༢༠༡༦ ལོའི་རྒྱལ་སྤྱིའི་གནས་ཚུལ་ཆེ་ཁག་བཅུ།

ཕྱི་ལོ་གསར་པ་བསླེབ་ལ་ཉེ་བ་དང་བསྟུན་ཏེ་འདི་ག་བོད་ཀྱི་དུས་བབ་གསར་ཁང་གིས་རྫོགས་ལ་ཉེ་བའི་ཕྱི་ལོ་ ༢༠༡༦ ལོའི་རྒྱལ་སྤྱི་ཐོག་གི་གནས་ཚུལ་ཆེ་ཁག་བཅུ་འདིར་ཕྱོགས་བསྡུས་བྱས་ཡོད།

༡༽ ཐའེ་ཝན་སྲིད་འཛིན་འོས་འདེམས།

ཕྱི་ཟླ་ ༡ ཚེས་ ༡༧ ཉིན། ཐའེ་ཝན་སྲིད་འཛིན་རྒྱལ་ཡོངས་འོས་འདེམས་ཀྱི་གྲུབ་འབྲས་ཕྱིར་བསྒྲགས་བྱས་པར། ཐའེ་ཝན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལྕམ་ཚའེ་ཡེན་ཝིན་ལ་འོས་གྲངས་ལས་བརྒྱ་ཆ་ ༥༦།༡ དང་། ཐའེ་ཝན་གོ་མིན་ཏང་ཚོགས་པའི་སྲིད་འཛིན་འོས་མི་སྐུ་ཞབས་ཨེ་རིག་ཆོ་ལེ་ལུན་ལ་འོས་གྲངས་བརྒྱ་ཆ་ ༣༡ བཅས་ཐོབ་སྟེ། ཐེངས་འདིའི་སྲིད་འཛིན་འོས་འགྲན་ཁྲོད་ལྕམ་ཚའེ་ཡེན་ཝིན་ལ་རྒྱལ་ཁ་ཐོབ་ཡོད་པ་དང་། དེ་ནི་ཐའེ་ཝན་ལོ་རྒྱུས་ནང་གི་བུད་མེད་སྲིད་འཛིན་ཐོག་མ་ཆགས་ཡོད་པ་མ་ཟད། ཐའེ་ཝན་རང་བཙན་ལངས་ཕྱོགས་འཛིན་མཁན་ལ་རྒྱལ་ཁ་ཐོབ་པ་ཞིག་ཀྱང་ཆགས་ཡོད་སྟབས་རྒྱ་ནག་དང་འབྲེལ་ལམ་ཇེ་སྡུག་ཏུ་ཕྱིན།

༢༽ དབྱིན་ཇི་ཡུ་རོབ་མཐུན་ཚོགས་ལས་ཕྱིར་བུད།

ཕྱི་ཟླ་ ༦ ཚེས་ ༢༣ ཉིན། དབྱིན་ཇི་ཡུ་རོབ་མཐུན་ཚོགས་ཁོངས་མུ་མཐུད་སྡོད་མིན་ལ་མང་མོས་འོས་བསྡུ་གནང་བའི་ཁྲོད་མི་ ༤༦༠༠༠༠༠༠ ལྷག་གིས་འོས་བསྡུའི་ཆ་ཤས་བླངས་ཏེ། དབྱིན་ཇི་ཡུ་རོབ་མཐུན་ཚོགས་ཀྱི་ཁོངས་སུ་མུ་མཐུད་མཉམ་གནས་བྱེད་པར་འོས་གྲངས་བརྒྱ་ཆ་ ༤༨ དང་། ཕྱིར་འབུད་པར་འོས་གྲངས་བརྒྱ་ཆ་ ༥༢ ཐོབ་སྟེ། དབྱིན་ཇི་ཡུ་རོབ་མཐུན་ཚོགས་ཀྱི་ཁོངས་ནས་ཕྱིར་འབུད་པར་མང་མོས་ཐག་གཅོད་བྱུང་ཡོད་པ་དང་། དེ་ནི་ཡུ་རོབ་མཉམ་འབྲེལ་སྒྲིག་འཛུགས་ཁོངས་ནས་རྒྱལ་ཁབ་ཅིག་ཕྱིར་བུད་པ་ཐོག་མ་དེ་ཆགས་ཡོད་པ་དང་། གནས་ཚུལ་དེ་དང་འབྲེལ་ཏེ་དབྱིན་ཇིའི་སྲིད་བློན་ཁ་མི་རོན་གྱིས་སྲིད་བློན་ལས་གནས་ནས་དགོངས་པ་ཞུས་ཏེ། ཁོའི་ཚབ་ཏུ་ལྕམ་མཱེ་ལགས་དབྱིན་ཇིའི་སྲིད་བློན་དུ་བདམས།

༣༽ འཇིགས་སྐུལ་བའི་འཇབ་རྒོལ།

ཕྱི་ཟླ་ ༧ ཚེས་ ༡༥ ཉིན། ཧྥ་རན་སིའི་ལྷོ་རྒྱུད་གྲོང་ཁྱེར་ནི་སི་(Nice)ནང་། རྒྱལ་ཡོངས་དུས་ཆེན་ལ་རོལ་བཞིན་པའི་མི་ཚོགས་ཁྲོད། གློ་བུར་དུ་ཁ་ཆེ་འཇིགས་སྐུལ་དྲག་སྤྱོད་པ་ཞིག་གིས་དོས་སྐྱེལ་རླངས་འཁོར་ཆེན་པོ་ཞིག་བསྐོར་ཏེ། མི་ ༨༦ ཙམ་རླངས་འཁོར་འོག་མནན་ཏེ་བསད་ཡོད་པ་དང་གཞན་མི་ ༤༣༤ ལྷག་ལ་རྨས་སྐྱོན་བཟོས་ཡོད་པ་དང་། དེ་མ་ཐག་སྐོར་སྲུང་ཉེན་རྟོག་པས་མེ་མདའ་བརྒྱབ་སྟེ་རླངས་འཁོར་ཁ་ལོ་བ་དེ་ཡུལ་དངོས་ནས་བསད་ཡོད་པ་དང་། རླངས་འཁོར་ནང་མེ་མདའ་དང་འབར་རྫས་སོགས་འཁྱེར་ཡོད་འདུག

༤༽ འཛམ་གླིང་ཨོ་རྩལ་འགྲན་ཚོགས།

ཕྱི་ཟླ་ ༨ ཚེས་ ༥ ནས་ ༢༡ ཉིན་བར་བྷིར་རྫིལ་རྒྱལ་ས་རུ་རྒྱལ་སྤྱིའི་ཨོ་རྩལ་འགྲན་ཚོགས་ཐེངས་ ༣༡ པ་ཚོགས་ཏེ། ཨ་རིའི་རྩེད་འགྲན་རུ་ཁག་ལ་གསེར་གྱི་རྟགས་མ་ ༤༦ ཐོབ་སྟེ་ཨང་དང་པོ་དང་། དབྱིན་ཇིའི་རྩེད་འགྲན་རུ་ཁག་ལ་གསེར་གྱི་རྟགས་མ་ ༢༧ ཐོབ་སྟེ་ཨང་གཉིས་པ། རྒྱ་ནག་གི་རྩེད་འགྲན་རུ་ཁག་ལ་གསེར་གྱི་རྟགས་མ་ ༢༦ ཐོབ་སྟེ་ཨང་གསུམ་པ་ཆགས་ཡོད། འདི་ལོའི་ཨོ་རྩལ་འགྲན་ཚོགས་ཐོག་རྒྱལ་ཁབ་ ༢༠༥ ཡི་རྩེད་འགྲན་པ་ ༡༡༡༧༨ མཉམ་ཞུགས་བྱས་ཡོད་པ་དང་། སྐབས་རྗེས་མའི་ཨོ་རྩེད་འགྲན་ཚོགས་དེ་ཉི་ཧོང་ནང་འཚོགས་རྒྱུ་ཡིན་པ་གསལ་བསྒྲགས་སྤེལ་ཡོད།

༥༽ ཁ་ཆེ་བའི་དམར་མཆོད།

ཕྱི་ཟླ་ ༩ ཚེས་ ༡༠ ནས་ ༡༡ ཉིན་བར། བྷང་ལ་ཌེ་ཤིའི་རྒྱལ་ས་ཌ་ཀ་ (Dhaka)ཡི་གྲོང་ཁྱེར་ནང་ཁ་ཆེ་ཆོས་ལུགས་ཀྱི་དམར་མཆོད་དུས་ཆེན་ (Eid al-Adha)ཞེས་པ་སྲུང་གཙི་ཞུས་ཏེ་ར་ལུག་དང་བ་གླང་། མ་ཧེ་དང་རྔ་མོང་སོགས་ཁྱོན་སེམས་ཅན་ ༡༠༠༠༠༠ ལྷག་དམར་མཆོད་བྱས་སྟབས། ཉིན་དེ་གར་གྲོང་ཁྱེར་དེར་ཆར་བ་ཆེན་པོ་བབ་སྟེ་གྲོང་ཁྱེར་གྱི་སྲིང་ལམ་དང་སྤྱི་གླིང་ཁག་ཡོངས་ཁྲག་གིས་དམར་པོར་གྱུར་བའི་ཆར་ཆུ་དང་རྒྱུག་ཆུའི་ཁེངས་ཏེ། ཡུལ་མི་དང་ཕྱོགས་ཡོང་འགྲུལ་བ་ཚང་མ་ཁྲག་གི་འཇིག་རྟེན་ཞིག་ཏུ་འགྲོ་འདུག་བྱེད་བཞིན་པའི་པར་མང་པོ་བརྒྱུད་ལམ་ཁག་ཏུ་ཁྱབ་སྟེ་འཛམ་གླིང་མི་མང་དང་ལྷག་པར་དུ་དུད་འགྲོའི་རང་དབང་ཚོགས་པ་ཁག་གིས་སྐྱོན་བརྗོད་ཤུགས་ཆེན་བྱས།

༦༽ རྒྱ་གར་དངུལ་ལོ་གསར་རྗེ།

ཕྱི་ཟླ་ ༡༡ པའི་ ༨ ཉིན་གྱི་དགོང་མོར་རྒྱ་གར་སྲིད་བློན་ན་རེན་ཌི་ར་མོ་ཌེ་ཡིས་ཛ་དྲག་གསལ་བསྒྲགས་སྤེལ་ཏེ། དགོང་མོ་དེའི་ཆུ་ཚོད་ ༡༢ རྗེས་སུ། ཧིན་སྒོར་སྟོང་ལོ་དང་ལྔ་བརྒྱ་ལོ་གཉིས་བེད་སྤྱོད་གཏོང་མི་ཆོག་པ་དང་། མི་མང་གི་ལག་ཏུ་ཡོད་པའི་ལྔ་བརྒྱ་ལོ་དང་སྟོང་ལོ་ཚང་མ་ཕྱི་ཟླ་ ༡༢ ཚེས་ ༣༠ ཉིན་ཚུན་ལ་དངུལ་ཁང་དང་སྦྲགས་ཁང་ཁག་ནང་འཇུག་དགོས་པ་དང་། གལ་སྲིད་དུས་ཚོད་དེ་ལས་བརྒལ་ན་དངུལ་ལོ་དེ་དག་བེད་མེད་གཏོང་རྒྱུ་ཡིན་པ་དང་། དེ་དང་མཉམ་དུ་ལྔ་བརྒྱ་ལོ་དང་ཉིས་སྟོང་ལོ་གསར་པ་འགྲེམ་སྤེལ་བྱས་ཡོད་སྐོར་དང་། ལས་དོན་ལྐོག་ཟ་རུལ་སུངས་དང་། ཁྲལ་མ་སྤྲད་པའི་དངུལ་ནག་ཉར་བ་སོགས་ཀྱི་དཀའ་རྙོག་སེལ་ཆེད་ཡིན་སྐོར་བསྒྲགས།

༧༽ ནོ་བྷེལ་ཞི་བདེ་གཟེངས་རྟགས།

ཕྱི་ཟླ་ ༡༠ ཚེས་ ༡༣ ཉིན། ནོ་བྷེལ་ཞི་བདེ་གཟེངས་རྟགས་ཚོགས་ཆུང་གིས་ནོར་ཝེ་རྒྱལ་ས་ཨོ་སི་ལོ་རུ། ༢༠༡༦ ལོའི་ཞི་བདེ་གཟེངས་རྟགས་དེ་ཁོ་ལོམ་བྷི་ཡའི་སྲིད་འཛིན་སྐུ་ཞབས་ཇུན་མཱ་ནུལ་སན་ཊོ་མཆོག་ལ་ཕུལ་ཡོད་པ་དང་། ཁོང་གིས་འདས་པའི་ལོ་ངོ་ ༥༠ རིང་ཁོ་ལོམ་བྷེ་ཡའི་ནང་གྲང་དམག་ཟིང་འཁྲུག་ཞི་བའི་ཐོག་ནས་སེལ་ཐབས་ལ་འབད་བརྩོན་གནང་ཡོད་འདུག གཞན། ༢༠༡༦ ལོའི་ནོ་བྷེལ་རྩོམ་རིག་གཟེངས་རྟགས་དེ་ཨ་རིའི་སྲོལ་རྒྱུན་དམངས་གླུའི་སྒྱུ་རྩལ་པ་ཅན་བྷོ་བྷི་ཌེ་ལཱན་ལགས་སུ་ཕུལ་ཡོད་ཀྱང་ཁོང་གིས་གཟེངས་རྟགས་དེ་དང་ལེན་གནང་མེད།

༨༽ ཨ་རིའི་སྲིད་འཛིན་གསར་འདེམས།

ཕྱི་ཟླ་ ༡༡ ཚེས་ ༩ ཉིན། ཨ་རིའི་སྐབས་ཞེ་ལྔ་པའི་སྲིད་འཛིན་འོས་བསྡུ་ཆེན་མོའི་གྲུབ་འབྲས་གསལ་བསྒྲགས་བྱས་ཏེ། ཨ་རིའི་གྲོས་ཚོགས་གོང་འོག་གཉིས་ནང་ཁྱོན་འཐུས་མི་ ༣༥༨ ཡོད་པ་ལས་ཆབ་སྲིད་ཚོགས་པའི་སྲིད་འཛིན་འོས་མིར་རྒྱལ་ཁ་འཐོབ་པར་ཞབས་སྟེགས་ ༢༧༠ འཐོབ་དགོས་པ་ལས་ཐེངས་འདིར་སྤྱི་མཐུན་ཚོགས་པའི་འོས་མི་སྐུ་ཞབས་ཊི་རུམ་ཕི་ལ་འོས་ ༢༩༠ དང་། དམངས་གཙོ་ཚོགས་འོས་མི་ལྕམ་ཧེ་ལ་རེ་ལ་འོས་ ༢༡༨ བཅས་ཐོབ་སྟེ། ཨ་རིའི་སྲིད་འཛིན་སྐབས་ ༤༥ པ་དེ་སྐུ་ཞབས་ཊི་རུམ་ཕི་ལ་ཐོབ་ཡོད་པ་མ་ཟད། གྲོས་ཚོགས་གོང་འོག་གཉིས་ཀའི་ནང་སྤྱི་མཐུན་ཚོགས་པར་རྒྱལ་ཁ་ཆེན་པོ་ཐོབ་པར་འཛམ་གླིང་མི་གི་ཚོད་དཔག་ལས་བརྒལ་བའི་གནས་ཚུལ་ཞིག་ཆགས།

༩༽ འགྲུལ་སྐྱེལ་གནམ་གྲུ་བརྡབ་སྐྱོན།

ཕྱི་ཟླ་ ༡༡ ཚེས་ ༢༨ ཉིན། བྷོ་ལེ་ཝེ་ཡ་རྒྱལ་ཁབ་ཀྱི་སན་ཊ་ཁི་རུ་ཛ་གནམ་ཐང་ནས་ཁོ་ལོམ་བྷེ་ཡ་རྒྱལ་ཁབ་ཀྱི་མི་ཌི་ལེན་གནམ་ཐང་དུ་འཕུར་བཞིན་པའི་ (CP-2933) རྟགས་ཅན་གྱི་འགྲུལ་སྐྱེལ་གནམ་གནམ་གྲུར་ཆག་སྐྱོན་བྱུང་སྟེ་རི་ཁུལ་ཞིག་ཏུ་བརྡབ་སྐྱོན་བྱུང་བའི་ཁྲོད། སྦར་རྫིལ་གྱི་རྐང་རྩལ་སྦོ་ལོ་བ་གྲགས་ཅན་ཊེ་གྷེ་ནོ་ལགས་གཙོས་པའི་རྩེད་འགྲན་པ་དང་གསར་འགོད་པ་མི་གྲངས་ ༧༡ རྐྱེན་འདས་དང་མི་ ༦ ཙམ་གསོན་གནས་ཐུབ་པ་བྱུང་ཡོད། ཕྱི་ཚེས་ ༢༩ སྦར་རྫིལ་གཞུང་དམངས་གིས་རྒྱལ་དར་ཕབ་པ་དང་། རྩེད་འགྲན་ཚོགས་རྭའི་ནང་རྩེད་མོ་མཚམས་འཇོག་པ་སོགས་བྱས་ཏེ་མྱ་ངན་ཞུས་ཡོད།

༡༠༽ གཞུང་ཚབ་པ་ལྐོག་གསོད།

ཕྱི་ཟླ་ ༡༢ ཚེས་ ༢༠ ཉིན། ཊུར་ཀིའི་རྒྱལ་ས་ཨན་ཀ་ར་ཡི་སྒྱུ་རྩལ་འགྲེམས་སྟོན་ཁང་གི་དབུ་འབྱེད་མཛད་སྒོའི་སྟེང་། ཨུ་རུ་སུའི་གཞུང་ཚབ་ཆེན་མོ་སྐུ་ཞབས་ཨན་ཌི་རེ་ཀར་ལོ་ཝ་(Andrey Karlov)ལགས་ཀྱིས་གཏམ་བཤད་སྤེལ་བཞིན་པའི་སྐབས་སུ། བློ་བུར་དུ་རྒྱབ་ལོགས་ནས་ཊུར་ཀི་བ་ཞིག་གིས་མེ་མདའ་བརྒྱབ་སྟེ་ཁོང་བསད་ཡོད་པ་མ་ཟད། ཊུར་ཀི་བ་དེས་ “དཀོན་མཆོག་རླབས་ཆེན་ཡིན། ཨ་ལི་ཕོ་བརྗེད་དུ་མ་འཇུག སི་རི་ཡ་བརྗེད་དུ་མ་འཇུག” ཅེས་འབོད་ཚིག་སྒྲོག་བཞིན་མེ་མདའ་གང་བྱུང་བརྒྱབ་སྟེ་ཉེ་འགྲམ་གྱི་མི་གསུམ་ལའང་རྨས་སྐྱོན་བཟོས་ཡོད་འདུག ཨུ་རུ་སུ་དང་ཊུར་ཀའི་གཞུང་གིས་ལག་དམར་བ་དེ་ནི་སི་རི་ཡའི་ནང་གི་འཇིགས་སྐུལ་དྲག་སྤྱོད་པར་འབྲེལ་བ་ཡོད་པར་ངོས་འཛིན་བྱས་ཡོད།

གསར་འགོད་པ། པདྨ་རྒྱལ་གྱིས་ཕྱོགས་བསྡུས་བྱས།