ཨ་རིའི་སྲིད་འཛིན་གསར་པས་ཕོ་བྲང་དཀར་པོའི་ཚོང་དོན་ལྷན་ཁང་གི་འགན་འཛིན་དུ་སྐུ་ཞབས་ཕེ་ཊིར་ཝ་རོ་བསྐོ་བཞག་མིང་འདོན་བྱས་པ་དེས་རྒྱ་ནག་གཞུང་ལ་སེམས་ཚབ་ཆེན་པོ་བསླངས་ཡོད་འདུག
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཨ་རིའི་སྲིད་འཛིན་འོས་ཐོབ་པ་སྐུ་ཞབས་ཊི་རུམ་ཕི་ཡིས། ཨ་རིའི་དཔལ་འབྱོར་རིག་པ་བ་སྐུ་ཞབས་ཕེ་ཊིར་ན་ཝ་རོ་ (Peter Navarro) ཞུ་བ་ཕོ་བྲང་དཀར་པོའི་རྒྱལ་ཡོངས་ཚོང་དོན་ལྷན་ཁང་ (WHNTC) གི་གཙོ་འཛིན་དུ་མིང་འདོན་བྱས་ཡོད་པ་དེར། དེ་རིང་རྒྱ་ནག་ཚོང་དོན་ལྷན་ཁང་ (Ministry of Commerce) གིས་གྲོང་ཁྱེར་པེ་ཅིན་དུ་གསར་འགོད་གསལ་བསྒྲགས་ཤིག་སྤེལ་ཏེ། སྐུ་ཞབས་ཊི་རུམ་ཕི་ཡི་སྲིད་དབང་འོག་ཨ་རྒྱ་གཉིས་བར་གྱི་ཚོང་དོན་མཉམ་ལས་སྲིད་ཇུས་ལ་འགྱུར་བ་འགྲོ་མི་སྲིད་ཀྱང་། ཁོ་རང་གི་བྱ་སྤྱོད་རེ་ཟུང་གིས་ཕྱོགས་གཉིས་བར་གྱི་ཚོང་དོན་ལག་ལེན་ཐོག་གཏོར་བརླག་ཐེབས་ངེས་ཡིན་ཚུལ་བཤད་འདུག
རྒྱ་ནག་ཚོང་དོན་ལྷན་ཁང་གི་མགྲིན་ཚབ་པ་ཧྲིན་ཏན་ཡང་ (Shen Danyang) ཟེར་བ་ཞིག་གིས། “ཨ་རིའི་གཞུང་ཕྱོགས་ནས་ཨ་རྒྱ་གཉིས་ཐུན་མོང་གི་ཉོ་ཚོང་ཁེ་ལས་ལ་སྔར་བཞིན་དོ་སྣང་ཡོད་ངེས་ཡིན། ཨ་རྒྱ་གཉིས་བར་གྱི་ཚོང་འབྲེལ་ནི་ཕྱོགས་གཉིས་ཐུན་མོང་གི་ཁེ་ཕན་ཡིན་སྟབས། ཕ་རོལ་བོར་དོ་ཕོག་བཟོས་ཏེ་རང་ཉིད་ཀྱི་ཁེ་ཕན་མ་བརླག་རོགས། ནད་པར་སྨན་འཐུང་དུ་འཇུག་པའི་བསམ་བཀོད་དེ་འདྲར་མཐའ་གཅིག་ཏུ་ངོ་རྒོལ་ཡོད་ལ། དོན་རྐྱེན་དེ་འདྲ་སྔོན་ཆད་བྱུང་མྱོང་ལ་མ་འོངས་པར་ཡང་འབྱུང་ངེས་རེད།” ཅེས་བཤད་འདུག
རྒྱ་ནག་གཞུང་འབྲེལ་ཉེན་རེའི་ཚགས་པར་ཁང་གི་རྩོམ་སྒྲིག་པའི་དཔྱད་བརྗོད་ནང་། སྐུ་ཞབས་ཊི་རུམ་ཕི་ཡིས་རྒྱ་ནག་གཞུང་ལ་སྐྱོན་བརྗོད་བྱེད་མཁན་ན་ཝ་རོ་ཨ་རིའི་ཚོང་དོན་ལྷན་ཁང་གི་གཙོ་འཛིན་དུ་མིང་འདོན་བྱས་པ་དེ་ནི་གནད་དོན་གྱི་འགག་རྩ་ཞིག་ཆགས་ཡོད། ཨ་རིའི་གཞུང་གསར་བའི་ངོས་ནས་འཛམ་གླིང་གི་སྟོབས་ཆེན་རྒྱལ་ཁབ་གཉིས་བར་གྱི་སྔར་བྱུང་མ་མྱོང་བའི་ད་ལྟའི་བཟང་ཕྱོགས་ཀྱི་ཚོང་འབྲེལ་ལ་བསམ་ཤེས་བྱེད་དགོས། ཕྱོགས་གཉིས་ཀྱི་ཚོང་འབྲེལ་ལ་གཏོར་བརླག་བྱས་པ་ཡིན་ན། དེའི་མཇུག་འབྲས་ནི་ཕྱོགས་གཉིས་ལ་འཕོག་པའི་གྱོང་གུད་ཡིན། ཞེས་འཁོད་ཡོད་འདུག
རྒྱ་ནག་གཞུང་འབྲེལ་གོ་ལའི་དུས་བབ་ཅེས་པའི་གསར་ཤོག་གི་རྩོམ་སྒྲིག་པའི་དཔྱད་བརྗོད་ནང་། ཊི་རུམ་ཕི་ཡི་ཤོག་ཁག་གིས་རྒྱ་ནག་ཐོག་འཛིན་པའི་དམ་དྲག་སྲིད་ཇུས་ལ་རྒྱ་ནག་གིས་གདོང་གཏད་དགོས། གནད་དོན་དེ་ཊི་རུམ་ཕི་ཡི་སྲིད་གཞུང་གིས་གྲ་སྒྲིག་བྱས་པའི་བཙན་ཤེད་ཁྲིམས་འགལ་གྱི་འགུལ་སྐྱོད་རེད། རྒྱ་ནག་ལ་ཊི་རུམ་ཕིའི་གཞུང་གིས་བསླངས་པའི་གནོན་ཤུགས་ལ་འགོག་རྒོལ་བྱེད་པའི་སྟོབས་ཤུགས་ཡོད། ཕྱོགས་གཉིས་བར་གྱི་དཀའ་རྙོག་དེ་འདྲར་པེ་ཅིན་གཞུང་ལ་ཆ་རྒྱུས་ཟབ་མོ་ཡོད། གལ་ཏེ་ཝ་ཤིན་ཊོན་གྱིས་རྒྱ་ནག་གི་ཁེ་ཕན་ལ་དོ་ཕོག་བཟོ་ཕོད་ན། པེ་ཅིན་གཞུང་གིས་ཨ་རི་དང་ལྷན་དུ་གྲོས་མོལ་གྱི་ལམ་ནས་རྒྱ་ནག་གི་ཁེ་ཕན་ལ་བརྩི་བཀུར་བྱེད་དགོས་པའི་གནོན་ཤུགས་སྤྲོད་རྒྱུར་འཚེར་སྣང་སྐྱེ་དོན་མེད། ཅེས་སོགས་འཁོད་འདུག
གནས་ཚུལ་ལྟར་ན། ཨ་རིའི་དཔལ་འབྱོར་རིག་པ་བ་སྐུ་ཞབས་ཕེ་ཊིར་ན་ཝ་རོ་ (Peter Navarro) ལགས་ནི། ཨ་རྒྱ་གཉིས་བར་གྱི་དཔལ་འབྱོར་གྱི་གཡུལ་འཁྲུག་ཁྲོད་དུ་ཨ་རིར་ཕམ་ཁ་བྱུང་ཡོད་པ་དང་། ལྷག་པར་དུ་རྒྱ་ནག་གི་ཚོང་ཟོག་མང་པོ་ཨ་རིའི་ནང་དབོར་འདྲེན་བྱས་པའི་དཀའ་རྙོག་དང་རྒྱ་ནག་གཞུང་གིས་ཨ་རིའི་ཚོང་དོན་དྲ་ལམ་ནང་ལྐོག་འཛུལ་བྱས་པའི་གནད་དོན་བཅས་ཀྱི་ཐད་ལ་བློ་འཚུབ་གནང་མཁན་ཞིག་ཡིན་སྟབས། ཟླ་འདིའི་ཕྱི་ཚེས་ ༢༡ ཉིན་སྐུ་ཞབས་ཊི་རུམ་ཕི་ཡིས་ཁོང་ཕོ་བྲང་དཀར་པོའི་རྒྱལ་ཡོངས་ཚོང་དོན་ལྷན་ཁང་ (WHNTC) གི་གཙོ་འཛིན་དུ་མིང་འདོན་བྱས་ཡོད་པ་རེད།
གསར་འགོད་པ། པདྨ་རྒྱལ།
