མ་ལེ་ཞི་ཡའི་ཉེན་རྟོག་པས་ཐའེ་ཝན་དང་རྒྱ་ནག་སྐམ་ས་ཆེན་མོའི་རྒྱ་རིགས་དྲ་ལམ་དང་ཁ་པར་སྐུད་ལམ་ནས་དངུལ་གཡོ་ལེན་བྱས་པའི་དོགས་ཡོད་ཉེས་ཅན་ ༧༤ འཛིན་བཟུང་བྱས་ཏེ་རྒྱ་ནག་ལ་རྩིས་སྤྲོད་བྱས་ཡོད་འདུག
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་མ་ལེ་ཞི་ཡའི་ཉེན་རྟོག་པས་དངུལ་གཡོ་ལེན་བྱས་པའི་དོགས་ཡོད་ཉེས་ཅན་རྒྱ་རིགས་ ༧༤ འཛིན་བཟུང་བྱས་ཏེ་ཕྱིར་རྒྱ་ནག་ཉེན་རྟོག་པར་རྩིས་སྤྲད་ཡོད་པ་དང་། རྒྱ་རིགས་དེ་དག་གིས་དྲ་ལམ་དང་ཁ་པར་སྐུད་ལམ་ནས་ཁྱོན་བསྡོམས་རྒྱ་སྒོར་ས་ཡ་ ༦༠ གཡོ་ལེན་བྱས་ཡོད་འདུག
གནས་ཚུལ་དེའི་ཐད་རྒྱ་ནག་གཞུང་གིས། མི་དེ་དག་ལས་ ༢༡ ཙམ་ཐའེ་ཝན་མཚོ་འགག་ནས་ཡིན་པ་དང་གཞན་མི་ ༥༣ སྐམ་ས་ཆེན་མོ་རང་ནས་ཡིན་སྐོར་དང་། མི་དེ་དག་གིས་ཁྲིམས་འགལ་ཐོག་དྲ་ལམ་དང་ཁ་པར་སྐུད་ལམ་ནས་དངུལ་གཡོ་ལེན་བྱས་པའི་དོན་རྐྱེན་ ༥༠༠ ནང་ཚུད་ཡོད་པ་མ་ཟད། ཁྱོན་རྒྱ་སྒོར་ས་ཡ་ ༦༠༠ གཡོ་ལེན་བྱས་ཡོད་པ་དང་། མ་ལེ་ཞི་ཡ་དང་རྒྱ་ནག་སྐམ་ས་ཆེན་མོའི་སྤྱི་བདེ་ཉེན་རྟོག་པ་མཉམ་འབྲེལ་ཐོག་མ་ལེ་ཞི་ཡའི་ནང་རྟེན་གཞི་བྱས་པའི་དངུལ་གཡོ་ལེན་བྱེད་མཁན་གྱི་ནག་ཚོགས་ཁག་ལ་ཁ་གཏད་གཅོག་གི་ཡོད་ལུགས་བཤད་སོགས་བཤད་འདུག
ཐའེ་ཝན་ཕྱི་འབྲེལ་ལྷན་ཁང་གིས་གསར་འགོད་གསལ་བསྒྲགས་སྤེལ་ཏེ། མ་ལེ་ཞི་ཡས་ཐའེ་ཝན་གྱི་ཡུལ་མི་ ༢༡ རྒྱ་ནག་གཞུང་ལ་རྩིས་སྤྲད་པའི་བྱ་སྤྱོད་དེ་ལ་མཐའ་གཅིག་ཏུ་ངོ་རྒོལ་ཡོད། བྱ་སྤྱོད་དེས་ཐའེ་ཝན་མཚོ་འགག་དང་མ་ལེ་ཞི་ཡ་གཉིས་བར་གྱི་མཛའ་འབྲེལ་ལ་དོ་ཕོག་ཆེན་པོ་བཟོས་ཡོད་པ་དང་། ཐའེ་ཝན་ཉེན་རྟོག་པས་མ་ལེ་ཞི་ཡའི་ཉེན་རྟོག་པར་འབྲེལ་གཏུགས་བྱས་ཡོད་ནའང་རྒྱ་ནག་གཞུང་གི་གནོན་ཤུགས་འོག་མ་ལེ་ཞི་ཡའི་ཉེན་རྟོག་པས་ཐའེ་ཝན་གྱི་ཡུལ་མི་དེ་དག་རྒྱ་ནག་ལ་རྩིས་སྤྲད་པ་རེད། ཅེས་བརྗོད་འདུག
གནས་ཚུལ་དེའི་མཇུག་ཏུ། ཐའེ་ཝན་རྒྱ་ནག་ལས་དོན་ཁང་གིས། རྒྱ་ནག་གཞུང་གི་བྱ་སྤྱོད་དེས་རྒྱལ་ཁབ་སོ་སོའི་བདེ་སྲུང་ལས་ཁུངས་ཕན་ཚུན་བར་གྱི་བསམ་ཤེས་དང་མཉམ་འབྲེལ་གྱི་གཞི་རྩར་དོ་ཕོག་བཟོས་ཡོད་ཚུལ་བཤད་ཡོད་ཀྱང་། མ་ལེ་ཞི་ཡ་གཞུང་གིས་རྒྱ་ནག་རྒྱལ་ཁབ་གཅིག་གི་ལམ་ལུགས་འོག་ཐའེ་ཝན་མཚོ་འགག་དེ་རྒྱ་ནག་གི་ཆ་ཤས་གླིང་ཕྲན་ཞིག་ཡིན་པར་ངོས་འཛིན་བྱས་ཏེ། མ་ལེ་ཞི་ཡའི་ཕྱི་འབྲེལ་ལྷན་ཁང་ནས་གནད་དོན་དེའི་ཐད་གསལ་བཤད་གང་ཡང་བྱས་མེད་སྐོར་དང་། ན་ནིང་ཕྱི་ཟླ་ ༡༡ པའི་ནང་རྒྱ་ནག་གཞུང་གིས་ཤར་ཨ་ཧྥི་རི་ཁའི་རྒྱལ་ཁབ་ཁིན་ཡ་དང་ཁམ་བྷོ་ཌེ་ཡ། ལའོ་སི་དང་མ་ལེ་ཞི་ཡ། ཨིན་ཌོ་ནི་ཤི་ཡ་སོགས་ཀྱི་ཉེན་རྟོག་ཁང་དང་མཉམ་འབྲེལ་གྱིས་རྒྱལ་ཁབ་དེ་དག་ནང་དངུལ་གཡོ་ལེན་བྱེད་མཁན་ཚོགས་ཁག་ ༦༠ རྩ་གཏོར་བཏང་བ་དང་དོགས་ཡོད་ཉེས་ཅན་པ་ ༡༠༠༠ འཛིན་བཟུང་བྱས་ཡོད་ལུགས་སོགས་བཀོད་འདུག
གཞན། རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས་གནས་ཚུལ་སྤེལ་བའི་ནང་། ཁ་སང་རྒྱ་ནག་ཀུང་ཏུང་ཞིང་ཆེན་མའོ་མེན་ (Maoming) གྲོང་ཁྱེར་དུ་ཁ་པར་སྐུད་ལམ་ནས་དངུལ་གཡོ་ལེན་བྱེད་མཁན་དོགས་ཡོད་མི་སྣ་ ༢༧༠ འཛིན་བཟུང་བྱས་ཡོད་པ་དང་། མི་དེ་དག་གིས་ཁྱོན་བསྡོམས་རྒྱ་སྒོར་ས་ཡ་ ༣.༤ གཡོ་ལེན་བྱས་ཡོད་པ་མ་ཟད། ད་དུང་ཀུང་ཏུང་དང་ཧྲན་ཏུང་། ཀེ་ཀྲུའུ་དང་ཧུའུ་པེ། གུང་ཞི་དང་ཧུ་ནན། ལོ་ནན་དང་ཆི་ཨན། ཧེ་ནན་སོགས་ཞིང་ཆེན་ ༩ དང་། དེ་བཞིན། ཐེན་ཅིན་དང་པེ་ཅིན་གྲོང་ཁྱེར་གཉིས་ནང་ཁ་པར་སྐུད་ལམ་ནས་འབྲེལ་གཏུགས་བྱས་པའི་ཡིག་ཚགས་ས་ཡ་མང་པོ་ལག་སོན་བྱུང་ཡོད་ལུགས་བཤད་འདུག
གསར་འགོད་པ། པདྨ་རྒྱལ།
