ཨ་རི་དང་རྒྱ་ནག་གི་ཚོང་འབྲེལ་ཇེ་བཟང་དུ་འགྲོ་བའི་རེ་བ་ཡོད་ཟེར།

རྒྱ་ནག་གི་སྲིད་བློན་གཞོན་པ་ཝང་ཡཱོང་གིས་ཨ་རྒྱ་གཉིས་ཀྱི་ཚོང་འབྲེལ་ཐོག་ཨ་རིའི་གཞུང་གིས་ལངས་ཕྱོགས་གང་འདྲ་ཞིག་འཛིན་མིན་ད་ལོའི་ཨ་རིའི་འོས་བསྡུའི་མཇུག་འབྲས་ལྟར་ཚོད་དཔག་དཀའ་ཟེར།

དེ་རིང་རྒྱ་ནག་ལྷོ་བརྒྱུད་ཞོགས་པའི་ཚགས་པར་ཁང་གི་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༢༢ ནས་དེ་རིང་ཕྱི་ཚེས་ ༢༣ བར་ཨ་རིའི་རྒྱལ་ས་ཝ་ཤིན་ཊོན་དུ་འཚོགས་བཞིན་པའི་ཨ་རྒྱ་གཉིས་ཀྱི་མཉམ་འབྲེལ་ཉོ་འཚོང་ཚོགས་འདུ་ (JCCT)ཞེས་པ་དང་བསྟུན་ཏེ། རྒྱ་ནག་གི་སྲིད་བློན་གཞོན་པ་ཝང་ཡཱོང་ (Wang Yang) གིས་ཚོགས་ཞུགས་དཔོན་རིགས་ཚོར་ཨ་རིའི་གཞུང་གིས་རྒྱ་ནག་ཐོག་འཛིན་པའི་སྲིད་ཇུས་གསལ་ཁ་མེད་ཀྱང་། ཨ་རིའི་ཁེ་ལས་ཚོགས་སྡེ་ཁག་གིས་ཨ་རྒྱ་གཉིས་བར་གྱི་ཉོ་འཚོང་འབྲེལ་ལམ་ཐོག་སྤྲོ་སེམས་ཆེན་པོ་ཡོད་སྟབས། མ་འོངས་ཨ་རྒྱ་གཉིས་བར་གྱི་ཉོ་འཚོང་འབྲེལ་ལམ་ལ་བཟང་ཕྱོགས་སུ་འཕོ་འགྱུར་འགྲོ་བར་རེ་བ་བཅང་ཡོད་ཚུལ་བཤད་འདུག

རྒྱ་ནག་གི་སྲིད་བློན་གཞོན་པ་ཝང་ཡཱོང་ཟེར་བ་དེས། མ་འོངས་ཨ་རྒྱ་གཉིས་བར་གྱི་ཉོ་འཚོང་འབྲེལ་ཐོག་ཨ་རིའི་གཞུང་གིས་སྲིད་ཇུས་ལངས་ཕྱོགས་གང་འདྲ་ཞིག་འཛིན་མིན་ནི། ཉེ་ཆར་བྱུང་བའི་ཨ་རིའི་སྲིད་འཛིན་འོས་བསྡུའི་མཇུག་འབྲས་ལྟར། ང་ཚོ་མཇུག་འབྲས་ལ་བསྒུག་རྒྱུ་མ་གཏོགས་ད་ལྟ་ནས་ཚོད་དཔག་བྱེད་མི་ཐུབ་པ་དང་། དེ་རིང་ཚོགས་ཞུགས་པ་ཚང་མས་ཨ་རིའི་གཞུང་ལ་འགྱུར་བ་འགྲོ་སྲིད་ནའང་ད་ལྟའི་ཨ་རྒྱ་གཉིས་བར་གྱི་ཚོང་འབྲེལ་ལ་གྱུར་བ་གཏོང་མི་སྲིད་པའི་ཡིད་ཆེས་བྱེད་ཀྱིན་ཡོད་པ་རེད། ཨོ་བྷ་མའི་སྲིད་དབང་འོག་ཕྱོགས་གཉིས་བར་གྱི་མཉམ་འབྲེལ་ཚོང་ལས་དང་དམག་དོན། དཔལ་འབྱོར་གྲོས་མོལ་བཅས་ལ་བཟང་ཕྱོགས་ཀྱི་འཕོ་འགྱུར་བྱུང་བ་དང་ལྡོག་ཕྱོགས་ཀྱི་ཤན་ཤུགས་ཉུང་དུ་ཕྱིན་ཡོད། རྒྱ་ནག་ཕྱོགས་ནས་མུ་མཐུད་དུ་ཨ་རིའི་ཚོང་གཉེར་ཁང་ཁག་ལ་ཁེ་ལས་ཀྱི་གོ་སྐབས་ཆེན་པོ་སྤྲོད་རྒྱུ་ཡིན། དེ་ཡང་མ་འོངས་པའི་ལོ་ངོ་ ༥ ཡི་ནང་ཨ་རིའི་ཕྱོགས་ནས་ཨ་སྒོར་ཁྲག་ཁྲིག་ཆེན་པོ་ ༨ ཀྱི་དངོས་ཟོག་ནང་འདྲེན་བྱ་རྒྱུ་དང་། རྒྱ་ནག་ཕྱོགས་ནས་ཕྱིའི་རྒྱལ་ཁབ་ཁག་ནང་ཨ་སྒོར་ཐེར་འབུམ་ ༧༢༠ ཡི་མ་འཛུགས་བྱ་རྒྱུ། དེ་བཞིན། ཕྱིའི་རྒྱལ་ཁབ་ཁག་གི་ཁེ་ལས་མ་འཛུགས་ནང་རྒྱ་ནག་གིས་ཨ་སྒོར་ཐེར་འབུམ་ ༥༠༠ སྔ་བསྣུར་བྱ་རྒྱུ་དང་།

རྒྱ་རིགས་མི་མང་ས་ཡ་ ༦༠༠ ཕྱིའི་རྒྱལ་ཁབ་ཁག་ནང་ཡུལ་སྐོར་སྤྲོ་འཆམ་དུ་འགྲོ་འོང་ཐུབ་པའི་རེ་བ་ཡོད་ལ། འདི་ནི་ཨ་རི་ཚུད་པའི་འཛམ་གླིང་རྒྱལ་ཁབ་ཚང་མའི་ཚོང་གཉེར་ཁང་ཁག་གི་གོ་སྐབས་ཆེན་པོ་ཞིག་ཡིན། ད་ལྟའི་རྒྱ་ནག་གི་དཔལ་འབྱོར་ཁྲོམ་རའི་འཕོ་འགྱུར་ལ་གཞིགས་ཏེ། ཨ་རིའི་གཞུང་དང་ཚོང་གཉེར་ཁང་ཁག་གིས་འདམ་ག་མ་ནོར་བར་བྱ་ངེས་རེད་བསམ་གྱི་ཡོད། གལ་ཏེ་འདམ་ག་ནོར་བ་ཡིན་ན། ཨ་རྒྱ་གཉིས་བར་གྱི་ཚོང་འབྲེལ་དཀའ་རྙོག་དེ་ད་ལྟའི་རྒྱལ་སྤྱིའི་དཔལ་འབྱོར་གྱི་དཀའ་རྙོག་ལྟ་བུ་ཆགས་སྲིད། ཅེས་སོགས་བཤད་འདུག

ཨ་རིའི་རྒྱལ་ཡོངས་དངུལ་རྩིས་ཞབས་ཞུ་ཁང་ (Morgan Stanley) གི་སློབ་སྟོན་པ་ཟུར་བ་སྐུ་ཞབས་རྗ་ཁི་ཝ་ཌི་ཝོར་ཐི་ (Jack Wadsworth) ཟེར་བ་ཞིག་གིས། ཨ་རིའི་མ་འོངས་གཞུང་གསར་བས་ཕྱིའི་དཔལ་འབྱོར་ཉོ་འཚོང་ལ་བརྟེན་ཏེ། ཨ་རིའི་དཔལ་འབྱོར་འཕེལ་རྒྱས་གཏོང་བ་དང་ལས་ཤོར་མི་མང་ལ་ལས་གནས་གསར་འཛུགས་ཐུབ་པར་ངོས་འཛིན་བྱ་སྲིད་སྐོར་བརྗོད་འདུག

ཉེ་ཆར་སྐུ་ཞབས་ཊི་རུམ་ཕི་ཡིས་རྒྱ་ནག་གིས་རྒྱ་སྒོར་གྱི་འཛའ་ཐང་བཅག་པ་དང་ཨ་རིའི་ཁེ་ལས་བཙན་འཕྲོག་བྱེད་བཞིན་ཡོད་སྟབས། ཁོས་རྒྱ་ནག་གི་དངོས་ཟོག་ནང་འདྲེན་གྱི་ཁྲལ་བརྒྱ་ཆ་ ༤༥ སྤར་ཏེ་ཨ་རིའི་གྱོང་གུད་ཇེ་ཉུང་ལ་གཏོང་རྒྱུ་ཡིན་པ་མ་ཟད། ད་དུང་རྒྱ་ནག་འཛམ་གླིང་ཚོང་ལས་སྒྲིག་འཛུགས་ཀྱི་ཁོངས་ནས་ཕྱིར་ཕུད་གཏོང་རྒྱུ་ཡིན། ཞེས་སོགས་བརྗོད་ཡོད་པ་རེད།

གནས་ཚུལ་ལྟར་ན། ཨ་རྒྱ་གཉིས་བར་གྱི་མཉམ་འབྲེལ་ཉོ་འཚོང་ཚོགས་འདུ་ཐེངས་ ༢༧ པ་དེ་ཟླ་འདིའི་ཕྱི་ཚེས་ ༢༢ ནས་ ༢༣ ཉིན་བར་ཨ་རིའི་རྒྱལ་ས་ཝ་ཤིན་ཊོན་དུ་འཚོགས་བཞིན་ཡོད་པ་དང་། ད་ལོའི་ཚོགས་ཐོག་ཏུ་ཕྱོགས་གཉིས་ཀྱི་ཁེ་ལས་པ་དང་གཞུང་འབྲེལ་མཐོ་རིམ་དཔོན་རིགས་ཁག་ཅིག་བཅས་མཉམ་ཞུགས་བྱས་ཡོད་འདུག

གསར་འགོད་པ། པདྨ་རྒྱལ།