ཟླ་འདིའི་ཕྱི་ཚེས་ ༡༢ ཉིན་ནས་བཟུང་རྒྱ་གར་ལྷོ་ཕྱོགས་མོན་གྷོ་བཙུན་དགོན་བྱང་ཆུབ་ཆོས་གླིང་དུ་དགེ་བཤེས་མའི་གྲྭ་བསྐོར་དམ་བཅའ་འཚོགས་བཞིན་ཡོད་འདུག
ཆོས་རིག་ལས་ཁུངས་ནས་གནས་ཚུལ་མཁོ་གཏོང་གནང་བ་ལྟར་ན། ༸གོང་ས་མཆོག་གི་བཀའ་དགོངས་ལྟར་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གཙོ་འགན་བཞེས་ཏེ། ཕྱི་ལོ་ ༢༠༡༢ ལོར་བོད་ཀྱི་བཙུན་དགོན་དང་སློབ་གཉེར་ཁང་ནས་གཞུང་ཆེན་བསླབ་པ་མཐར་སོན་བཙུན་མ་རྣམས་ལ་དགེ་བཤེས་མའི་རྒྱུགས་སྤྲོད་དང་མཚན་རྟགས་འབུལ་ཕྱོགས་ཀྱི་སྒྲིག་གཞི་ཞེས་པ་གསར་དུ་གཏན་ལ་ཕབ་སྟེ། ཕྱི་ལོ་ ༢༠༡༣ ནས་ ༢༠༡༦ བར་རྒྱུགས་སྤྲོད་ཀྱི་ལས་རིམ་རྣམས་ཚགས་ཚུད་བཟོས་གནང་སྟེ། ཁ་སང་ཕྱི་ཚེས་ ༡༢ ཉིན་ནས་ཉིན་གྲངས་བཞིའི་རིང་རྒྱ་གར་ལྷོ་ཕྱོགས་མོན་གྷོ་བཙུན་དགོན་བྱང་ཆུབ་ཆོས་གླིང་དུ། དགེ་བཤེས་མའི་སློབ་པ་མཐར་སོན་གྱི་ཡོད་པའི་བཙུན་མ་ ༢༠ ཡིས་དགེ་བཤེས་མའི་གྲྭ་བསྐོར་དམ་བཅའ་འཚོགས་བཞིན་ཡོད་པ་དང་། ཟླ་འདིའི་ཕྱི་ཚེས་ ༢༢ ཉིན་འབྲས་སྤུངས་བླ་སྤྱིར་༸གོང་ས་མཆོག་ནས་དགེ་བཤེས་མའི་མཚན་རྟགས་ཞུ་མཁན་བཙུན་མ་རྣམས་ལ་ཕྱག་འཁྱེར་གནང་རྒྱུ་ཡིན་འདུག
ཆོས་རིག་ལས་ཁུངས་དང་། དགེ་བཤེས་མའི་རྒྱུགས་སྤྲོད་དོ་དམ་ལྷན་ཚོགས། དེ་བཞིན་བཙུན་དགོན་བྱང་ཆུབ་ཆོས་གླིང་ནས་ཇི་ལྟར་གསོལ་འདེབས་ཞུས་པ་ལྟར། ༸སྐྱབས་རྗེ་དགའ་ལྡན་ཁྲི་ཟུར་རི་རྫོང་སྲས་སྤྲུལ་རིན་པོ་ཆེ་མཆོག་དམ་བཅའི་ཚོགས་མགོན་དུ་༸ཞབས་སོར་བཀའ་དྲིན་བསྐྱངས་ཡོད་པ་དང་། དམ་བཅའ་དབུ་འཛུགས་ཀྱི་ཉིན་དང་པོར་བྱང་ཆུབ་ཆོས་གླིང་གི་བཙུན་མ་ཕུན་ཚོགས་སྒྲོལ་དཀར་ལགས་དང་། བཙུན་མ་ངག་དབང་ཆོས་སྐྱིད་ལགས། འཇམ་དབྱངས་ཆོས་གླིང་གི་བཙུན་མ་བསྟན་འཛིན་བདེ་ལྡན་ལགས། སྒྲོལ་མ་གླིང་གི་བཙུན་མ་བདེ་ལེགས་སྒྲོལ་མ་ལགས་དང་། བཙུན་མ་བདེ་ལེགས་དཔལ་མོ་ལགས་བཅས་ནས་ཚད་མ་དང་དབུ་མ་ཕར་ཕྱིན། འདུལ་མཛོད་བཅས་ཀྱི་དམ་བཅའ་ཕུལ་ཡོད་པ་དང་། དེ་བཞིན་ཉིན་རེར་བཙུན་མ་ལྔ་རེ་བྱས་ནས་དམ་བཅའ་འབུལ་གྱི་ཡོད་པ་རེད།
གསར་འགོད་པ། པདྨ་མཚོ།
རྗེས་སུ་ཡི་རང་ཞུ། དངོས་འབྲེལ་བྱས་ན་དགེ་བཤེས་མའི་ཕྱག་ཁྱེར་སྩོལ་བཞེས་གནང་བར་དུས་རབས་ཉེར་གཅིག་གི་ལོ་ངོ་བཅུ་ཕྲག་གཉིས་ལ་མངོན་དུ་ཕྱོགས་ཕྱོགས་བར་སྒུག་སྡོད་པ་ཞིག་གཏན་ནས་མིན། གང་ལགས་ཟེར་ན་དགེ་བཤེས་མའི་ལག་ཁྱེར་དེ་ཡོན་ཚད་ལས་སྡོམ་པ་དང་གནས་རིམ་ཅན་གྱི་ས་དམིག་དེ་འདྲ་གང་ཡང་མ་རེད། ཡིན་ན་ཡང་ང་ཚོའི་སྤྱི་ཚོགས་ཀྱིས་གང་ཞིག་ལག་ཁྱེར་ཡིན་པ་དང་གང་ཞིག་གནས་རིམ་ཅན་གྱི་ས་དམིག་ཡིན་པ་གཉིས་ཀྱི་ཁྱད་པར་དེ་ད་ལྟ་ཡང་གསལ་པོ་ཞིག་ཆགས་ཐུབ་ཀྱི་མེད་པ་རེད། pgt དང་tgt ཟེར་ན་གནས་རིམ་ཅན་གྱི་ས་དམིག་གི་མིང་རེད། MA B Ed དང་ BA B Ed ཟེར་ན་ལག་ཁྱེར་གྱི་མིང་རེད། ན་གས་བྲིས།
ཡག་པོ་རེད། ད་དུང་ཕྱོགས་ཡོངས་ནས་ང་ཚོའི་བོད་པའི་བུ་མེད་རྣམས་ལ་ཤེས་ཡོན་དང་ཐོབ་ཐང་གོ་སྐབས་ཡོད་ཚད་སྤྲོད་དགོས།
ང་ཚོའི་བོད་པའི་བུ་མེད་རིགས་ལ་འཇོན་ཐང་དང་ནུས་པ་ཇི་ཙམ་ཡོད་པ་དེ་འཛམ་གླིང་མི་མང་ལ་ཤེས་སུ་འཇུག་དགོས།
ང་ངོ་མ་དགའ་ནི་ཡིན། ང་རང་དགེ་བཤེས་ཡིན་ཙང་བཙུན་མ་རྣམས་འདི་འདྲ་གཟེངས་སུ་ཐོན་པ་དེ་དགའ་བ་ཚད་མེད་སྐྱེས་
བྱུང་། ལྷག་པར་དུ་༧གོང་ས་ཡི་བཞིན་ནོར་པའི་བཀའ་དྲིན་ཉིད་གཅིག་རེད། དེ་ནི་ང་ཚོ་བོད་པའི་དགེ་སློང་ཕ་མ་གཉིས་ཀྱིས་
བརྗེད་མི་རུང་བ་ཞིག་ཡིན།། གཟེངས་སུ་ཐོན་པའི་བཙུན་མ་༢༠ཐ་པ་ལབཀྲ་ཤིས་བདེ་ལེགས་ཞུ།
དང་པོ་རྒྱ་ཆེ་ཐོས་པ་མང་དུ་འཚལ། བར་དུ་གཞུང་ལུགས་ཐམས་ཅད་གདམས་པ་ཤར། ཐ་མ་ཉིན་མཚན་ཀུན་ཏུ་ཉམས་སུ་ལེན། བཤད་སྒྲུབ་བསྟན་པ་ཡུན་རིང་གནས་གྱུར་ཅིག བསྟན་པ་ཕྱོགས་ཀུན་རྒྱས་པའི་བཀྲ་ཤིས་ཤོག