ཚོགས་པ་ཁག་བདུན་མཉམ་འབྲེལ་གྱིས་༧གོང་ས་མཆོག་ལ་གཞི་མེད་སྐུར་འདེབས་བྱེད་མཁན་རྣམས་ཐེར་འདོན་མཐའ་གཅིག་ཏུ་བྱ་རྒྱུ་ཡིན་པའི་གསལ་བསྒྲགས་གནང་།
དེ་རིང་སྔ་དྲོར་དྷ་ས་མེག་གྷན་དུ་ཡོད་པའི་ཆོལ་གསུམ་ཆིག་སྒྲིལ་ཚོགས་པའི་ཚོགས་ཁང་དུ།དབུས་གཙང་ཆོལ་ཁ་དང་མདོ་སྟོད་ཆོལ་ཁའི་དབུས་རྒྱུན་ལས་ཁང་། མདོ་སྨད་ཆོལ་ཁའི་དབུས་རྒྱུན་ལས་ཁང་། མངའ་རིས་སྤྱི་མཐུན་ཚོགས་པ། ཆོལ་གསུམ་ཆིག་སྒྲིལ་ཚོགས་པ། དབུ་མའི་ལམ་མི་མང་ལས་འགུལ་ཁང་། ཚོང་ཁང་ཚོགས་པ་བཅས་ཚོགས་པ་བདུན་མཉམ་འབྲེལ་ཐོག ༸གོང་ས་མཆོག་ལ་དྲིན་བྱས་དྲིན་དུ་མ་གོ་བར་གཞི་མེད་བསྙོན་འཛུགས་གྱི་གཟུགས་མེད་གྲིབ་བཟོའི་སྐུར་འདེབས་བྱེད་མཁན་ལ་མཐའ་གཅིག་ཏུ་ངོ་རྒོལ་དང་ཐེར་འདོན་བྱ་རྒྱུ་ཡིན་སྐོར་བསྒྲགས་སོང་།
དེ་ཡང་ཚོགས་པ་བདུན་གྱི་ལས་རྟགས་ཐམ་ག་བརྒྱབ་པའི་བསྒྲགས་གཏམ་དེའི་ནང་། འཕགས་མཆོག་ཕྱག་ན་པདྨོས་སངས་རྒྱས་སྟོང་གི་སྤྱན་སྔར་བོད་ཁ་བ་གངས་ཅན་གྱི་འདུལ་ཞིང་དུ་བདག་གིར་བཞེས་རྒྱུའི་ཐུགས་བསྐྱེད་དམ་བཅའ་བ་བཞིན། རྒྱལ་བློན་བྱང་ཆུབ་སེམས་པ་དང་ལྷག་པར་ངུར་སྨྲིག་གར་གྱི་རྣམ་རོལ་རྒྱལ་མཆོག་སྐུ་ཕྲེང་ན་རིམ་གྱིས་གངས་ཅན་བོད་ཀྱི་འགྲོ་བ་རྣམས་ལ་ཆོས་སྲིད་གང་ཐད་ནས་བཀའ་དྲིན་གཞལ་མཐའ་མེད་པ་བསྐྱངས་པ་སྤྱི་དང་། ཡང་སྒོས་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོའི་ལུགས་གཉིས་ཆབ་སྲིད་ཀྱི་ཐུགས་འགན་བཞེས་པ་ནས་བཟུང་བོད་འབངས་བདེ་ཐབས་སུ་སྔ་ཕྱི་བར་གསུམ་དུ་བཀའ་དྲིན་ཇི་ལྟར་བསྐྱང་པར་རིག་འཚོ་མ་ཟིན་པ་དང་སྨོན་ལམ་ལོག་པའི་དམ་སྲིས་བརྒྱུད་བསྐུལ་བའི་མི་ངན་རིགས་ཕུད། ཤེས་པ་རྣལ་དུ་གནས་པའི་སྐྱེ་བོ་ཀུན་གྱི་བློ་ངེས་སེམས་གསལ་གྱིས་བཀའ་དྲིན་རྗེས་དྲན་ཞུས་དང་ཞུ་བཞིན་ཡོད་པ་ཀུན་གྱིས་ཤེས་གསལ་ཡིན། འོན་ཀྱང་། བར་ལམ་ནས་བོད་མིའི་སྤྱི་ཚོགས་ནང་ངོ་ཚ་ཁྲེལ་གཞུང་མེད་པའི་ཀླད་མེད་རེ་ཟུང་དངུལ་དངོས་ཁོ་ནར་ཞེན་ཏེ་རྒྱ་དམར་གྱི་མགྲིན་ཚབ་བྱེད་བཞིན་དྲ་ལམ་ཁག་ཏུ་འཇིག་རྟེན་ཞི་བདེའི་དེད་དཔོན་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྲིན་བྱས་དྲིན་དུ་མ་གོ་བར་གཞི་མེད་བསྙོན་འཛུགས་གྱི་གཟུགས་མེད་གྲིབ་བཟོའི་སྐུར་འདེབས་ཁ་ནས་གང་ཐོན་བྱས་དང་བྱེད་མུས་ཐད། ང་ཚོ་མིང་འཁོད་ཚོགས་པ་བདུན་གྱིས་ཐེར་འདོན་མཐའ་གཅིག་ཏུ་བྱེད་རྒྱུའི་གྲོས་དོན་ལྟར། སྤྱིའི་འགན་དབང་ཡོད་པའི་བཀའ་སྤྱི་གཉིས་དང་ཆོས་སྡེ། ཚོགས་སྐྱིད་ཁག རྒྱ་ཆེའི་སེར་སྐྱ་མང་ཚོགས་ཡོངས་ནས་དེ་ལུགས་རང་དོན་རང་གཅེས་ཀྱིས་ཕྱར་གྲུ་མཉམ་འདེགས་དང་། བོད་མིའི་ས་ཁུལ་ཁག་ཏུ་མི་ངན་གཏེ་བོ་དེ་དག་གི་ལོ་རྒྱུས་འདྲ་པར་སོགས་ཉེས་སྤྱོད་ཐེར་འདོན་གྱི་འགན་འཁུར་སོགས་ཚོར་བ་རྣོན་པོའི་སྒོ་ནས་ཉེས་སྤྱོད་དེ་དག་ལ་གདོང་ལེན་གྱི་ལས་འགུལ་སྤྱི་དང་། ལྷག་པར་གནས་ཡུལ་སོ་སོའི་གཞུང་དང་ཁྲིམས་ཁང་ལ་ཞུ་གཏུགས་གནང་རྒྱུའི་མཚོན་གང་ལ་ཕན་ནུས་ལྡན་པའི་ལས་འགུལ་སྤེལ་ཐབས་ལ་དགོངས་བཞེས་དང་། བོད་མིའི་བདེ་རྩ་དང་ཆིག་བསྒྲིལ་གོང་འཕེལ་ཡོང་སླད་མཉམ་རུབ་འགན་འཁུར་གྱིས་ཆ་ཤས་ལེན་པའི་སྒོ་ནས་དོན་གནད་དེར་རྩ་འཛིན་ཅི་ནས་ཀྱང་གནང་གལ་ཆེ་བའི་འབོད་བསྐུལ་ཞུ། ཞེས་བཀོད་འདུག
གསར་འགོད་པ། པདྨ་མཚོ།
དངོས་སུ་གདོང་ལ་ཐོན་ནས་མཚན་སྨད་ཞུ་མཁན་མིག་ལྡན་གཡང་མཆོངས་རྣམས་ཕལ་ཆེར་ཚང་མས་ཤེས་ཀྱི་ཡོད་ཀྱང་ནང་ལ་གདུག་འདྲེ་བསྟེན། ཕྱིར་བསྟེན་གྱི་མེད་ཚུལ་གླེང་ནས་ཕར་ཕྱོགས་དང་ཚུར་ཕྱོགས་གཉིས་ཀར་འབྲེལ་བ་ཡོད་པ་དེ་འདྲ་ཡང་ཡོད་པ་འདྲ་བས་དེ་རྣམས་ངོ་ཐག་ཆོད་ན་ཡག་པོ་ཡོང་བ།
ངོ་མ་ཡག་པོ་འདུག ངས་ཁྱེད་རྣམ་པར་མི་ཞིག་རྩིས་སྤྲད་དགོས། ངོ་དེབ་ཐོག སྔར་ནས་ད་བར་༧གོང་ས་མཆོག་ལ་སྐྱོན་བརྗོད་ཤུགས་ཆེ་བྱེད་མཁན་༼ དབང་ཆེན་ ཉི་མ་༽ ཟེར་པ་དེ་ངེས་པ་དུ་ཐེར་འདོན་བྱེད་དགོས་འདུག མྱུར་མྱུར་མྱུར། ཁྱེད་ཅག་ལ་འབྲེལ་བ་ཞུ་ས་ཞིག་དྲ་ཐོག་ལ་བཞག་ན་ཡོད་པོ་འདུག