ཧིན་སྒོར་བརྗེ་སྒྱུར་གྱི་ཚ་རླབས་ཁྲོད་ཉིན་གཅིག་ནང་མི་གཅིག་གིས་དངུལ་བརྗེ་ལེན་ཐེངས་གཅིག་མ་གཏོགས་མི་ཐུབ་པ་བཟོ་རྒྱུ་ཡིན་འདུག
ཟླ་འདིའི་ཕྱི་ཚེས་ ༩ ཉིན་ནས་བཟུང་སྟེ། རྒྱ་གར་རྒྱལ་ཡོངས་ནང་ཧིན་སྒོར་ལྔ་བརྒྱ་ལོར་དང་ཆིག་སྟོང་ལོར་བརྗེ་སྒྱུར་གྱི་བྲེལ་འཚུབ་ཆེན་པོ་འབྱུང་བཞིན་ཡོད་པ་དང་། དངུལ་ཁང་དང་སྦྲགས་ཁང་། སྟབས་བདེའི་དངུལ་འདོན་ཁང་བཅས་སུ་མི་མང་གིས་འཚང་ཁ་ཤིག་ཤིག་གིས་སྔ་བོ་ནས་བང་རིང་པོ་བསྒྲིགས་ཏེ་དངུལ་ལོར་བརྗེ་སྒྱུར་དང་འདོན་འཇུག་བྱེད་བཞིན་ཡོད་པ་དང་། མི་ཚོགས་འཚང་ཁ་ཆེ་དྲག་སྟེ་དངུལ་ཁང་སྦྲགས་ཁང་དང་། སྟབས་བདེའི་དངུལ་འདོན་ཁང་ནས་དངུལ་རྫོགས་ཏེ། ཆུ་ཚོད་ཁ་ཤས་རིང་བང་བསྒྲིགས་ཀྱང་མཐའ་མ་ལག་པ་སྟོང་པར་ཕྱིར་ལོག་དགོས་བྱུང་བ་སོགས་ཀྱི་དཀའ་ངལ་མང་དག་ཅིག་འཕྲད་བཞིན་ཡོད་སྟབས། ཁ་སང་རྒྱ་གར་དབུས་གཞུང་དཔལ་འབྱོར་ལས་ཁུངས་ནས་ཡོངས་ཁྱབ་གསལ་བསྒྲགས་སྤེལ་ཏེ། དོ་དགོང་ནས་བཟུང་དངུལ་རྙིང་བརྗེ་སྒྱུར་དང་འདོན་འཇུག་བྱེད་སྐབས། དོ་བདག་གི་ལག་གཡས་པའི་མཛུབ་མོའི་སྟེང་སྣག་ཚས་རྟགས་རྒྱག་རྒྱུ་ཡིན་པས། ཉིན་གཅིག་ནང་མི་གཅིག་གིས་དངུལ་ཁང་དང་སྦྲགས་ཁང་མི་འདྲ་བ་ཁ་ཤས་ལ་སོང་ནས་དངུལ་བརྗེ་འདོན་བྱེད་མི་ཐུབ་པ་བཟོ་ཡི་ཡོད་པ་དང་། ལྡི་ལི་སོགས་གྲོང་ཁྱེར་ཆེ་ཁག་ནང་ཁ་སང་ནས་བཟུང་སྣག་ཚས་རྟགས་རྒྱག་བཞིན་ཡོད་འདུག
དེ་ཡང་རྒྱ་གར་དབུས་དཔལ་འབྱོར་ལས་ཁུངས་ཀྱི་དྲུང་ཆེ་ཤག་ཊི་ཀན་ཊ་ཌཱ་སི་(Shaktikanta Das)ལགས་ཀྱིས། མི་ཁག་ཅིག་གིས་སོ་སོའི་དངུལ་ནག་པོ་ཁྲིམས་མཐུན་བཟོ་ཆེད་མི་ཁྱུ་གཅིག་བསྡུས་ཏེ། ཁོང་ཚོ་དངུལ་ཁང་གི་ཡན་ལག་གཅིག་ནས་གཅིག་ཏུ་བཏང་སྟེ་དངུལ་ནག་པོ་བརྗེ་ཐབས་བྱས་ཏེ་མི་ཉུང་ཤས་ཤིག་གིས་དངུལ་སྨར་བརྗེ་ལེན་གྱི་ཁེ་ཕན་ལེན་འགྲོ་ཡི་ཡོད་པར་བརྟེན། དངུལ་ཁང་དང་སྦྲགས་ཁང་ཁག་ནས་གསུབ་དཀའ་བའི་སྣག་ཚ་ཡིས་རྟགས་བརྒྱབ་ནས་གནད་དོན་དེ་འགོག་ཐབས་དགོས་སྐོར་བསྒྲགས་འདུག
ཟླ་འདིའི་ཕྱི་ཚེས་ ༨ ཉིན་གྱི་དགོང་མོར་སྲིད་བློན་མུ་ཌི་མཆོག་གིས། ཧིན་སྒོར་བརྗེ་སྒྱུར་གྱི་ཐོག་མའི་ཉིན་ཤས་ནང་དངུལ་འདོན་བྱང་བུ་གཅིག་གིས་ཉིན་རེར་ཧིན་སྒོར་ ༢༠༠༠ རེ་ལེན་ཆོག་པ་དང་། དེ་བཞིན་དཔང་ཡིག་གཅིག་གི་ཐོག་ནས་ཉིན་རེར་ཧིན་སྒོར་ ༤༠༠༠ བརྗེ་ཆོག་པའི་ཡོངས་ཁྱབ་གསལ་བརྡ་བཏང་ཡོད་པ་དང་། ད་ལྟའི་ཆར་ཉིན་རེར་ཧིན་སྒོར་ ༤༥༠༠ རེ་བརྗེ་ཡི་ཡོད་འདུག འདས་པའི་ཉིན་ཤས་ནང་དྷ་ས་ཁུལ་གྱི་དངུལ་ཁང་དང་སྦྲགས་ཁང་ཁག་ཅིག་ནས་དངུལ་བརྗེ་ས་གཅིག་ནས་དོ་བདག་གི་དཔང་ཡིག་མི་འདྲ་བ་(RC,dhaar Card,Voter Card, Ration Card, Passport, PAN Card)སོགས་ཀྱི་ཐོག་ནས་ཉིན་རེར་དངུལ་རྙིང་བརྗེ་སྒྱུར་དང་། འདོན་འཇུག་ཐེངས་འགའ་རེར་བྱེད་ཐུབ་ཀྱི་ཡོད་པ་མ་ཟད། དངུལ་བརྗེ་སྒྱུར་འདོན་འཇུག་ཐད་རོགས་རེས་བྱེད་མཁན་ཡང་མང་པོ་ཡོད་ཀྱང་། དེ་རིང་ཁ་སང་དངུལ་ཁང་དང་སྦྲགས་ཁང་ཁག་ཅིག་ནས་དཔེར་ན། དངུལ་བརྗེ་ས་གཅིག་ནས་མི་གཅིག་གིས་དཔང་ཡིག་མི་འདྲ་བ་གཉིས་ཀྱི་ཐོག་ནས་དངུལ་ཐེངས་གཉིས་ལ་བརྗེ་ཆོག་གི་མི་འདུག
གསར་འགོད་པ། པདྨ་མཚོ།
ཧོང་ཀོང་ནང་བཞིན་བོད་མི་སྒྲིགས་འཛུག་ནང་ལ་འང་རྒྱ་སྒོར་ལེན་ཟ་མི་མང་པོ་འདུག