པེ་ཅིན་གཞུང་གཏོགས་ཤོག་ཁག་གིས་ཧོང་ཀོང་མི་མང་ལ་ཧོང་ཀོང་ཌོ་ལར་དང་ཟ་མ་རིན་མེད་སྤྲད་ནས་ཧོང་ཀོང་རང་དབང་དང་དམངས་གཙོ་དོན་གཉེར་བ་ཚོར་ངོ་རྒོལ་ཁྲོམ་སྐོར་བྱེད་དུ་བཅུག་ཡོད་འདུག
དེ་རིང་ཧོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ཚེས་ ༡༣ ཉིན་པེ་ཅིན་གཞུང་ལ་རྒྱབ་སྐྱོར་བྱེད་མཁན་ཚོས་ཧོང་ཀོང་མི་མང་ལ་ཧོང་ཀོང་ཌོ་ལར་ ༡༠༠ ནས་ ༣༠༠ དང་ཉིན་གཅིག་གི་ཟ་མ་རིན་མེད་སྤྲད་དེ་པེ་ཅིན་གཞུང་གི་དབང་སྒྱུར་སྲིད་ཇུས་ལ་ངོ་རྒོལ་བྱེད་མཁན་ཧོང་ཀོང་ས་གནས་འཐུས་མི་གསར་པ་ཉིང་སོང་ཧིན་ལགས་དང་ཡུས་ཧེ་ཀྲིན་ལགས་གཉིས་ཀྱིས་བསྐྱར་དུ་ཧོང་ཀོང་ས་གནས་གྲོས་ཚོགས་ནང་འཐུས་མིའི་དམ་འབུལ་ཞུས་མི་ཆོག་པའི་ངོ་རྒོལ་ཁྲིམ་སྐོར་ནང་མཉམ་ཞུགས་བྱེད་དུ་བཅུག་ཡོད་འདུག
མིང་བརྗོད་འདོད་མེད་པའི་བུད་མེད་ལས་འགུལ་བ་ཞིག་གིས། ཁོང་མོས་ངོ་རྒོལ་ཁྲོམ་སྐོར་དེ་ཅི་ཞིག་གི་ཆེད་དུ་ཡིན་པ་མི་ཤེས་པ་དང་། ཁོང་མོ་ཕྱི་ལོགས་སུ་ཡོང་ནས་ངོ་རྒོལ་ཁྲོམ་སྐོར་ལ་བལྟས་རྗེས། ཁོང་མོའི་དངུལ་བྱང་ཐོག་ཧོང་ཀོང་ཌོ་ལར་ ༣༠༠ བླུགས་ཡོད་སྐོར་བརྗོད་འདུག
ངོ་རྒོལ་ཁྲོམ་སྐོར་ནང་མཉམ་ཞུགས་བྱེད་མཁན་ཞིག་གིས། པེ་ཅིན་གཞུང་ལ་རྒྱབ་སྐྱོར་བྱེད་མཁན་ཚོས་གལ་ཏེ་ཁོང་མོ་ངོ་རྒོལ་ལས་འགུལ་ནང་ཞུགས་ན། ཧོང་ཀོང་ཌོ་ལར་ ༡༠༠ དང་ངོ་རྒོལ་ཁྲོམ་སྐོར་རྗེས་ཀྱི་ཟ་མ་རིན་མེད་སྤྲོད་རྒྱུ་ཡིན་ཚུལ་བཤད་སྟབས། ཁོང་མོའི་ཕ་མ་གཉིས་ཀྱིས་ཁོང་མོ་ཁྲིད་ནས་ངོ་རྒོལ་ལས་འགུལ་ནང་ཞུགས་ཏེ་ཉིང་སོང་ཧིན་དང་ཡུས་ཧེ་ཀྲིན་གཉིས་རྒྱ་མི་རེད། ཁོང་གཉིས་ཀྱིས་ཅིའི་ཕྱིར་རྒྱ་ནག་གཞུང་ལ་ངོ་རྒོལ་བྱས་པ་རེད་ཅེས་ང་ཚོས་འཐུས་མི་དེ་གཉིས་ཀྱི་ཧོང་ཀོང་རང་བཙན་ལངས་ཕྱོགས་ལ་སྐྱོན་བརྗོད་བྱས་པ་ཡིན་སྐོར་བརྗོད་འདུག་ལ། ལས་འགུལ་བ་ཁ་ཅིག་གིས་བུ་མོ་དེས་རྒྱ་ནག་གིས་ཧོང་ཀོང་ཐོག་འཛིན་པའི་སྲིད་ཇུས་ཀྱི་དམིགས་འབེན་མི་ཤེས་ནའང་། ཉིང་སོང་ཧིན་དང་ཡུས་ཧེ་ཀྲིན་གཉིས་ཀྱི་ཧོང་ཀོང་རང་བཙན་ལངས་ཕྱོགས་ལ་སྐྱོན་བརྗོད་བྱས་པ་དེ་ནི་ཧོང་ཀོང་གྲོང་ཁྱེར་གྱི་ཁྲིམས་ཀྱི་དབང་སྒྱུར་དང་མཐུན་པའི་ཐག་གཅོད་ཡང་དག་ཅིག་ཡིན་པར་ཡིད་ཆེས་བྱེད་ཀྱིན་འདུག ཅེས་བརྗོད་འདུག
ངོ་རྒོལ་ཁྲོམ་སྐོར་ནང་ཞུགས་མཁན་ལས་འགུལ་བ་གཞན་ཞིག་གིས། ཁོང་མོ་དང་ཁོང་མོའི་ནང་མི་གཞན་གསུམ་ངོ་རྒོལ་ཁྲོམ་སྐོར་ནང་ཞུགས་པ་ཡིན་ན། ལས་འགུལ་རྗེས་སུ་ཁོང་ཚོར་ཧོང་ཀོང་ཌོ་ལར་ ༦༠༠ རྔན་པར་སྤྲོད་རྒྱུ་དང་། ལས་འགུལ་ནང་མ་ཞུགས་སྔོན་ལ་མིང་ཐོ་འགོད་དགོས་པ་དང་། ལས་འགུལ་ནང་ཞུགས་པའི་རྔན་པ་བླངས་རྗེས་སོ་སོའི་མིང་ཐོ་བསུབ་ཆོག་ཚུལ་བཤད་ཡོད་སྐོར་བརྗོད་འདུག
རང་མིང་བརྗོད་མེད་པའི་ཧོང་ཀོང་དམངས་གཙོ་དོན་གཉེར་བ་ཞིག་གིས། མི་མང་ལ་སྒོར་མོ་བྱིན་ནས་ངོ་རྒོལ་ཁྲོམ་སྐོར་ནང་མཉམ་ཞུགས་བྱེད་དུ་བཅུག་པའི་བྱ་སྤྱོད་དེ་ནི་མིའི་བརྩིས་ཐང་ལ་དམའ་འབེབས་བྱས་པ་རེད། ཅེས་བརྗོད་འདུག
གནས་ཚུལ་ལྟར་ན། རེས་གཟའ་ཉི་མའི་ཉིན་གྱི་ངོ་རྒོལ་ཁྲོམ་སྐོར་ནང་ཁྱོན་ཧོང་ཀོང་མི་མང་ ༤༠༠༠༠ ལྷག་མཉམ་ཞུགས་བྱས་ཡོད་པ་དང་། ཁོང་ཚོ་ཚང་མ་ཧོང་ཀོང་རང་བཙན་ལངས་ཕྱོགས་ལ་ངོ་རྒོལ་བྱེད་མཁན་ཡིན་ཞིང་། པེ་ཅིན་གཞུང་ལ་རྒྱབ་སྐྱོར་བྱེད་མཁན་ཚོས་ལས་འགུལ་ནང་ཞུགས་མཁན་རྒྱལ་ཞེན་རིང་ལུགས་པ་ཚོ་ཕུད་མི་མང་ལས་འགུལ་བ་དེ་ཚོར་ཧོང་ཀོང་སྒོར་མོ་སྤྲད་ནས་ལས་འགུལ་ནང་འབོད་འགུག་བྱས་ཡོད་འདུག
ཟླ་སྔོན་མར་ཧོང་དམངས་གཙོའི་ལས་འགུལ་ནང་མི་མང་ ༡༣༠༠༠ ལྷག་མཉམ་ཞུགས་བྱས་ཡོད་པ་དང་། སྐབས་དེར་མི་མང་ཚང་མ་རང་མོས་ཀྱི་སྒོ་ནས་དམངས་གཙོའི་ལས་འགུལ་ནང་མཉམ་ཞུགས་བྱས་ཡོད་འདུག
ཉེ་སྔོན་པེ་ཅིན་གཞུང་གིས་ཧོང་ཀོང་གི་གཞི་རྩའི་བཅའ་ཁྲིམས་ཀྱི་འགྲེལ་བཤད་འཆར་ཟིན་ཟེར་བ་ཞིག་གཏན་འབེབས་ཁྱབ་བསྒྲགས་བྱས་ཡོད་པ་དང་། འཆར་ཟིན་དེའི་དོན་ཚན་གཉིས་པའི་ནང་གཞུང་ཞབས་པས་ལས་འཁུར་དམ་བཅའ་འབུལ་སྐབས་ངེས་པར་དུ་ཁྲིམས་ཀྱི་གཏན་འབེབས་ཆ་རྐྱེན་དང་ལེན་དང་བརྒྱུད་རིམ་ཆ་ཚང་བརྒྱུད་དགོས་པ་ལས། ཁྲིམས་མཐུན་དམ་བཅའ་མ་ཕུལ་བ་དང་། དམ་འབུལ་ཚིག་གཞི་དང་ལེན་མི་བྱེད་མཁན་ལ་སྲིད་གཞུང་གི་ལས་ཀ་བྱེད་པའི་ཐོབ་ཐང་མེད་སྐོར་བརྗོད་ཡོད་པ་ལྟར། ཧོང་ཀོང་གི་གྲོས་ཚོགས་འཐུས་མིའི་དམ་འབུལ་སྐབས་སུ། དམ་འབུལ་ཚིག་གཞི་དང་ལེན་མི་བྱེད་མཁན་འཐུས་མི་གསར་པ་ཉིང་སོང་ཧིན་ལགས་དང་ཡུས་ཧེ་ཀྲིན་ལགས་གཉིས་ཀྱིས། ཧོང་ཀོང་རྒྱ་ནག་མིན་ཞེས་པའི་འབོད་ཚིག་ཐོག་ནས་ཡང་བསྐྱར་འཐུས་མིའི་དམ་བཅའ་འབུལ་བའི་ཐོབ་ཐང་མེད་པ་བཟོས་ཡོད་པ་རེད།
གསར་འགོད་པ། པདྨ་རྒྱལ།