ཧི་མ་ཅལ་མངའ་སྡེའི་འགྲིམ་འགྲུལ་བློན་ཆེན་ལགས་ཀྱིས་དངོས་སུ་འགྲིམ་འགྲུལ་ཞིབ་བཤེར་གནང་བ་བརྒྱུད་དྷ་ས་དང་ལྡི་ལི་བར་འགྲོ་འོང་བྱེད་མཁན་སྤྱི་སྤྱོད་རླངས་འཁོར་ ༧ བཀག་ཉར་བྱས་པ་མ་ཟད། སྤྱི་སྤྱོད་རླངས་འཁོར་གཅིག་གིས་ཁྲིམས་འགལ་ཚབས་ཆེན་བྱས་ཡོད་སྐོར་བརྗོད་འདུག
རྒྱ་གར་དུས་བབ་ཀྱིས་གནས་ཚུལ་སྤེལ་བ་ལྟར་ན། ཕྱི་ཟླ་ ༡༡ ཚེས་ ༣༠ ཉིན་གྱི་མཚན་མོ་ཆུ་ཚོད་ ༣།༣༠ ཐོག་ཧི་མ་ཅལ་མངའ་སྡེའི་འགྲིམ་འགྲུལ་བློན་ཆེན་ཇི་ཨེ་སི་བྷ་ལི་(G S Bali)ལགས་ཀྱིས། མངའ་སྡེའི་འགྲིམ་འགྲུལ་ཁང་གི་དམིགས་བསལ་རུ་ཁག་ཅིག་དང་ཉེན་རྟོག་པ་ཁག་ཅིག་འཁྲིད་དེ། དྷ་ས་དང་ལྡི་ལི་བར་འགྲོ་འོང་བྱེད་མཁན་གྱི་སྤྱི་སྤྱོད་རླངས་འཁོར་རྣམས་ལ་ཞིབ་བཤེར་བྱས་པ་བརྒྱུད། སྤྱི་སྤྱོད་རླངས་འཁོར་ ༧ བཀག་ཉར་བྱས་ཡོད་པ་དང་། དེའི་ནང་ནས་སྤྱི་སྤྱོད་རླངས་འཁོར་གཅིག་གིས་ཁྲིམས་འགལ་ཚབས་ཆེན་བྱས་ཡོད་པ་དང་། འབྲེལ་ཡོད་འགྲིམ་འགྲུལ་ལས་བྱེད་པ་གཅིག་གནས་སྤོ་བཏང་ཡོད་འདུག
མངའ་སྡེའི་འགྲིམ་འགྲུལ་བློན་ཆེན་ཇི་སི་བྷ་ལི་ལགས་ཀྱིས། འགྲིམ་འགྲུལ་ཞིབ་བཤེར་ལས་བྱེད་པ་ཁ་ཤས་ཀྱིས་ལྷོད་གཡེང་གཏོང་གི་ཡོད་པར་བརྟེན། ད་ལན་ཁོ་རང་གིས་དངོས་སུ་ཞིབ་བཤེར་བྱས་ཡོད་ལ། དྷ་ས་དང་ལྡི་ལི་བར་གྱི་སྤྱི་སྤྱོད་རླངས་འཁོར་རྣམས་ཁྲིམས་འགལ་ཐོག་འགྲོ་འོང་བྱས་ནས་དུས་ཡུན་རིང་པོ་ཕྱིན་ཡོད་པ་དང་། འགྲིམ་འགྲུལ་ཞིབ་བཤེར་པས་ཞིབ་བཤེར་བྱས་ཡོད་ཀྱང་དོན་ཕན་ལྡན་པ་ཞིག་བྱུང་མེད་སྟབས། ད་ལན་ཁོང་གིས་ཡིད་ཆེས་འཕེལ་བའི་ཞིབ་བཤེར་རུ་ཁག་ཅིག་རྩ་འཛུགས་བྱས་ཏེ་གློ་བུར་དུ་ཞིབ་བཤེར་བྱས་ཡོད་སྐོར་བརྗོད་འདུག
ཡང་ཁོང་གིས་བཀག་ཉར་བྱས་པའི་སྤྱི་སྤྱོད་རླངས་འཁོར་ནང་གི་འགྲུལ་བ་རྣམས་གཞུང་གི་སྤྱི་སྤྱོད་རླངས་འཁོར་ནང་བཞག་སྟེ་སོ་སོ་འགྲོ་དགོས་ས་དེར་བཏང་ཡོད་ལ། འགྲིམ་འགྲུལ་ཞིབ་བཤེར་བས་དྲ་ཐོག་བརྒྱུད་རླངས་འཁོར་དེ་ཚོའི་འཛིན་བྱང་ཚོང་མཁན་རྣམས་ལ་ཁྲིམས་ལྟར་འགོག་རྒོལ་བྱ་རྒྱུ་ཡིན་པ་དང་། དེ་ཚོས་ཁྲལ་འཇལ་གྱི་མེད་ལ་འགྲོ་ལམ་ཡང་ངེས་གཏན་མེད་པས། འགྲུལ་བ་ཚོའི་བདེ་འཇགས་ལ་ཉེན་ཁ་བཟོ་ཡི་ཡོད་སྟབས། སྤྱི་སྤྱོད་རླངས་འཁོར་དེ་རིགས་ནང་འདུག་རྒྱུར་ཡིད་གཟབ་དགོས་སྐོར་བརྗོད་ཡོད་འདུག
ཁོང་གིས་མ་འོངས་པར་སིམ་ལ་དང་མ་ནཱ་ལི་བར་འགྲོ་འོང་བྱེད་མཁན་སྤྱི་སྤྱོད་རླངས་འཁོར་རྣམས་ལའང་ཞིབ་བཤེར་བྱ་རྒྱུ་ཡིན་ལ། འགྲིམ་འགྲུལ་ཞིབ་བཤེར་ཐད་ལྷོད་གཡེང་གཏོང་མཁན་འབྲེལ་ཡོད་ལས་བྱེད་རྣམས་འཕྲལ་དུ་གནས་སྤོ་གཏོང་བ་དང་ས་གནས་ཀྱི་ཁྲིམས་ལྟར་ཉེས་ཆད་གཅོད་རྒྱུ་ཡིན་སྐོར་ཡང་བརྗོད་འདུག
གསར་འགོད་པ། པདྨ་མཚོ།
