ཨོ་སི་ཊོ་ལི་ཡའི་སིཌ་ནི་བོད་རིགས་མཐུན་ཚོགས་ཀྱི་རིག་གནས་སྐྱེད་ཚལ་ཁང་གི་འདྲི་བརྩད་འགྲན་བསྡུར་ཐེངས་གསུམ་པའི་ཁྲོད་སློབ་མ་ ༢༡ ལ་བྱ་དགའ་ཐོབ་ཡོད་འདུག
འདི་གར་རྨེའུ་དཀོན་རྒྱམ་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་ཨོ་སི་ཊོ་ལི་ཡའི་ཞོགས་པའི་ཆུ་ཚོད་ ༩ ནས་ ༡༢ བར་དུ། སིཌ་ནེ་བྱང་ཕྱོགས་སུ་ཡོད་པའི་ཌི་ཝེ་མི་མང་སློབ་གྲྭ་(Deewhy public school)ཡི་ཚོགས་ཁང་དུ། སིཌ་ནི་བོད་རིགས་མཐུན་ཚོགས་ཀྱི་རིག་གནས་སྐྱེད་ཚལ་ཁང་གི་གོ་སྒྲིག་འོག ཕྱི་ལོ་ ༢༠༡༦ ལོའི་ས་གནས་བོད་རིགས་བྱིས་པའི་འདྲི་བརྩད་འགྲན་བསྡུར་ཐེངས་གསུམ་པ་ཚོགས་ཡོད་པ་དང་། འགྲན་ཚོགས་དང་སྟབས་བསྟུན་ལོ་འཁོར་ཡིག་རྒྱུགས་ཀྱི་གྲུབ་འབྲས་དང་ལག་ཁྱེར་བཅས་གནང་ཡོད་འདུག
ཐེངས་འདིའི་འགྲན་སྡུར་གྱི་མཛད་སྒོའི་ཐོག་ཨོ་སི་ཊོ་ལི་ཡ་དང་ནེའུ་ཛི་ལན་ཌིའི་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱི་དབུས་ཨོ་སི་ཊོ་ལི་ཡ་དང་ཨེ་ཤ་ཡའི་བོད་མི་མང་སྤྱི་འཐུས་གདོང་འདུས་སྐྱིད་འཛོམས་ལགས། སིཌ་ནི་བོད་རིགས་མཐུན་ཚོགས་ཀྱི་ཚོགས་གཙོ་དང་རྒྱུན་ལས་རྣམ་པ། ས་གནས་མི་མང་། དེ་བཞིན་རིག་གནས་སྐྱེད་ཚལ་ཁང་གི་སློབ་སྤྱི་བློ་བཟང་དོན་ལྡན་ལགས་དང་དགེ་ཆེ་རྭ་ལོ་དོན་ལྡན་རྣམ་གྱི་གཙོས་དང་བླངས་དགེ་རྒན་ ༡༧ དང་། སྔོན་འགྲོ་ནས་འཛིན་རིམ་དྲུག་པ་བར་གྱི་སློབ་མ་ ༡༠༠ ལྷག་བཅས་ཁྱོན་མི་གྲངས་ ༢༠༠ ལྷག་འཛོམས་ཡོད་འདུག
ཐེངས་འདིའི་འགྲན་སྡུར་ནང་བོད་སྐོར་གྱི་དྲི་བ་ ༤༠ དང་། ཨོ་གླིང་སྐོར་གྱི་དྲི་བ་ ༣༠། རྒྱལ་སྤྱིའི་གནས་ཚུལ་གྱི་དྲི་བ་ ༣༠ བཅས་ཁྱོན་རྒྱུན་མཁོའི་ཤེས་བྱའི་དྲི་བ་ ༡༠༠ བཏང་སྟེ་འགྲན་སྡུར་བྱས་པ་བརྒྱུད། ཁྱོན་འགྲན་ཞུགས་པ་སློབ་མ་ ༩༧ ཡོད་པའི་ཁྲོད་ནས་སློབ་མ་ ༢༡ ལ་གཟེངས་བསྟོད་བྱ་དགའ་དང་ལག་འཁྱེར་བཅས་གནང་ཡོད་འདུག
གནས་ཚུལ་མཁོ་གཏོང་བའི་ནང་། འདྲི་བརྩད་འགྲན་བསྡུར་དེ་ནི་སིཌ་ནེ་བོད་རིགས་མཐུན་ཚོགས་ཀྱི་རིག་གནས་སྐྱེད་ཚལ་ཁང་གི་ལོ་གཅིག་གི་བོད་ཀྱི་རིག་རྩལ་འགྲན་ཚོགས་ཀྱི་ལས་རིམ་གལ་ཆེ་ཤོས་ཡིན་པ་དང་། ལས་གཞི་འདི་བརྒྱུད་སློབ་མ་ཚོས་དུས་ཐུང་ནང་དགོས་ངེས་ཤེས་བྱ་གསར་པ་མང་པོ་ཞིག་སྦྱོང་ཐུབ་པའི་དགེ་མཚན་ཆེན་པོ་ལྡན་ཡོད་པ་དང་། ཕྱི་ལོ་ ༢༠༡༤ ལོར་༸གོང་ས་མཆོག་གི་མཛད་རྣམ་སྐོར་ལ་འདྲི་བརྩད་འགྲན་བསྡུར་གནང་ཡོད་པ་དང་། ཕྱི་ལོ་ ༢༠༡༥ ལོར་བོད་ཡིག་གི་དག་ཆ་འགྲན་བསྡུར་གནང་ཡོད་འདུག
གསར་འགོད་པ། པདྨ་མཚོ།
