ཧོང་ཀོང་གི་བདག་དབང་ཧོང་ཀོང་མི་མང་ལ་ཡོད།

དེ་རིང་རོའུ་གསར་ཁང་གིས་གནས་ཚུལ་སྤེལ་བ་ལ་ལྟར་ན། ཁ་སང་ཧོང་ཀོང་ནང་ཡོད་པའི་རྒྱ་ནག་འབྲེལ་མཐུད་ལས་ཁུངས་ཀྱིས་ཧོང་ཀོང་གི་རང་དབང་དམངས་གཙོ་དོན་གཉེར་བ་ཚོར་རྒྱ་ནག་སྐམ་ས་ཆེན་མོའི་ཆབ་སྲིད་མགོ་རྟིང་སློག་འཇུག་གི་མིན་ལ་རྒྱལ་ཁབ་གཞན་ལ་ཧོང་ཀོང་གི་ནང་སྲིད་ལ་ཐེ་གཏོགས་ཀྱང་བྱེད་འཇུག་གི་མིན་ཟེར།

རྒྱ་ནག་དབུས་བརྙན་འཕྲིན་ཁང་གི་བཅར་འདྲིའི་སྐབས་སུ། ཀྲང་ཞོ་མིན་ (Zhang Xiaoming) གྱིས། “ཧོང་ཀོང་གི་རང་དབང་དམངས་གཙོ་རྩོད་ལེན་པ་དང་གཞོགས་འབྲེལ་རྒྱལ་ཁབ་ཁག་ལ་ཧོང་ཀོང་གི་གནད་དོན་ལ་བརྟེན་ནས། རྒྱལ་ཁབ་ཀྱི་མངའ་ཁོངས་བདག་དབང་དང་སྲིད་དོན་བདེ་འཇགས་ལ་གཏོར་བརླག་བྱེད་དུ་མི་འཇུག་ལ། དབུས་སྲིད་གཞུང་གི་དབང་འཛིན་དཔོན་རིགས་དང་ཧོང་ཀོང་གི་གཞི་རྩའི་རྩ་ཁྲིམས་བསྒྱུར་བཅོས་རྩོད་གླེང་བྱེད་དུ་མི་འཇུག སྐམ་ས་ཆེན་མོའི་སྤྱི་ཚོགས་ཆབ་སྲིད་བརྟན་ལྷིང་ལ་གཏོར་བཤིག་གཏོང་བའི་ལས་འགུལ་གང་ཡང་སྤེལ་དུ་མི་འཇུག” ཅེས་སོགས་བཤད་འདུག

ཟླ་སྔོན་མར་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་སྤྱི་ཁྱབ་པ་ལུང་ཁྲུན་ཡེན་ (Leung Chun-ying) ལ། “རྒྱ་ནག་དབུས་གཞུང་ནས་ཧོང་ཀོང་གཞུང་གིས་ཀོང་ཧོང་རང་བཙན་དང་འབྲེལ་བའི་ལས་འགུལ་རིགས་འགོག་སྡོམ་བྱེད་བཞིན་པར་མཐའ་གཅིག་ཏུ་རྒྱབ་སྐྱོར་ཡོད།” ཅེས་བཤད་ཡོད་འདུག

གཞན། དེ་རིང་ཀོང་ཧོང་རང་དབང་གསར་ཁང་གིས་སྤེལ་བའི་གནས་ཚུལ་ནང་། ཁ་སང་ཡེ་ཤུ་འཁྲུངས་སྐར་ཉིན། ཧོང་མི་མང་ ༩༡༥༠ ལྷག་ཧོང་ཀོང་གྲོང་ཁྱེར་སྲང་ལམ་དུ་འཛོམས་ཏེ། “ཧོང་ཀོང་རང་བཙན་གྱི་བདག་དབང་ཧོང་ཀོང་མི་མང་ལ་ཡོད། ས་གནས་གྲོས་ཚོགས་ནང་མི་མང་གིས་བདམས་པའི་ཧོང་ཀོང་རང་བཙན་དོན་གཉེར་བའི་འཐུས་མི་འཇོག་དགོས” ཞེས་པའི་འཕྲེད་དར་དང་འབོད་ཚིག་བསྒྲགས་ཏེ། ཧོང་ཀོང་གྲོང་ཁྱེར་སྲང་ལམ་དུ་རྔམ་སྟོན་ཁྲོམ་སྐོར་བྱས་ཡོད་པ་དང་། དེ་ནི་ཉེ་ལམ་ཧོང་ཀོང་གཞུང་གིས་ཧོང་ཀོང་རང་བཙན་དང་དམངས་གཙོ་དོན་གཉེར་བའི་ས་གནས་འཐུས་མི་ ༤ གྲོས་ཚོགས་དམ་འབུལ་གྱི་སྔ་རྗེས་སུ་ཕྱིར་འཕུད་བཏང་བའི་གནད་དོན་དང་འབྲེལ་ཏེ་བྱུང་བ་ཞིག་ཡིན་འདུག

མི་མང་གི་རྔམ་སྟོན་ཁྲོམ་སྐོར་སྐབས། ཧོང་ཀོང་དམངས་གཙོ་དོན་གཉེར་བ་ཧུང་ཀྲི་ཧྥིང་ (Huangzhi Feng) གིས། ཧྥ་རན་སིའི་གསར་ཁང་ (AFP) གི་གསར་འགོད་པར། “ཧོང་ཀོང་སྲིད་གཞུང་གིས་རྒྱ་ནག་གི་ཁྲིམས་ལུགས་གཞིར་བཟུང་སྟེ། ཐབས་བྱུས་སྣ་ཚོགས་འོག་ཧོང་ཀོང་རང་བཙན་དང་དམངས་གཙོ་དོན་གཉེར་བ་ཚོར་ཐུབ་ཚོད་གཏོང་གི་ཡོད་པ་དང་། དབྱིན་ཇི་གཞུང་གིས་ཧོང་ཀོང་གི་བདག་དབང་རྒྱ་ནག་དབུས་གཞུང་ལ་རྩིས་སྤྲད་དེ་མི་ལོ་ ༢༠ འགྲོ་བཞིན་ཡོད་ནའང་། ང་ཚོས་ད་ལྟའི་ཧོང་ཀོང་གི་སྲིད་དོན་གནས་སྟངས་ལ་ལྟ་དུས། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་དེ་ནོར་འཁྲུལ་ཞིག་ཏུ་མཐོང་གི་འདུག” ཅེས་བརྗོད་འདུག

ཧོང་ཀོང་གཞུང་ཞབས་ཟུར་བ་ཕི་གྷེ་ནག་ (Peggy Ng) ཟེར་བ་ཞིག་གིས། ཧོང་ཀོང་ས་གནས་འཐུས་མི་བཞིས་བཟོས་བའི་རྩོད་རྙོག་དེས། ཧོང་ཀོང་གི་འབྱུང་འགྱུར་དང་མི་མང་གི་མངོན་འདོད་བཅས་ལ་སེམས་འཁྲལ་བསླངས་ཡོད་ནའང་ང་ཚོའི་མི་རབས་རྗེས་མ་ཚོས། ད་ལྟའི་ང་ཚོ་ནང་བཞིན་ཧོང་ཀོང་ནང་རང་དབང་ལོངས་སུ་སྤྱོད་ཐུབ་པ་མངོན་གསལ་རེད། ཅེས་བཤད་ཡོད་འདུག

གནས་ཚུལ་ལྟར་ན། ད་ལྟའི་ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་སྤྱི་ཁྱབ་པ་ལུང་ཁྲུན་ཡེན་གྱིས། ཁོའི་ནང་མི་དང་འབྲེལ་བའི་གནད་དོན་འགའ་ཞིག་གི་དབང་གིས་ཁོ་རང་འདི་ལོའི་ཧོང་ཀོང་སྤྱི་ཁྱབ་པ་འདེམས་བསྐོའི་བྱ་འགུལ་ནང་མཉམ་ཞུགས་བྱ་རྒྱུ་མིན་ཚུལ་བརྗོད་ཡོད་འདུག

འཆར་ཟླ་ ༣ པའི་ནང་པེ་ཅིན་ཕྱོགས་གཏོགས་ཀྱི་མི་སྣ་ ༡༢༠༠ གྲུབ་པའི་འོས་བསྡུའི་ཚོགས་ཆུང་བརྒྱུད། ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་སྤྱི་ཁྱབ་པ་འདེམས་བསྐོ་བྱ་རྒྱུ་ཡིན་འདུག

གསར་འགོད་པ། པདྨ་རྒྱལ།