རྒྱ་ནག་གི་ཁྱད་ཆོས་ལྡན་པའི་འགྲོ་བ་མིའི་ཐོབ་ཐང་ལ་ངོས་ལེན་མེད།

རྒྱ་ནག་ནང་གི་ཨ་རིའི་གཞུང་ཚབ་ཆེན་མོས་འགྲོ་བ་མིའི་ཐོབ་ཐང་གི་གནད་དོན་ཐད་ནས་རྒྱ་ནག་གཞུང་དམངས་ལ་གུས་བརྩི་ཞུ་ཐབས་མེད་སྐོར་དང་བོད་མི་བཀྲ་ཤིས་དབང་ཕྱུགས་འཛིན་བཟུང་བྱེད་དོན་གང་ཡིན་སོགས་གླེང་འདུག

དེ་རིང་ཨེ་ཕེ་གསར་ཁང་གིས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་སྐོར་གྱི་གནས་ཚུལ་ཕྱོགས་བསྡུས་ཤིག་བཀོད་ཡོད་པའི་ནང་། ཟླ་འདིའི་ཚེས་ ༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་ཏེ། རྒྱ་ནག་ནང་གི་ཨ་རིའི་གཞུང་ཚབ་པ་སྐུ་ཞབས་མ་ཁི་སི་བྷུ་ཁུ་སི་ (Max Baucus) ལགས་དང་རྒྱ་ནག་ནང་གི་ཡུ་རོབ་མཐུན་ཚོགས་ཀྱི་སྐུ་ཚབ་བཅས་ཀྱིས། རྒྱ་ནག་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་གི་གནས་སྟངས་ཧ་ཅང་སྐྱོ་བོ་ཡིན་པའི་སྐོར་བརྗོད་ཡོད་ཚུལ་བཀོད་འདུག

སྐུ་ཞབས་བྷུ་ཁུ་སི་ལགས་ཀྱིས། “རྒྱ་ནག་གི་རྩ་ཁྲིམས་ཆེད་བསྒྲགས་བྱས་པའི་ནང་། རྒྱ་ནག་ནང་གི་མི་སེར་ཚང་མས་སོ་སོའི་ཕ་སྐད་བཤད་པ་དང་སོ་སོའི་ཡི་གེ་འབྲི་བའི་རང་དབང་ཡོད་ལུགས་བཤད་འདུག དེས་ན་ངས་རྒྱ་ནག་གཞུང་ལ་འདྲི་རྒྱུར། རྒྱ་ནག་གི་མི་སེར་ཡིན་པའི་བོད་རིགས་ཤེས་ཡོན་སློབ་གསོ་དོན་གཉེར་བ་བཀྲ་ཤིས་དབང་ཕྱུགས་ལགས་ཀྱིས། ཞི་བའི་ཐོག་ནས་བོད་སྐད་ཡིག་སློབ་གསོའི་རང་དབང་མེད་པའི་གནད་དོན་ཁྲིམས་རྩོད་ཞུ་གཏུག་བྱས་པའི་རྐྱེན་གྱིས་ཁོང་འཛིན་བཟུང་བཙོན་འཇུག་བྱེད་དོན་ཅི་ཡིན།” ཞེས་བརྗོད་འདུག

སྐུ་ཞབས་བྷུ་ཁུ་སི་ལགས་ཀྱིས། “འགྲོ་བ་མིའི་ཐོབ་ཐང་གླེང་སྐབས་ངས་རྒྱ་ནག་གཞུང་དམངས་གཉིས་ལ་བརྩི་བཀུར་དང་ཆེ་མཐོང་བྱེད་ཐབས་མི་འདུག ངས་རྒྱ་ནག་གི་ཁྱད་ཆོས་ལྡན་པའི་འགྲོ་བ་མིའི་ཐོབ་ཐང་ལ་ངོས་ལེན་བྱེད་ཐབས་མི་འདུག འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ནང་། རྒྱལ་སྤྱིའི་གནས་བབ་དང་བསྟུན་ཏེ་འཛམ་གླིང་རྒྱལ་ཁབ་ཚང་མས་སོ་སོའི་མི་སེར་རྣམས་ལ་ལྟ་ཚུལ་ཇི་ལྟར་འཛིན་དགོས་པ་གསལ་བོར་བསྟན་ཡོད་པ་རེད།” ཅེས་བརྗོད་འདུག

དེ་བཞིན། རྒྱ་ནག་ནང་གི་ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་པའི་ངོས་ནས་<<འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་>>ཉིན་མོ་སྲུང་གཙི་དང་འབྲེལ་ཏེ་གསལ་བསྒྲགས་ཤིག་སྤེལ་བའི་ནང་། “འདས་པའི་ལོ་ངོ་འདི་དག་རིང་། སྨྲ་བརྗོད་རང་དབང་དང་ཚོགས་སྦྲེལ་རང་དབང་ལ་བརྩི་འཇོག་མ་བྱས་པར་ཉམས་རྒུད་དུ་ཕྱིན་པའི་གནས་སྟངས་འོག ང་ཚོར་དཀའ་རྙོག་ཧ་ཅང་ཕྲད་སོང་། དམ་དྲག་དེ་ལ་བརྟེན་ནས་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་དང་། ཁྲིམས་རྩོད་པ། ཆོས་དད་རང་དབང་བརྩོན་ལེན་གནང་མཁན་ཚོ་འཛིན་བཟུང་དང་བཀག་བསྐྱིལ་བྱས་ཡོད་པ་རེད།” ཅེས་བཀོད་འདུག

གནས་ཚུལ་དེའི་ནང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཕྱི་འབྲེལ་ལས་ཁུངས་ནས་<<འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་>>ཉིན་མོར་སྤེལ་བའི་གསལ་བསྒྲགས་ཤིག་ལུང་འདྲེན་བྱས་ཡོད་པའི་ནང་། “འགྲོ་བ་མིའི་ཐོབ་ཐང་ནི་བླ་ན་མེད་པའི་ཕུགས་བསམ་ཞིག་ཡིན་པ་ལས་མགྲིན་དབྱངས་གཅིག་ཏུ་གྲགས་པའི་ལམ་ཁ་ཞིག་ཏུ་གྱུར་མེད། རྒྱལ་སྤྱིའི་འགྲོ་བ་མིའི་ཐོབ་ཐང་གི་འགྲོ་འོང་ཁྲོད་དུ་རྒྱལ་ཁབ་ཁག་གིས་ངེས་པར་དུ་༼མཉམ་འབྲེལ་རྒྱལ་ཚོགས་ཀྱི་རྩ་ཁྲིམས་༽ (UN Charter) ནང་གསལ་བའི་དགོངས་དོན་དང་རྩ་འཛིན་ཁག་གིས་མཚོན་པའི་རྒྱལ་སྤྱིའི་འབྲེལ་ལམ་གྱི་རྩ་དོན་བརྩི་སྲུང་བྱེད་དགོས། རྒྱལ་ཁབ་ཕན་ཚུན་བར་དུ་བདག་དབང་། རང་བཙན་དང་རྒྱལ་ཁོངས་ཆ་ཚང་བཅས་བརྩི་སྲུང་དང་། སྲིད་དོན་གནད་དོན་དུ་བསྒྱུར་བ་དང་ཚད་གཞི་མ་འདྲ་བའི་བྱེད་ཐབས་དོར་དགོས། འགྲོ་བ་མིའི་ཐོབ་ཐང་གི་སྤྱི་ཁྱབ་རང་བཞིན་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གནས་སྟངས་མཉམ་སྒྲིལ་གྱིས། མི་དམངས་ཀྱི་དཔལ་འབྱོར། སྤྱི་ཚོགས་དང་རིག་གཞུང་ཁེ་དབང་གིས་མཚོན་པའི་སྤྱི་དམངས་དང་ཆབ་སྲིད་ཁེ་དབང་སོགས་ཕྱོགས་ཡོངས་ནས་དོ་མཉམ་ངང་འཕེལ་རྒྱས་གཏོང་བར་ཧུར་བརྩོན་བྱེད་ཀྱིན་ཡོད་པ་མ་ཟད། ད་དུང་ཀྲུང་གོའི་ཁྱད་ཆོས་ལྡན་པའི་འགྲོ་བ་མིའི་ཐོབ་ཐང་གི་ལམ་བུ་ཞིག་མགོ་འཛུགས་བྱས་ཡོད།” ཅེས་བཀོད་འདུག

གནས་ཚུལ་འདིའི་མཇུག་ཏུ། “རྒྱ་ནག་གཞུང་གིས་བོད་ཁུལ་གྱི་སློབ་གྲྭ་དང་དགོན་སྡེ་ཁག་ནང་བོད་སྐད་ཡིག་སློབ་འཁྲིད་བྱེད་རྒྱུ་བཀག་བསྡོམས་བྱས་ཏེ། སློབ་གྲྭ་ཁག་ནང་བོད་ཡིག་གི་སློབ་ཚན་འཁྲིད་པ་ནི་ཕྱི་སྐད་ལྟ་བུར་ངོས་འཛིན་བྱེད་ཀྱིན་ཡོད་པའི་སྣང་ཚུལ་བྱུང་འདུག བཀྲ་ཤིས་དབང་ཕྱུགས་ལགས་ཀྱི་ཉེས་དོན་གཙོ་བོ། ཁོང་གིས་རྒྱ་ནག་གི་དབང་འཛིན་དཔོན་རིགས་ཚོར་ཁོང་གི་ཚ་མོ་གཉིས་གཙོས་པའི་བོད་རིགས་སློབ་མ་ཚོར་བོད་སྐད་ཡིག་གི་ཤེས་ཡོན་སློབ་གསོ་སྤྲོད་དགོས་པའི་ཞུ་གཏུག་ཡིག་ཆ་ཕུལ་བ་དེ་རེད། རྒྱ་ནག་གཞུང་གིས་གྲངས་ཉུང་མི་རིགས་ས་ཁུལ་ཁག་ནང་གྲངས་ཉུང་མི་རིགས་ཀྱི་སྐད་ཡིག་སློབ་འཁྲིད་བཀག་བསྡོམས་བྱས་ཏེ་རྒྱ་ཡིག་རྒྱ་སྐད་ཁྱབ་སྤེལ་གཏོང་བཞིན་ཡོད། དེ་བས་བོད་རིགས་མི་མང་གི་ཁྲོད་དུ་བོད་སྐད་བོད་ཡིག་འབྲི་ཀློག་ཐུབ་མཁན་བརྒྱ་ཆ་ ༢༠ ལས་དམའ་རུ་འགྲོ་བཞིན་ཡོད། མི་མང་པོ་ཞིག་གིས་རྒྱ་ཡིག་རྒྱ་སྐད་ལ་དགའ་མོས་བྱེད་བཞིན་པའི་སྐབས་འདིར། རྒྱ་ནག་གཞུང་གིས་མི་རིགས་སློབ་ཆེན་ཁག་གི་ཡིག་རྒྱུགས་ཚང་མ་རྒྱ་ཡིག་ཐོག་ནས་གཏོང་གི་ཡོད་པ་ལྟར། གཅིག་བྱས་ན་པེ་ཅིན་གཞུང་གིས་གྲངས་ཉུང་མི་རིགས་ཁག་གི་ངོ་བོ་རྩ་མེད་བཟོ་ཐབས་བྱེད་ཀྱིན་ཡོད་ངེས་རེད།” ཅེས་སོགས་འཁོད་འདུག

གསར་འགོད་པ། པདྨ་རྒྱལ།