ད་ལྟའི་ཆར་རྡོར་གདན་ལ་ཚོང་དེ་ཙམ་ཡག་པོ་མི་འདུག

མི་མང་པོ་འབྱོར་མེད་པ་དང་རྒྱ་གར་གཞུང་གིས་དངུལ་ལ་སྟངས་འཛིན་བྱས་པ་སོགས་ལ་བརྟེན་ཏེ་གནས་མཆོག་རྡོ་རྗེ་གདན་ཁུལ་གྱི་ཐང་ཁྲོམ་ཚོང་ར་ཁག་དང་ཟ་ཁང་ཚོང་ཁང་སོགས་ལ་ཚོང་དེ་ཙམ་ཡག་པོ་མི་འདུག་ཟེར།

ད་ལོར་གནས་མཆོག་རྡོ་རྗེ་གདན་གྱི་མཆོད་རྟེན་འགྲམ་ནས་སྤྱི་ལེ་གཅིག་ཙམ་གྱི་སར་༼སྐྱབས་བཅོལ་བོད་པའི་ཐང་ཁྲོམ་ཚོང་ར༽ཞེས་པའི་བོད་མིའི་ཐང་ཁྲོམ་ཚོང་ར་ཞིག་ལོགས་སུ་བཙུགས་འདུག་པ་དང་། ཚོང་ར་དེར་བོད་མིའི་ཁྲོམ་ས་ ༡༠༠ ལྷག་ཡོད་ཀྱང་། ད་ལྟའི་ཆར་ཁྲོམ་སྟོན་པ་མང་པོ་བསླེབས་མི་འདུག་ལ། ཧིན་སྒོར་བརྗེ་འདོན་གྱི་དཀའ་ངལ་དང་མི་མང་པོ་བསླེབས་མེད་པའི་རྐྱེན་གྱིས་ཚོང་དེ་ཙམ་ཡག་པོ་མི་འདུག་ཟེར། སྐྱབས་བཅོལ་བོད་མིའི་ཚོང་ར་དེར་ཚོང་ཟོག་གཙོ་བོ་ཕྲེང་བ་དང་མཆོད་ཆས་རིགས། གྲུམ་ཙེ། གྱོན་གོས་རིགས་སོགས་འདུག་ལ། དེ་བཞིན་བོད་ཟས་དང་རྒྱ་གར་གྱི་ཟས་རིགས་ཡོད་པའི་བོད་པའི་ཟ་ཁང་ཡང་ཁག་ཅིག་འདུག

བོད་པའི་ཐང་ཁྲོམ་ཚོགས་པའི་ཚོགས་གཙོ་བསོད་ནམས་དབང་ཕྱུག་ལགས་ཀྱིས་འདི་གའི་གསར་འགོད་པར་ངོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༩ པའི་ནང་ནས་བཟུང་ཐང་ཁྲོམ་ཚོགས་པའི་རྒྱུན་ལས་ལྔ་ཡིས་ས་གནས་མངའ་སྡེ་གཞུང་ལ་སྙན་ཞུ་ཕུལ་ཡོད་པ་དང་། སྔ་ས་ནས་བོད་མི་ཐང་ཁྲོམ་སྟོན་མཁན་ཚོར་ལོགས་སུ་ཁྲོམ་ས་ཞུ་དགོས་པའི་རྒྱུ་མཚན་གཙོ་བོ་ནི། ལོ་ལྟར་རྡོར་གདན་དུ་ཐང་ཁྲོམ་སྟོན་མཁན་སྐྱབས་བཅོལ་བོད་མི་ ༥༩ ཙམ་ཡོད་པ་དང་། ད་ལོར་བོད་རིགས་ཚོང་པ་ཚང་མ་དེའི་ནང་མཉམ་རུབ་ཡོང་ཆེད་ཁྲོམ་ས་ལོགས་སུ་ཞུས་པ་ཞིག་ཡིན་ལ། བོད་མི་ཚང་མ་རུག་རུག་བྱས་ནས་འདུག་རྒྱུ་གལ་ཆེན་པོ་ཡིན་པ་དང་། ནམ་རྒྱུན་ནས་རྡོར་གདན་གྱི་བོད་མིའི་ཁྲོམ་ས་དག་ལ་ངེས་གཏན་མེད་པར་རང་རང་སར་ཐོར་ཡོད་སྟབས། མ་འོངས་པར་བོད་མིའི་སྒྲིག་འཛུགས་ནས་དེ་ལ་གཟིགས་རྟོག་ཅིག་གནང་གལ་ཆེ་སྐོར་བརྗོད་བྱུང་།

ཚོང་རྭ་དེར་ཁྱོན་ཁྲོམ་ས་ག་ཚོད་ཡོད་པ་དང་། དུས་དབང་ཧྲིལ་པོར་ཁྲལ་ཅི་ཙམ་སྤྲོད་དགོས་སྐོར་དྲིས་པར་ཁོང་གིས། ཚོང་ར་དེར་བལ་ཡུལ་དང་ལ་དྭགས། དྷ་ས་དང་ལྡི་ལི། རྡེ་ར་ལྡུན་སོགས་ཕྱོགས་མཐའ་གང་ས་གང་ནས་ཡོད་ཅིང་། ད་ལྟའི་ཆར་ཁྲོམ་ས་ ༡༤༥ ཡོད་པ་དང་། མངའ་སྡེ་གཞུང་ལ་ཁྲོམ་ས་རེ་ནས་སྒོར་ ༣༠༠༠ རེ་འབུལ་དགོས་པའི་ཚད་གཞི་ཡོད་པ་ལྟར། ང་ཚོས་ཀྱང་དང་ཐོག་ཁྲོམ་ས་རེར་སྒོར་ ༣༠༠༠ རེ་ཕུལ་བ་རེད། ཡིན་ནའང་། ཕྱིས་སུ་ང་ཚོས་ང་ཚོ་སྐྱབས་བཅོལ་བ་ཡིན། ཚོང་རྒྱག་མཁན་ནང་ཁྱིམ་ཚང་སྐྱོ་བོ་མང་པོ་ཡོད་ཅེས་སྙན་ཞུ་ཕུལ་བར་བརྟེན་སྒོར་ ༢༠༠༠ རེ་བྱས་པ་རེད། དེ་ནས་རྒྱུན་ལས་དང་ལས་ཀ་བྱེད་མཁན་ཚོས་སྔ་ས་ནས་ས་གནས་དཔོན་རིགས་ལ་འབྲེལ་གཏུག་དང་ཁྲོམ་ས་གཙང་བཟོ། གུར་ཕུབ་པ་སོགས་གྲ་སྒྲིག་ཚང་མ་བྱས་པར་བརྟེན། ཐང་ཁྲོམ་སྟོན་མཁན་ཚང་མས་གྲོས་བསྡུས་བྱས་ཏེ་ཐག་གཅོད་གནང་བ་བཞིན་ཁྲོམ་ས་རེ་ནས་སྒོར་ ༡༠༠༠ རེ་བསྡུས་པ་དང་། ཐང་ཁྲོམ་ཚོགས་པའི་ནང་འཛུལ་ཞུགས་བྱས་པའི་ཚོགས་དངུལ་ ༣༠༠ བཅས་ཁྱོན་ཁྲོམ་ས་རེ་ནས་སྒོར་ ༤༣༠༠ རེ་བསྡུས་ཡོད་སྐོར་བརྗོད་བྱུང་།

ཐང་ཁྲོམ་ཚོགས་པའི་རྒྱུན་ལས་ཨ་ཅག་བཀྲ་ཤིས་སྲི་གནོན་ལགས་སུ། ཚོང་པ་ཚོས་ཉིན་ལྟར་སྒོར་མོ་མང་པོ་ཕར་སྤྲོད་ཚུར་ལེན་བྱེད་དགོས་སྟབས། དངུལ་ཁང་ནས་སྒོར་མོ་བརྗེ་འདོན་བྱེད་པར་དཀའ་ངལ་ཡོད་མེད་དྲིས་པར་མོས། བར་སྐབས་ཤིག་ནས་ང་ཚོར་དངུལ་གྱི་དཀའ་ངལ་ཆེ་ཙམ་འཕྲད་ཡོད་པ་རེད། ཡིན་ནའང་། ད་ལྟ་དེ་ཙམ་དཀའ་ངལ་མི་འདུག རྡོར་གདན་མཆོད་རྟེན་ཉེ་འགྲམ་དུ་ State Bank of India, HDFC, Punjab National Bank བཅས་ཀྱི་དངུལ་ཁང་ཡོད་པ་དང་། ལས་ཁུངས་ནང་བཅར་བ་ཡིན་ན་བདུན་ཕྲག་རེར་སྟོང་ཕྲག་ ༢༤ རེ་ལེན་ཐུབ་ཀྱི་འདུག་ལ། དེ་བཞིན་ SBI ལ་དངུལ་འདོན་འཕྲུལ་ཆས་ཁང་(ATM)གཅིག་དང་། པན་ཇབ་དངུལ་ལ་དངུལ་འདོན་འཕྲུལ་ཆས་ཁང་གཉིས་ཡོད་པ་དང་། (SBI)དངུལ་འདོན་བྱང་བུ་ལས་ཉིན་རེར་སྒོར་ ༢༤༠༠ རེ་འདོན་ཐུབ་ཀྱི་འདུག་སྟབས། ད་ལྟའི་ཆར་དངུལ་འདོན་མ་ཐུབ་པའི་དཀའ་ངལ་ཆེན་པོ་མི་འདུག ཡིན་ནའང་། དུས་དབང་གི་སྐབས་མི་མང་པོ་ཡོང་གི་ཡོད་སྟབས་དཀའ་ངལ་འཕྲད་སྲིད་པ་རེད། ཅེས་བརྗོད་བྱུང་།

བོད་མིའི་ཚོང་ར་ན་གྱོན་གོས་ཀྱི་ཚོང་རྒྱག་བཞིན་ཡོད་པའི་ཨ་ཅག་ཅིག་གིས། མོས་ཚོང་ར་བཤམས་ཏེ་ཉིན་ཤས་འགྲོ་ཡི་ཡོད་ཀྱང་ཚོང་ཡག་པོ་མེད་པ་དང་། ད་ལྟའི་ཆར་མི་མང་པོ་བསླེབས་མེད་པས་ཡིན་སྲིད་སྐོར་བརྗོད་བྱུང་། དེ་བཞིན་མཆོད་ཆས་རིགས་བཙོང་མཁན་སྐྱེས་པ་ཞིག་གིས་ཁོང་རྡོར་གདན་དུ་བསླེབས་ཏེ་ཟླ་གཉིས་ཙམ་འགྲོ་བཞིན་ཡོད་པ་དང་། དེ་སྔོན་མཆོད་རྟེན་ཉེ་འགྲམ་དུ་ཁྲོམ་སྟོན་སྐབས་ཚོང་ཅུང་ཡག་པོ་ཡོད་ཀྱང་། ཕྱིས་སུ་མཆོད་རྟེན་ཉེ་འཁོར་གཙང་བཟོ་བྱས་ཏེ་འདུག་མི་ཆོག་པ་བཟོས་པར་བརྟེན། བོད་མིའི་ཚོང་རར་གནས་སྤོས་རྗེས་ཚོང་ཡག་པོ་མེད་པ་དང་། ལྷག་པར་དུ་རྒྱ་གར་གཞུང་གིས་དངུལ་བཀག་པ་སོགས་ལ་བརྟེན་ཏེ་ཚོང་ལ་དོ་ཕོག་ཆེན་པོ་འགྲོ་ཡི་ཡོད་སྐོར་བརྗོད་བྱུང་།

མཆོད་རྟེན་ཉེ་འགྲམ་དུ་མོག་མོག་དང་ཇ་བཙོང་བཞིན་ཡོད་པའི་བོད་ནས་ཡོང་བའི་ཕོ་གསར་ཁག་ཅིག་གིས། ད་ལོར་ཚོང་ཁྱོན་ནས་ཡག་པོ་མེད་སྟབས། དུས་དབང་སྐབས་མ་རྩ་ཆེན་པོ་མི་དགོས་པའི་ཚོང་ག་རེ་ཡོད་མེད་ལ་བསམ་བློ་གཏོང་དགོས་སྐོར་དང་། ཁ་ཤས་ཀྱིས་མེ་ཏོག་བཙོང་ན་མ་རྩ་མི་དགོས་ཀྱང་མཚོ་ཁར་མེ་ཏོག་བཏུ་རུ་འགྲོ་དགོས་པས་ཉེན་ཁ་ཡོད་སྐོར་དང་། ཁ་ཤས་ཀྱིས་ཇ་བཙོང་ན་མ་རྩ་ཆེན་པོ་མི་དགོས་པ་མ་ཟད། བཟོ་ཤེས་དང་མ་ཤེས་པའི་དཀའ་ངལ་ཡང་མེད་སྐོར་སོགས་གླེང་གི་འདུག

པདྨ་མཚོས་གནས་མཆོག་རྡོ་རྗེ་གདན་ནས་སྤེལ།