ལྐོག་ཟ་རུལ་སུངས་ཀྱི་ཉེས་མིང་འོག་ཝིན་ཀྲུའུ་གྲོང་ཁྱེར་གྱི་སྤྱི་ཁྱབ་གཞོན་པ་ཡཱང་ཞཱི་ཀྲུའུ་ཨ་རིའི་གཞུང་གིས་ཕྱིར་འཕུད་བཏང་སྟེ་རྒྱ་ནག་ལ་འབྱོར་མ་ཐག་གནམ་ཐང་ནས་ཉེན་རྟོག་པས་ཐད་ཀར་བཀག་བསྐྱིལ་ཁང་དུ་ཁྲིད་ཡོད་འདུག
ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཀྲེ་ཅང་ཞིང་ཆེན་ཝིན་ཀྲུའུ་ (Wenzhou) གྲོང་ཁྱེར་གྱི་སྤྱི་ཁྱབ་གཞོན་པ་ཟུར་བ་ལྕམ་ཡཱང་ཞི་ཀྲུའུ་ (Yang Xiuzhu) ཁ་སང་ཨ་རི་ནས་ཕྱིར་འཕུད་བཏང་སྟེ་ཕྱིར་རྒྱ་ནག་ལ་འབྱོར་མ་ཐག རྒྱ་ནག་གི་ཉེན་རྟོག་པས་ཁོང་མོ་གནམ་ཐང་ནས་ཐད་ཀར་བཀག་བསྐྱིལ་ཁང་ཞིག་ཏུ་ཁྲིད་ཡོད་འདུག
ཡཱང་ཞི་ཀྲུའུ་ནི་ད་ཆར་ལོ་ ༧༠ ཡིན་པ་དང་ཁོང་མོ་དེ་སྔ་རྒྱ་ནག་ཀྲེ་ཅང་ཞིང་ཆེན་ཝིན་ཀྲུའུ་གྲོང་ཁྱེར་གྱི་སྤྱི་ཁྱབ་གཞོན་པ་ཡིན་ཞིང་། རྒྱ་ནག་གཞུང་གིས་ལྐོག་ཟ་རུལ་སུངས་ཀྱི་ནག་ཉེས་ཡོད་པའི་དཔོན་རིགས་ ༡༠༠ ཡི་མིང་ཐོ་བཏོན་པའི་གྲས་ཀྱི་མིག་འབེན་གཙོ་བོ་གཅིག་ཁོང་མོ་ཡིན་པ་དང་། ༢༠༡༥ ལོའི་ཕྱི་ཟླ་ ༤ བ་ནས་རྒྱ་ནག་གཞུང་གིས་ཡཱང་ཞི་ཀྲུའུ་ཡིས་རྒྱ་སྒོར་ས་ཡ་ ༢༥༠ ལྐོག་ཟ་བྱས་པའི་ནག་ཉེས་ལ་ཞིབ་བཤེར་བྱེད་མགོ་བཙུགས་ཏེ། རྒྱལ་སྤྱིའི་ཉེས་དོན་ཉེན་རྟོག་སྒྲིག་འཛུགས་ (Interpol) བརྒྱུད་དེ། ཡཱང་ཞི་ཀྲུའུ་ཨ་རི་ནས་ཕྱིར་རྒྱ་ནག་གཞུང་ལ་རྩིས་སྤྲོད་དགོས་པའི་བཀའ་ཁྱབ་བཀྲམས་ཡོད་འདུག
ཕྱི་ལོ་ ༢༠༠༣ ལོར་ཡཱང་ཞི་ཀྲུའུ་རྒྱ་ནག་ནས་སེང་གྷ་པོར་གཉེན་ཉེ་ཞིག་ལ་ཐུག་འཕྲད་དུ་ཕྱིན་རྗེས། ཕྱིར་རྒྱ་ནག་ཏུ་མ་ལོག་པར་ཨ་རིར་སྐྱབས་བཅོལ་དུ་ཕྱིན་ཡོད་པ་དང་། ཟླ་བ་གཅིག་གི་རྗེས་སུ་ཨ་རིའི་གཞུང་གིས་ཁོང་མོའི་ཕྱི་སྐྱོད་ལག་ཁྱེར་རྫུན་མ་ཡིན་པ་ཤེས་ཏེ་ནེའུ་ཡོག་གྲོང་ཁྱེར་དུ་སྡོད་པའི་ཁོང་མོའི་གཅེན་མོའི་ཁྱིམ་ནས་འཛིན་བཟུང་བྱས་ཡོད་འདུག ཁ་སང་ཁོང་མོ་ཨ་རི་ནས་ཕྱིར་འཕུད་བཏང་སྟེ་རྒྱ་ནག་པེ་ཅན་གནམ་ཐང་ལ་འབྱོར་མ་ཐག་ཉེན་རྟོག་པས་ཐད་ཀར་བཀག་བསྐྱིལ་ཁང་ཞིག་ཏུ་ཁྲིད་ཡོད་འདུག
ད་དུང་གནས་ཚུལ་དེའི་ནང་། ད་ལྟའི་རྒྱ་ནག་གཞུང་གིས་ལྐོག་ཟ་རུལ་སུངས་དང་འབྲེལ་བའི་དཔོན་རིགས་ ༡༠༠ ཡི་མིང་ཐོ་གསལ་བསྒྲགས་བྱས་པ་དེ་དག་ནི། དོན་དངོས་ཐོག་ལྐོག་ཟ་རུལ་སུངས་ཁོ་ན་ཙམ་མིན་པར། རྒྱ་ནག་དམར་ཤོག་ཚོགས་པ་ནང་ཁུལ་གྱི་ཆབ་སྲིད་འཐབ་རྩོད་ཅིག་ཡིན་པ་དང་། ཐེངས་འདིའི་ཡཱང་ཞུ་ཀྲུའུ་ལ་མཚོན་ནའང་ཨ་རྒྱ་གཉིས་བར་གྱི་ཆབ་སྲིད་ལག་ཆ་ལྟ་བུ་ཞིག་ཏུ་གྱུར་ཡོད་འདུག
གནས་ཚུལ་ལྟར་ན། འདས་པའི་ལོ་ངོ་གསུམ་ནང་རྒྱ་ནག་གི་ལྐོག་ཟ་རུལ་སུངས་ཞིབ་བཤེར་ཚན་པས་ཕྱིའི་རྒྱལ་ཁབ་ ༦༦ ནས་ལྐོག་ཟ་རུལ་སུངས་ཀྱི་ཉེས་མིང་འོག་རྒྱ་རིགས་ཁེ་ལས་པ་དང་དམར་ཤོག་ཚོགས་ཁོངས་ཀྱི་དཔོན་རིགས་བཅས་ཁྱོན་མི་གྲངས་ ༨༥༠ ལྷག་འཛིན་བཟུང་བཀག་བསྐྱིལ་བྱས་ཡོད་འདུག
གསར་འགོད་པ། པདྨ་རྒྱལ།
