ཉེ་སྔོན་ཀྲེ་ཅང་ཞིང་ཆེན་ནང་ཆོས་མཐུན་ཚོགས་ཟེར་བས་ཀྲེ་ཅང་ནང་བོད་བརྒྱུད་ནང་བསྟན་དར་སྤེལ་ལ་དོགས་ཟོན་བཀག་འགོག་བྱས་ཏེ་རྒྱ་བརྒྱུད་ནང་བསྟན་སྤེལ་བར་སྐུལ་འདེད་དགོས་པའི་བཀའ་རྒྱ་བསྒྲགས་འདུག
འདི་ལོའི་ཕྱི་ཟླ་ ༡༡ ཚེས་ ༢༨ ཉིན་ཀྲེ་ཅང་ཞིང་ཆེན་ནང་ཆོས་མཐུན་ཚོགས་ཟེར་བ་དེས། ཞིང་ཆེན་དེའི་གྲོང་ཁྱེར་ཁག་གི་ནང་ཆོས་མཐུན་ཚོགས་ཁག་དང་། རི་བོ་གྲུ་འཛིན་ནང་ཆོས་མཐུན་ཚོགས་བཅས་ལ་བཀའ་རྒྱ་བསྒྲགས་ཏེ། ཏང་གི་ཆོས་ལུགས་སྲིད་བྱུས་དང་རྒྱལ་ཁབ་ཀྱི་འབྲེལ་ཡོད་བཅའ་ཁྲིམས་ལག་ལེན་ནན་ཏན་དགོས་པ་མ་ཟད། ནང་ཆོས་དང་སྤྱི་ཚོགས་འཆམ་མཐུན་ལ་སྲུང་སྐྱོབ་ཤུགས་སྣོན་བྱེད་དགོས་སྟབས།། ཀྲེ་ཅང་ཞིང་ཆེན་མི་རིགས་ནང་ཆོས་ལས་དོན་ཁང་ནས་ཞིང་ཆེན་དེའི་ནང་བོད་བརྒྱུད་ནང་བསྟན་ཁྲིམས་འགལ་གྱིས་དར་སྤེལ་གཏོང་བའི་གནད་དོན་ལ་དོགས་ཟོན་བཀག་འགོག་དགོས་པའི་དགོས་འདུན་བཏོན་ཡོད་སྐོར་བརྗོད་འདུག
བོད་བརྒྱུད་ནང་བསྟན་དར་འཕེལ་སྔོན་འགོག་དགོས་པའི་སྐོར་ལ་དོན་ཚན་དྲུག་བཏོན་ཡོད་པའི་དང་པོ། གོང་རིམ་གྱི་ཆོག་མཆན་མེད་ན། བོད་བརྒྱུད་ནང་བསྟན་གྱི་གྲྭ་བས་ཀྲེ་ཅང་ཞིང་ཆེན་ནང་ཆོས་འཆད་ཉན་བརྒྱུད་སྤེལ་གྱི་བྱེད་སྒོ་གཙོ་གཉེར་དང་མཉམ་ཞུགས་མི་ཆོག་ལ། བཀའ་དབང་གནང་སྟེ་སློབ་མ་བསྡུ་འགུག་དང་མར་མེ་མཆོད་འབུལ་སོགས་ནང་ཆོས་ཀྱི་བྱེད་སྒོ་རིགས་སྤེལ་མི་ཆོག
གཉིས་པ། ཆོག་མཆན་མེད་ན་ཀྲེ་ཅང་ཞིང་ཆེན་ནང་ཆོས་མཐུན་ཚོགས་དང་ནང་ཆོས་ཀྱི་བྱེད་སྒོ་སྤེལ་ས། ནང་ཆོས་སློབ་གཉེར་ཁང་སོགས་རྩ་འཛུགས་ཁག་གིས་ནང་ཆོས་དོན་གཉེར་བ་རྣམས་ལ་བོད་བརྒྱུད་ནང་བསྟན་གྱི་དཔེ་ཆ་དང་བསྟན་བཅོས་འཆད་འཁྲིད་མི་ཆོག་ལ། བོད་བརྒྱུད་ནང་བསྟན་གྱི་བྱེད་སྒོ་རིགས་སྤེལ་མི་ཆོག
གསུམ་པ། ཀྲེ་ཅང་ཞིང་ཆེན་གྱི་རྒྱ་སྐད་ཚན་པའི་ནང་ཆོས་དགོན་པའི་གྲྭ་པ་ཚོས་རྒྱ་བརྒྱུད་ནང་ཆོས་ཀྱི་བསྟན་བཅོས་འདུལ་ཁྲིམས་སྒྲིག་ལྟར་ནང་ཆོས་ཉམས་ལེན་སློབ་གཉེར་དགོས་པའི་སློབ་གསོ་གཏོང་དགོས།
བཞི་པ། ཞིང་ཆེན་ཕྱི་ནས་ནང་ཆོས་འཆད་འཁྲིད་དགེ་རྒན་དང་ལས་བྱེད་གདན་འདྲེན་ཞུས་ཏེ། ནང་ཆོས་ཀྱི་བྱེད་སྒོ་གཙོ་གཉེར་དང་ནང་ཆོས་འཆད་འཁྲིད་ཀྱི་ལས་འགན་འཁུར་ཆོག་ཀྱང་། འབྲེལ་ཡོད་ནང་ཆོས་མཐུན་ཚོགས་ཀྱི་ཆོག་མཆན་ཡོད་དགོས་པ་མ་ཟད། ཞིང་ཆེན་ནང་ཆོས་མཐུན་ཚོགས་ཀྱིས་ཞིང་ཆེན་མི་མང་ཆོས་ལུགས་ལྷན་ཁང་ལ་སྙན་གསེང་ཐོ་འགོད་དགོས་པ།
ལྔ་པ། ཆོག་མཆན་མེད་ཚེ་ཆོས་ལུགས་འཆད་འཁྲིད་བྱེད་མཁན་དགེ་རྒན་དང་ལས་བྱེད་ཀྱིས་ཆོས་ལུགས་བྱེད་སྒོ་སྤེལ་ས་མ་ཡིན་པར་གཙོ་འགན་འཁུར་མི་ཆོག་ལ། ཆོས་ལུགས་བྱེད་སྒོ་རིགས་རྩ་འཛུགས་བྱེད་པ་དང་མཉམ་ཞུགས་མི་ཆོག
དྲུག་པ། འདུ་འཛོམས་ཀྱི་ཆོས་ལུགས་བྱེད་སྒོ་རྣམས་ཁྲིམས་ལྟར་ཐོ་འགོད་ཟིན་པའི་ཆོས་ལུགས་བྱེད་སྒོ་སྤེལ་ས་དང་། རྫོང་རིམ་པ་ཡན་གྱི་ཆོས་ལུགས་ལས་དོན་ཁང་གི་ཆོག་མཆན་ཡོད་པའི་ཁྱབ་ཁོངས་ནང་སྤེལ་དགོས་པ་བཅས་བརྗོད་འདུག
གསར་འགོད་པ། པདྨ་མཚོ།
སྟོན་པ་ཐུབ་པའི་དབང་པོའི་རྗེས་འབྲངས་ཡིན་པ་མཚུངས་ཀྱང་འཆམ་མཐུན་གོང་བུ་ཆིག་བསྒྲིལ་ཡོང་རྒྱུའི་ཚབ་ཏུ་བོད་བརྒྱུད་ནང་བསྟན་དང་རྒྱ་བརྒྱུད་ནང་བསྟན་ཞེས་ཁ་འབྲལ་གཏོང་མཁན་སུ་ཡིན་ཟུར་བལྟས་ལེབ་མཐོང་རེད་བཞག མི་རིགས་འཆམ་མཐུན་མི་ཡོང་བའི་རྩ་བ་ཡང་བསམ་ཤེས་མེད་པའི་གུ་དོག་གི་སྲིད་བྱུས་དང་མི་རིགས་དབྱེ་འབྱེད་སོགས་དྲང་བདེན་གྱིས་དབེན་པ་ལ་ཐུག་ཡོད།