུ་དང་བརྩི་བཀུར་ཆེན་པོ་ཡོད་མེད་ལ་མ་ལྟོས་པར་སྲིད་འཛིན་འོས་མི་ཁྲི་རོམ་ཕུ་ལ་མཐའ་མའི་རྒྱལ་ཁ་དེ་ཐོབ་པ་རེད།
དེ་ཡང་ཁྲི་རོམ་ཕུ་ལ་མངའ་སྡེའི་མཚོན་བྱེད་འོས་གྲངས་(Electro vote)མང་བ་ཐོབ་ཡོད། ཧིས་ལར་རེས་(Hillary) ལ་མི་མང་འོས་གྲངས(Popular vote)མང་བ་ཐོབ་ཡོད། མངའ་སྡེའི་མཚོན་བྱེད་འོས་གྲངས་དང་མི་མང་འོས་གྲངས་གཉིས་ཀྱི་གོ་དོན་ནི། སྔ་མ་དེ་མངའ་སྡེ་རེ་རེའི་མི་འབོར་པ་ལ་དཔག་པའི་ཚབ་མཚོན་འོས་གྲངས་དེ་ཡིན། དཔེར་ན། ནེའུ་ཡོག་མངའ་སྡེ་ལྟ་བུར་མངའ་སྡེའི་མཚོན་བྱེད་འོས་གྲངས་ཉེར་བརྒྱད་ཡོད། ཕྱི་མ་མི་མང་འོས་གྲངས་ནི་མི་སྒེར་བ་རེ་རེའི་འོས་གྲངས་དེ་ཡིན། གཞན། ད་ལོའི་མི་མང་འོས་གྲངས་དེ་མང་གཙོ་ཚོགས་པའི་སྲིད་འཛིན་འོས་མི་ཧི་ལར་རེས་ལ་མང་བ་ཐོབ་ཡོད་རུང་། མངའ་སྡེའི་མཚོན་བྱེད་འོས་གྲངས་དེ་སྤྱི་མཐུན་ཚོགས་པའི་འོས་མི་ཁྲི་རོམ་ཕུ་ལ་ཐོབ་ཙང་ཁོང་ལ་སྲིད་འཛིན་རྒྱལ་ཁ་ཐོབ་པ་རེད། མི་མང་གི་འོས་གྲངས་མང་བ་ཐོབ་མཁན་དེ་སྲིད་འཛིན་མ་ཆགས་པའི་གནས་སྟངས་འདི་ལྟ་བུ་བྱུང་བ་ཉུང་མོད། ཕྱི་ལོ་ཉིས་སྟོང་ལོའི་ཨ་རིའི་སྲིད་འཛིན་འོས་འགྲན་སྐབས་ཀྱི་འོས་མི་རྦུའུ་ཞིས་(George W. Bush) དང་ཨལ་སྒོར་(Al Gore)གཉིས་ཀྱི་སྐབས་ལ་ཡང་ད་ལོའི་གནས་སྟངས་ལྟ་བུ་བྱུང་ཡོད། གང་ལྟར། མངའ་སྡེའི་མཚོན་བྱེད་འོས་གྲངས་དང་མི་མང་འོས་གྲངས་གཉིས་ནི་ཨ་རིའི་འོས་བསྡུའི་ཆབ་སྲིད་རིག་གཞུང་(Political culture)གི་མ་ལག་གལ་ཆེན་གཉིས་ཡིན་ལ་འདི་གཉིས་ཀྱི་རྒྱབ་ལྗོངས་ལོ་རྒྱུས་ཀྱང་རིང་།
གཉིས་པ།
སྒྲོ་ནེལ་་སྒྲི་ ཁྲི་རོམ་ཕུ་((Donald Trump)ལགས་སྲིད་འཛིན་གྱི་འོས་འགྲན་ལ་ལངས་པ་ནས་བཟུང་ཁོང་གི་གཏམ་བཤད་ཀྱི་འབོད་ཚིག་ནི། “ཨ་རི་བསྐྱར་དུ་རླབས་ཆེན་བཟོ་ཡི་ཡིན་”(Make America Great Again) ཟེར་བ་དེ་རེད། འབོད་ཚིག་འདིའི་རྒྱབ་ན་ད་ཡོད་ཀྱི་གནས་སྟངས་ཚང་མ་དམྱལ་བ་དང་གཅིག་མཚུངས་རེད་(All is hell)ཟེར་བའི་ཕྱོགས་སུ་ལྷུང་བའི་བསམ་ཚུལ་དེ་ཡང་ཡོད། “ཨ་རི་བསྐྱར་དུ་རླབས་ཆེན་བཟོ་ཡི་ཡིན་” ཟེར་བའི་འབོད་ཚིག་འདི་ཁྲི་རོམ་ཕུ་(Trump)ཡིས་གསར་དུ་བཟོས་པ་ཞིག་མིན། འདི་ཨ་རིའི་སྲིད་འཛིན་ཨང་བཞི་བཅུ་པ་རོ་ནེལ་སྒྲི་ རེ་རྒན་ (Ronald Reagan) གྱི་ཕྱི་ལོ་༡༩༨༠ ལོའི་ཆབ་སྲིད་འོས་འགྲན་གྱི་འབོད་ཚིག་ཀྱང་ཡིན།
ད་ལོར་ཁྲི་རོམ་ཕུ་(Trump)ཡིས་ “ཨ་རི་བསྐྱར་དུ་རླབས་ཆེན་བཟོ་ཡི་ཡིན་” ཟེར་ནས་ཆབ་སྲིད་ཀྱི་ཁ་ཕོ་བསྒྲགས་པ་མ་གཏོགས། ཨ་རིའི་ད་ཡོད་ཆབ་སྲིད་དང་དཔལ་འབྱོར། དམག་དོན། ཕྱི་སྲིད་བཅས་ཀྱི་ཐད་ལ་ཕུགས་རྒྱང་ཅན་གྱི་འཆར་གཞི་གཅིག་ཀྱང་ཕྱི་ལ་བཏོན་མེད་པ་མ་ཟད། ད་ལྟའི་ཨ་རིའི་དཀའ་ངལ་ཚང་མ་སྲིད་འཛིན་ལས་ཐོག་པ་ཨོ་བྷ་མ་དང་ཁོང་གི་ཕྱོགས་གཏོགས་ཀྱི་མི་སྣ། མང་གཙོ་ཚོགས་པ་(Democratic Party) ཨ་རིའི་ནང་གི་སྐྱབས་བཅོལ་བ། གྲངས་ཉུང་མི་རིགས་ཁག ཐ་ན་སྤྱི་མཐུན་ཚོགས་པའི་(Republican Party)མགོ་ཁྲིད་ཚོ་བཅས་ཀྱི་སྟེང་ལ་ཡང་གཡུགས་ཡོད། དེར་བརྟེན། ཁོང་ཉིད་སྤྱི་མཐུན་ཚོགས་པའི་སྲིད་འཛིན་འོས་མི་ཆགས་ན་ཡང་ཁོང་གི་ལྟ་ཚུལ་མང་པོ་ཞིག་སྤྱི་མཐུན་ཚོགས་པའི་ཆབ་སྲིད་ཀྱི་ལྟ་བ་དང་དཔལ་འབྱོར་ལངས་ཕྱོགས། རིན་ཐང་ལྟ་ཚུལ་སོགས་དང་མི་མཐུན་པ་མ་ཟད། སྤྱི་མཐུན་ཚོགས་པའི་འགོ་འཁྲིད་ པོལ་རན་(Paul Ryan)གཙོས་པའི་གྲོས་ཚོགས་འཐུས་མའི་ཁོངས་ནས་ཁྲི་རོམ་ཕུ་(Trump)ལ་རྒྱབ་སྐྱོར་མི་བྱེད་མཁན་གྱི་གནད་ཡོད་མི་སྣའང་བརྒྱ་ཁ་ལོངས་པ་བྱུང་ཡོད། ད་དུང་། ཁོང་གི་སྲིད་འཛིན་འོས་འགྲན་སྐབས་ཀྱི་ཆབ་སྲིད་ཐ་སྙད་(Political Language)དག་ནི། བུད་མེད་ལ་མཐོང་ཆུང་(Misogyny)དང་མི་རིགས་དབྱེ་འབྱེད།(Racism) རིག་གཞུང་དང་གོམས་སྲོལ་ལ་བརྩི་མེད།(Nihilism) ཕོ་མོ་དབྱེ་འབྱེད།(Sexism) མི་རིགས་དཀར་པོ་མཆོག་གྱུར་གྱི་བསམ་བློ།(White Supremacy)་སོགས་ཀྱིས་བཅིངས་ཡོད་པ་མ་ཟད། ཁོང་གི་ཆབ་སྲིད་ཀྱི་ཐ་སྙད་འདི་དག་གི་དཔེ་མཚོན་གྱི་་ཁོངས་སུ། ཨ་རིའི་ཆེད་དུ་རང་སྲོག་བློས་གཏོང་བྱེད་མཁན་གྱི་ཁ་ཆེ་བའི་བུ་ཕྲུག་གི་ཕ་མ་ལ་མཐོང་ཆུང་དང་བུད་མེད་ཀྱི་ཟླ་མཚན་ལ་ཟུར་ཟ་བྱས་པ་སོགས་ཀྱང་ཚུད་ཡོད། དེར་བརྟེན། འགྲོ་བ་མིའི་གཞི་རིམ་གྱི་རང་དབང་དང་འདྲ་མཉམ། དྲང་བདེན། གུ་ཡངས་བཅས་ཀྱི་ལྟ་ཚུལ་ལ་གུས་བཀུར་དང་ཆེ་མཐོང་མི་སྤྲོད་མཁན་གྱི་མི་ཞིག་ཨ་རིའི་སྲིད་འཛིན་ཆགས་ཀྱི་རེད་བསམ་པ་མི་མང་ས་ཡ་མང་པོའི་རྨི་ལམ་ལ་ཡང་མེད། འོན་ཀྱང་། ང་ཚོའི་རྨི་ལམ་ན་མེད་པ་ཞིག་དངོས་ཡོད་ཆགས་པ་མ་ཟད་། སྒྲོ་ལེལ་སྒྲི་ ཁྲི་རོམ་ཕུ་(Donald Trump)ཁོང་ལ་ཨ་རིའི་སྲིད་འཛིན་འོས་འགྲན་གྱི་རྒྱལ་ཁ་ཡང་ཐོབ་པ་རེད། དེས་ན། ཁོང་ལ་ཇི་ལྟར་ཨ་རིའི་སྲིད་འཛིན་འོས་འགྲན་གྱི་རྒྱལ་ཁ་ཐོབ་པ་རེད། ཁོང་ལ་རྒྱབ་སྐྱོར་བྱེད་མཁན་རྣམས་སུ་རེད། དྲི་བ་འདི་དག་ལ་དབྱེ་ཞིབ་བྱེད་རྒྱུ་ཧ་ཅང་གནད་འགག་ཡིན་པ་མ་ཟད། མི་མང་པོའི་སེམས་ཁྲལ་གྱི་འབྱུང་ཁུངས་ལྟེ་བ་གཅིག་ཀྱང་དྲི་བ་འདི་དག་དང་འབྲེལ་བ་ངེས་ཅན་ཡོད།
CNNགྱིས་ག་རེ་བཤད་པ་དག་བསྐྱར་བསྡུས་བྱེད་ནས་མ་འདུག དོན་དངོས་ཤེས་འདོད་ན་མིག་གསུམ་པ་ཞིག་བེད་སྤྱོད་གཏོང
དང་པོ།
ད་ལོའི་ཨ་རིའི་འོས་བསྡུའི་མཇུག་འབྲས་ཀྱིས་རང་དབང་དང་འདྲ་མཉམ། དྲང་བདེན། གུ་ཡངས་བཅས་ཀྱི་འཇིག་རྟེན་ལྟ་ཚུལ་ལ་དགའ་མོས་ཆེ་བའི་མི་མང་ས་ཡ་མང་པོ་སེམས་ཁྲལ་དང་ཐེ་ཚོམ་གྱི་ཀློང་ལ་དེད་ཡོད། ང་ཡང་དེའི་ཁྲོད་ཀྱི་གཅིག་ཡིན། རྒྱུ་མཚན། གཞན་ལ་མཐོང་ཆུང་(Insult)དང་མི་རིགས་དབྱེ་འབྱེད་(Racism)གཉིས་ཆབ་སྲིད་ཀྱི་གཏམ་བཤད་དང་མི་སྒེར་བའི་ལྟ་ཚུལ་གྱི་གཙོ་སྙིང་ལ་འཛིན་པའི་ཕྱུག་བདག་ཞིག་ཨ་རིའི་སྲིད་འཇིན་ཨང་ཞེ་ལྔ་པ་ཆགས་པ་འདི་རེད། ཨ་རིའི་སྲིད་འཛིན་གསར་པ་འདིའི་མིང་ལ་སྒྲོ་ནེལ་སྒྲི་ ཁྲི་རོམ་ཕུ་(Donald Trump)ཟེར། ཁོང་ད་ལྟ་དགུང་ལོ་ ༧༠ ཡིན། ཨ་རིའི་ཆབ་སྲིད་ལོ་རྒྱུས་ཁྲོད་ཀྱི་སྲིད་འཛིན་ལོ་ན་རྒན་ཤོས་དེ་ཡིན་པ་མ་ཟད། དེ་སྔ་ཨ་རིའི་ཆབ་སྲིད་དང་དམག་དོན་གཉིས་ལ་སྲི་ཞུ་དང་ཉམས་མྱོང་མེད་མཁན་ཞིག་སྲིད་འཛིན་ཆགས་པ་ཐོག་མའང་ཡིན།