ཨུ་རུ་སུའི་གཞུང་ཚབ་པ་ལྐོག་གསོད་བྱས།

ཊུར་ཀིའི་སྒྱུ་རྩལ་འགྲེམས་སྟོན་ཁང་ཞིག་ཏུ་ལྭ་ནག་གྱོན་ཞིང་ལག་ཏུ་མེ་མདའ་ཐོགས་པའི་ཊུར་ཀི་བ་ཞིག་གིས་ཨུ་རུ་སུའི་གཞུང་ཚབ་པ་ཀར་ལོ་ཝ་ལྐོག་གསོད་བྱས་ཡོད་འདུག

ནེའུ་ཡོག་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་དགོང་མོ་ཊུར་ཀི་སྤྱི་མཐུན་རྒྱལ་ཁབ་ཀྱི་རྒྱལ་ས་ཨན་ཀ་ར་ (Ankara) ཡི་སྒྱུ་རྩལ་འགྲེམས་སྟོན་ཁང་ཞིག་གི་དབུ་འབྱེད་མཛད་སྒོའི་ཐོག་ལག་ཏུ་མེ་མདའ་ཐོགས་པའི་ཊུར་ཀི་བ་ཞིག་ཞིག་གིས“དཀོན་མཆོག་རླབས་ཡིན། ཨ་ལི་ཕོ་བརྗེད་དུ་མ་འཇུག སི་རི་ཡ་བརྗེད་དུ་མ་འཇུག”ཅེས་འབོད་ཚིགས་སྒྲོག་བཞིན་ཨུ་རུ་སུའི་གཞུང་ཚབ་པ་ཨན་ཌི་རེ་ཀར་ལོ་ཝ་ (Andrey Karlov) ལ་མེ་མདའ་བརྒྱབ་ནས་བསད་ཡོད་པ་མ་ཟད། ཉེ་འགྲམ་གྱི་མི་གསུམ་ལའང་རྨས་སྐྱོན་བཟོས་ཡོད་པ་དང་། དེའི་རྗེས་ཊུར་ཀའི་དམིགས་བསལ་དྲག་ཆས་དམག་གིས་ལྐོག་གསོད་པ་དེ་ཡུལ་ངོས་དེ་གར་མེ་མདའ་བརྒྱབ་སྟེ་བསད་ཡོད་པ་དང་། ཨུ་རུ་སུ་དང་ཊུར་ཀའི་སྲིད་གཞུང་གཉིས་ནས་ལག་དམར་དེ་ནི་འཇིགས་སྐུལ་དྲག་སྤྱོད་པ་ཞིག་ཡིན་པར་ངོས་འཛིན་བྱེད་ཀྱིན་ཡོད་འདུག

ཨུ་རུ་སུའི་ཕྱོགས་ནས་མི་གསོད་དོན་རྐྱེན་དེའི་ཐོག་ཛ་དྲག་གི་ཚོགས་འདུ་བསྡུས་ཏེ། ཨུ་རུ་སུའི་སྲིད་འཛིན་ཕུ་ཊེན་ (Putin) གྱིས“དོན་རྐྱེན་འདིའི་བརྡ་ལན་ནི། ང་ཚོས་འཇིགས་སྐུལ་དྲག་སྤྱོད་པར་འཐབ་འཛིང་བྱེད་ཀྱིན་ཡོད་སྟབས། རྐུན་ཇག་ཚོས་གནས་ཚུལ་དེ་ཚོར་གྱི་ཡོད་པ་རེད།” ཅེས་བརྗོད་འདུག

ཊུར་ཀིའི་སྲིད་འཛིན་ཨར་ཌོ་གྷན་ (Erdogan) གྱིས། མི་གསོད་དོན་རྐྱེན་དེ་ནི་ཨུ་རུ་སུ་དང་ཊུར་ཀི་རྒྱལ་ཁབ་གཉིས་བར་གྱི་ཚོང་འབྲེལ་དང་རྒྱལ་ནང་གི་དུས་ཟིང་ཐད་ཀྱི་མཉམ་ལས་བཅས་ལ་འབྲེལ་བ་དམ་ཟབ་ཡོད་པ་དང་། འཇིགས་སྐུལ་དྲག་སྤྱོད་པའི་དམིགས་འབེན་གཙོ་བོ་ནི། ཨུ་རུ་སུ་དང་ཊུར་ཀི་རྒྱལ་ཁབ་གཉིས་བར་གྱི་འབྲེལ་ལམ་ལ་གཏོར་བཤིག་གཏོང་རྒྱུ་དེ་རེད། ཡིན་ནའང་འཇིགས་སྐུལ་དྲག་སྤྱོད་པའི་གཏོར་རྒོལ་དེས་ཨུ་རུ་སུའི་གཞུང་དང་ཊུར་ཀི་སྤྱི་མཐུན་སྲིད་གཞུང་གཉིས་བར་གྱི་མཉམ་འབྲེལ་ལ་འགོག་རྒོལ་ཐེབས་མི་སྲིད། ཅེས་བརྗོད་འདུག

སུ་རུ་ཡའི་ལས་འགུལ་བ་ཨལ་ཤཱེ་བྷ་ལེ་ (al-Shibli) ཟེར་བ་ཞིག་གིས། “ཨན་ཌི་རེ་ཀར་ལོ་ཝ་ལྐོག་གསོད་ཐེབས་པའི་གནས་ཚུལ་དེ་གོ་བས། ང་རང་ཧ་ཅང་དགའ་བོ་བྱུང་། འདི་ནི་སི་རི་ཡའི་མི་མང་ལ་དྲང་བདེན་གྱི་རྒྱལ་ཁ་འཐོབ་པའི་གོམ་པོ་དང་པོ་རེད། ཨུ་རུ་སུའི་གཞུང་ཚབ་པ་ཁོ་ཉེས་ཅན་པ་ཞིག་རེད། ཁོ་ཨུ་རུ་སུའི་མི་གསོད་ཁྲག་སྦྱོར་དང་འབྲེལ་བའི་ཕྱི་འབྲེལ་སྲིད་ཇུས་ཀྱི་སྐུ་ཚབ་ཡིན་སྟབས། ཁོ་རང་ལྐོག་གསོད་བྱས་པ་རེད། ད་ནི་ང་ཚོས་སུ་རུ་ཡའི་རྒྱལ་ནང་གི་མི་གསོད་ཁྲག་སྦྱོར་དང་འབྲེལ་བའི་མི་ཚོར་དགྲ་ཤ་ལེན་རྒྱུར་སྒུག་ཡོད།” ཅེས་བརྗོད་འདུག

གནས་ཚུལ་ལྟར་ན། ཊུར་ཀིའི་ནང་ཡོད་པའི་ཨུ་རུ་སུའི་གཞུང་ཚབ་པ་ཀར་ལོ་ཝ་ལགས་ནི་ཕྱི་ལོ་ ༡༩༧༦ ལོ་ནས་ཨུ་རུ་སུའི་གཞུང་ཚབ་པའི་ལས་ཀར་ཞུགས་ཏེ། ལོ་ངོ་བཅུ་ཕྲག་གཉིས་རིང་བྱང་ཀོ་རི་ཡའི་ནང་ཨུ་རུ་སུའི་གཞུང་ཚབ་བྱས་པ་དང་། ཕྱི་ལོ་ ༢༠༡༣ ཟླ་ ༧ ནས་ཊུར་ཀི་སྤྱི་མཐུན་རྒྱལ་ཁབ་ནང་ཨུ་རུ་སུའི་གཞུང་ཚབ་པའི་འགན་ཁུར་ཡོད་འདུག

གཞུང་ཚབ་པ་ཀར་ལོ་ཝ་ལགས་ལྐོག་གསོད་བྱེད་སྐབས། ཁོས་ཊུར་ཀི་སྤྱི་མཐུན་རྒྱལ་ཁབ་ཀྱི་རྒྱལ་ས་ཨན་ཀ་ར་ (Ankara) ཡི་སྒྱུ་རྩལ་འགྲེམས་སྟོན་ཁང་ཞིག་གི་དབུ་འབྱེད་མཛད་སྒོའི་གཏམ་བཤད་སྤེལ་སྐབས། ལྭ་ནག་གྱོན་ཞིང་ལག་ཏུ་མེ་མདའ་ཐོགས་པའི་ལྐོག་གསོད་པ་དེས་རྒྱབ་ཕྱོགས་ནས་ཁོ་ལ་མེ་མདའ་ཐེངས་བརྒྱད་ལ་བརྒྱབ་སྟེ་བསད་ཡོད་འདུག

ཨུ་རུ་སུའི་གཞུང་ཚབ་པ་ལྐོག་གསོད་མ་ཐེབས་པའི་སྔ་ཉིན། ཊུར་ཀིའི་མི་མང་ཁ་ཅིག་གིས་སི་རི་ཡའི་དུས་ཟིང་ཁྲོད་དུ། ཨུ་རུ་སུའི་གཞུང་གིས་སི་རི་ཡའི་སྲིད་འཛིན་བྷ་ཤཱར་ཨལ་ཨ་ས་ཊི་ (Bashar al-Assad) སྲིད་གཞུང་ལ་དམག་རོགས་བྱས་ཏེ། སི་རི་ཡའི་ཨ་ལི་ཕོ་གྲོང་ཁྱེར་ནང་འབྱུང་བཞིན་པའི་དམར་གསོད་དང་གཏོར་རྒོལ་ལ་ངོ་རྒོལ་ཁྲོམ་སྐོར་བྱས་ཡོད་མ་ཟད། ཨུ་རུ་སུའི་གཞུང་ཚབ་པ་ལྐོག་གསོད་བྱས་པའི་དགོང་མོ་དེར་ཡང་མི་མང་ལས་འགུལ་བ་བརྒྱ་ཕྲག་ལྷག་གིས། ཊུར་ཀིའི་ནང་ཡོད་པའི་ཨུ་རུ་སུའི་དོན་གཅོད་ཁང་གི་སྒོ་འགྲམ་དང་སྲང་ལམ་ཁག་ཏུ་འདུ་འཛོམས་ཀྱིས། ཁྲག་མདོག་གི་ཚོན་རྩི་བྱུགས་པའི་འཕྲེད་དར་དང་སི་རི་ཡའི་དར་ཆ་སོགས་འཕྱེར་ཏེ་ཨ་ལི་ཕོ་གྲོང་ཁྱེར་དུ་བསླངས་པའི་དུས་ཟིང་ལ་ངོ་རྒོལ་ཁྲོམ་སྐོར་བྱས་ཡོད་འདུག

ཁ་སང་ཨུ་རུ་སུའི་གཞུང་ཚབ་པ་ཨན་ཌི་རེ་ཀར་ལོ་ཝ་མེ་མདས་བསད་པ་དེ་ནི་ཕྱི་ལོ་ ༡༩༢༧ ལོར་པོ་ལན་ཊིའི་ནང་ཡོད་པའི་ཨུ་རུ་སུའི་གཞུང་ཚབ་པ་ཝེ་ཀོ་ཝ་ (Voykov) ལྐོག་གསོད་བྱས་པའི་རྗེས་ཀྱི་ཨུ་རུ་སུའི་གཞུང་ཚབ་པ་ལྐོག་གསོད་ཐེབས་པའི་དོན་རྐྱེན་ཐེངས་གཉིས་པ་དེ་ཆགས་ཀྱི་ཡོད་འདུག

ཨན་ཌི་རེ་ཀར་ལོ་ཝ་ལྐོག་གསོད་བྱས་པའི་དོན་རྐྱེན་དང་འབྲེལ་ཏེ། ཨུ་རུ་སུའི་སྲིད་འཛིན་ཕུ་ཊེན་གྱིས་ཊུར་ཀིའི་སྲིད་འཛིན་ཨར་ཌོ་གྷན་ལ་ཁ་པར་བཏང་སྟེ། ཕྱོགས་གཉིས་ཀྱིས་མུ་མཐུད་དུ་ཚབ་པ་ཨན་ཌི་རེ་ཀར་ལོ་ཝ་ལྐོག་གསོད་བྱས་པའི་གནད་དོན་ལ་ཞིབ་བཤེར་བྱེད་རྒྱུ་མ་ཟད། སྲིད་གཞུང་གཉིས་མཉམ་འབྲེལ་གྱིས་འཇིགས་སྐུལ་དྲག་སྤྱོད་པར་འགོག་རྒོལ་བྱེད་རྒྱུར་གྲོས་མོལ་ཡང་བྱས་ཡོད་འདུག

གསར་འགོད་པ། པདྨ་རྒྱལ།