ཨི་ཊ་ལིའི་ནང་གི་རྒྱ་རིཊ་མང་པོ་འཛིན་བཟུང་བྱས།

ཨི་ཊ་ལིའི་རྒྱ་རིགས་གནས་སྡོད་ཁུལ་ཆེ་ཤོས་ཕར་ཊོ་ཡི་ཡིག་ཆ་རྫུན་མ་བཟོ་མཁན་དང་ཁྱིམ་ཐོ་ནག་པོ་ཅན་སོགས་ལ་ཞིབ་བཤེར་བྱས་ཏེ་མི་གྲངས་ ༡༥ འཛིན་བཟུང་བྱས་ཡོད་འདུག

རྒྱ་ནག་གི་སྲིད་འཛིན་ཞི་ཅིན་ཕིན་ཨི་ཊ་ལི་ནང་བསླེབས་པ་དང་། ཨི་ཊ་ལི་ཡི་སྲིད་བློན་མཉམ་དུ་དགོང་ཟས་ལ་རོལ་པའི་ཉིན་མོ་སྟེ་ཟླ་འདིའི་ཕྱི་ཚེས་ ༡༦ ཉིན། ཨི་ཊ་ལི་ཕར་ཊོ་(Prato)ཞིང་ཆེན་གྱི་ལྟེ་གནས་གྲོང་ཁྱེར་ཕར་ཊོ་ཉེན་རྟོག་ཁང་གིས། ས་གནས་རྒྱ་རིགས་གཙོ་བོར་གྱུར་བའི་ཕྱི་མི་ཞིབ་བཤེར་གྱི་(White Collars)ཞེས་པའི་ཞིབ་བཤེར་བྱ་འགུལ་ཞིག་སྤེལ་ཏེ། ཁྱོན་དོགས་ཡོད་མི་སྣ་ ༨༣ ལ་ཞིབ་བཤེར་བྱས་ཡོད་པ་མ་ཟད། མི་གྲངས་ ༡༥ འཛིན་བཟུང་བྱས་པ་དང་། དེའི་ནང་ནས་རྒྱ་མི་ཚོང་པ་གཉིས་དང་ཨི་ཊ་ལིའི་ཚོང་པ་ཞིག་བཅས་བཙོན་ཁང་དུ་བཅུག་ཡོད་འདུག

ཕྱིའི་བརྒྱུད་ལམ་དུ་གནས་ཚུལ་ཐོན་པ་ལྟར་ན། ཐེངས་འདིའི་ཞིབ་བཤེར་ཁྲོད་ཉེན་རྟོག་པ་ ༤༠༠ ལྷག་མཉམ་ཞུགས་བྱས་ཏེ། གནས་སྡོད་ཆོག་པའི་ཡིག་ཆ་རྫུན་མ་བཟོ་མཁན་དང་ཁྱིམ་ཐོ་ནག་པོ་ཅན། ཁྲིམས་འགལ་ནག་ཚོགས་སོགས་ལ་ཞིབ་བཤེར་བྱས་ཡོད་པ་དང་། ཞིབ་བཤེར་ཐེངས་ ༡༡༡ པ་འདིའི་དམིགས་འབེན་གཙོ་བོ་ནི་ཨི་ཊ་ལིའི་མི་དང་རྒྱ་རིགས་ཁག་ཅིག་ཡིན་ཞིང་། མི་དེ་ཚོ་མང་ཆེ་བ་ཞིག་ཕར་ཊོ་རུ་ཡོད་པའི་ཚོང་པ་དང་ཆེད་ལས་མི་སྣ་ཡིན་སྐོར་བརྗོད་འདུག

ཨི་ཊ་ལི་གཞུང་ཕྱོགས་ནས་བརྗོད་པ་ལྟར་ན། ཁུལ་དེར་ཁྱོན་མི་གྲངས་ཁྲི་ ༡༨ ལྷག་ཡོད་པ་དང་། དེའི་ནང་རྒྱ་རིགས་ ༡༦༠༠༠ ཡོད་ཀྱང་། དངོས་སུ་གནས་སྡོད་བྱེད་མཁན་རྒྱ་རིགས་ཁྲི་ ༥ ལ་ཉེ་བ་ཡོད་པའི་ཚོད་དཔག་བྱས་ཏེ། ཡོ་རོབ་ཁུལ་གྱི་རྒྱ་རིགས་གནས་སྡོད་ཁུལ་ཆེ་ཤོས་ཤིག་ཏུ་ངོས་འཛིན་བྱེད་བཞིན་ཡོད་པ་དང་། རྒྱ་རིགས་མང་པོ་འདུས་སྡོད་བྱས་པ་དང་བསྟུན་ས་དེའི་དཔལ་འབྱོར་འཕེལ་རྒྱས་ཧ་ཅང་མགྱོགས་པར་བརྟེན། ནུབ་ཕྱོགས་སྤྱི་ཚོགས་ནང་དོ་སྣང་ཆེན་པོ་འབྱུང་བཞིན་ཡོད་སྐོར་ཡང་བརྗོད་འདུག

འདི་ལོའི་ཕྱི་ཟླ་ ༦ པའི་ནང་ཕར་ཊོ་ཁུལ་གྱི་ཚོང་ཁང་དག་ལ་བདེ་འཇགས་ཉེན་རྟོག་པས་ཞིབ་བཤེར་བྱེད་སྐབས། པང་དུ་བྱིས་པ་ཉར་བའི་རྒྱ་རིགས་ཚོང་པ་རྒན་འཁོགས་ཤིག་གིས་བདེ་འཇགས་ཞིབ་བཤེར་བྱེད་པར་བཀག་འགོག་བྱས་པར་བརྟེན། བདེ་འཇགས་ཉེན་རྟོག་པ་དང་ལག་འཛིང་ཤོར་ཏེ་བྱིས་པ་སར་ལྷུང་ནས་རྨས་སྐྱོན་བཟོས་ཡོད་པ་དང་། གནད་དོན་དེ་རྐྱེན་བྱས་ནས་ས་གནས་རྒྱ་རིགས་ ༣༠༠ ཙམ་དང་ཉེན་རྟོག་པར་བར་འཁྲུག་འཛིང་ཤོར་ཏེ། ཉེན་རྟོག་པ་ ༤ དང་ལས་བཟོ་བ་ ༣ ལ་རྨས་སྐྱོན་ཕོགས་ཡོད་པ་དང་། གཞན་ཡང་། ཕྱི་ལོ་ ༢༠༡༣ ལོར་ཕར་ཊོ་ཁུལ་དུ་ཡོད་པའི་རྒྱ་མིའི་བཟོ་གྲྭ་ཞིག་ལ་མེ་སྐྱོན་བྱུང་སྟེ་མི་ ༧ ལ་སྲོག་སྐྱོན་བྱུང་བ་དང་། སྐབས་དེར་ཡང་ས་གནས་རྒྱ་རིགས་དང་ཉེན་རྟོག་པ་བར་འཁྲུག་འཛིང་ཆེན་པོ་ཤོར་ཡོད་འདུག

གསར་འགོད་པ། པདྨ་མཚོ།