ཨ་ཚོགས་མཁས་བཙུན།།
དགའ་སྐྱོ་ཆགས་སྡང་ཚོར་བས་མ་ཟིན་པའི།།
མིའི་བུ་རྐང་གཅིག་འཚོ་བའི་གནས་མ་ཡིན།།
གནས་མིན་གནས་འདིར་གནས་སྟངས་མ་འདྲ་བ།།
མིའུ་བུ་གདུང་དྲུག་མེས་རབས་ཨ་ཧོ་རྨད།།
སྐྱིད་ལ་སྡུག་གི་སྲིད་པ་ས་སྒང་འདིར།།
སྐྱིད་ལ་བསྐུར་བའི་མི་རིགས་གསོན་པོ་ཞིག།
འགྱུར་དྲུག་ཉམས་དགུའི་རོལ་བ་བསམ་མི་ཁྱབ།།
ཁ་ཐོག་དོན་སྟེང་རི་མོ་གླིང་ལ་ཁྱབ།།
སང་ཉིན་གནངས་ཉིན་ནས་ཉིས་སྟོང་བཅུ་བདུན་ལོ་ལ་སླེབས་འགྲོ། ཐར་ལོ་ཉིས་སྟོང་བཅོ་ལྔ་ཙམ་ཞིག་ནས་ལམ་ལ་ཆས་པ་འདྲ། འུ་ཚང་ལ་དེ་རིང་བར་དུ་ཐོན་མ་སོང་། དེ་ནི་སྦྲ་རྒན་ཅན་ལ་ཧབ་ལངས་ནས། རུ་མཚེས་ཅན་ལ་ཡི་ཆད་པའི་དཔེ་མི་འགྲོ། ཁྱིམ་མཚེས་རུ་སྐོར་གྱིས་ཡར་བཤད་མར་བཤད་མང་བའི་དབང་གིས་ཡིན་ནམ། ང་ཡང་ཁོ་རང་ལ་ཐུག་འདོད་པ་དེ་ཙམ་མ་བྱུང་ལ། ཁོ་ཡང་རི་ཕྱི་ལ་བུད་པ་ཞིག་ཡིན་པ་ཡོད། ཁོ་ལ་རལ་གཅིག་དང་། རྭ་ལོ། ཐར་ལོ་ཞེས་མིང་འདོགས་ཀྱི་གོ་རིམ་ནང་བཞིན། དང་པོར་རལ་གཅིག་དང་། དེ་ནས་རལ་གཟེངས། ཐ་མ་མགོ་རེགས་སྤྱི་ཐེར་ཏུ་བཏང་བའི་རིམ་པ་བཅས་ནི་བདག་ཅག་ལ་ཁ་ཚ་དགོས་གཏུགས་ཀྱི་འགྱུར་འགྲོས་སྣང་ཚུལ་ཞིག་ཡིན། ཐར་ལོས་ངའི་སྐད་ཆ་དང་ངའི་རྣམ་འགྱུར་། ངའི་སྤྱོད་ཚུལ་མང་པོ་ཞིག་རྒྱལ་ཁམས་ལ་འུར་བཞིན་སྒྲོག་བཞིན་ཡོང་ཐལ། དེ་བས་ངས་ཀྱང་ཁོའི་མགོ་རྔ་བར་གསུམ་ལ་ཞིབ་ཙམ་བལྟས་པ་ཡིན། མ་ཟད་ཁོ་ལ་ཁ་བརྡ་དང་གླེང་མོལ་སེམས་གཏམ་མང་པོ་ཞིག་འཆད་འདོད་སྐྱེས་སོང་། ཡིན་ནའང་། ཁོའང་ཁ་ཆེན་དབང་ཆེན་ཞིག་མ་རེད། དེ་བས་སྐད་ཆ་གང་ནས་མགོ་བརྩམས་ཏེ་མཇུག་ཇི་ལྟར་བསྡུ་རྒྱུའང་མི་ཤེས་ཀི།
གློག་དྲའི་གཞི་རྒྱ་དང་ཐར་ལོའི་རུ་བ་གཉིས་ཇི་འདྲའི་དོ་མི་སྙོམས་པ་ཞིག་རུ་བའི་ཀྭ་མགོར་མར་ལོག་ཅིག་སྦྱར་ཡོད་ཡོད་ལའང་ངོ་སྣུམ་མ་བྱུག་པར་བསམ་གཟས་ནས་གདོང་མདོག་སྐྱ་ཐག་ཆོད་པར་ཡོང་བ་དང་། དགུན་གྲང་སྒང་ལ་རྒྱུག་འདུར་རྒོད་པ་ནི་གཞན་གྱིས་ཉམ་ཐག་སྙིང་རྗེའི་ཡུལ་ལ་ཨེ་འཇོག་བསམ་པའམ། ཡང་ན་རི་བོ་ཐན་ཧྲན་ལས་ཀྱང་ལྗིད་ཁོག་ཅན་ཞིག་ཏུ་འགྱུར་འདོད་པ་གང་རུང་ལས་མ་འདས་མོད། ཡིན་རྒྱུ་ནི། ཁོ་ཕྱི་ཚུལ་ལ་མགོ་རྔ་ཁ་ཚང་བརྗེ་བོ་རྒྱག་ཐུབ་ཡོད་ཀྱང་། ཡང་ཉིང་སྐེ་ནས་ཕྱག་མདུད་ལོན་དཀའ་ཙམ་ཞིག་ལ། གར་སོང་གར་འདུག་ལ་འཁུར་འགྲོ་བའི་ལུ་གུ་ཁ་དྭ་དེའི་ཨ་མའི་ཚབ་བྱེད་རྒྱུ་དང་། དེ་མིན་ལུག་ཁྱུ་སྤྱང་ལུང་ལ་ཕུད་ནའང་ཤོག་སྦགས་དང་ཀི་རིང་བོ་ཞིག་གི་ཐབས་ཇུས་ལས་མེད་པའམ། གློ་ལུད་བརྒྱབ་ནས་ཉལ་བཟོད་ཀི་མེད་ཀྱང་གླུ་སྐད་སིང་སིང་བར་འདུག་པ་ནི་ཁོ་རང་ངོ་མ་དེ་ཡིན། དེ་ནི་མར་མེ་རླུང་གིས་བསྐྱོད་ན་འཛུམ་མུལ་མུལ། གཏོར་མ་ཁྱིས་འཁྱེར་ན་འཛུམ་མུལ་མུལ་གྱི་གནས་སྟངས་ལས་མ་འདས་ཀྱང་། ཁོའི་རེ་བ་ཡོད་ཚད་མཇུག་བསྡུ་ཁ་མའི་ཤོག་སྦགས་དེ་ལ་བཅོལ་ཡོད། དེ་ནི་རི་སྤྱང་སྔོན་མོར་ཐོ་དང་། ཕ་བཟང་བུ་ལ་བརྡ་དངོས་གནས་ལ་འགྱུར་བའི་རེ་བ་བརྒྱབ་པ་རེད།
གཡང་འཚོ་ནི་གཡང་ཕྱུག་འཚོ་ལས་ལྡེབ་འགྱུར་གྱིས་ཇེ་ཡག་ལ་སོང་ཡོད་ཀི། ཁོ་མོ་འགྱུར་བ་མ་འདྲ་བ་ཞིག་དང་ཁུར་རྩ་ལྗིད་མོ་ཞིག་ཁུར་ཏེ་བུད་སོང་། ཐར་ལོ་ལ་རྡུང་རྡེག་ཚབས་ཆེན་ཞིག་དང་གོ་སྐོན་ཟབ་མོ་ཞིག་ཐེབས་པ་འདྲ། སྙིང་རྗེ་མོ་རང་ཕྱིར་ཡོང་ས་ཡོད་མེད་ཀྱང་མི་ཤེས་མོད། རྡོ་རྗེ་སོའོ་ཀྲང་དང་པར་ལེན་མ་བདེ་སྐྱིད། ད་དུང་པར་ལེན་མི་དང་། མཐའ་བསྐོར་གྱི་དུ་རྐྱལ་ཆང་རྐྱལ་དག་གིས་ཀྱང་ངའི་དོན་དག་མང་པོ་ཞིག་གླེང་གི་ཡོད་པ་འདྲ། ང་ཡང་དོགས་མི་བདེ་བ་དང་། བསམ་གཞིག་དང་ཕྱིར་འདང་གི་ཀླུང་ལ་ལྷུང་སོང་། ཉེན་རྟོག་པ་དེའི་འདྲི་རྟོག་དང་ངོ་མདངས་ཀྱིས་ཐར་ལོ་དྲིན་ཆེན་པོའི་མི་ཚེ་ལ་སྡོམ་ཞིག་བརྒྱབ་ཡོད།
སྲང་ལམ་གྱི་ཡངས་དོག་དང་སྒྲ་འདྲ་མིན་གྱི་འུར་ཟིང་། ཆེ་མི་ཆེ་ཆུང་མི་ཆུང་གི་འདུ་འཛི་བཅས་ནི་ཇི་འདྲའི་བདེན་ཅོག་ཅོག་ཅིག་བསྟན་ཡོད་གི། ཡིན་ནའང་། ཐར་ལོའི་ན་ཚོད་ནི་དེ་ཙམ་ཚོད་ཐུག་པ་ཞིག་མིན། རང་གི་ལོ་ཚོད་ཀྱང་ཅི་ཙམ་ཡིན་མི་ཤེས་པ་ནི་ཁེར་རྐྱང་ཁ་ཐོར་ལ་བསྡད་དྲག་པའམ། ཡུལ་ལུང་བཅའ་གནས་ཆེ་དྲག་པས་མིན་ནམ། ཡག་ཕོ་སྒོ་མེད་པ་མིན་ཡང་མིང་འདོགས་ཉེས་དང་དཔྱད་བཅོས་ཉེས་འདི་འདྲར་ལུས་སོང་། མིང་སུས་བཏགས་མ་ཤེས་ཀྱང་སྐྱོན་མེད་ཀི། གང་ཞིག་གི་ཁ་དབང་ལག་འོག་ནས་ཐར་ལོའི་དོན་མི་འགྲོ། པར་ལེན་བཟའ་མི་གཉིས་ཀྱིས་བོད་ཆས་ནུབ་ཆས་ཡ་མ་ཟུང་དུ་བརྗེ་བ་དང་། བདེ་སྐྱིད་ཀྱང་སྦྲགས་སྐད་ལ་ཡ་ང་མེད་པ་བཅས་ནི་ཡང་བསྐྱར་སོན་རྩ་ཞིག་གི་མགོ་འབུས་ཙམ་ཡིན་པ་ཤེས།
ཐར་ལོ་རྒྱུ་བདག་ལ་ངོ་ལོག་པ་ནི་མ་བདག་བདག་ཚུལ་གྱིས་ལུག་བདག་རང་གི་བགྱིས་པས་ཡིན། དྲིན་ལ་འོ་བརྒྱལ་མེད་པའི་གཡང་བླ་རྡོ་ཁ། ཐལ་ལྕག་གསུམ་གྱིས་ལུག་རྫི་ཙམ་ཞིག་གི་ངོ་སྤྲད་པས་ཁོ་རང་གཞི་ནས་རྟོག་པ་སད་སོང་། སློབ་ཚན་མང་ཤས་ཀྲུའུ་ཞིའི་གསུང་བཏུས་དང་། ཡང་ན་གསུང་བཏུས་དང་འདྲ་བར་ཡོད་པ་དོན་དངོས་རེད། སློབ་གྲྭར་སོང་མ་སོང་ཀུན་དང་། ན་ཚོད་སོན་མིན་ཐམས་ཅད་ནས་ཀྲུའུ་ཞིའི་གསུང་བཏུས་བློ་ལ་ཤར་ཤར་ཐོན་མིན་ནི། ཁོ་དང་ཁོ་རང་ལྟ་བུ་དུས་ཐོག་དེའི་མི་སོགས་ཀུན་པོའི་བསོད་ནམས་དང་དབང་ཐང་ཆེ་ཆུང་ལ་བརྩི་་བ་རེད། མའོ་ཀྲུའུ་ཞིས་ཀྱང་རང་གི་མེས་པོ་གོང་མ་ཚོར་ལད་ཟློས་བྱ་སྲིད་པ་ཞིག་བདག་གིས་ཐོག་དང་པོར་ཐར་ལོའི་ཁ་ནས་ཐོས་པ་ཡིན་ཞེས་པ། ཕོ་གཏམ་ངོ་དང་། དྲེག་ནག་ཆུ་ཡིན། ཐ་མ་ཐར་ལོས་བསྐྱར་ཏུ་པར་ལེན་དགོས་བྱུང་བ་དང་། མའོ་ཀྲུའུ་ཞིའི་གསུང་བཏུས་ཀྱང་བློ་ཐོག་ནས་མ་ཐོན་པ་དེ། ཐར་ལོ་སེམས་འཁྲུགས་པས་མ་ཡིན་པར་དུས་ཀྱིས་དེད་པའི་ཁོའི་འགྱུར་བ་ཆེས་ཤས་དེ་ཡིན་ནོ།ཞེས་ཚོར་ཤུགས་ཕལ་བའི་ར་བ་ལས་འགོང་བའི་སྒྱུ་རྩལ་ལ་སྒྱུ་རྩལ་དཔྱོད་ཤེས་ཀྱིས་ཚད་ཐིག་ཅིག་བླངས་པ་འདི་ནི། རང་རེར་བུ་སྐྱེས་འགོ་ཞིག་གི་དོན་སྒོར་སྒང་བསང་ཞིག་གི་ཚབ་་ཏུ་ཨ་ཚོགས་མཁས་བཙུན་གྱིས་གནའ་མཁར་ཟི་ལིང་ནས་རང་ཡུལ་བྲག་དཀར་རྫོང་ལ་བསྐྱོད་པའི་ལམ་ཁར་བྲིས།
ཕྱི་ལོ་ 2016 /12 / 30 ཉིན།
